Traem Faenem Ol Trufala Profet Tok
“MAN we i saeve talemaot ol samting tri dei bifo we oli kamtru hem i save kam rij long plante taosen yia.” Hemia wan proveb blong ol man Jaena.
Ol man oli wantem save se fyuja bambae i olsem wanem, mo plante man bambae oli glad nomo blong pem plante mane blong kasem trufala save blong fyuja olsem. Oli traem faenem ol toktok blong fyuja we oli save kamtru. Olsem yumi luk long fasin blong talemaot fyuja blong weta mo long bisnes, yumi intres long ol samting we oli stap long fyuja. Mo tu, trufala save long fyuja i save givhan long yumi blong mekem plan mo mekem sam jenis long laef blong yumi.
Tingting blong wantem save wanem bambae i kamaot long fyuja i pusum plante man blong oli go luk ol man blong talem fyuja, ol pasta, ol man blong lukluk sta, mo ol kleva. Ol stoa blong ol buk mo ol magasin oli fulap wetem ol olfala mo ol nyufala buk blong ol man we oli stap talem se, oli man blong talemaot fyuja. Be ol man oli no bilif tumas long ol toktok ya blong talemaot fyuja. Cato, haeman ya blong Rom i talem olsem se: “Mi sapraes se wan man blong talemaot fyuja i no laf taem hem i luk wan narafala man blong talemaot fyuja.”
Yes, i gat plante fasin blong talemaot fyuja. Long 1972 wan bigfala grup blong ol man blong hae save mo ol bisnes man we oli kolem olgeta se ‘Club of Rome’ (Klab blong Rom), oli talemaot long wan stadi blong fyuja se i no longtaem, wol bambae i no moa gat ol samting we oli stap tekem aninit long graon. Bambae gol i finis long 1981, mekuri i finis long 1985, sink i finis long 1990, bensin i finis long 1992, mo ol narafala samting olsem. Naoia yumi luk se ol tok ya oli no kamtru.
Plante toktok long saed blong fyuja oli stanap long tingting blong skul. Eksampel: Sakson bisop Wulfstan i bilif se faet ya we Denmak i mekem long Engglan i no longtaem afta long yia 1000 K.T., hem i wan saen blong soem se en blong wol i kolosap. Long 1525, Thomas Münzer i lidim ol puaman long Jemani blong oli faet agensem gavman, from we long wan vison we hem i luk, ol enjel oli stap sapenem huknaef blong olgeta, ale hem i ting se hemia i wan bigfala taem blong karem kakae long garen. I klia se ol toktok ya blong fyuja oli no stret.
Maet yu save finis, Baebol i tokbaot sam samting we oli save kamtru long fyuja. Mo tu, ol man blong raetem Baebol oli talem se God nao i givim ol toktok ya long olgeta. Kristin aposol Pita i talem se: “Wok blong talemaot mining blong tok blong ol profet we i stap long Baebol, hem i no wan wok we man i save mekem, hem wan. ?From wanem? From we i no gat tok blong profet we i kamaot from we man nomo i wantem olsem. Taem tok blong profet i kamaot, ol profet oli talem, be Tabu Speret i stap givim tok long olgeta, nao oli talemaot tok we i kamaot long God.”—2 Pita 1:20, 21.
Antap long ol narafala samting Baebol i bin talemaot ol defren samting we bambae oli kamtru blong makem laen ya we bambae oli laef long taem ya we Jisas Kraes i stap finis long paoa blong Kingdom long heven. Naoia bitim bifo, ol faet, kakae i sot, graon i seksek, ol rabis fasin bambae oli olsem saen blong “Lasdei” we Baebol i stap tokbaot. (2 Timote 3:1-5; Matyu 24:3-14, 34) Long saed blong Baebol, en blong ol rabis fasin blong naoia bambae i openem rod long glad taem blong ol man long nyufala wol we i gat ol blesing blong olwe.—2 Pita 3:13; Revelesen 21:1-4.
?Wanem tingting blong yu long ol profet tok ya blong Baebol? ?Ol profet tok ya oli gyaman nomo, olsem plante narafala toktok long saed blong fyuja? Yumi save jekem blong luk sipos yumi save trastem ol profet tok blong Baebol we oli no kamtru yet, sipos yumi faenem se ol profet tok long saed blong ol samting we oli bin kamaot finis oli tru. Long nekis haf, bambae yumi lukluk sam long olgeta.
[Foto Credit Line Blong Pija Long Pej 3]
Courtesy National Weather Service