No Letem Wan Gudfala Fasin i Kam Wan Slak Fasin

Titanic i wan nambawan sip. Hem i gat 16 bokis blong blokem wota i no pas i go insaed long hem. Taswe, ol man oli ting se sip ya i no save draon. Long 1912, sip ya i mekem faswan trip blong hem. Long taem ya, hem i karem haf nomo long ful namba blong ol laef bot we hem i nidim. Sip ya i bangem wan aesbeg, nao hem i draon mo 1500 man oli ded.

USIA, we i King long Jerusalem blong bifo, hem i fraet gud long God. Hem i wan nambawan man blong lidim ol ami. Wetem help blong Jeova, hem i winim ol enemi blong hem wan afta narawan. “Nao nius blong hem i go long evri ples, mo kingdom blong hem i stap kam strong moa from we Hae God i stap givhan long hem.” Be “samting ya i mekem [Usia] i kam praod tumas.” From we Usia i flas tumas, hem i kasem leprosi.​—2 Kronikel 26:15-​21; Ol Proveb 16:18.

Tufala stori ya i tijim yumi se i gud blong skelem paoa, no gudfala fasin we yumi gat, wetem sam narafala fasin olsem fasin waes, fasin blong no bitim mak, mo tingting daon. Sipos yumi no mekem olsem, i isi nomo blong mekem se gudfala fasin ya i kam wan slak fasin no i spolem yumi. I impoten blong tingbaot samting ya, from we long defdefren rod, evri man i kasem sam gudfala fasin we oli olsem ol presen. Yumi wantem se ol fasin ya oli givhan long yumi, mo oli mekem se yumi mo ol narafala, be antap moa hemia we i Wokem Yumi, i harem gud from. Tru ya, yumi wantem yusum fulwan ol presen ya we God i givim long yumi. Be, long semtaem yumi mas lukaotgud long ol presen ya, blong oli stap olsem ol gudfala fasin oltaem.

Eksampel, wan man maet i gat fasin ya we hem i laekem wok blong hem tumas. Be, fasin ya i save kam wan slak fasin, sipos man ya i slef long wok blong hem. Wan man maet hem i gat fasin ya blong tingting gud bifo we hem i mekem samting, nao i no isi blong trikim hem mo mekem hem i foldaon long wan trap. Be, sipos man ya i tekem tumas taem blong tingting, maet bambae hem i neva mekem sam disisen. Mo tu, tingbaot fasin blong man we i wok wetem ful paoa blong hem, hemia wan nambawan fasin. Be, sipos wan man i bitim mak long fasin ya, maet bambae hem i no moa kea long mak we narafala i no naf blong kasem. Ale, man ya i save mekem se ples blong wok i kam kolkol, ol rul oli kam strong tumas, mo fasin glad i lus. Taswe, i gud we yu tekem smoltaem blong tingbaot ol gudfala fasin blong yu. ?Yu stap yusumgud olgeta? ?Ol fasin ya oli givhan long ol narafala? Mo antap long hemia, ?yu yusum ol fasin ya blong leftemap Jeova, we i stamba blong “evri presen we oli nambawan”? (Jemes 1:​17) Blong mekem olsem, i gud blong tokbaot sam narafala gudfala fasin we oli save kam slak fasin, antap moa, olgeta fasin ya we oli save spolem yumi, sipos yumi no lukaotgud long olgeta.

Yusum Paoa Blong Tingting Wetem Waes

Wan tingting we i gat gud save, hem i wan nambawan samting. Be, gudfala tingting ya i save kam wan slak fasin blong yumi sipos yumi trastem yumi wan tumas, no yumi tinghae long yumi wan, antap moa taem ol narafala oli leftemap yumi tumas. Maet yumi stat karem fasin ya we yumi ridim ol buk blong stadi long Baebol mo Tok blong God, jes blong fulumap hed blong yumi nomo.

