Ripot Long Wok Blong Kingdom

Bambae Ol Man Oli Talemaot Gud Nyus Blong Kingdom

PLANTE handred yia finis, bigfala enemi blong God, Devel Setan, i stap yusum ol politik gavman mo ol gyaman skul long fasin haed, blong traem blokem trufala Kristin Skul blong i no moa gohed. Be bambae hem i no save win. Jisas i talem se, “gud nyus ya blong kingdom, bambae oli talemaot [i no se “maet oli talemaot” no, “oli save talemaot”] long olgeta ples long wol we i gat man long hem, blong oli wetnes long olgeta nesen.”​—Matyu 24:14, NW.

Fasin ya we Setan i no blokem wok ya, i bin kamaot klia long Gris. Long kantri ya, Grik Otodoks Jyos i bin traehad blong blokem ol Wetnes blong Jeova blong no talemaot gud nyus blong Kingdom. Be, ekspiryens we i kam biaen i soem se sloslou, ol trutok blong Baebol oli kasem olgeta we hat blong olgeta i stret, nating se i gat fasin agens.

Samwe long 30 yia bifo, wan pris blong Grik Otodoks i akseptem gud nyus mo i soemaot se hem i wantem tumas blong kam wan Wetnes blong Jeova. Be, ol famle blong hem oli strong blong agensem disisen blong hem mo oli fosem hem blong no moa joen wetem ol Wetnes. Blong mekem famle blong hem i glad, hem i gohed long wok blong hem olsem wan pris; be, oltaem hem i tingbaot se ol Wetnes blong Jeova oli bin givhan long hem blong lanem trutok mo se hem i lego stadi ya blong trutok blong holem haenem long wan gyaman skul.

Nating se i olsem, neva hem i fraet blong sapotem ol Wetnes blong Jeova long tok blong hem, taem i gat jans. Samtaem, hem i givim advaes long ol man se sipos oli wantem lanem ol trutok blong Baebol, oli mas stadi wetem ol Wetnes. Long ol yia we oli pas, samfala oli folem advaes blong hem.

I no longtaem i pas, pris ya i sik tumas mo hem i save se maet i no longtaem bambae hem i ded. Taem hem i stap long hospital, hem i singaot ol pikinini blong hem blong oli kam. Ale oli kam hivap kolosap long bed blong hem.a Nao hem i eksplenem long olgeta se, sipos hem i ded, bambae oli save luk hem bakegen. Hem i tokbaot tijing blong Baebol long olgeta, se bambae Jeova i mekem plante man oli laef bakegen long ded blong stap long paradaes long wol, be sipos oli rili wantem blong luk samting ya, oli mas lanem trutok long Baebol mo kamaot fulwan long ol gyaman skul. Hem i talem long olgeta blong joen wetem ol Wetnes blong Jeova mo lanem olsem wanem blong kam ol trufala Kristin.

Smoltaem biaen, pris ya i ded. Be, advaes we hem i talem long ol pikinini blong hem jes bifo we hem i ded, i karem ol gudfala frut. Dota blong hem, olsem bighaf blong ol famle blong hem, i bin agensem tumas ol Wetnes blong Jeova mo wok blong olgeta. Be hem i no save sakemaot tok ya we i kamaot long hat blong papa blong hem taem kolosap hem i ded. Ale, smoltaem biaen, hem i toktok wetem ol Wetnes blong Jeova mo i stat blong stadi Baebol. I no longtaem i pas, hem i mekem disisen blong kam wan Wetnes, i givim laef blong hem blong mekem wok blong Jeova God mo i baptaes long wora blong soemaot samting ya.

Long Gris, olsem long 230 narafala kantri, ol Wetnes blong Jeova oli dipen long paoa blong tabu speret blong God. From we tabu speret i sapotem olgeta fulwan, oli stap joen blong mekem profet tok blong Jisas i kamtru, se: “Taem tabu speret i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo long olgeta ples long Judia mo Sameria, gogo i finisim olgeta ples long wol.”​—Ol Wok 1:8.

[Futnot]