?Yu Yu Stap Lanem Samting Long Bigfala Tija Blong Yumi?
JULIO i eksplenem se, “Mi stap stadi loa blong faef yia long wan long ol nambawan yunivesiti long Spen. Be wanem we mi lanem taem mi stat stadi Baebol i gud moa. Yunivesiti ya i tijim mi olsem wanem blong stadi; Baebol i tijim mi olsem wanem blong laef.”
Long Baebol yumi kasem ol tingting blong God, ol loa blong hem, mo ol tijing blong hem. Baebol i tokbaot Jeova olsem “Bigfala Tija” from we hem i nambawan tija long ful heven mo wol. (Aesea 30:20) Blong talem stret, Hibru lanwis i kolem Hem “ol tija”—fasin ya blong talem plante, i no wan nomo, i soem se hem i nambawan olgeta. Samting ya i mas mekem yumi tingbaot se Jeova i tijim yumi i gud moa bitim we eni narafala tija i save tijim yumi.
Waes Blong Jeova We i Wokgud
?From wanem tijing blong God i gud tumas? Faswan samting, from ol gudgudfala samting long hem. Tijing blong Jeova i givim long yumi “fasin waes we i save wokgud.” Antap moa, waes we God i givim “i save givim laef” long olgeta we oli mekem i wok.—Proveb 3:21, 22; Eklesiastis 7:12.
Man we i mekem singsing blong Ol Sam 119 i luksave se waes blong Jeova i bin lukaotgud long hem long ful laef blong hem. Eksampel, hem i sing se: “Long mi, Loa blong yu i gud moa, i winim olgeta mane long wol ya. Bifo ya, mi mi stap harem nogud tumas long bodi blong mi, mo sipos Loa blong yu i no stap mekem mi mi glad, mi mi ded finis. Tok ya we yu yu putum i stap oltaem long tingting blong mi, i stap mekem mi mi waes moa, i winim ol enemi blong mi. From we oltaem mi mi stap tingting long ol rul we yu yu mekem, mi mi save plante samting moa, i winim ol tija blong mi.”—Ol Sam 119:72, 92, 98, 99.
I no man blong raetem Ol Sam nomo we i save ‘ded from i harem nogud tumas long bodi blong hem,’ sipos i no gat loa blong Jeova. Rosa, wan yangfala woman long Spen, i bilif strong se hem i laef from we hem i mekem ol loa blong God i wok. Hem i talem se, “Long ol yia bifo we mi gat 26 yia, mi traem blong kilim mi wan i ded tu taem.”
Rosa i bin joen long fasin ya blong mekem woman blong rod, i yusum alkol bitim mak mo drag. Hem i talem se, “Wan taem, taem tingting blong mi i foldaon bigwan, wan man wetem woman blong hem we tufala i Wetnes, tufala i storeyan long mi olsem wanem Baebol i save halpem yumi blong stretem ol problem blong yumi. Mi stat stadi long Tok blong God, we mi faenem se i pulum intres blong mi. Long wan manis mi gat paoa blong jenisim mo mekem laef blong mi i klin fulwan. Naoia we mi gat plan long laef, mi no moa nidim alkol no drag. Mo from we mi wantem tumas blong kam fren blong Jeova, mi mekem tingting blong mi i strong blong laef folem ol loa blong hem. Sipos i no gat waes blong Tok blong God we i save wokgud, mi sua se bambae mi kilim mi wan i ded finis.”
I tru, waes we i kamaot long Jeova i stap sevem laef. From samting ya, yumi save haremgud i no from ol gudgudfala samting long tijing blong God nomo, be tu from ol rod we Jeova i stap yusum blong tijim ol man blong hem. From we Pikinini blong God, Jisas Kraes, i talem long yumi blong yumi kam ol tija mo ol man blong mekem disaepol, yumi wantem lanem ol nambawan fasin blong tij.—Matyu 28:19, 20.
Jeova i Yusum Ol Pijatok
Gospel blong Mak i talem se “ol tok blong hem [Jisas], hem i no talem klia long olgeta, i talem long olgeta long parabol nomo.” (Mak 4:34) Fasin ya we Jisas i yusum oltaem blong tij i no wan sapraes. Hem i folem nomo wan long ol rod we Jeova i yusum blong givim profet tok long nesen blong Isrel. Oli fulap long ol klia pijatok.—Aesea 5:1-7; Jeremaea 18:1-11; Esikel 15:2-7; Hosea 11:1-4.
