Wok We Man i Mas Mekem Taem Hem i Kasem Save Long Trufala Skul
“Man we i harem tok blong God mo i obei long hem, hem i save haremgud moa.”—LUK 11:28.
1. ?Ol wanem kaen man oli mekem trufala skul i impoten samting long laef blong olgeta, taem oli luksave hem?
I IMPOTEN blong luksave trufala skul, be i no hemia nomo. Sipos yumi man blong laekem stret fasin mo trutok, taem yumi faenem trufala skul, bambae yumi mekem evri haf long laef blong yumi i joen wetem skul ya. Trufala skul i no wan bigfala save nomo long tingting; hem i wan fasin blong laef.—Ol Sam 119:105; Aesea 2:3; lukluk Ol Wok 9:2.
2, 3. (a) ?Olsem wanem Jisas i soemaot se i impoten tumas blong mekem wil blong God? (b) ?Evriwan we oli kasem save long trufala skul, oli gat wanem responsabiliti?
2 Jisas Kraes i makemgud from wanem i impoten tumas blong mekem samting we God i soem se hemia nao wil blong Hem. Blong finisim toktok ya we naoia yumi kolem Bigfala Toktok antap long Hil, Jisas i talem se i no olgeta man evriwan we oli stap singaot hem se Masta (olgeta we oli stap talem se oli Kristin) we bambae oli go insaed long Kingdom; olgeta ya nomo we oli stap mekem wil blong Papa blong hem, bambae oli go insaed. Jisas i talem se, ol narafala, bambae hem i sakemaot olgeta olsem ol “man blong brekem loa.” (NW) ?From wanem oli man blong brekem loa? From we Baebol i talem se, man we i no mekem wil blong God, hem i mekem sin, mo man we i mekem sin, hem i brekem loa blong God. (Matyu 7:21-23; 1 Jon 3:4; lukluk Rom 10:2, 3.) Maet wan man i kasem save long trufala skul, maet hem i save leftemap olgeta we oli tijim skul ya, mo maet hem i save presem olgeta we oli folem, be antap long samting ya, hem i gat responsabiliti blong folem skul ya long prapa laef blong hem. (Jemes 4:17) Sipos hem i akseptem responsabiliti ya, bambae hem i faenem se hem i gat plante blesing long laef blong hem, mo bambae hem i kasem glad we i no save kamaot long wan narafala rod.
3 Long laswan stadi, yumi bin tokbaot sikis poen we oli makemaot trufala skul. Wanwan long ol poen ya oli halpem yumi blong luksave trufala skul, be i no hemia nomo, oli givim wan wok we i strong mo ol blesing tu long yumi wanwan. ?Long wanem rod?
?Yu Yu Stap Lesin Long Tok Blong God Olsem Wanem?
4. (a) ?Taem ol nyuwan oli stat blong joen wetem ol Wetnes blong Jeova, i no longtaem oli luk wanem samting long fasin blong ol Wetnes blong yusum Baebol? (b) ?Olsem wanem fasin blong ol man blong Jeova blong kasem gudfala save long saed blong speret i gat paoa long olgeta?
4 Taem ol Wetnes blong Jeova oli stap stadi Baebol wetem ol nyuwan we oli intres, kwiktaem nomo plante long ol nyuwan ya oli luksave se ol samting we oli stap lanem oli kamaot long Baebol. Taem oli kasem ansa blong ol kwestin blong olgeta, ansa i no kamaot long ol stampa bilif blong jyos, long ol kastom blong man, no long ol tingting blong ol haeman. Prapa Tok blong God i stampa blong ol ansa ya. Taem oli go long Haos Kingdom, oli luk se long ples ya tu, Baebol i stampa buk we oli yusum. Ol man we oli rili stap lukaot trutok, oli no tekem longtaem blong luksave se bigfala samting we i mekem fasin glad i kamaot long medel blong ol Wetnes blong Jeova, hemia se oli stap kasem gudfala tijing long Tok blong God.—Aesea 65:13, 14.
