Protektem Bilif Blong Yumi

“Yufala i mas mekem Kraes i Masta blong yufala, mo yufala i mas mekem hem i nambawan long laef blong yufala. Mo sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta.”​—1 PITA 3:​15.

1, 2. ?From wanem ol Witnes blong Jeova oli no sapraes taem ol man oli agensem olgeta, be oli wantem wanem samting?

LONG plante kantri, ol man oli savegud ol Witnes blong Jeova. Oli luksave se ol Witnes blong Jeova oli no man blong giaman mo oli gat gudfala fasin. Plante man, oli talem se ol Witnes we oli laef raonabaot long olgeta oli ol kwaet man we oli no stap mekem trabol. Be samting we i narakaen se, ol Kristin ya we oli laekem pis, ol man oli bin mekem i nogud tumas long olgeta blong nating nomo. Long taem blong faet mo long taem we i no gat faet, ol man oli bin mekem trabol long olgeta. Ol Witnes, oli no sapraes long ol fasin agens ya. Oli save finis se bambae ol man oli agensem olgeta. Oli save se ol man ‘oli bin agensem’ ol trufala Kristin long faswan handred yia. Taswe, olgeta we oli traehad blong stap olsem ol trufala man blong Kraes tede, olgeta tu, bambae oli kasem trabol. (Matiu 10:22) Antap long hemia, Baebol i talem se: “Olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.”​—2 Timoti 3:​12.

² Ol Witnes blong Jeova oli no lukaot fasin ya we narafala i mekem i nogud tumas long olgeta. Oli no harem gud taem ol man oli askem faen long olgeta, putum olgeta long kalabus, no mekem i strong tumas long olgeta. Oli wantem tumas ‘blong gat wan laef we i kwaet mo i gat pis.’ Long rod ya, bambae i no gat wan samting i blokem wok blong talemaot gud nius blong Kingdom blong God. (1 Timoti 2:​1, 2) Ol Witnes oli gat bigfala tangkiu from we long plante kantri, gavman i letem ol skul oli fri blong wosip. From samting ya, ol Witnes oli save gohed long wosip blong olgeta, mo traem faenem rod blong gat “pis wetem olgeta man,” mo ol gavman. (Rom 12⁠:18; 13:​1-7) Sipos i olsem, ?from wanem ol man ‘oli agensem’ olgeta?

3. ?Wanem wan risen we i mekem se ol man oli agensem ol Witnes blong Jeova?

³ Semfala risen we i pulum ol man blong ronem ol faswan Kristin, i stap pulum ol man tede tu blong agensem ol Witnes blong Jeova. Faswan long ol risen ya, hemia se ol Witnes blong Jeova oli mekem bilif blong skul blong olgeta i wok long laef blong olgeta, mekem se ol man oli no laekem olgeta. Eksampel, oli gat strong tingting blong talemaot gud nius blong Kingdom blong God. Be plante taem, ol man oli gat rong tingting, oli luk wok ya blong prij we ol Witnes oli stap mekem, olsem “wan rod blong fosem man blong jenisim bilif blong hem.” (Skelem wetem Ol Wok 4:​19, ​20.) Oli no joen long ol politik mo faet blong nesen. From samting ya, ol man oli ting se ol Witnes oli no sapotem kantri blong olgeta.​—Maeka 4:​3, 4.

4, 5. (a) ?Ol man oli bin talem wanem giaman tok agensem ol Witnes blong Jeova? (b) ?Hu ya ol man we plante taem, oli stamba blong ol trabol we oli kasem ol man blong Jeova?