Wan eksampel, tingbaot olsem wanem Jeova i yusum wan pijatok we i gat paoa blong tijim yumi se ol aedol oli no save givhan nating long yumi. Aesea 44:14-17 i talem se: “I gat wan man we i mekem bisnes blong katemdaon ol tri ya sida; hem i tekem wan kaen tri, hemia we i bigwan . . . hem i planem tri ya lorel, . . . hemia wud ya we man i yusum blong mekem wan faea. Ale, hem i yusum haf wud ya, blong mekem hem i stap womgud. Yes hem i mekem wan faea mo i kukum bred long hem. Mo hem i wokem wan god tu, blong i save bodaon long hem. Hem i katem wud ya i kam wan aedol, mo hem i stap bodaon fored long hem. Long wan haf blong wud ya, hem i mekem faea. Long haf ya, hem i rusumgud mit we hem i wantem kakae, nao hem i fulumap bel blong hem. . . . Be long narafala haf blong wud, hem i wokem wan god, yes, hem i katem wan imej. Nao hem i foldaon blong mekem wosip long hem, mo hem i bodaon, mo hem i prea long hem, i se: ‘Plis yu halpem mi, from we yu yu god blong mi.’ ” Ol pijatok olsem oli ol tul we oli gat paoa blong halpem ol man we hat blong olgeta i stret blong no laekem nating wosip blong ol aedol mo ol gyaman tijing.
Ol Kwestin Blong Mekem Man i Jekemgud Hem Wan
Baebol i fulap tu long ol eksampel blong soem olsem wanem Jeova i stretem tingting blong sam man blong hem taem hem i askem ol kwestin we oli pulum tingting blong olgeta. Olfala ya Job i wan long olgeta. Wetem longfala tingting, Jeova i halpem hem blong luksave se hem i smol nomo taem hem i skelem hem wan wetem God. Jeova i mekem samting ya taem i askem plante kwestin long Job, we Job i no save ansa long olgeta nating.
Jeova i askem Job se, “?Yu yu stap wea taem mi mi putum fandesen blong wol ya? ?Hu i stopem solwora wetem ol doa? . . . ?Yu yu save fasem strong grup blong ol sta ya Kima, no yu yu save karemaot rop we i holemtaet grup blong ol sta ya Kesil? . . . ?Yu yu gat wan han olsem han blong trufala God?” Wan long ol kwestin ya we i pulum Job blong mekem tingting blong hem i stap daon, hemia impoten kwestin ya: “?Bambae yu talem se mi [Jeova] mi nogud, blong yu save mekem olsem we yu wan yu stret?”—Job 38:4, 8, 31; 40:8, 9.
Ol kwestin ya blong pulum tingting oli mekem Job i luksave se hem i no save wanem we hem i stap talem. Taswe, hem i tekembak tok blong hem mo i tanem tingting blong hem. (Job 42:6) Olsemia nao, ol kwestin we oli stret i save givhan blong stretem tingting we i no stret long ol pikinini blong yumi no ol Baebol studen.
Wokem Fasin No Fraet
?Olsem wanem sipos yumi mas givhan long wan man we i harem se hem i nogud no i no naf blong mekem wan samting? Toktok blong Jeova wetem profet blong hem Moses i save givhan long yumi long saed ya. Taem God i jusum Moses blong i kam man blong talem tok blong hem long Fero mo ol man Isrel, profet ya i harem se i no gat naf save blong mekem wok ya. Hem i talem se, “Taem mi traem talemaot tingting blong mi, mi no save toktokgud nating.” Be, God i ansa se: “?Hu i mekem maot blong man? . . . Mi nomo mi save mekem samting ya. !Yu go naoia! Bambae mi mi givhan long yu long toktok blong yu, mo bambae mi talem long yu wanem we yu yu mas talemaot.”—Eksodas 4:10-12.
Jeova i talem long Eron brata blong Moses blong i kam man blong talemaot tok blong Moses, mo oli finisim wok blong olgeta long Ijip. (Eksodas 4:14-16) Olsem Moses, plante Wetnes blong Jeova oli gat sem filing we oli no naf taem oli stat joen long wok blong prij long ol haos wanwan no taem oli stap wetnes long rod. Olsem Moses yumi save se Jeova i stap sapotem yumi mo we bambae yumi kampani wetem wan we i gat ekspiryens long wok blong prij, mo ol samting ya oli save halpem yumi blong winim fasin ya blong fraet blong toktok. Moses i wokem fasin no fraet go kasem mak we hem i mekem ol bigfala toktok blong hem we oli gat paoa we yumi faenem long Baebol Buk blong Dutronome, sem mak nao, wetem help blong Jeova, yumi tu i save mekem fasin blong toktok blong yumi i kamgud.
Wan Pijatok Blong Tijim Man
Mo tu, yumi nidim trufala fasin ya blong wantem halpem ol narafala. Hemia fasin ya we profet Jona i slak long hem. Jeova i talem long Jona blong givim woning long ol man Nineve se bambae Hem i spolem taon ya i no longtaem. I wan sapraes we, ol man Nineve oli tanem tingting blong olgeta. (Jona 3:5) From samting ya, Jeova i no moa spolem olgeta. Samting ya i mas mekem Jona i glad bigwan long frut we i kamaot from nambawan wok blong hem blong prij, be long defren fasin, hem i kros from se bambae samting we i talemaot i no save kamtru. ?Olsem wanem Jeova i givhan long hem blong kasem stret tingting?