5. (a) ?Olgeta we oli luk ol Wetnes blong Jeova oli kasem wanem traem? (b) ?Olsem wanem oli save joen long glad blong ol Wetnes?
5 Sipos yu luksave samting ya, ?bambae yu mekem wanem? Sipos yu kasem mining blong hem, i no stret blong yu stap olsem we yu no mekem wan samting, mo yu no mas wantem blong stap olsem. Baebol i soem se olgeta we oli stap ‘lesin nomo long tok ya blong God’ be “oli no mekem,” oli stap ‘gyaman nomo long olgeta.’ (Jemes 1:22) Nating se oli stap talem wanem tok, oli stap gyaman nomo long olgeta from we oli no luksave se fasin blong olgeta blong no obei long God i soem se oli no rili laekem hem. Wan man we i talem se hem i bilif be i no gat wok we i go wetem, bilif blong hem i ded nomo. (Jemes 2:18-26; 1 Jon 5:3) Long defren fasin, olgeta we lav blong olgeta long Jeova i pusum olgeta blong “mekem ol samting we loa ya i talem,” bambae oli ‘haremgud long olgeta laef blong olgeta.’ Yes, i tru olsem Jisas Kraes i eksplenem se: “Man we i harem tok blong God mo i obei long hem, hem i save haremgud moa.”—Jemes 1:25; Luk 11:28; Jon 13:17.
6. ?Sipos yumi rili gat fasin tangkyu long Tok blong God, bambae wanwan long yumi i traehad blong holemtaet wanem jans?
6 Bambae fasin glad ya i kam bigfala moa taem yu stap kasem moa save long wil blong God mo folem ol samting we yu stap lanem. ?Bambae yu yu traehad olsem wanem blong stadi long Tok blong God? Plante taosen man we oli no save rid mo raet bifo, oli bin traehad blong lanem blong rid, oli mekem olsem from wan samting nomo, blong oli save ridim Baebol mo tijim ol narafala long hem. Sam narafala oli girap eli long moning blong spenem sam taem evri dei blong ridim Baebol mo ol buk we oli givhan blong stadi Baebol, olsem Wajtaoa magasin. Taem yu wan yu stap gohed blong ridim Baebol no jekemap ol vas we oli stap long ol buk blong stadi long saed blong Baebol, traem tingtinggud long ol loa mo ol rul blong Jeova, mo traem luksave plante advaes we oli blong lidim yumi. Tingting dip long ol samting we ol wanwan haf oli stap soemaot long saed blong God, stampa tingting blong hem, mo ol samting we hem i mekem long olgeta man. Letem taem long samting ya blong i gat paoa long hat blong yu. Traem luksave ol rod we yu save folem blong mekem ol advaes blong Baebol oli wok moa long prapa laef blong yu.—Ol Sam 1:1, 2; 19:7-11; 1 Tesalonaeka 4:1.
?Wosip Blong Yu Long Jeova i Fulwan?
7. (a) ?Olsem wanem tijing blong Triniti i gat paoa long fasin traehad blong olgeta man blong wosip long God? (b) ?Wanem i save hapen taem wan man i lanem trutok long saed blong Jeova?
