?From Wanem Ol Wetnes Blong Jeova Oli Gohed Blong Visitim Ol Man?
‘!OLGETA ya bakegen! !Be oli jes kam long ples ya sam wik i pas nomo!’ ?Yu yu gat tingting olsem taem wan Wetnes blong Jeova i kam visitim yu? Tede i gat plante milyan man we ol Wetnes blong Jeova oli visitim olgeta evritaem. Maet yu yu askem se, ?from wanem oli gohed olsem taem oli save se bighaf blong ol man oli gat prapa skul blong olgeta no oli no intres? Kwestin ya i gat ansa blong hem.
Responsabiliti Fored Long God
Ol Wetnes blong Jeova oli stadi long Baebol, ale oli faenemaot se stat long 1914, long yia ya we Faswan Bigfala Faet blong Wol i stat, ol samting we oli kamtru long wol oli stap fulumap ol profet tok blong Baebol long saed blong en blong wol blong naoia mo Kingdom blong God we bambae i rul long wol i no longtaem. Kolosap wan handred yia blong ol raf fasin, fasin blong man i kilim man, mo fasin blong no laekem man, i mekem we ol man oli stap longwe moa long wan rod blong politik we i save stretem ol problem blong olgeta. Ol faet mo fasin blong kilim man mo sakem bom from politik we oli stap gohed yet blong spolem olgeta man long wol, oli pruvum se rul blong man i no save jenisim tingting, fasin, mo hat, blong ol man. Fasin kros we i stap dip long hat blong ol man from ol samting we oli kamaot longtaem finis, i gohed strong blong spolem fasin fren blong ol man long ol defren laen, kala, mo skul. Samting ya i tru tu long ol ples we oli stap longwe long olgeta olsem Afganistan, India, Medel Is, Not Aerlan, Saot Afrika, mo ples we bifo oli kolem Yugoslavia. ?Ale, wanem nomo i save stretem problem ya blong olwe?
?Wanem Stampa Tingting We i Pusum Ol Wetnes?
Ol Wetnes blong Jeova oli luksave se rod we God i wokem—tru long Kingdom blong hem we hem i promes long hem we Jisas Kraes i rulum—hemia nomo rod blong winim ol problem ya. Jisas tu i prea blong askem se Kingdom ya bambae i rul, long prea we hem i mekem blong soemaot fasin blong prea long ol man se: “From samting ya, i stret blong yufala i prea olsem hemia. ‘Papa blong mifala we yu stap long heven, nem blong yu i tabu. Mifala i wantem we olgeta man oli ona long yu, mo we yu yu kam king blong olgeta man, mo we olgeta man long wol oli mekem olsem we yu yu wantem, olsem we olgeta long heven oli stap mekem.’ ” Ol Wetnes oli bilif se prea ya i rili askem God blong mekem wan samting blong stretem trabol blong olgeta man long wol.—Matyu 6:9, 10.
?Oraet, be from wanem ol Wetnes blong Jeova oli harem se i gat nid blong go long ol haos wanwan oltaem blong givimaot mesej ya? From tufala loa ya we Jisas i talemaot se: “ ‘Yu mas laekem Hae God ya we i God blong yu long olgeta tingting blong yu, mo long olgeta laef blong yu, mo long olgeta maen blong yu.’ Hemia loa ya we i hae moa long ol narafala loa, mo i nambawan blong folem. Mo narawan kolosap i olsem. ‘Yu mas laekem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’ ”—Matyu 22:37-39.
Ol Wetnes oli wantem kasem blesing blong God, mo from we oli laekem ol man raonabaot long olgeta, oli wantem blong ol man ya tu oli kasem sem blesing ya. Taswe, folem eksampel blong Jisas, oli harem se oli mas visitim ol man raonabaot long olgeta from we lav ya we i stanap long fasin blong no tingbaot olgeta wanwan fastaem, i pusum olgeta blong mekem olsem. Oli wantem we olgeta man ya oli gat jans blong save wanem nao “hapi God ya” i promes blong mekem long ol man we oli obei long hem long wan wol we i klin.—1 Timote 1:11; 2 Pita 3:13.
Kristin misinari ya Pol, i bilif long ol promes blong God mo taswe i save raetem se: “Mi Pol, mi man blong wok blong God, mo mi aposol blong Jisas Kraes. Hem i sanem mi blong givhan long ol man we God i jusumaot olgeta finis se bambae oli bilif long hem, blong oli save ol trutok ya we i stampa blong Kristin laef blong yumi. Hem i sanem mi blong mi givhan long olgeta, blong oli putum tingting blong olgeta i stap long laef ya we i no save finis. Bifo olgeta, taem we wol ya i no stap yet, God ya we i no save gyaman, hem i promes finis blong givim laef ya long olgeta.” Yes, God ya, “we i no save gyaman,” i “promes” blong givim laef we i no save finis long olgeta we oli gat tingting daon blong traem save God mo wosip long hem.—Taetas 1:1, 2; Sefanaea 2:3.
?Ol Wetnes Oli Kasem Pei From Wok Ya?
Samtaem sam man oli talem se ol Wetnes oli kasem pei from minista wok blong olgeta. !I no tru nating! Oli tingting strong long tok blong Pol long kongregesen long Korin se: “Mifala i no olsem plante narafala man we oli stap wokem tok blong God olsem rod blong winim mane nomo blong olgeta, no gat. Mifala i stap tok olsem man blong trutok nomo, we God i putumap mifala mo mifala i stap yet long fes blong hem. Mifala i joen finis long Kraes, nao mifala i stap talemaot tok blong God.”—2 Korin 2:17.
