“?Talem Long Mifala, Wetaem Ol Samting Ya Bambae Oli Kamtru?”
“Mi mi stap talemaot ol nyufala samting. Bifo oli stat blong kamaot, mi mekem yufala i harem.”—AESEA 42:9.
1, 2. (a) ?Ol aposol blong Jisas oli askem wanem long saed blong fyuja? (b) ?Olsem wanem ansa blong Jisas long saed blong wan saen we i gat plante haf blong hem i bin kamtru?
TIJING blong God i kamaot long Jeova God, “Hem ya we i stap talemaot en blong wan bisnes taem i stat nomo.” (Aesea 46:10) Olsem faswan atikol i bin soemaot, ol aposol oli wantem kasem tijing olsem long Jisas, oli askem long hem se: “Plis yu talemaot long mifala. ?Bambae ol samting ya oli kamtru wetaem? ?Mo wanem saen we bambae i soemaot we i stret taem blong ol samting ya?”—Mak 13:4.
2 Long ansa blong hem, Jisas i talem wan “saen” we i gat defren haf long hem we i soemaot pruf se fasin blong laef blong ol man Jyu bifo bambae i finis i no longtaem. Samting ya i kamtru taem oli spolem Jerusalem long yia 70 K.T. Be profet tok blong Jisas bambae i kamtru plante yia biaen long fasin we i bigwan moa. Afta we “taem blong ol hiten man” i finis long 1914, wan saen bambae i kamaot long wan bigfala fasin, blong soemaot se i no longtaem nogud fasin blong wol blong naoia bambae i finis long wan “bigfala trabol.”a (Luk 21:24) Plante milyan man we oli stap laef tede oli save talem stret se saen ya i bin kamtru long ol bigfala faet long wol mo ol narafala impoten samting we oli bin hapen long ol yia biaen long 19 handred. Ol samting ya oli makem tu, taem ya we profet tok blong Jisas i kamtru long fasin we i bigfala moa, mo samting we i bin hapen long yia 33 kasem 70 K.T. i olsem wan pija blong ol samting we oli kamtru long taem blong yumi.
3. Taem hem i tokbaot wan narafala saen, ?Jisas i talem wanem samting bakegen we bambae i kamaot?
3 Afta we Luk i tokbaot taem blong ol hiten man, ol store we oli laenap long Matyu, Mak, mo Luk, oli soemaot sam samting bakegen we bam bae oli mas kamaot, mo insaed long ol samting ya wan saen antap long ‘saen we i gat plante haf long hem blong soemaot en blong fasin blong wol blong naoia.’ (Matyu 24:3) (Long pej 15, oli makem poen ya wetem tu laen.) Matyu i talem se: “Ale nao, taem trabol ya bambae i finis, wantaem nomo san bambae i kam tudak, mo mun bambae i no moa saen. Ol sta long skae bambae oli folfoldaon, mo ol strostrong samting blong skae, bambae God i muvum olgeta. Biaen, saen blong mi, mo Pikinini blong Man, bambae i kamaot long skae. Nao biaen olgeta laen blong ol man blong wol bambae oli krae, nao bambae oli save luk mi, mi Pikinini blong Man, mi kamaot long klaod blong skae, wetem olgeta paoa we mi mi gat, mo long bigfala laet we bambae i saenaot raonabaot long mi. Nao wantaem nomo, pupu bambae i krae, mo mi bambae mi sanem ol enjel blong mi oli tekem ol man we mi mi jusumaot olgeta finis, oli kam wanples. Bambae ol enjel ya oli mas go long ol fo kona blong wol, mo long olgeta ples long heven blong tekem olgeta oli kam.”—Matyu 24:29-31.
Trabol Mo Ol Samting Blong Sapraes We Oli Kamaot Long Skae
4. ?Wanem ol kwestin we oli stanap long saed blong ol samting blong sapraes long skae we Jisas i tokbaot?
