?Yu Yu Stap Kakae Long Wanem Tebel?
“Yufala i no save sidaon blong kakae long tebel blong Jeova, nao bakegen long tebel blong ol rabis speret.”—1 KORIN 10:21.
1. ?Wanem tufala tebel we i stap fored long yumi, mo aposol Pol i givim wanem woning long saed blong tufala tebel ya?
OL TOK ya we tabu speret i pusum aposol Pol blong raetem oli soem se long fored blong olgeta man, i gat tufala samting i stap we i olsem tebel. Yumi save makemaot wanwan long tufala tebel ya tru long samting olsem kakae we i stap antap long tufala, mo yumi evriwan i stap kakae long wan long tufala tebel ya. Be, sipos yumi wantem mekem God i glad, yumi no save kakae long tebel blong hem mo long semtaem yumi go kakae smol long tebel blong ol rabis speret tu. Aposol Pol i givim woning se: ‘Mi mi talem se taem ol man oli kilim anamol blong mekem sakrifaes long ol narafala god, i olsem tok blong Baebol we i talem se: “Oli stap mekem sakrifaes long ol rabis speret, oli no mekem long God.” Nao mi no wantem nating we bambae yufala i kam wan kampani wetem ol rabis speret. Yufala i no save dring long kap blong Jeova, nao bakegen long kap blong ol rabis speret. Yufala i no save sidaon blong kakae long tebel blong Jeova, nao bakegen long tebel blong ol rabis speret.’—1 Korin 10:20, 21.
2. (a) ?Wanem ya tebel blong Jeova long taem blong ol man Isrel bifo, mo hu i joen long ol sakrifaes blong pis we oli stap givim? (b) ?Fasin blong kakae long tebel blong Jeova i minim wanem tede?
2 Ol tok blong Pol oli mekem yumi tingbaot ol sakrifaes blong pis we bifo, ol man Isrel oli stap mekem olsem Loa blong Jeova i talem. Oli kolem olta blong God se wan tebel, mo man we i karem anamol i kam blong mekem sakrifaes, oli talem se hem i kam blong joen wetem Jeova mo ol pris. ?Joen olsem wanem? Fastaem, Jeova i joen long sakrifaes ya from we oli sakem blad blong anamol antap long olta blong Hem mo bonem gris blong anamol wetem faea aninit long olta. Namba tu samting, pris i joen long sakrifaes blong anamol ya from we hem (mo famle blong hem) oli kakae mit blong jes mo raetsaed leg we oli rusum. Mo namba tri samting, man we i givim sakrifaes i joen taem hem i kakae ol nara haf blong anamol ya. (Levitikas 7:11-36) Tede, fasin blong kakae long tebel blong Jeova i minim se yumi wosip long hem long fasin we hem i askem, olsem Jisas mo ol aposol blong hem oli soem. Blong mekem samting ya, yumi mas kakae ol kakae long saed blong speret we Jeova i stap givim long yumi tru long ogenaesesen mo Tok blong hem. Ol man Isrel, we oli haremgud blong joen wetem Jeova long spesel kakae long tebel blong hem, Jeova i blokem olgeta blong oli no mekem sakrifaes long tebel blong ol rabis speret. Ol man Isrel long saed blong speret mo ol fren blong olgeta, “ol narafala sipsip,” God i blokem olgeta tu blong oli no mekem samting ya.—Jon 10:16.
3. ?Olsem wanem wan man i save kakae long tebel blong ol rabis speret long taem blong yumi?
3 ?Olsem wanem wan man i save kakae long tebel blong ol rabis speret long taem blong yumi? Hemia taem hem i stap leftemap ol samting we oli agensem tingting blong Jeova. Tebel blong ol rabis speret i minim olgeta gyaman waes blong ol rabis speret, we i blong lidim yumi i go krangke mo blong mekem se yumi tanem baksaed long Jeova. ?Hu man i wantem fulumap hat mo maen blong hem long posen olsem? Ol trufala Kristin oli no agri blong joen long ol sakrifaes we bighaf blong ol man tede oli stap mekem long ol god blong faet mo ol rij samting.—Matyu 6:24.
Stap Longwe Long ‘Tebel Blong Ol Rabis Speret’
4. ?Yumi evriwan i mas fesem wanem kwestin, mo from wanem yumi no wantem kakae long tebel blong ol rabis speret?