Sam lida blong skul oli prij blong kasem mane, maet oli kasem pei from wok blong prij long skul blong olgeta no oli kasem mane long pablisiti we oli mekem blong sapotem samkaen bisnes taem oli prij long televisin. Bighaf blong ol skul oli stap pem pasta no pris blong olgeta.
Long defren fasin, ol Wetnes oli no gat wan pasta no pris we i stap kasem pei from wok blong hem, mo plante taem oli givim fri ol buk blong olgeta we i tokbaot Baebol, long ol man we oli rili stap lukaot trutok, be plante long ol man ya oli wantem givim presen mane from. Oli yusum ol mane ya blong givhan long wok blong prij long olgeta ples long wol. Ol wetnes oli folem tok blong Jisas se: “Paoa ya, yufala i kasem we yufala i no pem, nao yufala i mas yusum we oli no pem yufala from,” taswe oli yusum ol samting we oli gat, olsem taem mo paoa blong olgeta, blong mekem plante milyan haoa evri yia long wok blong God, we oli no kasem pei from. Olsem nao, oli tijim olgeta we oli intres taem oli prij long ol haos wanwan mo taem oli mekem Baebol stadi long haos blong ol man.—Matyu 10:8; 28:19, 20; Ol Wok 20:19, 20.
Ol trufala samting ya oli pruvum se ol Wetnes wanwan, ol kongregesen blong olgeta, mo Watch Tower Society, oli no stap mekem wok blong olgeta blong kasem mane. I no gat wan i kasem pei blong stap go long ol haos wanwan. ?Sipos i olsem, olsem wanem oli kasem mane blong mekem wok ya i gohed? From ol presen mane we ol man raon long wol we oli gat fasin tangkyu long olgeta oli givim. I neva gat kleksin.
Bigfala Paoa Long Wok Blong Olgeta Blong Prij
?Ol man oli luksave wok ya blong go long ol haos wanwan mo fasin blong tekem evri jans blong prij we ol Wetnes oli stap mekem? Ol pruf we nyuspepa mo radyo i givim, oli talem yes long kwestin ya. Oli bin tokbaot ol Wetnes blong Jeova long ol program blong televisin mo ol sinema taem oli soemaot we wan i stap noknok long doa. Sam katun oli bin tokbaot ol Wetnes. Ol man oli savegud ol wok blong ol Wetnes blong Jeova, mekem se ol man we oli dro ol katun oli tokbaot olgeta. Maet ol katun ya oli luk olsem we oli blong jikim ol Wetnes nomo, be kolosap oltaem oli stanap long wan stampa trutok—se ol man oli save ol Wetnes from fasin blong olgeta blong stap gohed long wok blong prij.—Ol Wok 20:20.
I no longtaem i pas, wan katun i soem wan man i stap klaem i go antap long wan bigfala hil blong toktok wetem wan tija long saed blong speret long ol kantri long Is, we oli kolem “guru.” Hem i talem se: “!Talem long mi ol nambawan samting we bambae oli kamaot!” ?“Guru” i ansa olsem wanem? “Yu luk . . . Bambae ol man oli gat hadtaem blong kasem kakae, ol strong sik, mo graon i save seksek. San bambae i kam tudak, mo mun bambae i kam red olsem blad.” Man ya i askem se: “?Wanem ya gud nyus ya?” “Guru” ya i ansa se: “!God bambae i ravemaot wora blong ae blong olgeta . . . mo i no moa gat man i ded no man we i krae from ded no i harem nogud long bodi blong hem!” Visita ya i askem se: “?Olsem wanem yu save ol samting ya?” ?Wanem ansa blong hem? “!I no gat wan man i save ronwe long ol Wetnes blong Jeova!” !Mo samting ya i mas tru tu long saed blong man ya we i dro katun ya!
Impoten samting long katun ya mo long ol narafala pija olsem se oli soemaot strong tingting blong ol Wetnes blong gohed blong visitim ol man oltaem, be i soemaot tu se, mesej blong olgeta i sem mak oltaem. Long smol toktok nomo, man we i dro katun ya i eksplenem wan impoten haf blong gud nyus we ol Wetnes oli stap talemaot long ol haos wanwan mo i talem tu ol vas blong Baebol.—Skelem wetem Matyu 24:7, 29; Revelesen 21:3, 4.
Nating se plante man oli no wantem mesej blong olgeta, samting ya i no mekem tingting blong ol Wetnes i foldaon no mekem olgeta oli kam slak long wok blong olgeta. Aposol Pita i givim woning ya se: “Long taem blong Lasdei, bambae sam man oli save kamtru, we fasin blong olgeta blong wantem ol samting nogud, hem i bos blong olgeta. Olgeta ya bambae oli laf long yufala, oli askem se: ‘?Olsem wanem nao? ?Hem i promes finis blong kam, be hem i stap wea? Ol olfala blong yumi, ol man oli berem olgeta finis, be i no gat wan samting i jenis, i stat bifo olgeta, taem we God i mekem wol ya fastaem, i kam kasem tede. Evri samting oli stap olsem nomo.’ ” Nating se ol man oli tok olsemia, fasin ya blong laekem ol man, i pusum ol Wetnes blong gohed blong visitim ol man raonabaot long olgeta mo bambae oli gohed blong mekem olsem kasem we God bambae i spolem rabis fasin blong wol ya.—2 Pita 3:3, 4.
Jisas i talem se long ol lasdei ya, man i mas talemaot gud nyus fastaem. Blong kasem moa save from wanem mo olsem wanem ol man oli talemaot gud nyus ya, yu save luk tufala haf we oli kam biaen.—Mak 13:10.
[Tok blong pija long pej 9]
Ol Wetnes blong Jeova oli no gat wan man olsem pasta no pris we i kasem pei—evriwan oli wok fri nomo olsem ol minista blong God