4 ?Wetaem bambae samting ya i kamtru? Ol store blong trifala Gospel evriwan oli talemaot wanem we yumi save kolem se ol samting blong sapraes we oli kamaot long skae—san mo mun oli kam tudak mo ol sta oli folfoldaon. Jisas i talem se ol samting ya bambae i kamaot afta “trabol ya.” ?Jisas i stap tingbaot trabol we i kamaot long yia 70 K.T., no hem i stap tokbaot wan bigfala trabol we i stap long fyuja long taem blong yumi? —Matyu 24:29; Mak 13:24.
5. ?Wanem tingting i bin stap long saed blong trabol long taem blong yumi?
5 Stat long taem we taem blong ol hiten man i finis long 1914, ol man blong God oli intres bigwan long “bigfala trabol.” (Revelesen 7:14) Long plante yia oli bin ting se bigfala trabol long taem blong yumi i gat fashaf blong hem long taem blong Faswan Bigfala Faet Blong Wol, nao afta we sam taem i pas, i gat laswan haf blong hem, hemia “faet long bigfala dei blong God ya we i gat olgeta paoa.” Sipos i olsemia, ?bambae wanem i kamaot long plante yia we i stap long medel blong taem ya go kasem ‘en blong fasin blong wol blong naoia’?—Revelesen 16:14; Matyu 13:39; 24:3; 28:20.
6. ?Wanem samting we oli bin ting se i fulumap profet tok blong Jisas long saed blong ol samting blong sapraes we oli kamaot long skae?
6 I tru, oli bin tingbaot se long taem ya we i pas bambae yumi luk ol defren haf blong saen ya, we i minim tu wok blong talemaot gud nyus we ol man blong God we hem i hivimap olgeta bambae oli mekem. I luk olsem se ol samting blong sapraes we bambae oli kamaot long skae bambae oli save kamaot long taem ya tu long ol yia afta we faswan haf i kamtru long 1914-1918. (Matyu 24:29; Mak 13:24, 25; Luk 21:25) Oli putum tingting blong olgeta i stap long ol samting long heven we man i save luk, spes sip,b ol roket, hot blong san we i stap spolem ol man, fasin blong go long mun mo putumap ol stesen longwe.
7. ?Wanem nyufala mining we yumi kasem long saed blong bigfala trabol?
7 Be, The Watchtower blong Janewari 15, 1970, i skelem bakegen profet tok blong Jisas, antap moa bigfala trabol we i stap kam. Hem i soemaot se folem wanem we i bin hapen long faswan handred yia, bigfala trabol blong tede i no save gat faswan haf blong hem long 1914-1918, ale plante yia i pas, mo afta i stat bakegen. Magasin ya i talem se: “‘Bigfala trabol’ we neva bambae i kamaot bakegen samtaem i stap yet long fyuja, from hem i minim taem ya we olgeta gyaman skul (Krisendom tu) bambae oli lus mo biaen ‘bigfala faet long dei blong God we i gat olgeta paoa’ long Amageden bambae i kamaot.”
8. Wetem nyufala tingting long saed blong bigfala trabol long taem blong yumi, ?olsem wanem oli bin eksplenem mining blong Matyu 24:29?
8 Be Matyu 24:29 i talem se ol samting blong sapraes we oli kamaot long skae bambae oli kam ‘wantaem nomo taem trabol ya bambae i finis.’ ?Olsem wanem samting ya i save kamaot olsem? The Watchtower blong Mei 1, 1975, i talem se long ples ya “trabol ya” i save minim hemia we i kamaot long yia 70 K.T. Be, ?olsem wanem nao yumi save talem se ol samting blong sapraes we oli kamaot long skae long taem blong yumi oli bin kamaot “wantaem nomo” afta samting we i hapen long yia 70 K.T.? Oli bin eksplenem se long lukluk blong God ol handred yia we oli stap bitwin bambae oli sot nomo. (Rom 16:20; 2 Pita 3:8) Be, taem yumi lukluk dip moa long profet tok ya, speseli long Matyu 24:29-31, yumi luk se i givim wan mining we i defren. Samting ya i soem olsem wanem laet i saen ‘i kam klia moa kam kasem we i delaet fulwan.’ (Proveb 4:18, American Standard Version)c Yumi luk nao from wanem wan nyufala, no defren, mining i stret nomo.