⁴ Namba tu samting, hemia se ol man oli bin mekem plante giaman toktok agensem ol Witnes blong Jeova​—oli giaman mo oli twistim bilif blong ol Witnes. From samting ya, long sam kantri, ol man oli talem se ol Witnes oli wan krangke grup blong skul. Ol Witnes oli no tekem blad blong winim sik blong olgeta. Hemia from we oli wantem obei long oda ya blong Baebol se, ‘yufala i no yusum blad.’ Nao, from samting ya, ol narafala oli tingbaot olgeta olsem “ol man blong kilim ol pikinini oli ded” mo “wan grup we i stap pulum ol man blong kilim olgeta wan i ded.” (Ol Wok 15:29) Be samting we i tru long saed blong ol Witnes blong Jeova, hemia se oli rili tinghae long laef mo oli traehad blong lukaot ol beswan meresin blong winim sik blong olgeta mo blong ol pikinini blong olgeta. Ol man oli stap talem se evri yia, fulap pikinini blong ol Witnes oli stap ded from we ol Witnes oli no agri blong tekem blad. Be ol toktok ya, oli giaman tok stret. I no gat wan trufala ripot we oli save mekem long saed ya. Wan narafala samting se, i no olgeta famle we evri memba blong hem oli folem ol trutok blong Baebol. Taswe, sam man oli talem se ol Witnes oli stap seraotem ol famle. Be, ol man we oli savegud ol Witnes blong Jeova, oli save se ol Witnes oli rili tinghae long famle laef. Mo tu, ol Witnes oli traehad blong folem oda ya blong Baebol se hasban mo waef, tufala i mas lavlavem mo respektem tufala mo se ol pikinini oli mas obei long papa mama blong olgeta, nating sipos tufala i bilif no nogat.​—Efesas 5:⁠21–​6:⁠3.

⁵ Ol fasin agens we oli kamaot oli soem se ol lida blong skul nao, oli stap pusum ol man blong mekem i nogud tumas long ol man blong Jeova. Ol lida ya, oli yusum paoa blong olgeta, ol haeman blong gavman, mo niuspepa, blong traem blokem wok blong ol Witnes blong Jeova. ?Yumi ol Witnes blong Jeova, bambae yumi mekem wanem taem oli agensem yumi​—from bilif mo ol wok blong yumi no from ol giaman toktok we oli mekemap?

“Yufala i Mas Soemaot Long Olgeta Man, We Yufala i Kwaet Man”

6. ?From wanem i impoten blong gat stret tingting long saed blong olgeta we oli stap afsaed long Kristin kongregesen?

⁶ Faswan samting se yumi mas gat stret tingting​—⁠tingting blong Jeova​—⁠long saed blong olgeta we oli gat defren bilif. Sipos yumi no lukaotgud, maet yumi nomo i save mekem se ol narafala oli agensem yumi, no oli tok nogud long yumi. Aposol Pol i raetem se: “Yufala i mas soemaot long olgeta man, we yufala i kwaet man.” (Filipae 4:5) Taswe, Baebol i leftemap tingting blong yumi blong gat stret tingting long saed blong olgeta we oli stap afsaed long Kristin kongregesen.

7. ?I minim wanem blong no letem ‘wol i mekem yumi kam doti’?

⁷ Be tu, Baebol i talem klia long yumi se: ‘Yumi mas lukaot gud long laef blong yumi, se wol i no mekem yumi kam doti.’ (Jemes 1:​27; 4:4) Long vas ya, olsem ol narafala vas long Baebol, tok ya “wol,” i minim kampani blong olgeta man we oli no stap long grup blong ol trufala Kristin. Yumi laef long medel blong kampani blong ol man ya. Yumi mitim olgeta long ples blong wok, long skul, mo oli laef klosap long yumi. (Jon 17:11, 15; 1 Korin 5:​9, 10) Nating se i olsem, wol ya i no save mekem yumi doti, sipos yumi sakemaot ol tingting, ol toktok, mo ol fasin we oli no laenap wetem ol stret rod blong God. I impoten tu se yumi luksave denja we i save kamaot sipos yumi fren wetem wol, antap moa sipos yumi fren wetem olgeta we oli no gat respek long ol rul blong Jeova.​—Proveb 13:20.

8. Taem Baebol i talem se yumi no mas letem wol i mekem yumi kam doti, ?from wanem advaes ya i no minim se yumi mas lukluk daon long ol narafala?

⁸ Taem Baebol i talem se yumi no mas letem wol i mekem yumi doti, hemia i no minim se yumi mas tok daonem olgeta we oli no Witnes blong Jeova, no gat. (Proveb 8:​13) Tingbaot eksampel blong ol lida blong skul blong ol man Jyu, we yumi tokbaot long faswan stadi. Jeova i no glad nating long fasin we oli folem long skul blong olgeta. Mo tu, skul blong olgeta i no givhan nating long ol man Jyu blong gat pis wetem ol Hiten man. (Matiu 21:43, 45) Ol krangke lida ya, oli ting se oli stretgud, taswe oli ting rabis long ol Hiten man. Long saed blong yumi, yumi no mas lukluk daon mo ting rabis long olgeta we oli no Witnes. Olsem aposol Pol, yumi wantem tumas we olgeta man oli harem trutok blong Baebol blong mekem God i glad long olgeta.​—Ol Wok 26:29; 1 Timoti 2:​3, 4.

