Finisim Fasin Ya Blong Sakem Doti Long Hat Mo Tingting Blong Man

JEOVA i no givim tingting ya blong sakem doti mo mekem ples i stap olbaot, long ol man. Hem i wokem wol ya blong olgeta blong i kam wan klin paradaes we ol samting oli stap long oda, mo oli luk naes. God i no mekem blong i kam wan ples blong doti we i no naes blong luk. No gat.​—Jenesis 2:​8, 9.

Be afta we ol man oli no moa wantem lesin long God, oli stat blong wokem prapa fasin blong wol blong olgeta. From we oli no kasem waes blong God mo oli no gat ekspiryens, oli traehad blong lanem ol samting from ol traem mo ol mastik blong olgeta. Histri i pruvum trutok ya blong Baebol se ol man oli no naf blong rulum olgeta nomo; long plante taosen yia finis “man i rulum ol man blong spolem olgeta nomo.” (Eklesiastis 8:9; Jeremaea 10:23) Tede trabol ya blong sakem doti, long ol defren kaen rod i kamaot from nogud rul blong man.

Gat Tingting Olsem God

Ol man we oli wantem mekem God i glad long olgeta oli traehad blong kasem mak blong klin fasin blong Hemia we i Wokem olgeta. Taswe, ol Wetnes blong Jeova oli fesem wan trabol taem oli makem plan blong holem wan intenasnal asembli long taon ya Prag, Jekoslavakia, long medel blong 1991.a Kolosap 75,000 man we bambae oli kam long asembli ya, wan bigfala hif blong man we Stad long Strahov i save tekem. Be ol man oli no moa yusum stad ya long faef yia finis. Oli no wokemgud bakegen, i no naes blong lukluk from san mo ren i spolem. Kolosap 1,500 Wetnes blong Jeova oli spenem bitim 65,000 haoa blong wokemgud mo pentem stad ya bakegen. Bifo we asembli i stat, wok blong klinim stad i finis, stad i luk naes olsem we i stret blong oli yusum blong mekem wosip long trufala God, Jeova.

?Wanem samting i pusum ol Wetnes blong Jeova blong oli stap defren long ol man blong wol we oli no moa soem fasin tangkyu from ol samting we oli klin mo oli stap long oda? Oli gat fasin tangkyu long advaes ya blong Baebol se ol Kristin oli mas tekemaot ol nogud fasin, olsem fasin blong man i tingbaot hem nomo, fasin blong man i no tingbaot narafala man, fasin blong man i wantem evri samting, mo fasin ya we ol man oli no moa gat lav. Baebol i talem se, “Yufala i tekemaot olfala laef ya blong yufala . . . wetem ol fasin blong hem.” Nao “putum nyufala laef ya blong yufala, . . . nyufala laef ya, God nomo i stampa blong hem. Mo oltaem God i stap mekem laef ya i kam nyufala bakegen, blong yufala i save hem tru, mo blong mekem yufala i kam moa olsem we yufala i pija blong hem.” Man we i laekem ol samting we oli klin, oli stap long oda, mo naes ples, hem i no save gat tingting blong sakem doti olbaot.​—Kolosi 3:​9, 10; 2 Korin 7:1; Filipae 4:8; Taetas 2:14.

Nyufala fasin ya i min se ol Kristin oli mas tingbaot fasin ya blong sakem doti, oli no wantem sakem doti olbaot, oli no wantem brekem ol loa we ol gavman oli putum blong blokem fasin ya blong sakem doti olbaot. Nyufala fasin ya i givhan long ol Kristin blong oli no gat fasin ya blong sakem doti olbaot, tingbaot olgeta nomo, no slak fasin we i stap mekem ol man oli sakem ol doti olbaot. Taem oli tinghae long fasin blong respektem ol samting we narafala man i gat, samting ya i blokem fasin blong raetem ol samting long wol blong ol haos olsem wan rod blong soemaot tingting mo filing blong olgeta, no olsem wan pleplei no wan narakaen fasin blong dro. Hem i min se haos, trak, ol klos, mo bodi blong olgeta i mas stap klin.​—Lukluk Jemes 1:21.

Long saed blong ol man we oli no wantem gat nyufala fasin ya, ?bambae i fol blong God sipos hem i no letem olgeta i stap long Paradaes blong hem we bambae i kam i no longtaem? No gat. Man we i gat fasin blong sakem doti insaed long hat no tingting blong hem yet bambae i spolem paradaes we bambae i kamaot long wol, mo bambae hem i spolem ol man we oli laekem blong kipim paradaes ya. Disisin ya blong God “blong spolem ol man ya we oli stap spolem wol” i stret mo i soemaot lav blong hem.​—Revelesen 11:​18; 21:8.