I gat defren rod we i soemaot se yumi stap trastem yumi wan tumas. Eksampel, taem wan man we i gat gud hed i kasem wan tok long Kristin kongregesen, ating wan pablik tok no wan tok long Tiokratik Skul, maet fasin ya i pulum hem blong mekem rere tok blong hem long laswan menet. Mo tu, maet hem i no prea long Jeova blong i givhan long hem. Yes, man ya i trastem save we hem i gat finis mo gud hed blong hem, blong wok hem wan. Gud hed we hem i gat bambae i haedem slak fasin ya, be blong smoltaem nomo. Sipos Jeova i no givim fulwan blesing blong hem, bambae man ya i slodaon, no i stop fulwan, long saed blong spirit. !Tru tumas, man ya i westem gudfala presen blong hem !​—​Ol Proveb 3:​5, 6; Jemes 3:1.

Man we i kwik blong kasem save samting, maet hem i yusum Baebol mo ol buk blong stadi long Baebol, jes blong hivimap moa save nomo. Yes, save ya i “solap,” no i mekem fasin flas blong man ya i kam antap, olsem wan balun we yumi blou long hem. Be, save ya i no “bildimap,” lav mo Kristin fasin fren wetem ol narafala. (1 Korin 8:​1, NW; Galesia 5:​26) Defren olgeta, man we i tingbaot ol samting long saed blong spirit, bambae hem i prea mo trastem tabu spirit blong God oltaem, nating sipos hem i gat gud hed. Nao, gudfala fasin ya we hem i gat bambae i kam gud moa blong givhan long narafala taem man ya i gru moa long ol fasin olsem lav, fasin daon, save, mo waes. Ol fasin ya oli wokgud tugeta.​—Kolosi 1:​9, 10.

Sipos yumi naf blong mekem plante samting, paoa ya i save kam wan slak fasin sipos yumi stat tinghae long yumi. Samting ya i soem se yumi no gat tingting daon. Wan man we i kasem wan presen​—mo olgeta we oli leftemap hem tumas​—oli fogetem se “olgeta we oli stap talem se oli waes, [Jeova] i tanem baksaed long olgeta.” Samting ya i tru long eni kaen presen we yumi gat. (Job 37:24) Tok blong God i talem se “man we i mekem tingting blong hem i stap daon, hem i waes man.” (Ol Proveb 11:2) Aposol Pol, nating se hem i save plante samting mo i gat gudfala edukesen, i talem long ol man Korin se: “Bifo, taem mi kam luk yufala, mi kam blong talemaot plan ya blong God we fastaem i blong haed. Be mi no kam blong talemaot long ol flas tok mo long ol waestok blong man, nogat. . . . Mo long taem ya we mi kam luk yufala, mi mi no gat paoa nating. Oltaem mi stap fraet we mi stap seksek from. Mo taem mi prij long yufala, mi talem ol tok blong mi, be mi no yusum waes blong man, blong pulum yufala. Tok blong mi i blong soemaot paoa blong Tabu Spirit nomo, blong bambae stamba blong bilif blong yufala i no stanap long waes blong man, i stanap long paoa blong God nomo.”​—1 Korin 2:​1-5.

Ol tingting we wol i gat long saed blong save mo ol samting we i mekem man i harem gud long laef, i no save trikim man we i rili waes. Taswe, man ya i no yusum gudfala save we hem i gat blong mekem se ol man oli glad long hem no blong kam rijman. Be, hem i givim beswan samting blong hem i go long Man ya we i givim laef mo ol gudfala save ya long hem. (1 Jon 2:​15-​17) Blong mekem olsem, man ya i putum ol wok blong Kingdom oli stap fas ples long laef blong hem. Nao hem i karem plante frut, olsem “ol tri we oli gru long saed blong wota we i stap ron.” From we man ya i gat tangkiu long ol blesing we Jeova i givim long hem, we oli no kamaot long prapa paoa blong hem, bambae man ya i ‘stap win long evri samting we hem i stap mekem.’​—Ol Sam 1:​1-3; Matiu 6:​33.

