?Bigfala Hil Blong Athos Wan “Tabu Hil”?

BLONG olgeta memba blong Otodoks Skul, we oli bitim 220 milyan man, Hil Athos, wan hil long not blong Gris, i wan long ol hil we i tabu tumas, long olgeta Otodoks Kristin long wol.” Blong bighaf long olgeta, wokbaot i go long “tabu hil ya” blong Athos, i wan drim we oli wantem se i kamtru long olgeta. ?Wanem ya “tabu hil ya”? ?From wanem oli tinghevi long hil ya? ?Mo “hil ya” nao, we ol man we oli fraetgud long God, oli mas luk i go long hem, blong oli kasem rod long saed blong spirit mo trufala wosip?

Tok ya “tabu hil” i kamaot long Baebol. Hem i laenap wetem fasin we i tabu, i klin, mo trufala wosip blong Jeova God, we i antap olgeta. Bigfala hil ya blong bifo, Saeon, i kam wan “tabu hil” taem King Deved i karem bokis blong kontrak long ples ya. (Ol Sam 15:1; 43:3; 2 Samuel 6:​12, 17) Afta we Solomon i bildim haos wosip, long hil ya Moriah, mining blong tok ya “Saeon” i kam joen tu, wetem ples we haos wosip i stap long hem; kasem taem ya, Saeon i gohed blong stap olsem “tabu hil” blong God. (Ol Sam 2:6; Joel 3:​17) Stat long taem ya we haos wosip blong God i stap long Jerusalem, oli kolem taon ya tu, “tabu hil” blong God​—Aesea 66:20; Daniel 9:​16, 20.

?Olsem wanem tede? Hil ya Athos​—no narafala hil​—?hemia “tabu hil” we ol man oli mas go long hem, blong wosipim God long fasin we hem i wantem?

Wan “Tabu Hil” Blong Ol Pris

Hil ya Athos i stap long is, long en blong kantri blong Chalcidice, antap long wan draeples, i go kasem sol wota blong Aegean, long is, we tede yumi kolem Thessaloníki. Hem i wan bigfala hil blong ston we hae blong hem i kasem 2032 mita, mo i kamdaon stret i go long sol wota.

Long taem bifo, kasem tede, ol man oli luk hil ya, olsem wan tabu hil. Long kastom store blong ol man Grik, hil ya hem i ples blong ol god, bifo we oli muf i go long Hil ya Olympus. Sam taem afta long taem blong Bigfala Constantine, long yia 400 K.T, Athos i kam wan tabu ples blong ol jos we oli talem se oli Kristin. Folem wan kastom store, “yangfala gel” Meri, wetem John hemia we i raetem wan long ol gospel, tufala i go long Cyprus blong visitim Lazarus, mo tufala i bin stap long ples ya Athos, from we wan bigfala hariken i bin kasem olgeta. Meri i sapraes bigwan long naesfala hil ya, taswe hem i askem Jisas blong mekem se hil ya i blong hem. Stat long taem ya, ol man oli kolem ples ya olsem “Garen Blong Gel Ya We i Tabu.” Long taem blong ol man Bisantin, ol man oli kolem ful hil ya we i kamaot, olsem Tabu Hil. Tok ya, oli putum bitwin ol yia 1000 kasem 1100 K.T., folem oda we Hae King Constantine 9 Monomachus, i bin talemaot.

From we ples ya, rod i nogud mo i drae, Athos i wan ples we i stret blong ol man we oli wantem blokem olgeta samting we oli wantem, oli go stap long hem. Tru long ol yia, ples ya i pulum plante man Otodoks, long ful wol​—ol man Grik, Serbia, Romania, Bulgaria, Russia, mo olgeta narafala kantri​—we oli bildim sam ples blong wosip, wetem ol jos mo ples blong olgeta. Twente blong olgeta oli stap laef long ples ya.

Bigfala Hil Blong Athos Tede

Tede, Athos i wan ples we i no dipen long wan kantri, folem kontrak we oli saenem long 1926. Afta we ol yia oli pas, namba blong ol pris we oli stap long ples ya, i kasem bitim 2,000.

