Lukaot Long Fasin Blong Tok Flas

TEDE plante man oli tingbaot fasin blong tok flas olsem wan gudfala fasin. Fasin we man i tokbaot ol gudfala fasin blong hem, ol save, mo wok blong hem, blong pulum ol narafala blong oli luk hem, i kam olsem wan bigfala fasin blong naoia. Samfala oli bilif se man i mas tok flas blong pulum hem blong traehad blong kasem sam mak. Sam narafala oli harem se fasin ya i mekem se man i glad long hem wan. Time magasin i talem se: “Fasin ya we man i no leftemap hem wan tumas, i no lus olgeta yet, be kolosap ol man oli tingbaot olsem wan fasin blong bifo.” Jody Gaylin, wan woman blong raetem buk, i talem se: “Sore tumas, fasin we man i no sem blong tok flas, . . . hem i fasin blong tede. Storeyan blong wan man wetem wan fren no wan man we hem i save hem, i gat wan nyufala samting i joen wetem, se: ol tok blong leftemap hem wan.”

Sam man we ol narafala oli luk olgeta olsem wan eksampel, oli bin soemaot rod long fasin ya. Maet yu bin harem toktok blong wan man we bifo hem i wan jampion blong boksing se: “I no wan mastik, we naoia, mi mi stap olsem man we i bigfala moa bitim ol narafala man.” Ol man oli savegud toktok ya blong wan memba blong ‘Beatles,’ wan grup blong plei myusek, se: “Naoia, ol man oli savegud mifala moa bitim Jisas Kraes.” Nating se samfala oli ting se ol man ya oli no minim blong leftemap olgeta taem oli talem ol tok ya, sam narafala oli luk ol man we oli talem ol tok ya olsem ol gudfala eksampel long fasin ya blong leftemap olgeta wanwan, we i stret blong folem.

Fasin blong tok flas we i kam antap bigwan tumas i stanemap wan kwestin se: ?I givhan long man blong i tok flas from ol samting we hem i gat mo ol samting we hem i save mekem? Tru ya, i stret blong man i glad long ol samting we hem i mekem mo i stret tu blong talemaot long ol gudfala fren mo ol famle. ?Be olsem wanem long ol man we oltaem long laef blong olgeta, oli stap folem tok ya se, “Sipos yu gat save no gudhan blong mekem wan samting, yu stap soemaot long olgeta man”? Antap long samting ya, ?olsem wanem long olgeta we, nating se oli no tok flas, be long fasin we i haed, oli mekem sua se ol narafala oli mas save long ol gudfala fasin blong olgeta mo ol samting we oli mekem? ?I tru se fasin ya i givhan long man mo man i nidim blong mekem pablisiti long hem wan, olsem samfala oli talem?

Spolem Fasin Fren

Tingbaot filing blong yu taem ol narafala oli tok flas. Eksampel, ?yu yu harem olsem wanem long ol tok we oli kam biaen?

“Ol buk we mi mi no raetem yet, oli moa gud bitim ol buk we ol narafala man oli raetem finis.”​—⁠Wan man blong raetem buk we ol man oli savegud hem.

“Sipos mi bin stap long taem ya we God i mekem olgeta samting, bambae mi mi givim sam gudfala advaes blong mekem plan blong heven mo wol i moa gud.”​—⁠Wan king blong Medel Ejes.a

“I no save gat wan God from we, sipos i gat wan, mi mi no save bilivim se mi mi no Hem.”​—⁠Wan man we i gat bigfala save long waes blong wol long ol yia bitwin 1800 mo 1900.

?Ol toktok blong wanwan man ya oli pulum yu blong laekem olgeta? ?Yu ting se yu glad blong stap long kampani blong olgeta? Ating no gat. Kolosap oltaem, fasin blong tok flas​—⁠nating se i talem tru no i tok plei​—⁠i mekem se ol narafala oli harem nogud, oli kros, no ating oli jelas. Hemia nao samting we fasin ya i mekem long Asaf, wan man blong raetem Ol Sam, we i talem se: “Taem mi luk ol man nogud ya we ol samting long laef blong olgeta oli stap gogud nomo, nao oli praod from, mi mi jelas long olgeta.” (Ol Sam 73:⁠3) !I tru se i no gat wan long yumi we i wantem mekem ol fren mo ol man we yumi joen wetem olgeta, oli gat ol nogud filing! Fas Korin 13:4 i talem se: ‘Man we i stap laekem ol man tumas . . . hem i no save tok flas.’ Fasin blong laekem God tumas mo tingbaot filing blong ol narafala, bambae i pusum yumi blong no flas from save mo ol fasin blong yumi mo ol samting we yumi gat.