7 Plante milyan man oli haremgud tumas taem oli lanem se trufala God i no wan Triniti. Fasin blong talem se Triniti “i wan tok haed,” neva i bin mekem se oli haremgud. ?Olsem wanem oli save kam kolosap long wan God we man i no save kasem klia save long hem? Risal we i kamaot from tijing ya se, oli daonem Papa (we oli neva harem nem blong hem long jyos) mo oli wosip long Jisas olsem God, no oli sanem wosip blong olgeta i go stret long Meri (we oli bin lanem se hem i “Mama blong God”). Be hat blong olgeta i haremgud tumas taem wan Wetnes blong Jeova i openem Baebol mo i soem prapa nem blong God, Jeova, long olgeta. (Ol Sam 83:18) Wan woman long Veneswela i haremgud tumas taem wan yangfala Wetnes i soem nem blong God long hem, mekem se hem i holemtaet sista ya we i serem nambawan trutok ya wetem hem mo woman ya i agri blong stadi Baebol long haos blong hem. Taem ol man olsem oli lanem se Jisas i tokbaot Papa blong hem se ‘God blong mi mo God blong yufala’ mo se Jisas i talem long Papa blong hem se “yu nomo yu God tru,” oli luksave se tijing blong Baebol long saed blong God i klia nomo, i no olsem hemia we man i no save kasem save long hem. (Jon 17:3; 20:17) Taem oli kasem save long ol fasin blong Jeova, oli harem se oli wantem kam moa kolosap long hem, oli stat blong prea long hem, mo oli wantem mekem hem i glad. ?Wanem frut i kamaot from?
8. (a) ?From lav we plante milyan man oli gat long Jeova mo from we oli wantem mekem hem i glad, oli mekem wanem samting? (b) ?From wanem Kristin baptaes i impoten tumas?
8 Long ol ten yia we oli jes pas, i gat 2,528,524 man long sikis bigfala kantri mo long sam aelan, oli givim laef blong olgeta long Jeova mo oli soemaot samting ya taem oli baptaes long wora. ?Yu yu wan long olgeta, no yu wan we yu stap mekemrere blong tekem baptaes? Baptaes i wan impoten samting long laef blong evri tru Kristin. Jisas i givim oda long ol man blong hem blong pulum ol man blong olgeta nesen oli kam disaepol blong hem mo blong baptaesem olgeta. (Matyu 28:19, 20) Yumi save makemgud tu se stret afta long baptaes blong Jisas nao, prapa voes blong Jeova i kamaot long heven we i talem se: “Yu yu Pikinini blong mi we mi laekem yu tumas.”—Luk 3:21, 22.
9. ?Blong holemtaet gudfala fasin fren wetem Jeova, yumi mas mekem wanem?
9 Wan gudfala fasin fren wetem Jeova i wan samting blong tinghae tumas long hem. Sipos yu frengud finis wetem Jeova from we yu givim laef blong yu long hem mo tekem baptaes finis, stap longwe long eni samting we i save spolem fasin fren ya. Yu no mas letem ol wari blong laef mo ol samting long saed blong bodi oli mekem fasin fren ya i kam long namba tu ples. (1 Timote 6:8-12) Yu mas rili folem advaes blong Proveb 3:6 long laef blong yu se: “Long olgeta samting we yu yu mekem, lesin long [Jeova], mo hem bambae i mekem ol rod blong yu oli stret.”
?Lav Blong Kraes i Gat Paoa Long Yu Olsem Wanem?
10. ?From wanem fasin blong yumi blong wosip long Jeova i no minim se yumi daonem Jisas?
10 Tru ya, stret fasin blong luksave Jeova olsem wan trufala God nomo, i no minim se wan man i daonem Jisas Kraes. Long defren fasin, Revelesen 19:10 i talem se: “Trutok ya we Jisas i wetnes long hem, hemia i stampa blong ol tok blong ol profet.” Stat long Jenesis kasem Revelesen, ol profet tok we oli kamaot from tabu speret oli givim ol smosmol save long saed blong wok blong Jisas Kraes blong mekem ol stampa tingting blong Jeova oli kamtru. Taem wan man i savegud ol samting ya, hem i save luksave klia ol nambawan tijing, ale hem i fri long ol tingting we oli no stret we oli kamaot long ol gyaman tijing blong Krisendom.
11. ?Olsem wanem fasin blong kasem save long samting we Baebol i tijim long saed blong Pikinini blong God i gat paoa long wan woman long Polan?