9. ?Olsem wanem stret tingting we i stanap long Baebol i save givhan long yumi taem yumi stap tokbaot olgeta we oli gat defren bilif?

⁹ Yumi mas gat stret tingting we i laenap wetem Baebol, taem yumi stap tokbaot olgeta we oli no Witnes. Pol i givim advaes long Taetas se hem i mas talem bakegen long ol Kristin long aelan blong Krit, se “oli no mas tok nogud long nem blong narafala man, mo oli no man blong rao. Oli mas man we oli fren gud long ol man, mo oltaem oli mas mekem i gud long ol man.” (Taetas 3:2) Makemgud se ol Kristin ol no mas tok nogud “long nem blong narafala man.” Long Krit, sam Hiten man, oli man blong giaman, oli man blong kakae mo dring bitim mak, mo oli les tumas. Nating se i olsem, ol Kristin oli no mas tok nogud long olgeta. (Taetas 1:​12) Taswe, Baebol i soem se yumi no mas yusum ol tok we oli blong daonem narafala, taem yumi stap tokbaot olgeta we oli gat defren bilif. Fasin blong tinghae long yumi, i no save pulum ol narafala blong kam long wosip blong Jeova. Be taem yumi mekem i gud long narafala mo gat tingting we i laenap wetem ol stret rul long Tok blong Jeova, yumi stap ‘flasem tijing’ blong God.​—Taetas 2:​10.

Wetaem i Stret Blong Stap Kwaet, Wetaem i Stret Blong Toktok

10, 11. ?Olsem wanem Jisas i soem se hem i save wetaem (a) ‘i stret blong stap kwaet’? (b) ‘i stret blong toktok’?

¹⁰ Prija 3⁠:7 i talem se: ‘I gat taem blong stap kwaet mo i gat taem blong toktok.’ Hemia wan bigfala traem blong yumi. Yumi mas luksave wetaem i stret blong stap kwaet mo wetaem i stret blong toktok blong protektem bilif blong yumi. Yumi save lanem plante samting long eksampel blong Jisas, we oltaem, hem i soem waes fasin long saed ya. (1 Pita 2:​21) Hem i save wetaem i stret ‘blong stap kwaet.’ Eksampel, taem ol jif pris wetem ol elda, oli kam long fored blong Paelat, mo oli talemaot ol giaman poen agensem Jisas, “Jisas i no talem wan samting nating.” (Matiu 27:11-​14) Hem i no wantem talem wan samting we maet, i save blokem hem blong i no moa mekem samting we God i wantem hem blong mekem. Jisas i letem olgeta wok we hem i mekem finis, i givim witnes long saed blong hem. Hem i save se sipos hem i talemaot trutok long ol lida ya, be bambae oli no save jenisim tingting mo hat blong olgeta we i fulap long fasin flas. Taswe hem i no talem wan tok nating blong ansa long olgeta. Hem i no wantem brekem profet tok ya we i tokbaot hem, se bambae hem i no talem wan tok nating.​—Aesea 53:7.

¹¹ Be tu, Jisas i save wetaem ‘i stret blong toktok.’ Wanwan taem, hem i tok klia nomo agensem olgeta ya we oli stap traem daonem hem mo hem i pruvum se tok blong olgeta i giaman. Eksampel, taem ol tija blong loa wetem ol Farisi, oli talemaot long wan hif blong man se Jisas i stap ronemaot devel long paoa blong Bielsebal, Jisas i daonem ol giaman tok blong olgeta. Wetem ol strong kwestin mo ol pija tok we oli gat paoa, Jisas i brekem daon giaman tok ya. (Mak 3:​20-​30; lukluk Matiu 15:​1-​11; 22:17-​21; Jon 18:37) Long sem fasin, taem ol enemi blong Jisas oli holem hem, oli tekem hem i kam long kot ya Sanhedrin, Kaeafas we i Hae Pris, i traem trikim Jisas, i talem se: “Hae God i laef, i stap we i stap, mo long nem blong hem, yu yu mas talem trutok. !Yu talem long mifala! ?Yu yu Mesaea, yu Pikinini blong God, no nogat?” Jisas i luksave se hemia ‘i stret taem blong toktok.’ From we sipos hem i no tok, i olsem we hem i haedem se hem i no Kraes. Taswe, hem i ansa se: “Mi ya nao.”​—Matiu 26:63, 64; Mak 14:61, 62.