Taem wan man i bos long tingting blong hem mo i toktok wetem tingting daon, hem i mekem se ol narafala man we oli stap raon long hem oli haremgud mo oli glad long olgeta wanwan. Hemia i wan fasin we mane i no naf blong pem. Maet hemia nao samting we Lord Chesterfield, wan man Engglan we i haeman blong gavman, i stap tingbaot taem hem i givim advaes long boe blong hem se: “Traem blong kam waes moa bitim ol narafala man sipos yu save mekem; be yu no mas talemaot long olgeta.”

Ol fasin we ol wanwan man oli gat oli no sem mak. Samting we i isi long wan man blong mekem, maet wan narafala i no save mekem. Lav bambae i pusum wan man blong gat filing long ol narafala we oli no gat sem save olsem we hem i gat. Maet narafala man i gat wan narafala fasin we i gud. Aposol Pol i talem long yumi se: “From we God i givhangud long mi long gladhat blong hem, mi mi talem tok ya long yufala evriwan. Yufala i mas no letem tingting blong yufala i go antap. Tingting blong yufala i mas stap long stret rod, mo yufala i mas makem yufala, stret long fasin blong bilif ya we God i givim long yufala.”​—⁠Rom 12:⁠3.

Slak Fasin i Stampa Blong Fasin Blong Tok Flas

Nating se samfala oli no wantem stap kolosap long ol man we oli tok flas, from oli harem se oli stap daon moa long olgeta, sam narafala oli mekem fasin we i defren. Oli talem se ol man blong tok flas oli no glad long olgeta wanwan. Frank Trippett, wan man blong raetem buk, i eksplenem from wanem wan man blong tok flas i save daonem respek we narafala i gat long hem: “Evriwan oli save long hat blong olgeta se fasin blong tok flas i soemaot sam slak fasin we wan man i gat long prapa laef blong hem.” From we plante oli luk klia samting we i stap long tingting blong wan man blong tok flas, ?yu ting se i moa waes blong blokem fasin ya blong leftemap yu wan?

“!Be Mi Rili Gat Gud Fasin Olsem!”

Hemia nao tok we samfala oli talem blong traem mekem eskyus from fasin blong leftemap olgeta wanwan. Oli harem se, from we oli gat gudhan long sam samting, oli gat tu fes sipos oli mekem olsem we oli no gat.

?Be tok flas blong olgeta i tru? Fasin we man i jajem hem wan se i gud long sam samting i stanap long ol prapa tingting mo filing blong hem. Samting we yumi wanwan i luk olsem wan nambawan fasin long yumi, maet ol narafala oli luk olsem we i no hae tumas. Fasin ya we man i wantem tumas blong soemaot save blong hem blong ol narafala oli luk, maet i soem se man ya i no rili strong nating​—⁠i no strong inaf blong ol man oli luksave sipos hem i no talemaot long olgeta. Baebol i tokbaot slak fasin blong man blong wantem gyaman long hem wan, taem hem i givim advaes se: “Man we i ting se i stap stanap strong, hem i mas lukaotgud blong bambae i no foldaon bakegen.”​—⁠1 Korin 10:⁠12.

