?Ol Kristin Oli Mekem Wanem Taem Ol Man Oli Spolem Gudnem Blong Olgeta?
?YU YU harem olsem wanem taem wan man i spolem gudnem blong yu no i talemaot sam gyaman tok long saed blong yu? Samting ya i save spolem filing blong yu bigwan. Ol Wetnes blong Jeova oli gat sem filing taem ol man oli raetem long nyuspepa no talem long radyo sam rong no gyaman tok long saed blong olgeta. Be, olsem Jisas i talem long Matyu 5:11, 12, oli gat risen yet blong glad.
Wan eksampel, wan nyuspepa blong ol Katolik long Jemani i talem se, “ol wanwan Wetnes oli mas givim 17 % kasem 28 % blong mane blong olgeta i go long hedkwota blong grup blong olgeta, we i folem tingting blong wan man.” Be, Ol Wetnes blong Jeova oli no wan grup we i folem tingting blong wan man. Mo ol mane we oli kasem blong givhan long wok blong olgeta long saed blong skul, hem i presen mane nomo. Plante man we oli ridim nyuspepa ya, oli gat rong tingting from ol gyaman tok ya, mo Ol Wetnes blong Jeova oli sore from. ?Be ol tru Kristin oli mas mekem wanem taem ol man oli spolem gudnem blong olgeta from sam gyaman ripot long ol nyuspepa no radyo?
Wan Eksampel We Ol Kristin Oli Save Folem
Matyu japta 23 i talem ol klia tok we Jisas i yusum blong soemaot fasin tu fes mo gyaman fasin blong ol lida blong jyos we oli stap agensem hem. ?Samting ya i soemaot wan rod we ol Kristin tede oli save folem taem ol man oli tok agens long olgeta? I no olsem. Pikinini blong God i save tok strong olsem long ol lida blong skul we oli agensem hem, from we hem i gat spesel paoa mo fasin luksave. Hem i mekem olsem blong givhan long bigfala hif blong man we oli stap lesin long hem.
Matyu 15:1-11 i tokbaot se ol lida ya oli tok agens long Jisas se ol disaepol blong hem oli no folem kastom blong ol man Jyu. ?Jisas i mekem wanem? Hem i stanap strong. Samtaem, Jisas i agyu strong wetem olgeta we oli agensem hem, blong soemaot se tingting blong olgeta i rong. I tru se ol Kristin tede oli no rong taem oli traem stretem sam gyaman tingting we man i gat long saed blong wok no tijing blong olgeta. I no rong blong traem mekem trutok i klia tru long sam pruf mo stret save. Oli mekem olsem blong halpem olgeta man we oli gat gudhat, blong oli luksave se ol tok agensem Ol Wetnes blong Jeova i no gat pruf, mo hem i jes blong daonem olgeta nomo.
Be, makem wanem Jisas i talem smoltaem biaen. Hemia afta we ol disaepol blong hem oli talem se: ‘?Yu save we ol Farisi oli foldaon from ol tok ya we yu yu talem?’ Ol Farisi ya oli ‘foldaon’—oli no jes harem nogud be oli kam ol stronghed man blong agens we Jisas i no wantem olgeta. Taswe hem i ansa se: ‘Yufala i livim olgeta ya. Olgeta oli lida, be oli blaen.’ Fasin blong gohed blong storeyan wetem ol man olsem we oli kros mo oli agensem hem oltaem, i blong nating nomo. Storeyan olsem i no save givhan long eni man, mo bambae i statem wan rao nomo. (Matyu 7:6; 15:12-14; skelem Matyu 27:11-14.) Ol ansa we Jisas i givim oli soemaot se i gat “wan taem blong stap kwaet mo wan taem blong toktok.”—Eklesiastis 3:7.
Ol Wetnes blong Jeova oli save se i no evri man we bambae i talem sam gudfala tok long saed blong olgeta. Oli tingbaot tok blong Jisas se: “Taem we ol man oli stap leftemap nem blong yufala, sore tumas long yufala. Fasin ya, hemia sem fasin nomo we ol olfala blong olgeta oli bin mekem long ol gyaman profet blong bifo.” (Luk 6:26) Wan taem, wan man i askem C. T. Russell, we hem i faswan presiden blong Watch Tower Sosaeti, from wanem hem i no tok agensem olgeta we oli spolem gudnem blong hem. Hem i ansa se: “Sipos yu stap wokbaot mo yu stop oltaem blong kikim evri dog we i singaot long yu, bambae yu neva gohed.”
Taswe yumi no mas letem ol tok blong ol man we oli stap agensem yumi, i pulum tingting blong yumi we yumi no moa gohed strong long wok blong God. (Ol Sam 119:69) Yumi mas putum tingting blong yumi i stap strong long wok blong ol tru Kristin, hemia wok blong talemaot gud nyus. Taem yumi stap mekem wok ya, samtaem bambae yumi gat jans blong ansarem sam kwestin mo eksplenem wok blong yumi, we hem i blong givhan long ol man blong mekem laef blong olgeta i kamgud moa, mo i blong tijim olgeta long ol Tok blong God.—Matyu 24:14; 28:19, 20.