9. ?Olsem wanem Hibru haf blong Baebol i givim sam save blong eksplenem tok blong Jisas long saed blong ol samting we oli kamaot long heven?
9 Jisas i bin talem profet tok ya long saed blong ‘san bambae i kam tudak, mo mun bambae i no moa saen, ol sta long skae bambae oli folfoldaon,’ long fo long ol aposol blong hem. From oli man Jyu, bambae oli haremsave tok ya long Baebol blong olgeta, wan eksampel long Sefanaea 1:15, we i talem se taem blong jajmen blong God i “wan dei blong bigfala win mo dei blong spolem olgeta samting, wan dei blong tudak mo ples i no klia, wan dei blong ol klaod mo ol bigfala smok.” Ol defren Hibru profet oli talem tu se san i kam dak, mun i no moa saen, mo ol sta oli no moa saen. Bambae yu save faenem ol tok olsem long mesej blong God agensem Babilon, Edom, Ijip, mo Kingdom blong Isrel we i stap long not.—Aesea 13:9, 10; 34:4, 5; Jeremaea 4:28; Esikel 32:2, 6-8; Emos 5:20; 8:2, 9.
10, 11. (a) ?Joel i talem wanem profet tok long saed blong ol samting long heven? (b) ?Wanem ol haf blong profet tok blong Joel we oli kamtru long yia 33 K.T., mo wanem ol haf nao i no kamtru?
10 Taem oli harem wanem Jisas i talem, ating Pita mo ol trifala narafala aposol oli tingbaot profet tok blong Joel we i stap long Joel 2:28-31 mo 3:15: “Bambae mi mi kafsaedem speret blong mi long olkaen man, mo ol boe mo gel blong yufala bambae oli talemaot profet tok. . . . Bambae mi mi givim ol saen long skae mo long wol ya, bambae i gat blad mo faea mo bigfala smok we i go antap. San bambae i kam tudak, mo mun bambae i kam olsem blad, bifo we bigfala dei blong Jeova i kam, we i mekem ol man oli fraet.” “San mo mun tufala bambae i kam tudak. Mo ol sta bambae oli no moa saen.”
11 Olsem Ol Wok 2:1-4 mo 14-21 i talem, long Pentekos blong 33 K.T., God i kafsaedem tabu speret blong hem long 120 disaepol, ol man mo ol woman. Aposol Pita i talemaot se hemia nao wanem Joel i bin talem bifo. Be, ?olsem wanem long ol tok blong Joel long saed blong ‘san mo mun tufala bambae i kam tudak mo ol sta bambae oli no moa saen’? I no gat samting i soemaot se samting ya i bin kamtru long yia 33 K.T. no insaed long bitim 30 yia ya we i makem en blong taem blong ol man Jyu bifo.
12, 13. ?Ol samting blong sapraes we oli kamaot long skae we Joel i tokbaot oli kamtru olsem wanem?
12 I klia se las haf blong profet tok blong Joel i joen moa long taem ya we ‘bigfala dei blong Jeova i kam, we i mekem ol man oli fraet’—taem Jerusalem i lus. The Watchtower blong Novemba 15, 1966, i tokbaot trabol we i kasem Jerusalem long yia 70 K.T. i se: “Hem i rili ‘dei blong Jeova’ long Jerusalem mo ol pikinini blong hem. Mo i bin gat plante ‘blad mo faea mo smok’ we i bin joen wetem dei ya olsem taem we, san i no moa saen from bigfala blak klaod we i kavremap taon long dei, mo mun i mekem man i tingbaot blad we i ron, i no moa givim gudfala laet long naet we i mekem tingting blong man i stap kwaet.”d
13 Yes, sem mak long ol narafala profet tok we yumi bin luk, ol samting blong sapraes we oli kamaot long skae we Joel i bin tokbaot bambae oli kamtru taem Jeova i mekem jajmen blong hem i kamaot. San mo mun oli kam tudak, mo ol sta oli no moa saen taem ol ami blong spolem ol samting oli kam agens long Jerusalem, samting ya i no kavremap longfala taem ya we i makem en blong fasin blong laef blong ol man Jyu bifo. I stret we yumi ting se bambae yumi save luk haf ya blong profet tok blong Joel i kamtru long wan fasin we i bigwan moa taem God i stat spolem fasin ya blong wol blong naoia.