Nating sipos wan man i gat spesel save long wan samting, ?yu ting se hemia i wan eskyus blong tok flas? No gat, from we fasin blong tok flas i givim ona long ol man nomo, be olgeta gudfala fasin we yumi gat oli kam long God. Ona i mas go long God. ?From wanem yumi mas kasem ona from samting we yumi bon wetem? (1 Korin 4:⁠7) Antap long samting ya, nating se yumi gat ol gudfala fasin, be yumi gat ol slak fasin tu. ?Blong tok tru, yu ting se yumi mas pulum ol narafala blong luk ol slak fasin mo ol mastik blong yumi? I luk olsem se smol namba blong ol man blong tok flas oli gat tingting olsem. Maet King Herod Agripa I i rili gat waes long fasin blong toktok. Be from we hem i no gat tingting daon, hem i ded long wan fasin we i nogud olgeta. Ded ya we i nogud olgeta, i soemaot olsem wanem God i no laekem nating fasin flas, mo plante man tu oli no laekem fasin ya.​—⁠Ol Wok 12:​21-23.

Ol man oli kasem save long ol gudfala fasin mo gudhan blong wan man nating se hem i no talemaot long olgeta long fasin we i leftemap hem wan. Taem ol narafala oli luksave mo presem wan man from ol fasin no ol samting we hem i mekem, man ya i kasem moa ona. Proveb 27:2 i talem long waes fasin se: “I gud wan strenja, mo i no prapa maot blong yu, i presem yu; i gud wan man we i kam long narafala kantri, mo i no prapa maot blong yu, i mekem olsem.”

?I Nidim Fasin Blong Tok Flas Blong Kasem Sam Mak?

Samfala man oli bilif se oli nidim blong leftemap olgeta blong kasem sam mak long sosaeti blong ol man tede we oli gat tingting blong traem winim narafala. Oli fraet se sipos oli no toktok mo talemaot ol gudfala fasin blong olgeta long ol narafala, bambae ol man oli no tingbaot no luksave olgeta. Magasin ya Vogue i tokbaot ol man we oli stap wari long saed ya se: “Bifo, oli tijim yumi se fasin blong no leftemap yu wan i wan gud fasin, be naoia yumi stap lanem se fasin blong stap kwaet i save blokem yumi blong no kasem sam gudfala samting.”

Ating olgeta we oli wantem kam moa gud long ae blong ol man blong wol ya, oli gat risen blong wari olsem. Be tingting blong wan Kristin i defren. Hem i save se God i tingbaot mo i yusum olgeta we oli gat tingting daon wetem ol save blong olgeta, i no olgeta we oli flas. From samting ya, wan Kristin i no mas lukaot ol rod blong tok flas. I tru, wan man we i trastem hem wan bitim mak i save yusum strong fasin blong hem no waes blong hem blong tanem tingting blong ol man, blong mekem ol narafala oli tinghae long hem blong smoltaem. Be biaen, bambae fasin blong hem i kam long klia ples mo bambae samting ya i daonem flas blong hem, maet hem i save sem tu. I olsem we Jisas Kraes i talem se: “Man we hem nomo i leftemap hem blong i kam haeman, bambae God i mekem hem i stap daon. Be man we hem nomo i mekem hem i stap daon, bambae God i leftemap hem.”​—⁠Matyu 23:12; Proveb 8:13; Luk 9:⁠48.

Ol Gudfala Samting We Oli Kamaot From Tingting Daon

Ralph Waldo Emerson i raetem se: “Evri man we mi mitim, oli hae moa long mi long sam rod. From samting ya, mi lanem plante samting long saed blong olgeta.” Tok blong man ya i laenap wetem advaes we tabu speret blong God i pusum aposol Pol blong talem, se ol Kristin oli no mas “mekem wan samting blong leftemap olgeta nomo, no blong oli save tok flas from. Oli mas mekem tingting blong olgeta i stap daon, mo oli mas stap luk ol narafala man olsem we oli gud moa long olgeta.” (Filipae 2:⁠3) Fasin ya blong gat tingting daon i mekem se wan man i save lanem samting long ol narafala.

Taswe lukaotgud se gudfala fasin blong yu i no kam olsem slak fasin blong yu. No letem fasin blong tok flas i daonem save mo ol fasin blong yu mo ol gudfala samting we yu mekem. Ademap tingting daon long ol narafala gudfala fasin blong yu. Hemia nao fasin we i rili leftemap wan man long tingting blong ol narafala. Fasin ya i halpem man blong frengud moa wetem ol man mo i mekem Jeova God i glad long hem.​—⁠Maeka 6:8; 2 Korin 10:⁠18.

[Futnot]