Wanwan long ol jos ya, oli gat prapa garen blong oli wok long hem, ol jos, mo ol prapa haos blong olgeta. Laswan ples blong wosip blong ol pris, i stap long Karoúlia, antap long ol klif long Hil Blong Athos. Long ples ya i gat wan hif blong ol wanwan haos, we yu save kasem nomo, taem yu wokbaot folem wan smol rod we i fasfas, wetem ol ston, mo ol jen. Long Athos, evri dei ol pris oli stap folem yet olfala fasin blong wosip, taem oli folem klok blong ol man Byzantine (we dei i stat taem san i kamaot) mo folem kalenda blong Julian (13 dei biaen long kalenda blong Gregorian).

Nomata oli talem se ples ya blong wosip, i “tabu ples” blong Meri, 1,000 yia i pas, ol pris mo ol man we oli blokem ol samting we olgeta i wantem, oli talemaot se oli blokem ful ples ya, blong olgeta laef samting we oli woman​—man mo anamol​—wetem ol man we oli katem olgeta blong no karem pikinini, no olgeta we oli no gat mustas. I no longtaem, oli no moa strong long saed long rul blong no gat mustas mo long saed blong ol anamol we oli woman. Be oli blokem yet ol woman blong stap long wan mak blong 500 mita, long Hil ya blong Athos.

Wan “Tabu Hil” Blong Plante Man

?Athos, hem i “tabu hil ya” nao we ol Kristin we oli fraetgud long God, oli mas kam mekem wosip? Taem Jisas i toktok long wan woman Sameria we i bilif se ol man oli mas wosipim God long Hil Blong Gerizim, Jisas i talem klia se i no moa long hil ya we ol man oli mas mekem wosip i go long God. Jisas i talem se: “I gat taem i stap kam, we bambae yufala i no moa save mekem wosip long Papa blong yumi long bigfala hil ya [Gerizim], mo long Jerusalem tu.” ?From wanem? “God, hem i Spirit, mo ol man we oli wosip long hem, oli mas mekem long fasin ya we spirit blong God i givhan long olgeta, nao oli savegud se hem i tru God.”​—Jon 4:​21, 24.

Taem i tokbaot taem blong yumi, profet Aesea i talemaot wan pijatok long saed blong “hil ya we haos blong Jeova i stap long hem” bambae “i kam hae moa, i winim ol narafala hil. Mo ol man blong ol narafala kantri bambae oli save wokbaot blong kam long hem.”​—Aesea 2:​2, 3.

Man mo woman we oli wantem gat wan gudfala fasin fren wetem God, oli mas wosipim Jeova wetem “spirit mo trutok.” Plante milyan man long olgeta ples long wol, oli faenem rod blong olgeta long ‘hil blong Jeova.’ Oli gat sem filing, olsem wan woman Grik we i loea, we i talem tingting blong hem long saed blong Athos se: “Mi mi bilif se yu save faenem ol samting long saed blong speret long ples ya, no long ol jos ya.”​—Skelem wetem Ol Wok 17:24.

[Bokis Blong Pija Long Pej 31]

Wan Sas Samting We Oli Haedem Blong Plante Yia

Long ol yia we i pas, ol pris we oli stap long Hil ya Athos, oli holem plante impoten buk, mo tu i gat klosap 15,000 olfala hanraet. Samfala hanraet ya, yia blong olgeta i kasem 400 yia, samting ya i mekem se ol buk ya, oli ol sas buk we i stap long wol tede. I gat ol buk we oli rolem long wanwan pepa, ol fulwan buk mo ol pej blong ol Gospel, ol sam mo ol singsing. Mo tu i gat ol olfala pija we oli pentem, ol aedol, ol pija long wol, mo ol samting we oli wokem long aean. Oli talem se Hil ya Athos i holem wan long ol fofala olfala Grik hanraet, nating se plante long ol hanraet ya, oli nidim yet blong faenemaot stret taem blong olgeta. Long 1997, i fastaem we ol pris oli letem se ol man oli save luk ol impoten buk blong olgeta, long Thessaloníki.

[Foto Credit Line Blong Pija Long Pej 31]

Telis/Greek National Tourist Organization