?Wanem Trabol Bambae i Kamaot Bifo Ol Samting Blong Sapraes Long Skae?
14, 15. ?Olsem wanem profet tok blong Joel i givhan long yumi blong kasem save long Matyu 24:29?
14 Profet tok blong Joel we i kamtru (we i laenap wetem ol nara profet tok we oli yusum semfala toktok) i givhan long yumi blong kasem save long ol tok blong Matyu 24:29. I klia se, wanem we Jisas i talem long saed blong ‘san bambae i kam tudak, mo mun bambae i no moa saen, mo ol sta long skae bambae oli foldaon,’ i no tokbaot ol samting we oli hapen insaed long olgeta yia we oli mekemap en blong fasin blong wol naoia, olsem ol roket long skae, fasin blong go long mun, mo ol samting olsem. No gat, hem i poen i go long ol samting we bambae oli joen wetem ‘bigfala dei blong Jeova we bambae i mekem ol man oli fraet,’ trabol blong spolem plante samting we bambae i kam yet.
15 Samting ya i givhan long yumi blong kasem save nao olsem wanem ol samting blong sapraes we bambae oli kamaot long skae bambae oli hapen “wantaem nomo, taem trabol ya bambae i finis.” Jisas i no stap tokbaot trabol we i kamaot long yia 70 K.T. Be, hem i stap poen i go long stat blong bigfala trabol we bambae i spolem fasin blong wol ya long fyuja, blong makem en blong ‘taem we hem i stap’ we hem i mekem promes long hem. (Matyu 24:3) Bigfala trabol ya i stap yet long fyuja blong yumi.
16. ?Mak 13:24 i stap poen i go long wanem trabol, mo from wanem?
16 ?Olsem wanem long ol tok blong Mak 13:24 (NW): ‘Long ol dei ya, afta trabol ya, san bambae i kam tudak, mo mun bambae i no moa saen’? Long ples ya tufala tok ya ‘ya’ mo ‘ya’ bakegen oli kamaot long Grik tok ya e·keiʹnos, wan tok we i soemaot wan samting we i stap longwe long saed blong taem. Oli save yusum e·keiʹnos blong makem samting we i hapen longtaem finis (no we oli tokbaot finis) no samting we i stap longwe long fyuja. (Matyu 3:1; 7:22; 10:19; 24:38; Mak 13:11, 17, 32; 14:25; Luk 10:12; 2 Tesalonaeka 1:10) Olsem nao, Mak 13:24 i stap poen i go long “trabol ya,” i no trabol we ol man Rom oli mekem, be bigfala wok blong Jeova long en blong fasin ya blong wol naoia.
17, 18. ?Revelesen i givim wanem save blong mekem yumi luksave moa olsem wanem bigfala trabol bambae i kamaot?
17 Japta 17 kasem 19 blong Revelesen i laenap long samting ya mo i pruvum nyufala mining ya blong Matyu 24:29-31, Mak 13:24-27, mo Luk 21:25-28. ?Long wanem rod? Ol Gospel oli soemaot se trabol ya bambae i no stat mo finis wantaem nomo. Afta we bigfala trabol bambae i stat, sam long ol man we oli no obei bambae oli stap laef yet blong luk ‘saen blong Pikinini blong Man’ mo blong mekem wan samting from—blong sore, mo olsem we Luk 21:26 i talem, “bambae ol man oli ded from fraet, mo from we oli stap harem nogud long ol samting we bambae oli save kam kasem wol ya.” Fasin ya we oli fraet bitim mak bambae i kamaot from we oli luk “saen” we i soemaot se bambae oli lus i no longtaem.