12. ?Wanem samting i hapen we i pusum Pol mo Banabas blong oli no fraet blong toktok long Ikoniam?

¹² Tingbaot eksampel blong Pol mo Banabas. Ol Wok 14:​1, 2 i talem se: “Long Ikoniam, Pol mo Banabas, tufala i go insaed long haos blong prea blong ol laen blong Isrel, nao tufala i prij we tok blong tufala i gud tumas, i pulum plante man long laen blong Isrel mo plante man Gris tu oli bilif long Jisas. Be . . . ol laen blong Isrel we oli no bilif long tok blong tufala, oli goraon long ol man we oli no laen blong Isrel, oli mekem olgeta oli kros tumas long ol man ya we oli bilif, oli agensem olgeta.” Long New English Bible, yumi ridim olsem se: “Be ol man Jyu we oli no bilif, oli posenem tingting blong ol Hiten man, mekem se [ol Hiten man,] oli kros tumas long ol Kristin.” Ol man Jyu we oli agens, oli sakemaot mesej blong Pol mo Banabas, be long tingting blong olgeta, hemia i no naf yet. Taswe, oli mekem ol giaman toktok olbaot, blong traem pulum ol Hiten man blong agensem ol Kristin.a !I klia se oli no laekem nating Kristin Skul! (Skelem wetem Ol Wok 10:28.) Pol mo Banabas, tufala i luksave se, hemia ‘i stret taem blong toktok.’ Sipos tufala i no toktok, ol rabis tok we ol man oli stap talem agensem ol Kristin bambae i mekem se tingting blong ol niufala disaepol i foldaon. From samting ya, ‘tufala aposol ya i stap longtaem lelebet long ples ya, mo tufala i no fraet, tufala i gohed blong talemaot gud nius long paoa blong God.’ Mo God i soemaot se hem i agri long tufala, taem i givim paoa long tufala blong mekem ol merikel. Samting ya i mekem se ‘ol man blong ples ya oli seraot. Haf oli biaen long ol man Jyu mo haf oli biaen long tufala aposol ya.’​—Ol Wok 14:⁠3, 4.

13. Taem narafala i tok agensem yumi, ?wetaem i moagud blong ‘stap kwaet?

¹³ ?Bambae yumi mekem wanem taem narafala i tok nogud long yumi? Ansa i dipen long wanem we i hapen. Samtaem yumi nidim blong folem rul ya se ‘i gat taem blong stap kwaet.’ I rili impoten blong folem rul ya taem yumi luksave se ol man blong agens oli jes wantem agyu blong nating nomo. Yumi no mas fogetem se sam man, oli no rili wantem save trutok. (2 Tesalonaeka 2:​9-​12) Sipos yumi stap traehad blong mekem plante toktok wetem olgeta we hat blong olgeta i flas mo oli no bilif, yumi stap westem taem blong yumi nomo. Antap long hemia, sipos yumi stap traem blong agyu wetem evriwan we oli mekem giaman tok agensem yumi, bambae yumi lusum taem we yumi mas spenem long wan wok we i moa impoten mo we i karem gudfala frut​—⁠hemia blong halpem olgeta we hat blong olgeta i stret, olgeta ya we oli rili wantem lanem ol trutok blong Baebol. Taswe, taem yumi faenem ol man we oli agensem yumi, we plan blong olgeta i blong talemaot giaman tok long saed blong yumi, advaes we i kamaot long God i talem se: “Yufala i no mas go klosap long olgeta.”​—Rom 16:17, 18; Matiu 7:6.

14. ?Olsem wanem yumi save protektem bilif blong yumi?

¹⁴ Be, samting ya i no minim se yumi no save tok blong protektem bilif blong yumi. Tingbaot se ‘i gat wan taem blong toktok’ tu. I stret nomo we yumi tingbaot ol man we oli wantem lesin. Maet ol man ya oli bin harem ol rabis tok we narafala i talem agensem yumi. Yumi glad blong eksplenem gud bilif blong yumi long ol narafala. Mo yumi rere oltaem blong mekem samting ya. Pita i raetem se: “Yufala i mas mekem Kraes i Masta blong yufala, mo yufala i mas mekem hem i nambawan long laef blong yufala. Mo sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta. Be yufala i mas toktok gud long olgeta we yufala i ona long olgeta.” (1 Pita 3:​15, 16) Taem ol man we oli rili intres, oli askem kwestin long yumi long saed blong ol giaman tok we oli harem long ol man blong agens, hemia i taem blong yumi protektem bilif blong yumi, mo givim ol ansa we oli kamaot long Baebol. Antap long hemia, gudfala fasin blong yumi i save givim bigfala witnes. Taem ol man we oli wantem lesin long yumi, oli luk se yumi rili traehad blong mekem laef blong yumi i laenap wetem ol stret rul blong God, bambae oli talem stret se ol man blong tok agensem ol Witnes, oli giaman.​—1 Pita 2:​12-​15.

