?Ol Dedman Oli Stap Olsem Wanem?
FRAET long ded i stanap long wan bilif—se dedman i gat sol no speret we i laef afta ded. Sipos Baebol i tijim se tingting ya i gyaman, ale kwestin ya se dedman i save spolem yu i kasem klia ansa blong hem. Oraet, ?Baebol i talem wanem?
Long saed blong ol dedman oli stap olsem wanem, Tok blong God i talem se: “Ol man we oli laef oli save se bambae oli mas ded. Be ol dedman oli no save wan samting nating. Mo oli no moa save kasem pei, from we ol man oli fogetem olgeta finis. Mo tu, fasin blong olgeta blong laekem wan samting no blong no laekem nating wan samting, mo fasin jelas blong olgeta, oli finis. Mo olgeta oli no moa save joen long olgeta wok we i mas kamaot aninit long san, gogo i no save finis.”—Eklesiastis 9:5, 6.
From samting ya, ?dedman i save halpem no spolem yu? Baebol i talem se, no gat. Ol dedman oli no gat tingting mo oli no save wan samting. Oli no save toktok wetem olgeta we oli laef no soemaot filing—blong laekem wan samting no blong no laekem wan samting—no blong mekem eni samting. Yu yu no nid blong fraet long olgeta.
Samfala oli save talem se, ‘Oraet, yes, samting ya i save tru sipos yu tingbaot ded blong prapa bodi. Be ded blong prapa bodi i no en blong laef; long taem ya speret i lego bodi nomo. Speret ya i save halpem no spolem man we i laef.’ Plante milyan man long wol oli ting olsem.
Eksampel, long Madagaska oli tingbaot laef olsem wan taem we man i pastru long hem blong jenis i go long narafala laef, taswe ol samting we oli mekem blong berem dedman mo fasin ya blong karemaot bodi blong dedman long beregraon oli impoten moa bitim wan mared. Oli ting se man i kamaot long ol olfala blong hem mo taem i ded, i gobak long olgeta. Taswe, ol haos we ol laef man oli stap long olgeta oli mekem long wud mo brikis we oli wokem long sofmad, hemia ol samting we oli save lus afta we plante taem i pas, be ol gref, “ol haos” blong ol dedman, oli wokem i naes moa mo i blong stap longtaem. Taem oli karemaot wan dedman long gref blong hem, famle mo ol fren oli harem se bambae oli kasem blesing, mo ol woman oli bilif se sipos oli tajem bun blong ol famle we oli ded, bambae oli save gat pikinini. Be, bakegen, ?Tok blong God i talem wanem?
God i No Wantem We Man i Ded
I gud tumas blong tingbaot se Jeova God i wokem man blong laef, mo i tokbaot ded olsem frut we i kamaot from fasin ya blong no obei nomo. (Jenesis 2:17) Be sore tumas, faswan man mo woman i mekem sin, mo from samting ya, sin i go long olgeta man mo olgeta oli ded from. (Rom 5:12) Taswe yumi save talem se ded i wan samting we yumi fesem stat taem tufala faswan man mo woman i no obei, yes, hemia wan trutok we i mekem yumi harem nogud. God i mekem yumi blong laef, mo hemia wan risen from wanem i had tumas long plante milyan man blong bilif se ded i en blong evri samting.
Baebol i talem se, Setan i traem blong gyaman long faswan man mo woman long saed blong ded taem i agensem woning blong God se fasin blong no obei bambae i givim ded. (Jenesis 3:4) Be, taem ol yia oli stap pas, i kam klia se ol man oli stap ded stret olsem we God i bin talem. Taswe, long ol handred yia we oli pas finis, Setan i traem blong agensem samting ya wetem wan narafala gyaman bakegen—se wan haf blong man no speret blong hem i laef afta we bodi i ded. Fasin gyaman olsem i stret long Devel Setan, we Jisas i tokbaot hem olsem “stampa blong ol gyaman toktok.” (Jon 8:44) Be samting we God i mekem i defren olgeta, hem i givim wan promes blong leftemap tingting blong ansa long fasin ya we ol man oli stap ded.
?Wanem Promes?