?Yu Mas Mekem Wanem Taem Man i Tok Agens Long Yu?
Jisas i talem long saed blong ol man blong hem se: “Yufala i no man blong wol ya. . . . Taswe ol man blong wol oli no laekem yufala, oli agens long yufala.” (Jon 15:19) Plante ripot long ol nyuspepa mo radyo we oli spolem gudnem blong Ol Wetnes blong Jeova, oli soemaot fasin ya blong no laekem yumi. Mo yumi mas fogetem ol ripot olsem. Be, sam ripot we ol nyuspepa mo radyo oli mekem, oli soemaot se ol man ya oli no savegud ol Wetnes, mo se oli stap tanem trutok mo talem sam samting we oli no stret. Sam man blong ripot maet oli karem save blong olgeta long sam man we oli gat tingting agens. Blong mekem disisen sipos yumi mas fogetem ol gyaman tok long nyuspepa no yumi mas yusum sam rod we oli stret blong stanap long saed blong trutok, yumi mas tingbaot wanem samting i mekem ol gyaman tok ya oli kamaot mo ples mo taem blong hem, hu man we i sakem tok agens ya, mo wanem we hem i wantem kasem from.
Samtaem yumi save stretem ol tok ya taem yumi raetem wan gudfala leta long nyuspepa, hemia sipos oli prentem fulwan leta ya long nyuspepa. Be samtaem maet wan leta olsem i save givim wan risal we i defren olgeta long risal we yu wantem. ?Olsem wanem? Gyaman tok we i kamaot fastaem, maet oli save mekem i kam bigwan moa. Mo maet leta blong yumi i givim narafala jans long olgeta blong prentem sam moa gyaman tok mo tok blong daonem yumi. Kolosap oltaem, i moa waes blong livim ol elda oli mekem disisen se bambae oli raetem wan leta no no gat. Sipos wan nogud ripot long nyuspepa i mekem plante man oli gat tingting agens, branj ofis blong Watch Tower Sosaeti i save talem trufala store long ol kongregesen long kantri we ripot i kamaot long hem. Bambae samting ya i givhan long ol man blong talemaot gud nyus, blong eksplenem klia trufala store long ol man we oli wantem save.
?Ating yu wan yu no nidim blong wari nating long ol gyaman tok agens olsem? Advaes blong Jisas blong ‘livim olgeta,’ we yumi no intres long olgeta, i stretgud blong mekem long olgeta ya we oli stap agens. Baebol i givim ol gudfala risen long ol Kristin we oli stap tru long God, blong ronwe long ol man we oli lego trutok finis, mo ol tok agens blong olgeta. (1 Korin 5:11-13; Taetas 3:10, 11; 1 Jon 2:19; 2 Jon 10, 11) Sipos wan man i rili wantem save sipos ol tok agensem ol Wetnes oli tru no gyaman, kolosap evri taem save we yu yu gat i naf blong givim ansa long hem.—Lukluk Wajtaoa blong Maj 15, 1986, pej 13 mo 14 (Engglis mo Franis).
Sipos yu ridim sam gyaman tok long nyuspepa no harem long radyo, folem advaes blong Proveb 14:15: “Man we i no gat save i bilif long evri tok, be hemia we i waes i lukluk gud long ol rod blong hem.” Long Swiselan, plante man oli kam kros taem oli ridim wan ripot long nyuspepa we i pulum filing blong ol man. Hem i talem se wan yangfala gel, we i wan Wetnes, hem i ded from we famle blong hem i blokem ol dokta blong givim blad long hem. ?Be, hemia i rili trufala samting we i bin hapen? No gat. Gel ya i no wantem karem blad from bilif blong hem, be hem i agri blong karem wan narafala meresin long ples blong blad. Sipos oli bin givim meresin ya kwiktaem, maet hem i no ded. Be no, hospital i wet longtaem tumas, ale gel ya i ded. Ripot blong nyuspepa i no talem ol samting ya.
Taswe, yumi mas skelemgud hamas trutok i stap long ol ripot ya. Sipos sam man oli wantem save moa, yumi save eksplenem long olgeta se ol lokol elda oli lukaot long ol bisnes olsem wetem fasin lav, mo oli folem ol advaes blong Baebol. Taem yumi stap eksplenem samting ya long wan man, sipos yumi tokbaot ol stampa rul we yumi stap folem, samting ya i save blokem yumi blong yumi no talem sam tok kwiktaem we maet i no stanap long ol trufala samting.—Proveb 18:13.