?Bambae Yumi Mekem Wanem Sipos Ol Man Oli Spolem Nem Blong Yumi Long Nius?

15. ?Wanem wan eksampel we i soem se ol man oli stap twistim tijing blong ol Witnes blong Jeova mo putum long nius?

¹⁵ Plante taem, ol man oli twistim ol tijing blong ol Witnes blong Jeova mo oli putum long nius. Eksampel, long Ogis 1, 1997, wan niuspepa blong Rasia i givim sam giaman tok we wan long ol tok ya i talem se, ol Witnes oli mas ‘sakemaot waef no hasban blong olgeta, mo papa mama blong olgeta, sipos olgeta ya oli no kasem save long bilif blong ol Witnes, no sipos oli gat defren bilif.’ Ol man we oli save gud ol Witnes blong Jeova, bambae oli talem stret se niuspepa ya i giaman. Baebol i soemaot se ol Kristin oli mas soem lav mo respek long ol memba blong famle blong hem we oli no bilif. Mo ol Witnes oli stap traehad blong folem advaes ya. (1 Korin 7:​12-​16; 1 Pita 3:​1-4) Nating se i olsem, ol man oli raetem ol giaman tok ya long niuspepa, mo long fasin ya, plante man we oli ridim oli tingting nogud long ol Witnes. ?Olsem wanem yumi save protektem bilif blong yumi taem narafala i jajem yumi wetem ol giaman tok?

16, 17, mo bokis long pej 16. (a) ?Wan Wajtaoa i talem se yumi mas mekem wanem taem ol man oli talemaot sam giaman nius long saed blong yumi? (b) ?Wanem ol rod we ol Witnes blong Jeova oli save folem blong givim ansa long ol giaman ripot we narafala i talem agensem olgeta long nius?

¹⁶ Bakegen, tingbaot se ‘i gat taem blong stap kwaet mo i gat taem blong toktok.’ Wan Wajtaoa i talem se: “Blong mekem disisen sipos yumi mas fogetem ol giaman tok long niuspepa no yumi mas yusum sam rod we oli stret blong stanap long saed blong trutok, yumi mas tingbaot wanem samting i mekem ol giaman tok ya oli kamaot mo ples mo taem blong hem, hu man we i sakem tok agens ya, mo wanem we hem i wantem kasem from.” Samtaem, i gud blong fogetem ol ripot we oli giaman. Olsem nao, bambae yumi no mekem se ol giaman tok ya oli go moa.

¹⁷ Be samtaem, maet ‘i taem blong toktok.’ Maet wan gudfala man blong nius i bin kasem rong stori long saed blong ol Witnes blong Jeova, mo maet bambae hem i glad blong save ol trufala samting long saed blong yumi. (Lukluk bokis “Stretem Wan Giaman Tok.”) Sipos ol giaman ripot long nius oli statem fasin agens we i blokem yumi long wok blong prij, ol man we oli wok long nem blong branj ofis blong Watch Tower Sosaeti bambae oli faenem stret rod blong protektem trutok.b Eksampel, maet Sosaeti i jusum sam elda we oli nafgud blong toktok long wan program blong televisin blong talemaot samting we i tru long saed blong yumi. Sipos oli no mekem olsem, maet ol man oli ting se ol Witnes blong Jeova oli no gat wan stret ansa blong talem. I waes we ol Witnes wanwan, oli folem advaes we i kamaot long Watch Tower Sosaeti mo ol man we oli wok long nem blong hem, taem oli wantem stretem ol bisnes olsem.​—Hibrus 13:17.

Yusum Loa Blong Protektem Gud Nius

18. (a) ?From wanem yumi no nid blong wet long ol gavman blong oli givim raet long yumi blong prij? (b) ?Yumi mekem wanem taem gavman i blokem wok blong prij?