11 Taem wan man i kasem save long trutok long saed blong Pikinini blong God, samting ya i save gat bigfala paoa long hem. Hemia nao samting we i hapen long Danuta, wan woman long Polan. Hem i bin storeyan wetem ol Wetnes blong Jeova blong eit yia, mo i haremgud long samting we oli tijim, be hem i no wantem mekem trufala wosip i bigfala samting long laef blong hem. Ale hem i kasem buk ya Man We i Hae Moa Long Olgeta Man, we i tokbaot laef blong Kraes long wan fasin we i isi blong kasem save long hem.a Long naet, hem i openem buk ya, mo i gat tingting blong ridim wan japta nomo. Be, i delaet finis, taem hem i satem buk ya, from we hem i ridim gogo i finisim fulwan buk. Wora blong ae blong hem i ron. Hem i askem long God se: “Jeova, plis yu fogivim mi.” From samting we hem i ridim, naoia bitim bifo, hem i luk moa klia, lav we Jeova mo Pikinini blong hem, tufala i soem. Hem i luksave se eit yia finis, hem i no bin gat fasin tangkyu long God mo hem i bin tanem baksaed long help we God i bin traem blong givim long hem wetem longfala tingting. Long 1993, hem i baptaes blong soem se hem i givim laef blong hem long Jeova, wan disisen we i stanap long bilif we hem i gat long Jisas Kraes.
12. ?Olsem wanem stret save long saed blong Jisas Kraes i gat paoa long laef blong yumi?
12 ‘Stret save long Jisas Kraes, Masta blong yumi’ i joen wetem fasin blong wok strong mo karem frut long Kristin wok. (2 Pita 1:8) ?Go kasem wanem mak bambae yu yu joen long wok ya, blong serem mesej blong Kingdom wetem ol narafala? Ol samting long laef blong yumi wanwan i mekem se samfala oli save mekem plante wok mo samfala oli save mekem smol nomo. (Matyu 13:18-23) Sam long ol samting ya, yumi no save jenisim; be sam long olgeta, yumi save jenisim. ?Wanem bambae i pusum yumi blong luksave ol jenis we yumi save mekem, mo blong mekem ol jenis ya? Aposol Pol i raetem se: ‘Yumi mekem olsem, from we Kraes i laekem yumi tumas’; long narafala tok, lav we hem i soem taem i givim laef blong hem from yumi i nambawan tumas, mekem se taem fasin tangkyu blong yumi long hem i kam bigwan moa, hat blong yumi wanwan bambae i pusum yumi bigwan. Frut blong samting ya se, yumi luksave se i no stret nating blong gohed blong traem kasem ol mak blong yumi wanwan mo blong stap laef blong lukaot ol samting we yumi nomo i wantem. Be, yumi jenisim ol samting long laef blong yumi blong putum wok ya we Kraes i tijim ol disaepol blong hem blong mekem, long fasples.—2 Korin 5:14, 15.
No Joen Long Wol—?Go Kasem Wanem Mak?
13. ?From wanem yumi mas no wantem joen nating long wan skul we i stap joen long ol fasin blong wol?
13 I isi nomo blong luk ol samting we Krisendom mo ol narafala skul oli mekem from we oli wantem joen long wol. Oli bin yusum mane blong jyos blong givhan long ol stronghed grup blong man, we oli stap faet blong traem mekem ol bigfala jenis oli kamaot. Ol pris tu oli joen long ol stronghed grup blong man we oli stap mekem faet. Plante taem, ol nyuspepa oli givim ripot long saed blong ol skul long ol defren ples long wol we oli stap faet agensem narafala skul. Han blong olgeta i fulap long blad. (Aesea 1:15) Mo raonabaot long wol, ol lida blong skul oli stap gohed blong traem blong lidim ol bisnes blong politik. Ol trufala man blong wosip oli no joen nating long samting ya.—Jemes 4:1-4.