4 Kwestin we yumi evriwan i fesem se, ?Mi mi stap kakae long wanem tebel? Yumi no save ronwe long trutok ya se yumi mas kakae long wan long tufala tebel ya. (Lukluk Matyu 12:30.) Yumi no wantem kakae long tebel we yumi save se i blong ol rabis speret. Sipos yumi kakae long hem, bambae Jeova, trufala God ya nomo we i laef, i no moa save glad long yumi. !Be, long defren fasin yumi save kasem hapi laef blong olwe sipos yumi kakae ol kakae long tebel blong Jeova nomo! (Jon 17:3) I gat wan tok we i talem se wan man i sem mak long ol samting we hem i stap kakae. Taswe, man we i wantem stap long gudfala helt long saed blong bodi mo tingting, hem i mas lukaotgud long ol samting we hem i stap kakae. Kakae we i gat plante gris mo suga, i no givhan nating blong mekem bodi i stap strong, nating se oli ademap plante samting insaed blong mekem gudfala tes, sem mak nao ol gyaman waes blong wol we i fulap long ol tingting blong ol rabis speret i olsem nogud kakae, we i save spolem maen blong yumi nomo.
5. ?Olsem wanem yumi save ronwe long ol tijing blong ol rabis speret tede?
5 Aposol Pol i talem se long taem blong lasdei blong wol, bambae ol man oli biaenem ‘ol tok ya we ol rabis speret nomo oli tijim olgeta long hem.’ (1 Timote 4:1) Yumi save faenem ol tijing blong ol rabis speret long ol bilif blong ol gyaman skul, be i no hemia nomo, oli stap yusum ol narafala rod tu blong mekem ol tijing ya oli kasem ol man raonabaot long wol. Eksampel, yumi mas jekem mo skelemgud wanem buk no magasin we yumi mo ol pikinini blong yumi i wantem ridim, program blong televisin we yumi lukluk, mo wanem pleplei mo sinema we yumi wajem. (Proveb 14:15) Sipos long taem blong spel yumi stap ridim ol buk we oli no stanap long trufala samting, ?olsem wanem long ol store ya, oli leftemap ol krangke raf fasin, fasin blong seks, no wok blong ol rabis speret? Sipos yumi ridim ol tru store nomo blong tijim yumi, ?olsem wanem long olgeta, oli leftemap wan waes blong wol no wan fasin blong laef we “i no kamaot long Kraes”? (Kolosi 2:8) ?I gat ol tingting blong man nomo we oli no save lidimgud yumi, no i pusum yumi blong joen wetem ol grup we ol man blong wol i stap stanemap blong traem halpem wol ya? ?Hem i pusum yu blong traehad blong kam rij tumas? (1 Timote 6:9) ?Hem i wan buk we long fasin we i haed i tokbaot ol tijing we oli save mekem ol man oli seraot, ol tijing we oli no folem ol tingting blong Kraes? Sipos yumi ansa se yes, mo yumi stap gohed blong ridim no lukluk ol samting olsem, yumi stap long denja blong kakae long tebel blong ol rabis speret. Tede, i gat plante handred taosen buk we oli stap leftemap waes blong wol, we i luk olsem se ol buk ya oli givim plante gudfala save mo oli stret long taem blong yumi. (Eklesiastis 12:12) Be long olgeta waes ya, i no gat wan we i rili nyuwan; no i givhan long man mo i mekem hem i kam moa gud, olsem waes we Setan i yusum blong trikim Iv i no mekem hem i kam moa gud.—2 Korin 11:3.
6. ?Taem Setan i singaot yumi blong testem kakae blong hem we i gat posen, yumi mas mekem wanem?
6 From samting ya, taem Setan i singaot yumi blong testem kakae blong hem we i olsem rabis kakae, ?bambae yumi mas mekem wanem? Bambae yumi mas mekem olsem Jisas, taem Setan i traem pulum hem blong tanem ol ston oli kam bred. Jisas i ansa se: “Baebol i talem se ‘Kakae nomo i no save mekem man i laef. Evri tok we God i talem, hemia nao samting blong mekem man i laef.’ ” Mo taem Setan i wantem givim “olgeta kantri long wol ya wetem ol gudgudfala samting we oli gat” long Jisas sipos Jisas i foldaon long hem, i mekem wosip long hem, Jisas i ansa se: “Yu goaot yu, Setan. Baebol i talem se: ‘Bambae yu mekem wosip long Jeova we i God blong yu. Bambae yu mekem ol wok blong hem nomo.’ ”—Matyu 4:3, 4, 8-10.