¹⁸ Raet we yumi gat blong talemaot gud nius i kamaot long heven. God i givim olgeta paoa long Jisas, ‘long olgeta samting long heven mo long wol.’ Mo Jisas nao i givim oda long yumi blong mekem wok ya blong talemaot gud nius. (Matiu 28:18-​20; Filipae 2:​9-​11) Taswe, yumi no nidim blong wet se ol gavman blong man oli givim raet long yumi blong prij. Nating se i olsem, yumi luksave se fasin fri blong wosip, we gavman i givim, i wan gudfala rod blong mekem mesej blong Kingdom i goaot moa. Long sam kantri we yumi fri blong gohed long wosip blong yumi, bambae yumi yusum loa blong protektem wosip blong yumi. Long ol kantri we gavman i no givim fasin fri olsem, bambae yumi yusum loa blong traem kasem fasin fri blong wosip. Mak blong yumi, i no blong stretem ol kruked fasin blong ol man long kantri, be i blong ‘protektem mo talemaot gud nius folem loa.’c​—Filipae 1:7.

19. (a) ?Wanem i save hapen long yumi taem yumi ‘givimbak long God samting we i blong God’? (b) ?Yumi gat strong tingting blong mekem wanem?

¹⁹ Yumi ol Witnes blong Jeova, yumi luksave se Jeova i Hae Rula blong heven mo wol. Ol loa blong hem oli hae olgeta. Yumi obei long ol gavman blong man folem tingting we i stap jajem yumi. Long rod ya, yumi ‘stap givimbak long Sisa samting we i blong Sisa.’ Be bambae yumi no save letem wan samting i blokem yumi blong mekem wok we i moa impoten​—⁠hemia blong ‘givimbak long God samting we i blong God.’ (Matiu 22:21) Yumi savegud we bambae samting ya i mekem se olgeta nesen ‘oli agensem’ yumi. Be yumi agri se, hemia i wan haf blong praes we yumi mas pem blong kam disaepol. Long ol yia 1900, olgeta rod we ol Witnes blong Jeova oli yusum folem loa i pruvum se yumi gat strong tingting blong protektem bilif blong yumi. From we Jeova i halpem mo i sapotem yumi, bambae yumi gohed nomo blong ‘tijim ol man mo talemaot gud nius ya.’​—Ol Wok 5:​42.

[Ol futnot]

?Yu Yu Tingbaot?

◻ ?From wanem ol man ‘oli agensem’ ol Witnes blong Jeova?

◻ ?Yumi mas gat wanem tingting long saed blong olgeta we oli gat defren bilif?

◻ ?Jisas i soem wanem gudfala eksampel we yumi save folem taem yumi faenem ol man we oli agensem yumi?

◻ Taem ol man oli mekem ol giaman toktok agensem yumi, ?olsem wanem yumi save folem rul ya se ‘i gat taem blong stap kwaet mo i gat taem blong toktok’?

[Bokis blong pija long pej 16]

Stretem Wan Giaman Tok

“Long Yakuiba, wan taon long Bolivia, wan grup blong skul i askem wan stesen blong televisin blong soem wan film we i klia se i kamaot long ol man blong apostasi. Ol elda oli tingbaot ol nogud frut we oli save kamaot from film ya, taswe oli mekem disisen blong go long tu stesen blong televisin, mo oli askem blong yusum tufala stesen ya blong soemaot long ol man tufala video kaset ya Jehovah’s Witnesses​—The Organization Behind the Name mo The Bible​—A Book of Fact and Prophecy. Afta we wan bos blong wan radyo stesen i wajem ol video kaset ya blong Sosaeti, hem i kros tumas long ol man blong apostasi from giaman tok we i kamaot long film we oli soem. Ale, from we wan distrik asembli blong ol Witnes blong Jeova i klosap, bos ya i talem se bambae hem i talemaot asembli ya long radyo, mo olgeta oli no nid blong pem wan samting. Namba blong ol man we oli kam long asembli ya i hae moa bitim ol narafala taem, mo plante man we hat blong olgeta i stret, oli stap askem ol gudfala kwestin taem ol Witnes oli visitim olgeta long wok blong prij.”​—1997 Yearbook of Jehovah’s Witnesses, pej 61-2.

[Tok Blong Pija Long Pej 17]

Wanwan taem, Jisas i tok agensem ol man we oli agens long hem, i mekem giaman tok blong olgeta i kam long klia ples