14. (a) ?Wanwan long yumi i mas stap longwe long wanem samting sipos yumi no wantem joen long wol? (b) ?Wanem i save halpem yumi blong no foldaon long trap blong gat ol tingting mo fasin blong wol?
14 Be fasin blong no joen long wol i min se yu mas mekem moa samting antap long fasin ya. Wol ya i stap leftemap fasin blong laekem mane tumas mo ol samting we mane i save pem, fasin blong wantem kam hae moa long ol narafala, mo fasin blong ronem oltaem ol samting we man i save haremgud long hem, fasin we man i no tingbaot narafala, fasin gyaman mo talem ol rabis tok, fasin rebel agens long olgeta we oli hae moa long yumi, mo fasin we man i no blokem eni samting we hem i wantem. (2 Timote 3:2-5; 1 Jon 2:15, 16) From we yumi no stretgud olgeta, maet samtaem yumi save mekem sam long ol fasin ya. ?Wanem i save halpem yumi blong traehad blong stap longwe long ol trap ya? Yumi mas tingting bakegen long man we i stap biaen long olgeta fasin ya. “Olgeta man blong wol oli stap long paoa blong Setan.” (1 Jon 5:19) Nating we i luk olsem se wan fasin blong laef i naes tumas, mo nating se plante man oli stap folem laef ya, taem yumi luk se bigfala enemi blong Jeova, Devel Setan i stap biaen long hem, yumi luksave se laef ya i nogud tumas.—Ol Sam 97:10.
?Fasin Lav Blong Yu i Kasem Wanem Mak?
15. ?Olsem wanem lav ya we yu luk finis, we i stanap long fasin blong tingbaot narafala fastaem, i halpem yu blong luksave trufala skul?
15 Taem yu stat blong joen wetem ol Wetnes blong Jeova, i tru se lav we yu luk long medel blong olgeta i pulum yu from we lav ya i defren olgeta long tingting blong ol man blong wol. Lav we i stanap long fasin blong tingbaot narafala fastaem i mekem se klin wosip blong Jeova i defren olgeta long ol narafala wosip. Ating samting ya nao i mekem yu yu bilif se ol Wetnes blong Jeova oli rili stap folem trufala skul. Jisas Kraes i talem se: “Nao from we yufala i stap laeklaekem yufala, bambae olgeta man oli luksave se yufala i man blong mi.”—Jon 13:35.
16. ?Yumi wanwan yumi gat wanem jans blong mekem fasin lav blong yumi i kam bigfala moa?
16 ?Yu ting se fasin ya i makemaot yu tu olsem wan long ol disaepol blong Kraes? ?I gat ol rod we yu save folem blong soemaot moa fasin ya blong laekem tumas ol man? Yes yumi evriwan i save kamgud moa long fasin ya. Yumi mas mekem moa samting antap long fasin frengud we yumi gat wetem ol narafala long Haos Kingdom. Mo sipos yumi stap soem lav long olgeta ya nomo we oli laekem yumi, ?yu ting se yumi defren long ol man blong wol? Baebol i talem se: “Antap long ol narafala samting, yufala i mas stap laeklaekem yufala tumas.” (1 Pita 4:8) ?Long hu nao, yumi save soemaot lav we i bigwan moa? ?Long wan Kristin brata no sista we laef blong hem bifo i defren long hemia blong yumi mo we fasin blong hem blong mekem sam samting i mekem yumi kros? ?Long wan man we i no save kam oltaem long ol miting, from i sik no i olfala? ?Long hasban no waef blong yumi? ?No ating long papa no mama blong yumi we oli stap kam olfala? Samfala we oli stap gohedgud blong soemaot ol frut blong tabu speret, olsem lav, oli harem se, oli stap lanem ol fasin ya bakegen taem oli fesem ol hadtaem we oli save kamaot, taem oli mas givim bighaf blong taem blong olgeta blong lukaot long wan memba blong famle we i kam sik tumas. Mo tu, nating se yumi fesem ol samting ya, yumi mas soemaot lav tu long ol man we oli no memba blong famle blong yumi.