Promes ya se bambae plante man oli laef bakegen long ded. Grik tok ya a·naʹsta·sis oli tanem i kam “fasin ya blong laef bakegen.” Prapa mining blong hem se “stanap bakegen,” mo i go stret long fasin blong laef bakegen long ded. Yes, man i slip long ded, be paoa blong God i save mekem man i girap bakegen. Man i lusum laef be God i save givim laef long hem bakegen. Pikinini ya blong God, Jisas Kraes, i talem se “taem i stap kam we ol dedman we oli stap long beregraon, bambae oli harem voes blong mi, nao bambae oli aot long beregraon.” (Jon 5:28, 29) Aposol Pol i talem se hem i putum ‘tingting blong hem long God . . . se God bambae i mekem olgeta man oli laef bakegen long ded, ol man we oli stret, wetem ol man we oli no stret.’ (Ol Wok 24:15) Job, man blong God we i gat strong bilif bifo long taem blong ol Kristin, i talemaot hop blong hem tu blong laef bakegen: “?Sipos wan man we i strong gud i ded, hem i save laef bakegen? Evri dei long wok kalabus ya we mi mas mekem, bambae mi mi wet gogo kasem taem we bambae mi mi fri bakegen. Yu [God] bambae yu singaot long mi, nao mi bambae mi ansa long yu.”—Job 14:14, 15.
Klia promes ya blong laef bakegen long ded i pruvum we tingting ya se ol dedman oli laef long speret bodi i gyaman, ?i tru? Sipos ol dedman oli laef mo oli stap haremgud long laef long heven no long wan wol blong ol speret man, ?fasin ya blong laef bakegen bambae i blong wanem? Oli kasem presen no fyuja blong olgeta finis, ?no? Stadi long Tok blong God i soemaot se ol dedman oli ded tru, oli no moa gat tingting, bambae oli slip gogo kasem bigfala taem ya blong laef bakegen long ded long nyufala wol—long paradaes—we Papa blong yumi we i laekem yumi tumas, Jeova, i promes long hem. Be sipos ded i no minim we bodi i seraot long speret mo sipos speret i no gohed blong laef, ?olsem wanem long ol store we ol man oli talem se ol speret oli bin toktok wetem olgeta?
Toktok We i Kamaot Long Ples Blong Ol Speret Man
I gat plante ripot long toktok we i kamaot long ples blong ol speret man. ?Wanem i rili stampa blong olgeta? Baebol i givim woning long yumi se “Setan, hem i save putum wan gyaman fes olsem wan enjel blong laet. From samting ya i isi nomo blong ol man blong hem tu oli putum gyaman fes se oli ol gudfala man.” (2 Korin 11:14, 15, The New English Bible) Yes, blong mekem i isi moa blong gyaman mo lidim nogud ol man, ol dimon ya (ol enjel we oli agensem God) oli toktok wetem ol man we oli laef, samtaem oli mekem olsem we oli stap givhan long olgeta.
Aposol Pol i givim moa woning from wok ya blong gyaman long ol man se: “Sam man oli save lego fasin blong bilif long God. Bambae olgeta ya oli obei long ol devel we oli blong gyaman nomo, bambae oli biaen long ol toktok ya we ol devel nomo oli tijim olgeta long hem.” (1 Timote 4:1) Taswe eni toktok we i kamaot long dedman, i klia se i kamaot long ol devel we oli putum gyaman fes se oli “ol gudfala man” be oli stap leftemap gyaman bilif, oli mekem ol man oli kam slef long ol gyaman tingting we oli lidim olgeta oli go longwe long trutok blong Baebol.
Blong pruvum se dedman i no save talem wan samting, no save mekem wan samting, mo i no save filim wan samting, Ol Sam 146:3, 4 (NW) i talem se: “I nogud yufala i trastem ol haeman, mo ol pikinini blong man we i kamaot long graon, from we oli no save sevem yu. Speret blong hem i kamaot long hem, nao man ya i gobak long graon blong hem bakegen. Long sem dei ya ol tingting blong hem oli finis.” ?Wanem speret ya we “i kamaot”? Hemia paoa blong laef blong man we i stap gohed from win we man ya i pulum. From samting ya, taem dedman i no moa pulum win, hem i no moa save lukluk, harem, smelem, testem, no filim wan samting. Hem i kam we i no moa gat tingting no filing nating. Taswe hem i no save kontrolem ol man we oli stap laef.