18 Store blong Revelesen i soemaot se bigfala trabol long fyuja bambae i stat taem “ol hon” we oli rere blong faet, blong “wael anamol” we i stap joen wetem olgeta kantri blong wol, bambae oli agensem “woman blong rod,” Bigfala Babilon.e (Revelesen 17:1, 10-16) Be plante man bambae oli stap yet, from we ol king, ol bisnesman, ol kapten blong sip, mo sam narafala bambae oli krae from ol gyaman skul oli lus olgeta. Tru ya, bambae plante man oli luksave se jajmen blong olgeta nao bambae i kam biaen.—Revelesen 18:9-19.
?Wanem Bambae i Kam?
19. ?Yumi save tingbaot blong luk wanem taem bigfala trabol i stat?
19 Ol haf blong Gospel blong Matyu, Mak, mo Luk oli joen wetem Revelesen japta 17 kasem 19 blong givim plante moa laet lelebet long wanem we bambae i kamaot i no longtaem. Long stret taem we God i makemaot finis, bigfala trabol bambae i stat wetem fasin blong agensem kampani blong ol gyaman skul long olgeta ples long wol (Bigfala Babilon). Bambae samting ya i strong moa agensem Krisendom, we Jerusalem we i no stap tru long God i pija blong hem. ‘Wantaem nomo afta’ long haf ya blong bigfala trabol, “bambae i gat saen long san, mo long mun, mo ol sta. Mo long wol ya, ol man blong plante kantri bambae oli harem nogud [bitim ol taem bifo].” —Matyu 24:29; Luk 21:25.
20. ?Wanem samting blong sapraes long skae we yumi save tingbaot blong luk?
20 ?Long wanem rod nao bambae ‘san bambae i kam tudak mo mun bambae i no moa saen, ol sta long skae bambae oli folfoldaon, mo ol strostrong samting blong skae God bambae i muvum olgeta?’ Sua se, long stat blong bigfala trabol, plante laet—hemia ol impoten lida blong ol gyaman skul long wol—bambae ol ten hon we Revelesen 17:16 i tokbaot oli mekem fasin blong ol lida ya i kam long klia ples mo bambae oli finisim olgeta. Tru ya, bambae samting ya i mufmuvum ol politik paoa tu. ?Bambae i gat ol samting blong fraet we oli kamaot long trufala heven tu? Ating bambae i gat, mo bambae oli mekem ol man oli fraet moa bitim olgeta we Josephus i tokbaot se oli bin kamaot kolosap long en blong taem blong ol man Jyu bifo. Yumi save se long taem bifo, God i bin soemaot paoa blong hem blong mekem ol bigbigfala samting blong sapraes olsem oli kamaot, mo hem i save mekem bakegen.—Eksodas 10:21-23; Josua 10:12-14; Jajes 5:20; Luk 23:44, 45.
21. ?Olsem wanem wan “saen” bambae i kamaot long fyuja?
21 Long ples ya ol trifala man we oli raetem Gospel oli yusum toʹte (biaen) blong talem wanem we bambae i kamaot biaen. “Nao biaen saen blong mi, mi Pikinini blong Man, bambae i kamaot long skae.” (Matyu 24:30; Mak 13:26; Luk 21:27) Stat long Faswan Bigfala Faet Blong Wol, ol trufala disaepol blong Jisas oli bin luksave ol saen blong makem taem we Jisas i stap we man i no save luk hem, be bighaf blong ol man oli no bin luksave. Be Matyu 24:30 i poen i go fored long wan moa “saen” we bambae i kamaot long fyuja, hemia “saen” blong “Pikinini blong Man,” mo bambae i fosem ol nesen blong oli luksave. Taem Jisas i kam long ol klaod we man i no save luk hem, ol man blong wol we oli gat fasin agens, bambae oli mas luksave ‘we hem i kam’ (Grik, er·khoʹme·non) from samting we bambae hem i mekem, we i bitim paoa blong ol man, blong soemaot bigfala paoa blong hem olsem king.—Revelesen 1:7.