Talemaot Kingdom—?I Impoten Olsem Wanem Long Yu?
17. ?Sipos ol visit blong ol Wetnes blong Jeova oli bin givhan long yumi wanwan, samting ya i mas pusum yumi blong mekem wanem naoia?
17 Wan impoten rod we yumi save folem blong soemaot lav long ol narafala man, hemia taem yumi talemaot Kingdom blong God long olgeta. Wan grup nomo blong olgeta man, oli stap mekem wok ya we Jisas i bin talemaot. (Mak 13:10) Hemia ol Wetnes blong Jeova. Wok ya i givhan finis long wanwan long yumi. Naoia i wan blesing blong yumi blong halpem ol narafala. Sipos yumi tingbaot tingting blong God long saed blong wok ya, bambae wok ya i kam wan impoten samting long laef blong yumi.
18. ?Taem yumi ridim buk ya Jehovah’s Witnesses—Proclaimers of God’s Kingdom, olsem wanem hem i save pulum yumi wanwan blong joen moa long wok blong talemaot Kingdom?
18 Buk ya Jehovah’s Witnesses—Proclaimers of God’s Kingdom i tokbaot ol nambawan store we oli soem olsem wanem mesej blong Kingdom i bin go kasem ol ples long wol we oli stap farawe tumas, long taem ya blong lasdei. Sipos yu save ridim Engglis, yu no mas mestem blong ridim. Mo taem yu stap ridim, makemgud ol fasin we wanwan man i folem blong joen long wok blong talemaot Kingdom. ?Yu ting se i gat sam long olgeta we yu save folem eksampel blong olgeta? Wanwan long yumi i gat plante jans. I gud lav we yumi gat long Jeova i pusum yumi blong yusumgud ol jans ya.
19. ?Olsem wanem yumi save kasem blesing taem yumi akseptem responsabiliti we i stap long yumi, taem yumi kasem save long trufala skul?
19 Taem yumi traehad olsem blong mekem wil blong Jeova, bambae yumi faenem ansa blong kwestin ya se, ?Wanem mining blong laef? (Revelesen 4:11) Yumi no moa stap olsem we yumi blaen, we yumi harem se laef i blong nating nomo. Eni wok we yu givim laef blong yu blong mekem, be i no gat wan we i save karem bigfala glad bitim glad we yu kasem taem yu mekem wok blong Jeova God wetem fulhat blong yu. !Mo wok ya i givim wan gudfala fyuja! Wan laef we yumi save haremgud long hem blong olwe long nyufala wol blong hem, we bambae yumi yusum save mo paoa blong yumi fulwan blong mekem ol samting we oli laenap wetem nambawan risen we God i gat fastaem blong wokem ol man.
[Futnot]
a Watchtower Bible and Tract Society of New York, Inc. i prentem.
?Bambae Yu Ansa Olsem Wanem?
◻ ?From wanem i impoten blong wan skul i akseptem Baebol olsem Tok blong God mo i givim ona long Jeova olsem trufala God?
◻ ?Tru skul i mas tijim wanem long saed blong wok blong Jisas olsem Man blong Givim Ransom?
◻ ?From wanem ol Kristin oli no mas joen nating long wol mo oli mas soemaot lav we i stanap long fasin blong tingbaot narafala fastaem?
◻ ?Trufala skul i putum wok blong talemaot Kingdom long wanem ples?
[Tok blong pija long pej 16]
Baptaes i wan impoten mak blong akseptem responsabiliti blong trufala wosip. Evri manis, 25,000 man raonabaot long wol oli kasem mak ya
Rasia
Senegal
Papua Nyu Gini
Yunaeted Stet
[Tok blong pija long pej 17]
Fasin blong serem trutok blong Baebol wetem ol narafala i wan haf blong tru wosip
Yunaeted Stet
Brasil
Yunaeted Stet
Hong Kong