Jeova i yusum wan tri blong tijim Jona se i impoten tumas blong gat fasin ya blong tingbaot narafala. Tri ya i gru long wan naet olsem merikel mo i givim sado long Jona, we i bin bildim wan smol haos blong hem jes afsaed long taon blong Nineve. Jona i stat blong “glad bigwan” long tri ya we i no rili impoten tumas. Be biaen Jeova i mekem bebet i spolem tri ya nao i kam drae. Taem Jona i stap harem nogud long san mo long win we i drae, hem i kam kros mo i talem se: “I moa gud mi ded bitim we mi stap laef.” (Jona 4:5-8) ?Yumi lanem wanem long ol samting ya?
Jeova i toktok long Jona mo i talem se: “Yu, yu sore long tri ya, we yu yu no wok nating blong mekem i bigwan, we i gru bigwan long wan naet nomo mo i lus long wan naet tu. ?Mo, long saed blong mi, mi no save sore long bigfala taon ya Nineve, we i gat bitim wan handred twante taosen man long hem we oli no save nating se raet han blong olgeta i defren long lef han, mo sore long ol anamol blong olgeta tu?”—Jona 4:9-11.
!Tijing ya i gat bigfala paoa! Jona i intres moa long tri ya bitim ol taosen man. Nating se i gud blong kea long olgeta samting we God i wokem, wok ya blong yumi blong givhan blong sevem laef blong ol man i impoten moa.
Stap Tij Wetem Longfala Tingting
Olsem we Jona i faenemaot, samtaem i no isi blong finisim minista wok blong yumi. (2 Timote 4:5) Be, fasin ya blong gat longfala tingting long ol narafala bambae i givhan.
?Yu yu mekem olsem wanem taem wan long ol Baebol studen blong yu i slou no i no wantem luksave? Bigfala Tija blong yumi i tijim yumi olsem wanem blong winim problem olsem. Hem i soem nambawan longfala tingting taem Ebraham i gohed blong askem ol kwestin long hem long saed blong jajmen blong Sodom mo Gomora. Ebraham i askem se, “?Bambae yu kilim ol man nogud wetem ol stret man tu? ?Sipos i gat fefte man i stap long taon ya we oli stap mekem i stret nomo, yu ting se bambae yu mas spolem olgeta man blong taon ya?” Taem Jeova i agri long Ebraham, samting ya i pusum Ebraham blong gohed blong askem kasem we namba i kamdaon long ten. Jeova i save se famle blong Lot nomo oli stret blong no kasem panis, mo hem i mekem wan rod finis blong sevem famle blong Lot. Be God i gat longfala tingting blong letem Ebraham blong gohed blong askem kwestin long hem gogo Ebraham i kasem save long bigfala fasin sore blong Jeova.—Jenesis 18:20-32.
Jeova i tingbaot we Ebraham i no kasem save fulwan, mo tu, Jeova i tingbaot ol filing blong hem. Sipos yumi tu i kasem save we ol studen blong yumi oli no gat plante save, bambae i givhan long yumi blong gat longfala tingting taem oli traehad blong kasem save long wan tijing no blong winim wan nogud fasin we i strong blong winim.
Stap Gohed Blong Lanem Samting Long Jeova
I klia se Jeova God i Bigfala Tija. Tru long ol pija tok, ol kwestin, mo ol samting blong tijim lesen long man, hem i gat longfala tingting blong mekem man i kasem save. Stret long mak we yumi traehad blong folem ol fasin blong hem blong tij, bambae yumi wanwan i kamgud moa long fasin blong tij.
Olgeta we oli tijim ol narafala oli no mas foget blong tijim olgeta wanwan, taswe yumi mas gohed blong letem “Jeova i tijim yumi.” (Aesea 54:13) Aesea i raetem se: “Bambae yufala i luk Bigfala Tija blong yufala. Mo bambae yufala i harem wan tok biaen long yufala i talem se: ‘Hemia rod ya. Yufala olgeta man, yufala i wokbaot long hem,’ blong yufala i no tanem i go long raet saed no long lef saed.” (Aesea 30:20, 21) Sipos yumi stap wokbaot long rod blong Jeova mo halpem ol narafala man blong mekem olsem, yumi save kasem spesel blesing blong lanem plante samting long Bigfala Tija ya blong yumi blong olwe.
[Tok blong pija long pej 28]
Jeova i askem long Job se: “?Yu yu givim oda long igel blong i flae antap mo i bildim haos blong hem antap?”
[Tok blong pija long pej 28]
From wan tri, Jeova i tijim Jona blong tingbaot ol man moa