Hemia from wanem Baebol i skelem ded blong man wetem ded blong anamol, i talem se tufala i no moa gat tingting nating taem tufala i ded mo tufala i gobak long graon ya we tufala i kamaot long hem. Eklesiastis 3:19, 20 i talem se: “I gat wan en long ol pikinini blong man, mo i gat wan en long ol anamol, nao en blong tufala i sem mak nomo. Olsem man i ded, anamol tu i ded long sem fasin. Mo olgeta evriwan oli gat wan speret we i sem mak nomo. Olsem ya nao, man i no hae moa long ol anamol, from we olgeta samting oli blong nating nomo. Olgeta evriwan oli go long sem ples nomo. Olgeta evriwan oli kamaot long graon fastaem, mo olgeta evriwan oli gobak long graon bakegen.”
Jeova God i save se ol dimon oli traem blong gyaman long ol man blong oli ting se oli save toktok wetem mo kasem help no trabol from ol dedman, taswe hem i givim woning long ol man blong hem, ol man Isrel bifo se: “Long laen blong yu bambae i no mas gat wan man we i . . . man blong talemaot ol samting we oli stap haed, no man blong mekem majik, no man blong lukaot ol saen, no man blong mekem posen, no man we i stap wokem nakaemas long narafala man, no man we i go luk kleva, no man we i stap soemaot ol samting we bambae oli save kamtru, no man we i wantem toktok wetem ol dedman. From we long tingting blong Jeova, ol man we oli stap mekem ol samting ya oli rabis nomo.”—Dutronome 18:10-12.
I klia se, tingting ya se dedman i save spolem yumi i no kam long God. Hem i God blong trutok. (Ol Sam 31:5; Jon 17:17) Mo bambae hem i givim wan nambawan fyuja long ol man we oli laekem trutok we oli wosipim hem “wetem speret mo trutok.”—Jon 4:23, 24.
Jeova, God Blong Trutok mo Lav
Papa blong yumi long heven we i laekem yumi tumas, “we i no save gyaman,” i promes se: !Plante plante milyan man we oli ded mo oli stap long beregraon bambae oli laef bakegen wetem hop blong laef blong olwe long nyufala wol blong stret fasin! (Taetas 1:1, 2; Jon 5:28) Nambawan promes ya blong laef bakegen i soemaot se Jeova i intres bigwan long ol man we hem i wokem olgeta mo hem i wantem tumas blong finisim ded, fasin blong harem nogud, mo soa long bodi. Taswe i no nid blong fraet long ol dedman mo blong wari tumas long olgeta mo fyuja blong olgeta. (Aesea 25:8, 9; Revelesen 21:3, 4) God blong yumi, Jeova we i gat lav mo stret fasin, i save mekem olgeta oli laef bakegen, mo bambae hem i mekem olsem, bambae i tekemaot fasin blong harem nogud from ded.
Tok blong God, Baebol, i talem plante samting blong eksplenem se wol ya bambae i olsem wanem taem nyufala wol blong stret fasin we God i promes long hem bambae i kamtru. (Ol Sam 37:29; 2 Pita 3:13) Bambae i wan taem blong pis, glad mo blong fasin ya blong laekem tumas ol man. (Ol Sam 72:7; Aesea 9:7; 11:6-9; Maeka 4:3, 4) Evriwan bambae oli gat gudfala haos we i sef, mo bambae oli haremgud long wok blong olgeta. (Aesea 65:21-23) Bambae i gat plante gudfala kakae blong evriwan oli kakae. (Ol Sam 67:6; 72:16) Evriwan bambae oli haremgud fulwan long bodi blong olgeta. (Aesea 33:24; 35:5, 6) Ol aposol mo stret namba blong ol narafala bambae oli rul long heven wetem Jisas, be Baebol i no tokbaot se ol sol blong ol narafala we oli ded bambae oli kasem ol blesing long heven. (Revelesen 5:9, 10; 20:6) Hemia bambae i no stret sipos plante bilyan man we oli ded oli stap laef yet afta we oli ded.
Be evri samting i stret nomo taem yumi save ol klia tijing blong Baebol: Ol dedman oli no moa stap olsem ol laef sol. Oli no save spolem yu. Olgeta we oli stap long beregraon oli stap spel nomo, tingting blong olgeta i finis gogo kasem stret taem ya we God bambae i mekem olgeta oli laef bakegen. (Eklesiastis 9:10; Jon 11:11-14, 38-44) Hop mo plan blong yumi long fyuja i dipen long God. “Yumi glad mo haremgud long fasin blong hem blong sevem yumi.”—Aesea 25:9.
[Tok blong pija long pej 7]
Olsem we Tok blong God i soemaot klia, ol dedman oli no save mekem wan samting nating gogo kasem taem ya we bambae oli laef bakegen