?Yumi Mas Joen Long Wok Ya?

?Samting ya i min se ol Kristin oli mas joen long ol grup no ol plan blong agensem fasin blong sakem doti olbaot no mekem wok blong klinim?

I klia se fasin ya blong sakem doti olbaot i givim sik mo hem i spolem ol man raonabaot. Jeova i stap tingbaot samting ya, olsem we yumi luk long ol loa we hem i givim long ol man Isrel. (Eksodas 21:​28-34; Dutronome 22:8; 23:​12-14) Be hem i no askem olgeta blong pulum ol narafala man long bisnes ya blong klinim ples; mo tu ol Kristin long faswan handred yia oli no mekem olsem.

Tede, ol bisnes long saed blong klinim ples i save joen long politik. Yes, sam pati blong politik oli stanap blong winim trabol ya nomo long saed blong mekem wol i klin. Wan Kristin i no mas joen nating long bisnes ya blong politik. Jisas i givim wan rul long ol disaepol blong hem, se: “Olsem we mi mi no man blong wol ya, olgeta ya tu oli no man blong wol ya.” Wan Kristin we i no obei long rul ya hem i save joen wetem “ol haeman ya blong wol tu we oli blong lus nomo.”​—Jon 17:16; 1 Korin 2:6.

Jisas i no traem blong winim olgeta trabol ya blong ol man long taem blong hem; mo hem i no talem long ol disaepol blong hem blong oli mekem olsem. Oda we hem i givim long olgeta, i se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta . . . , tijim olgeta blong oli folem olgeta tok ya we mi mi givim finis long yufala.” Hem i no givim oda long olgeta blong oli mekem ol rul long saed blong ol trabol blong klinim wol.​—Matyu 28:​19, 20.

Kraes i eksplenem samting we i mas stap fastaem long laef blong wan Kristin man, hem i se: “Fastaem yufala i mas lukaot gud blong obei long God we i king blong yufala, mo blong mekem ol stret fasin we hem i wantem.” (Matyu 6:33) Taem Jeova i yusum Kingdom blong Mesaea, blong mekem ol stret rul blong hem oli kamaot long olgeta ples long wol, trabol ya we i stap kasem wol bambae i finis blong olwe mo ol man bambae oli haremgud long hem.

Taswe, ol Wetnes blong Jeova oli skelemgud wanem samting oli mas mekem. Long saed blong Rom 13:​1-7, hemia wan rul we olgeta oli mas tingbaot blong obei long ol loa blong gavman long saed blong no sakem doti long wol. Mo tu, fasin blong laekem ol man raonabaot i pusum olgeta blong soemaot respek long ol samting​—we i blong olgeta man no ol samting we wanwan man i gat​—oli no spolem no oli sakem doti olbaot. Be i no wok blong olgeta blong lidim ol man blong klinim ol ples. I stret nomo we oli putum wok blong talemaot mesej blong Kingdom blong God fastaem. Oli luksave se hemia nomo i save mekem i gud long ol man blong olwe.

Wok Blong Klinim Ples Long Saed Blong Speret

Oltaem God i givim woning long ol man Isrel bifo long trabol we oli save kasem sipos oli mekem wol i doti wetem fasin blong kilim man i ded, gat ol rabis fasin blong seks, mo no gat respek long ol tabu samting. (Namba 35:33; Jeremaea 3:​1, 2; Malakae 1:​7, 8) I gud blong makem se God i jajem olgeta from we oli kam doti long saed blong speret, i no from we oli sakem doti olbaot long wol, nating se maet oli bin mekem samting ya tu.b

Taswe, tede wan Kristin i traehad moa blong no kam doti long saed blong speret no mekem ol rabis fasin. Hem i mekem olsem taem hem i “putum nyufala fasin blong laef,” we i save tekemaot ol doti fasin long hat mo tingting blong hem. Bitim fo milyan Wetnes blong Jeova oli stap haremgud long wok blong kam klin long saed blong speret, oli kasem ol mak ya blong klin fasin long saed blong wosip mo long ol fasin blong olgeta, mo tu long saed blong bodi.​—Efesas 4:​22-24.

Tede i taem blong mekem wok blong klinim doti long saed blong speret. Prapa wok blong klinim ples long wol ya bambae i kamaot long stret taem blong hem mo bambae hem i mekem se wol blong yumi i no save kam ples blong sakem doti taem yumi no moa sakem doti long hem olsem we God i wantem.​—Eklesiastis 3:1.

[Ol futnot]