7. ?From wanem yumi stap gyaman nomo long yumi, sipos yumi ting se yumi save kakae long tebel blong Jeova mo long tebel blong ol rabis speret long semtaem?
7 !Tebel blong Jeova mo tebel blong ol speret enemi blong hem, neva tufala i save joen! O, yes, bifo, samfala oli bin traem blong mekem fasin ya i kamaot. Tingbaot ol man Isrel long taem blong profet Elaeja bifo. Oli talem se oli stap wosip long Jeova, be oli bilif se ol narafala god, olsem Bal, oli promes blong givim plante gudfala samting long olgeta. Elaeja i kam kolosap long olgeta man mo i talem se: “?Gogo kasem wetaem bambae yufala i traem blong stanap long tu tingting? Sipos Jeova i trufala God, yufala i go, yufala i folem hem; be sipos Bal i trufala God, yufala i go, yufala i folem hem.” I klia nomo, ol man Isrel oli stap stanap “fastaem long wan leg, afta long narafala leg.” (1 King 18:21; The Jerusalem Bible) Elaeja i talem long ol pris blong Bal blong pruvum se god blong olgeta i trufala God. God ya we i save mekem faea i kamdaon long heven blong kakae wan sakrifaes bambae i pruvum se hem i trufala God. Nating se ol pris ya blong Bal oli traehad tumas, ol traehad blong olgeta i blong nating nomo. Ale Elaeja i prea long sot prea ya nomo se: “O Jeova, ansa long mi, blong bambae ol man ya oli save se yu, Jeova, yu yu trufala God.” Wantaem nomo, faea i kamaot long Jeova long heven mo i kakae sakrifaes ya blong anamol we i wetwetgud long wora. Tes ya i mekem ol man oli luksave Jeova olsem trufala God, nao samting ya i pusum olgeta blong obei long Elaeja mo oli kilim i ded olgeta 450 profet blong Bal. (1 King 18:24-40) Ale tede, yumi mas luksave Jeova olsem trufala God mo yumi mas go kwiktaem blong kakae long tebel blong hem nomo sipos yumi no kam long tebel blong hem yet.
‘Slef Ya We i Stret’ i Stap Putum Kakae Long Tebel Blong Jeova
8. ?Jisas i bin tokbaot wanem slef we bambae hem i yusum blong givim kakae long saed blong speret long ol man blong hem long taem we hem i stap bakegen, mo slef ya hem i hu?
8 Masta Jisas Kraes i talem se long taem ya we hem i stap bakegen, wan ‘slef we i stret mo waes’ bambae i givim kakae long saed blong speret long ol disaepol blong hem, i se: “Taem masta blong man olsem i kamtru, i faenem we hem i stap mekem ol wok olsem, man ya bambae i save haremgud. Tru mi talem long yufala, masta ya i save putumap hem blong i lukaot long olgeta samting blong hem.” (Matyu 24:45-47) I tru se slef ya i no wan man nomo, be hemia grup blong ol tabu Kristin we oli givim laef blong olgeta long Jeova. Grup ya i putum ol beswan kakae long saed blong speret antap long tebel blong Jeova, blong ol tabu Kristin we oli stap yet long wol mo “bigfala hif blong man” oli save kakae long hem. Naoia bitim fo milyan man long bigfala kampani i joen wetem ol tabu Kristin long wol ya blong stanap long saed blong hae rul blong Jeova God antap long heven mo wol, mo long saed blong Kingdom blong hem we bambae i leftemap tabu nem blong hem.—Revelesen 7:9-17.
9. ?Grup ya we i olsem slef i bin yusum wanem tul blong givim kakae long saed blong speret long ol Wetnes blong Jeova, mo olsem wanem profet tok i tokbaot lafet blong olgeta long saed blong speret?