Letem Kristin Skul i Wok Long Gudfala Fasin Blong Yu

Kristin skul i fulap tumas wetem ol nambawan fasin mekem se, waes blong man long wol ya i no gat paoa nating klosap long ol Kristin fasin ya. Eksampel, fasin blong laef blong ol Kristin i mekem se oli kam ol nambawan hasban mo waef. Oli ol nambawan man we oli stap long pis wetem ol narafala raonabaot long olgeta, mo oli kam ol nambawan man blong wok​—oli man we yu save trastem olgeta, oli soem respek long narafala, mo oli no les blong wok. (Kolosi 3:​18-​23) Antap long hemia, ol Kristin oli kasem trening long fasin blong toktok mo tij. Samting ya i halpem olgeta blong gat gudhan blong toktok tugeta. (1 Timoti 4:​13-​15) Taswe, yumi no sapraes se plante taem, ol man we oli bos long ol Kristin ya oli givim moa wok long olgeta mo oli givim haeples long olgeta. Be sipos yumi no lukaotgud, maet yumi stat yusum ol gudfala fasin ya long rod we i no stret. Wan haeples no wan wok we i gud moa, plante taem i minim se yumi mas givim ful paoa blong yumi long kampani nomo. From samting ya, maet yumi stat mestem ol Kristin miting, no i mekem yumi westem gudfala taem we yumi mas spenem wetem famle.

Long Ostrelia, wan Kristin we i elda mo i gat wan famle, hem i wan gudfala bisnesman. Olsem wan tok i talem, man ya i “gat jans blong kam rijman mo kasem haenem.” Be brata ya i no wantem kasem ol samting blong wol ya. Hem i talem se: “Mi mi wantem spenem moa taem wetem famle blong mi mo long Kristin wok blong prij. Taswe, mi mo waef blong mi, mitufala i agri se i waes blong mi daonem ol aoa we mi spenem long wok blong mi.” Brata ya i gohed se: “?From wanem mi stap wok faef dei long wik sipos mi no nidim?” Hem i tingting gud long wan plan blong jenisim sam samting long laef blong hem. Ale, elda ya i faenem se hem i naf blong lukaotgud long famle blong hem nating se hem i wok tri no fo dei nomo long wik. Biaen, ol brata oli singaot hem blong mekem sam narafala wok, olsem joen long Komiti blong wan Haos Asembli mo wok long ofis blong distrik asembli. From we brata ya i waes gud, hem mo famle blong hem i kasem glad mo i haremgud.

Skelem Tingting Blong Yu Long Saed Blong Ol Spesel Wok

I gud we ol Kristin man oli wantem mekem ol spesel wok insaed long kongregesen. “Sipos wan man i wantem mekem wok blong elda [no man blong givhan] long kongregesen, man ya i wantem wan gudfala wok. Hemia wan trutok ya.” (1 Timoti 3:1) Olsem ol narafala gudfala fasin we yumi tokbaot finis, yumi mas gat fasin luksave tu, wetem fasin ya blong rere oltaem blong karem ol responsabiliti. Wan brata i no mas akseptem tumas wok we bambae i mekem se hem i lusum fasin glad long wok blong Jeova. I tru se i gud taem man i rere oltaem blong mekem eni wok, from we Jeova i no laekem fasin les. Be, brata we i rere blong mekem eni wok i mas soem tu se hem i gat tingting daon mo hem i “tingtinggud.”​—⁠Taetas 2:​12, NW; Revelesen 3:​15, 16.

Kaen fasin blong Jisas, wetem fasin luksave mo dip filing blong hem, oli mekem se olgeta man, wetem olgeta ya tu we oli daon olgeta, oli haremgud blong stap wetem hem. Tede i sem mak, ol man oli haremgud blong stap wetem olgeta we oli soem fasin sore mo oli kea long narafala. Long Kristin kongregesen, ol elda we oli gat oli gudfala fasin ya, oli ol “man we i olsem presen.” Oli “olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren. Bambae oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.”​—​Efesas 4:8; Aesea 32:2.

Be ol elda oli mas skelemgud taem ya we oli stap spenem blong halpem ol narafala, wetem prapa nid blong olgeta, olsem stadi wanwan, tingting dip, prea, mo wok blong prij. I stret nomo we ol elda we oli mared, oli tektaem tu blong stap wetem famle blong olgeta, from we oli mas stap klosap long famle blong olgeta i bitim ol narafala man.

