STORI BLONG FRAN PEJ | ?HU I SAVE TALEMAOT FIUJA?
Plante Samting We Ol Man Oli Talem Oli No Kamtru
?Yu yu wantem save se fiuja blong yu i olsem wanem? Hemia wan samting we plante man oli wantem save. I gat plante man we oli stap talemaot ol samting we bambae oli kamtru long ol defdefren rod. Yu traem tingbaot ol samting we ol man oli talem:
OL SAENTIS oli yusum plante mane mo ol niufala tul, blong talemaot sipos ol doti we ol man oli sakem long win, bambae i spolem wol no nogat. Mo tu, blong oli talemaot sipos tumora bambae i ren no nogat.
OL MAN BLONG STADI oli talem se ol samting long bisnes mo politik oli stap jenis bigwan. Warren Buffett, hem i wan man we i win gud long bisnes, hem i naf blong talemaot stret samting we i kamaot long ol bisnes taswe, ol man oli stap singaot hem se profet. Nate Silver, hem i stap stadi long ol ripot, blong hem i save talemaot se politik blong Amerika bambae i olsem wanem, mo hu man we bambae i winim praes long Hollywood.
OL SAMTING BLONG BIFO oli olsem ol profet tok. Sam man oli luk se ol tok blong wan buk we Michel de Notredame (Nostradamus) i raetem long ol yia 1500, oli stap kamtru tede. Sam man we oli ridim kalenda blong ol man Maya, oli luk se kalenda ya i finis long 21 Disemba 2012. Taswe oli talem se bambae i gat wan bigfala trabol i spolem gud fulwol long taem ya.
OL LIDA BLONG SKUL samtaem oli stap talemaot ol nogud samting we oli ting se bambae i kasem ol man long olgeta ples long wol, mo oli mekem se ol man oli stap hivap wanples long ol grup. Wan man we nem blong hem Harold Camping mo ol man blong hem, oli talemaot se en blong wol bambae i kamtru long yia 2011. Be tede wol i stap yet.
OL MAN BLONG TALEMAOT FIUJA oli ting se oli gat wan spesel save. Edgar Cayce mo Jeane Dixon tufala i talemaot sam samting we oli kamtru long ol yia 1900. Be tufala i talem plante samting we oli no kamtru. Wan eksampol. Dixon i talem se long yia 1958, bambae i gat Wol Wo Tri, mo Cayce i talemaot se New York bambae i draon long solwota long medel blong yia 1970.
?Olsem wanem? ?I gat wan rod blong yumi save samting we bambae i kamtru long fiuja? Hemia wan impoten kwestin we i gud yumi save ansa blong hem. Sipos yu naf blong save samting we bambae i kamtru long fiuja, ating bambae yu lukluk gud long laef blong yu, mo long ol desisen we yu stap mekem.