22. Taem ol man oli luk “saen” we Matyu 24:30 i tokbaot, ?bambae samting ya i mekem wanem long olgeta?
22 Matyu 24:30 i yusum tok ya toʹte bakegen blong talem wanem we bambae i kam biaen. Long taem ya ol nesen, from oli haremsave bigfala samting we bambae i kasem olgeta, bambae oli stap kilkilim bodi blong olgeta mo oli krae, maet oli luksave se taem blong oli lus i kolosap nomo. !I defren tumas long ol man blong wok blong God, from we bambae yumi save leftemap hed blong yumi, yumi save se bambae yumi sef i no longtaem! (Luk 21:28) Revelesen 19:1-6 i soem tu ol trufala man blong wosip long heven mo wol we oli glad from woman blong rod i lus olgeta.
23. (a) ?Wanem wok Jisas bambae i mekem long olgeta we God jusum olgeta finis? (b) ?Yumi save talem wanem long saed blong fasin blong tekem smol haf blong smol kampani we i stap yet long wol oli go long heven?
23 Profet tok blong Jisas i gohed blong talem, long Mak 13:27 se: “Nao biaen [toʹte] long taem ya, bambae mi sanemaot ol enjel blong oli go tekem ol man ya we mi mi jusumaot olgeta finis oli kam wanples. Bambae ol enjel ya oli mas go long ol fo kona blong wol, mo long olgeta ples blong wol mo heven, blong tekem olgeta oli kam.” Long ples ya Jisas i tokbaot haf blong 144,000 ‘we oli jusumaot olgeta’ we oli stap laef yet long wol. Long stat blong en blong fasin ya blong wol naoia, ol disaepol ya blong Jisas we tabu speret i makemaot olgeta oli kam wanples long wan tiokratik fasin. Be, folem oda we oli yusum, Mak 13:27 mo Matyu 24:31 i tokbaot wan narafala samting bakegen. “Wetem bigfala krae blong pupu,” bambae oli hivimap ‘olgeta we oli jusumaot olgeta’ we oli stap yet long olgeta ples long wol. ?Bambae oli hivimap olgeta olsem wanem? Sua, bambae Jeova i putum ‘mak blong hem’ long olgeta mo soemaot olgeta olsem haf blong ‘olgeta we hem singaot olgeta, jusum olgeta mo oli holem strong oltaem.’ Mo long stret taem we God i makemaot finis, bambae oli go antap long heven mo joen wanples blong kam ol king mo pris.f Samting ya bambae i mekem olgeta oli glad mo ol fren blong olgeta we oli stap holemstrong bambae oli glad tu, hemia “bigfala kampani,” we olgeta tu bambae oli gat mak we i soem se bambae oli ‘pastru long bigfala trabol’ blong haremgud long ol blesing long wan paradaes long wol.—Matyu 24:22; Revelesen 7:3, 4, 9-17; 17:14; 20:6; Esikel 9:4, 6.
24. ?Matyu 24:29-31 i soemaot wanem we bambae oli kamaot wan biaen long narawan long fyuja?
24 Taem ol aposol oli talem se, “Talem long mifala . . . ,” ansa blong Jisas i kavremap plante samting bitim we oli save kasem save long hem. Be, long laef blong olgeta oli glad blong luk olsem wanem profet tok blong Jisas i kamtru long faswan mining blong hem. Stadi blong yumi long ansa we Jisas i givim i bin tokbaot moa haf blong profet tok blong hem we bambae i kamtru i no longtaem long fyuja. (Matyu 24:29-31; Mak 13:24-27; Luk 21:25-28) Yumi save luk finis we taem blong yumi kasem sef i stap kolosap nomo. Yumi save tingbaot se bambae yumi luk stat blong bigfala trabol, nao biaen saen blong Pikinini blong Man, mo biaen God bambae i hivimap olgeta we hem i jusumaot olgeta finis. Laswan, se man blong mekem wok blong Jeova blong kilimdaon ol man long Amageden, Soldia-King blong yumi, Jisas we i sidaon finis long jea blong King, bambae i go “blong finisim faet blong hem.” (Revelesen 6:2) Long dei ya blong Jeova, taem bambae hem i givimbak panis long ol man nogud, bambae i kam olsem bigfala en blong fasin blong wol naoia we i makem dei blong Masta Jisas stat long 1914 i kam.