I Impoten Blong Askem Stret Long Ol Wetnes
Long faswan handred yia, ol man oli talemaot plante gyaman tok agensem Jisas Kraes blong spolem gudnem blong hem. Samfala oli talem tu se hem i stap agensem gavman. (Luk 7:34; 23:2; skelem Matyu 22:21.) Biaen, Kristin kongregesen we i jes stat, i fesem plante fasin agens long ol man blong jyos mo long wol. From we “God i jusumaot ol samting we ol man blong wol oli stap talem se oli krangke,” taswe plante man oli no laekem ol man blong hem. (1 Korin 1:22-29) Ol tru Kristin tede, oli mas winim ol fasin agens olsem, we hem i wan rod we ol man oli yusum blong mekem nogud long olgeta.—Jon 15:20.
Ol Wetnes blong Jeova oli glad tumas taem man we oli stap toktok wetem, i gat fasin blong skelemgud ol poen mo tingtinggud. Oli glad taem hem i soem sem fasin olsem sam man we oli kam luk Pol long Rom, ale oli talemaot se: “Mifala i glad blong harem ol tingting blong yu. From we mifala i save we olbaot long evri ples, ol man oli stap tok nogud long kampani ya blong yu.”—Ol Wok 28:22.
Eksplenem samting we i tru long ol man we oli kasem ol rong ripot, mo mekem wetem kwaet fasin. (Rom 12:14; skelem 2 Timote 2:25.) Pulum olgeta blong askem stret long ol Wetnes blong Jeova taem oli wantem faenemaot wanem samting i tru. Samting ya i save givhan long olgeta blong luksave ol gyaman tok. Mo tu, yu save yusum ol buk we Watch Tower Sosaeti i prentem, we oli tokbaot ogenaesesen, histri blong hem, mo ol tijing blong hem.a Wan taem bifo, Filip i givim wan ansa long Nataniel wetem smol tok ya nomo: “Kam luk.” (Jon 1:46) Yumi save mekem sem mak. Eniman we i wantem, i save kam long Haos Kingdom kolosap long hem, blong luk wetem prapa ae blong hem olsem wanem long Ol Wetnes blong Jeova mo bilif blong olgeta.
No Fraet Long Ol Man We Oli Agensem Yu
!I leftemap tingting blong yumi blong save se fasin blong plante man blong spolem gudnem blong ol Wetnes i no stopem ol man blong kam joen long ol Wetnes! Long wan program blong televisin long Jemani, sam man we oli lego ol Wetnes finis, oli talemaot plante gyaman tok agensem ol Wetnes. Wan man we i stap lukluk program ya, i luksave se ol tok we ol man ya oli yusum blong pulum tingting blong ol man, oli gyaman nomo. Mo samting ya i pusum hem blong statem bakegen Baebol stadi blong hem wetem ol Wetnes. !Yes, samtaem fasin blong spolem gudnem blong yumi i save gat gudfala frut!—Skelem Filipae 1:12, 13.
Aposol Pol i save se samfala bambae oli lesin moa long ol ‘gyaman store’ bitim trutok. Taswe hem i raetem se: “Long wanem samting we i kam long yu, yu mas lukaotgud blong tekem stret rod. Sipos yu stap harem nogud, be yu mas mekem tingting blong yu i strong. Yu mas mekem wok ya blong talemaot gud nyus blong Kraes, mo yu mas finisim olgeta wok ya we God i givim long yu blong mekem.” (2 Timote 4:3-5) No letem wan samting i pulum tingting blong yu i go long narafala rod. Mo “no seksek nating” long ol man we oli stap agensem yu. (Filipae 1:28) Stap kwaet long tingting blong yu, no kam kros, mo talemaot gud nyus wetem glad. Olsemia nao, bambae yu save stanap strong tru long fasin blong ol man blong spolem gudnem blong yumi. Yes, tingbaot promes blong Jisas: “Yufala we ol man oli stap spolem nem blong yufala, oli stap ronem yufala, mo oli stap gyaman, oli stap talem ol rabis tok agens long yufala, from we yufala i man blong mi, yufala i save harem gud. Yufala i save hapi, yufala i save glad, from we i gat bigfala pei blong yufala i stap long heven. Olgeta bifo oli bin ronem ol profet ya we oli laef fastaem long yufala, long sem fasin nomo.”—Matyu 5:11, 12.
[Futnot]
a Lukluk trifala buk ya: Ol Wetnes blong Jeova—Oli Joengud blong Mekem Wok blong God Long Olgeta Ples Blong Wol, Jehovah’s Witnesses in the Twentieth Century, mo Jehovah’s Witnesses—Proclaimers of God’s Kingdom.
[Tok blong pija long pej 27]
Taem ol man oli agensem Jisas, hem i talem long ol disaepol blong hem se: ‘Yufala i livim olgeta.’ ?Hem i minim wanem?
[Tok blong pija long pej 29]
“Yufala we ol man oli stap spolem nem blong yufala, oli stap ronem yufala, mo oli stap gyaman, oli stap talem ol rabis tok agens long yufala, from we yufala i man blong mi, yufala i mas glad.”—Matyu 5:11