?From Wanem Ol Witnes Blong Jehova Oli No Ansa Long Ol Man We Oli Agensem Olgeta?
Ol Witnes blong Jehova oli folem advaes blong Baebol we i se, yumi no blong stretem evri tok agens o tok jik blong ol man blong giaman. Baebol i talem waes tok ya se: “Sipos yu tok long wan man blong flas blong traem stretem hem, bambae hem i girap, i tok nogud long yu.” (Ol Proveb 9:7, 8; 26:4) Mifala i putum tingting blong mifala i stap strong long ol samting we i save mekem God i glad, i bitim we mifala i wari tumas long ol tok agens mo mekem rao i kamaot.—Ol Sam 119:69.
Yes i tru, ‘i gat taem blong stap kwaet, mo i gat taem blong toktok.’ (Prija 3:7) Mifala i givim ansa long ol man we hat blong olgeta i stret we oli intres blong save trutok, be mifala i no wantem rao blong nating nomo. Mifala i folem ol tijing mo ol eksampol blong Jisas mo ol Kristin bifo.
Jisas i no talem wan samting taem ol man oli talemaot ol giaman poen agensem hem long fored blong Paelat. (Matiu 27:11-14; 1 Pita 2:21-23) Mo tu, Jisas i no talem wan tok taem ol man oli talem se hem i man blong drong mo blong kakae bitim mak. Be, hem i letem ol aksen blong hem oli soemaot ol gudfala fasin blong hem. Samting we hem i mekem i laenap wetem advaes ya we i se: “Ol gudfala wok blong man we i waes, oli soemaot se waes ya i tru.” (Matiu 11:19) Be, samtaem taem hem i luk se i stret hem i no fraet blong tok long sam man we oli agensem hem.—Matiu 15:1-3; Mak 3:22-30.
Jisas i talem long ol man blong hem se oli no mas harem nogud taem ol man oli talem sam giaman tok agens long olgeta. Hem i talem se: “Yufala we ol man oli stap spolem nem blong yufala, mo oli stap ronem mo kilim yufala, mo oli stap giaman, oli stap talem enikaen rabis tok agens long yufala from we yufala i man blong mi, yufala i glad.” (Matiu 5:11, 12) Be yet, Jisas i talem tu long ol man blong hem se sipos oli gat janis blong givim witnes taem ol man oli agensem olgeta, bae hem i holem promes blong hem we i se: “Mi bambae mi givim tok long yufala, mo bambae mi mekem yufala i waes. Nao bambae i no gat wan long ol enemi blong yufala we i save tok agens long yufala, blong brekemdaon tok blong yufala.”—Luk 21:12-15.
Aposol Pol i givim advaes long ol Kristin blong no agiu blong nating nomo wetem ol man blong agens, from we ol tok blong olgeta “oli blong nating nomo mo oli no save givhan long ol man.”—Taetas 3:9; Rom 16:17, 18.
Aposol Pita i leftemap tingting blong ol Kristin blong oli rere blong toktok from bilif blong olgeta taem i stret. (1 Pita 3:15) Be hem i luksave tu se i moa gud blong letem ol aksen blong yumi oli givim witnes i bitim ol toktok blong yumi. Hem i se: “Long ol stret fasin blong yufala bambae yufala i blokem ol krangke tok blong ol man we oli no gat save.”—1 Pita 2:12-15.