25. ?Olsem wanem yumi save mekem Luk 21:28 i kamtru long fyuja?
25 I gud yu gohed blong givhan long yuwan wetem tijing blong God, blong bambae yu save ansa long ol tok ya blong Jisas we bambae i kamtru yet long fyuja: “Nao taem ol samting ya oli stat kamtru, yufala i save stanap stret, yufala i save leftemap hed blong yufala, from we yufala i save, se bambae i no longtaem, mi mi mekem yufala i fri olgeta.” (Luk 21:28) !I gat wan nambawan fyuja i stap fored long olgeta we God i jusumaot olgeta finis mo bigfala kampani, taem bambae Jeova i stap gohed blong leftemap tabu nem blong hem!
[Ol futnot]
a Ol Wetnes blong Jeova oli glad blong givim pruf long samting ya, taem oli soemaot olsem wanem ol samting we yumi save luk tede oli mekem profet tok blong Baebol i kamtru.
b Ol samting we oli sutum i go long skae blong stadi long ol sta mo planet.
c Yu save luk sam narafala samting long pej 296-323 long buk ya God’s Kingdom of a Thousand Years Has Approached, we Watchtower Bible and Tract Society of New York, Inc., i prentem long 1973 mo long The Watchtower blong Septemba 15, 1982, pej 17-22 (Engglis).
d Josephus i tokbaot ol samting we oli kamaot long taem ya we i stap bitwin faswan taem we ol man Rom oli agensem Jerusalem (66 K.T.) mo taem ya we hem i lus: “Long naet wan bigfala win we i spolem plante samting i blou; wan strong hariken i kilim ples ya, ren i foldaon bigwan, laetning i gohed nomo blong laet, bigfala tanda we i faerap i mekem man i fraet, graon i seksek we i mekem bigfala noes. I klia se samting ya we i brekemdaon ful plan blong laef blong olgeta i pija blong bigfala trabol we ol laen blong man bambae oli kasem, mo i no gat man i save talem se samting ya we i bin hapen i no stap poen i go long wan bigfala trabol we neva man i luk olsem bifo.”
e Samting we Jisas i bin tokbaot olsem “bigfala trabol” mo “trabol ya” i kamaot fastaem taem fasin blong laef blong ol man Jyu bifo i finis. Be long ol vas we oli laenap long taem blong yumi nomo, hem yusum wod ya “wan,” hem i talem se “wan trabol.” (NW) (Matyu 24:21, 29; Mak 13:19, 24) Revelesen 7:14 i givim nem long samting ya we bambae i kamaot long fyuja se, “bigfala trabol,” we stret mining blong hem se, “wan trabol wan bigwan.”
f Lukluk “Wan Kwestin” long The Watchtower blong Ogis 15, 1990 (Engglis mo Franis).
?Yu Yu Rimemba?
◻ ?Olsem wanem sam haf blong Joel 2:28-31 mo 3:15 oli bin kamtru long faswan handred yia?
11?Wanem trabol nao Matyu 24:29 i stap tokbaot, mo from wanem yumi talem olsem?
◻ ?Wanem ol saen blong sapraes long skae we Matyu 24:29 i stap poen i go long hem, mo olsem wanem samting ya i save kamaot wantaem nomo afta trabol?
◻ ?Bambae Luk 21:26, 28 i kamtru olsem wanem long fyuja?
[Tok blong pija long pej 16, 17]
Ples blong tempel
[Credit Line]
Pictorial Archive (Near Eastern History) Est.