Ol Smol Bokis We Oli Gat Kakae Insaed Oli Givim Wetnes

LONG ol faswan dei biaen we graon i seksek long Kobe, Japan, long Janewari we i pas, ol man we oli stap long eria we graon i seksek, oli gat hadtaem blong faenem kakae. Be, ol Wetnes blong Jeova oli no sot long kakae, from we ol fren blong olgeta oli givhan. Long tu no tri dei biaen we graon i seksek, ol kongregesen we oli kolosap, oli givim raes we oli kukum finis. I no longtaem, ol brata we oli gat kaen fasin, oli givim long ol wanwan man ol smol bokis we oli gat kakae insaed. Long plante long ol bokis ya, oli fasem ol not blong soemaot se oli tingbaot olgeta we oli trabol tumas. Olgeta ya we oli kasem ol kakae, oli talem se oli putum “sol” long hem, from wora we i ron long ae blong olgeta” taem oli ridim ol not.

Ol Wetnes blong Jeova oli serem ol kakae blong olgeta wetem ol narafala we oli nidim. Wan Wetnes i stap kakae dina blong hem taem hem i stap wokbaot long trak wetem wan man we i no Wetnes, we tufala i stap wok long sem kampani. Ale hem i serem kakae we hem i bin kasem long wan smol bokis.

Man we i wok wetem hem i askem se, “?Weples yu pem kakae ya?” Brata i eksplenem se hemia ol saplae we ol Wetnes oli bin givim. Man ya i talem wetem fasin tangkyu se, “Plante dei mi no kakae ligim. Bambae mi livim sam i stap mo tekem i go long famle blong mi.”

Namba tri taem we brata ya i serem kakae blong hem wetem man ya, man ya i givim 3,000 yen (kolosap 3500 VT) long Wetnes mo i talem se: “Mi save ol wok blong yufala. Plis karem presen mane ya blong givhan long wok blong yufala. Mi tangkyu tumas we yu serem kakae blong yu wetem mi. I tru, ol fren blong yu oli rili ol gudfala man.”