Ol Woman We Oli Nafgud—Wan Nambawan Blesing

Olsem ol elda we oli nafgud, ol woman we oli tingbaot ol samting long saed blong spirit, oli save givhan bigwan long ol wok insaed long ogenaesesen blong Jeova. Plante taem, ol woman oli soem intres long narafala​—​hemia wan fasin we Jeova i laekem mo hem i leftemap tingting blong yumi blong soemaot fasin ya. Aposol Pol i raetem se, yumi ‘no mas stap lukaot long ol bisnes blong yumi nomo, be yumi mas stap lukaotgud long ol bisnes blong ol narafala man tu.’ (Filipae 2:​4, NW) Be, taem yumi stap “lukaotgud long ol bisnes blong ol narafala man,” yumi no mas bitim mak. I no stret sipos wan Kristin i wantem “go insaed long ol bisnes blong narafala man,” no kam wan man “blong mekem toktok.”—1 Pita 4:​15; 1 Timoti 5:​13.

Ol woman oli gat plante narafala presen. Eksampel, wan Kristin waef maet i gat save long plante moa samting i bitim hasban blong hem. Nating se i olsem, wan waef “we fasin blong hem i stret,” mo we i fraetgud long Jeova, bambae hem i soem ona long hasban blong hem. Woman olsem bambae i yusum presen blong hem blong halpem hasban blong hem, i no blong bitim hem. Mo wan hasban we i gat tingting daon, bambae i no jelas mo kros long waef blong hem from gud save we hem i gat, be, bambae hem i tinghae mo i glad long waef blong hem. Hasban ya bambae i leftemap tingting blong waef blong hem blong yusum fulwan gudhan ya we hem i gat blong lukaot famle mo givhan long ol pikinini blong hem blong oli ‘ona long hae God,’ olsem we hasban ya tu i stap mekem. (Ol Proveb 31:10, 28-​30; Jenesis 2:​18) Ol hasban mo waef olsemia, we oli gat tingting daon, oli haremgud long mared blong tufala. Mared ya i givim ona long Jeova.

Kontrolem Fasin We i Strong

Wan man we fasin blong hem i strong, i save yusumgud fasin ya blong folem stret fasin mo mekem fulwan wil blong Jeova, sipos fasin ya i joen wetem tingting daon. Be, fasin ya i lusum paoa blong hem sipos hem i pulum man blong daonem no mekem narafala i fraet. Samting ya i tru moa insaed long Kristin kongregesen. Ol Kristin oli mas haremgud long kampani blong ol narafala Kristin, antap moa taem oli stap kampani wetem ol elda.​—Matiu 20:25-​27.

Ol elda tu, oli mas haremgud taem oli kampani wetem ol narafala elda. Mo taem ol elda oli joen tugeta, paoa blong tabu spirit nao i mas lidim olgeta long evri disisen we oli mekem, be i no strong fasin blong wan man we i mas mekem samting ya. Tru ya, tabu spirit i save lidim eni elda we i stap long grup blong ol elda, hemia we i yang moa no hemia we i sem lelebet tu. Taswe, ol elda we maet oli gat fasin we i strong, nating se oli harem se tingting blong olgeta i stret, oli mas bos long fasin blong olgeta. Oli mas lanem blong fogetem tingting blong olgeta mo “rere blong soem ona” long ol narafala elda. (Rom 12:10) Prija 7:​16, (NW) i givim gudfala woning ya se: “I nogud yu ting se yu stret bitim mak, no yu soem se yu waes bitim mak. Mo i nogud yu kam waes tumas, we yu bitim mak blong waes. ?Weswe yu yu spolem yu wan olsemia?”

Jeova, we i Stamba blong “evri presen we oli nambawan,” hem i skelemgud ol fasin blong hem long rod we i stret gud olgeta. (Jemes 1:​17; Dutronome 32:4) !Mo hem i Tija blong yumi! From samting ya i gud yumi folem eksampel blong hem. Yumi mas traehad blong mekem se ol presen, no ol gudfala fasin we yumi gat, oli kam gud moa, mo yumi mas skelem ol presen ya wetem fasin waes, tingting daon, mo lav. !Sipos yumi mekem olsem, bambae yumi kam wan blesing blong ol narafala!

[Tok Blong Pija Long Pej 27]

Blong gru long saed blong spirit i nidim blong prea mo stadi oltaem mo dipen long Jeova

[Tok Blong Pija Long Pej 29]

Taem fasin blong soem intres long narafala i joen wetem tingting daon, tufala i save karem blesing

[Foto Credit Line Blong Pija Long Pej 26]

Courtesy of The Mariners’ Museum, Newport News, VA