9 Grup ya we i olsem slef we i stret i bin yusum ‘Watch Tower Bible and Tract Society’ blong givim ol kakae long saed blong speret long olgeta Wetnes blong Jeova. Nating se Krisendom mo ol narafala haf blong wol ya oli stap hanggri from we oli no gat kakae long saed blong speret we i save givim laef, ol man blong Jeova oli stap mekem lafet. (Emos 8:11) Samting ya i fulumap profet tok long Aesea 25:6, se: “Jeova blong ol ami bambae i wokem wan bigfala kakae blong olgeta pipol long bigfala hil ya. Bambae i gat ol kakae we i gat oel, wetem ol olfala waen we oli gud tumas. Bambae i gat ol gudfala kakae we i gat plante oel mo fulap wora blong bun, wetem ol olfala waen we oli gud tumas, oli sevemaot olgeta finis.” Vas 7 mo 8 i soem se lafet ya bambae i gohed blong olwe. !Hemia wan bigfala blesing blong evriwan we oli stap long ogenaesesen blong Jeova long wol naoia, mo bambae i gohed blong stap olsem wan bigfala blesing long olgeta long fyuja!
Lukaot Long Kakae We i Gat Posen Long Hem Long Tebel Blong Ol Rabis Speret
10. (a) ?Grup we i olsem rabis slef i stap givimaot wanem kaen kakae, mo wanem samting i pusum olgeta? (b) ?Grup blong rabis slef i mekem wanem long ol slef we fastaem oli fren blong olgeta?
10 I gat posen long kakae we i stap long tebel blong ol rabis speret. Eksampel, tingbaot kakae we grup we i olsem rabis slef mo ol man blong apostasi oli stap givimaot. Kakae ya i no givhan no i mekem man i gru; hem i no wan gudfala kakae. Hem i no savegud, from we ol man blong apostasi oli no moa stap kakae long tebel blong Jeova. Frut we i kamaot se, nyufala fasin blong laef we maet oli bin wokem sam haf blong hem fastaem, i lus finis. Samting we i pusum olgeta, i no tabu speret, be filing blong kros mo fasin agens. Oli gat wan mak nomo we oli stap tingting oltaem long hem—blong stap kilim ol slef we fastaem oli brata blong olgeta, olsem Jisas i talem.—Matyu 24:48, 49.
11. ?C. T. Russell i raetem wanem long saed blong disisen blong wanwan man long ol kakae long saed blong speret, mo olsem wanem hem i tokbaot olgeta we oli livim tebel blong Jeova?
11 Eksampel, longtaem finis long 1909, presiden blong ‘Watch Tower Society’ long taem ya, C. T. Russell, i raet blong tokbaot ol man we oli lego tebel blong Jeova, nao oli stat blong kilim ol slef we oli fren blong olgeta bifo. Wajtaoa blong Oktoba 1, 1909, i talem se: “Olgeta we oli seraot long Sosaeti mo wok blong hem, oli no kasem plante gudfala samting, no mekem bilif blong ol narafala i strong moa mo halpem ol narafala blong gat ol frut blong tabu speret, be i luk olsem se oli mekem narafala samting olgeta—oli traem blong spolem rod ya we bifo oli bin folem, mo wetem bigfala no smol fasin blong pulum ae blong ol man, sloslou oli lus, olgeta nomo oli spolem olgeta bakegen, mo oli spolem ol narafala tu we oli gat sem nogud tingting ya blong agens. . . . Sipos sam man oli ting se oli save kasem gudfala kakae olsem no kakae we i moagud long ol narafala tebel, no se olgeta nomo oli save mekem gudfala kakae olsem no kakae we i moagud—letem ol man ya oli folem rod blong olgeta. . . . Be nating se yumi rere blong letem ol narafala oli go long eniples mo long evri ples blong faenem kakae mo laet we oli wantem, yumi sapraes se, olgeta we oli kam olsem enemi blong yumi oli tekem wan defren rod. Oli no talem wetem fasin we wol i talem se i fasin blong bigman, ‘Mi mi faenem samting we mi mi laekem moa; !tata!’ be oli kros, oli wantem spolem narafala, oli agens, oli rao, oli mekem ‘ol wok blong bodi mo blong Devel Setan’ go kasem wan mak we neva yumi luk wan man long wol i mekem. I luk olsem se krangke fasin nomo i stap pusum olgeta, Setan i mekem olgeta oli olsem man we i fraet tumas blong go kolosap long wora no man we i kasem wan sik [rabis]. Sam long olgeta i kilim mifala mo biaen oli talem se mifala i kilim olgeta. Oli rere blong talem mo raetem ol gyaman store we oli no gat respek nating mo blong mekem samting blong spolem narafala.”
12. (a) ?Olsem wanem ol man blong apostasi oli kilim ol slef ya we oli wok wetem olgeta? (b) ?From wanem i denja tumas blong lesin mo ridim eni buk blong apostasi jes blong faenemaot moa?
12 Yes, ol man blong apostasi oli prentem ol buk we oli tokbaot tijing we oli twistim, trutok i meksap wetem gyaman tok, mo ol gyaman tok stret. Mo tu oli maj blong soemaot fasin agens long sam asembli blong ol Wetnes, oli stap traem blong gyaman long olgeta we oli no stap lukaotgud. !Taswe, i denja tumas blong wantem blong save moa long saed blong olgeta, ale yumi letem samting ya i pulum yumi blong ridim no lesin long ol rabis tok blong olgeta! Maet yumi no ting se samting ya i denja long yumi wanwan, be denja i stap. ?From wanem? Wan samting, sam long ol buk blong apostasi oli yusum ol “tok swit” mo ‘ol gyaman tok’ blong tijim ol gyaman tijing. (Rom 16:17, 18; 2 Pita 2:3) Hemia nao samting we yu save se bambae yu mas kasem long tebel blong ol rabis speret. Mo nating se ol man blong apostasi oli save talem sam trutok, plante taem oli no joenem gud wetem ol narafala vas long Baebol, mo oli mekem olsem from oli wantem blong pulum sam narafala oli aot long tebel blong Jeova. !Ol buk blong olgeta oli blong agensem mo daonem narafala man nomo! I no gat wan samting nating insaed we i save leftemap tingting.
13, 14. ?Wanem ol frut blong fasin blong apostasi mo ol gyaman waes blong hem?
13 Jisas i talem se: “Bambae yufala i save makem olgeta, long frut we i kamaot long laef blong olgeta.” (Matyu 7:16) ?Wanem nao ol frut we i kamaot long laef blong ol man blong apostasi, mo frut we i kamaot from ol buk blong olgeta? Fo samting i makem ol gyaman waes blong olgeta. (1) Oli gat gudhan long wok blong apostasi. Efesas 4:14 i talem se “oli save wokem ol trik, mo oli save lidim ol man oli go krangke.” (2) Oli flas from oli gat save. (3) Oli no gat fasin lav. (4) Oli mekem gyaman fasin long ol defren rod. Hemia ol samting we oli mekemap kakae we i stap long tebel blong ol rabis speret, evriwan oli blong spolem bilif blong ol man blong Jeova.
14 Mo i gat wan narafala samting. ?Ol man blong apostasi oli gobak long weples? Plante long olgeta oli gobak bakegen long tudak blong Krisendom mo ol tijing blong hem, olsem bilif ya se olgeta Kristin bambae oli go long heven. Mo tu, bighaf blong olgeta oli no moa folem rul blong Baebol long saed blong blad, fasin blong no tekem saed long faet, mo nid blong talemaot Kingdom blong God. Be yumi, yumi ronwe finis long tudak blong Bigfala Babilon, mo neva yumi wantem gobak long hem. (Revelesen 18:2, 4) Yumi we yumi fasgud long Jeova, ?from wanem yumi wantem lesin, nating se smol nomo, long ol gyaman waes blong ol man ya we oli tanem baksaed long tebel blong Jeova, nao oli stap yusum toktok blong kilim olgeta we oli stap givhan long yumi blong kasem ol “stret tok”?—2 Timote 1:13.
15. ?Wanem rul blong Baebol i halpem yumi blong folem waes rod, taem yumi harem ol rabis tok agens blong ol man blong apostasi?
15 Maet samfala oli wantem kasem moa save long ol strong tok agens we ol man blong apostasi oli talem. Be yumi mas folem rul we i stap long Dutronome 12:30, 31. Long vas ya, Jeova i yusum Moses blong givim woning long ol man Isrel long saed blong ol samting we oli mas stap longwe long olgeta, taem oli tekem Promes Lan, aot long han blong ol hiten man. “Yufala i mas lukaotgud blong yufala i no foldaon biaen long olgeta, afta we mi spolem olgeta long fored blong yufala, mo yufala i mas lukaotgud blong no askem kwestin long saed blong ol god blong olgeta se: ‘?Olsem wanem ol nesen ya oli stap mekem wosip long ol god blong olgeta bifo? Mo mi, yes mi, bambae mi mekem olsem tu.’ Yufala i no mas mekem olsem long Jeova, God blong yufala.” Yes, Jeova God i save se fasin blong man i blong wantem faenemaot plante samting. !Tingbaot Iv mo waef blong Lot tu! (Luk 17:32; 1 Timote 2:14) Yumi neva mas lesin long ol samting we ol man blong apostasi oli stap talem, no oli stap mekem. !Be, long defren fasin i gud yumi bisi blong leftemap tingting blong ol man mo gohed oltaem wetem bilif, blong kakae long tebel blong Jeova!
Tebel Blong Jeova Nomo Bambae i Stap
16. (a) ?I no longtaem bambae wanem i hapen long Setan, ol dimon blong hem, mo samting we i olsem tebel we ol nesen blong wol oli stap kakae long hem? (b) ?Bambae wanem i hapen long ol man we oli stap gohed blong kakae long tebel blong ol rabis speret?
16 I no longtaem, bambae bigfala trabol i faerap wantaem, mo bambae i gohed kwiktaem blong kasem en blong hem long “faet long bigfala Dei blong God ya we i gat olgeta paoa.” (Revelesen 16:14, 16) Bambae faet i kasem bigfala mak blong hem, taem Jeova i spolem ol fasin blong wol ya wetem samting we i olsem tebel we ol nesen long wol oli stap kakae long hem. Mo tu, bambae Jeova i spolem ful ogenaesesen blong Devel Setan we yumi no save luk mo bigfala hif blong ol dimon blong Setan. !Olgeta we oli stap gohed blong kakae long tebel blong Setan long saed blong speret, hemia tebel blong ol rabis speret, bambae God i fosem olgeta blong joen long wan trufala kakae, yes, oli no olsem ol man we oli kam kakae, be oli kam olsem kakae blong narafala—long taem we bambae God i spolem olgeta!—Lukluk Esikel 39:4; Revelesen 19:17, 18.
17. ?Ol man we oli kakae long tebel blong Jeova nomo, bambae oli kasem wanem blesing?
17 Tebel blong Jeova nomo bambae i stap. Olgeta we oli glad blong kakae long tebel ya, bambae oli no save lus mo bambae oli gat blesing blong kakae long tebel ya blong olwe. Enikaen fasin blong sot long kakae we oli bin fesem, neva bambae i kasem olgeta bakegen. (Ol Sam 67:6; 72:16) !Wetem wan bodi we i stretgud olgeta, bambae oli mekem wok blong Jeova God long Paradaes! Long taem ya bambae ol tok we i tajem hat long Revelesen 21:4 oli kamtru olgeta long nambawan fasin se: “Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.” From we i no moa gat fasin agens, long evri ples, bambae ol man oli leftemap hae rul blong Jeova blong olwe mo bambae Jeova i soemaot glad blong hem foreva long olgeta we hem i sevem olgeta we oli stap long Paradaes wol. !Blong kasem blesing ya, yumi evriwan i mas gat strong tingting blong kakae long tebel blong Jeova nomo, we i fulapgud long ol beswan kakae long saed blong speret!
?Bambae Yu Yu Ansa Olsem Wanem?
◻ ?Olsem wanem yumi save blokem ol tijing blong ol rabis speret blong oli no lidim yumi i go krangke?
◻ ?From wanem yumi no save kakae long tebel blong Jeova mo long tebel blong ol rabis speret wantaem?
◻ ?Ol man blong apostasi oli stap givimaot wanem kaen kakae?
◻ ?From wanem i denja blong wantem save moa long ol samting we ol man blong apostasi oli stap talem?
◻ ?Wanem frut blong fasin blong apostasi?
[Tok blong pija long pej 10]
Tebel blong Jeova i fulapgud long ol nambawan kakae long saed blong speret