Watchtower Senta Blong Edukesen i Sanem Ol Misinari Long Ol Narafala Kantri

OLI mekem Watchtower Baebol Skul blong Gilead long plante defren ples finis. Long ol yia 1943 kasem 1960, long ol ofis long Saot Lansing, Nyu Yok, Yunaeted Stet, oli mekem 35 klas blong givim spesel trening long ol studen we oli kam long 95 kantri. Biaen, oli mekem skul ya long hedkwota blong ol Wetnes blong Jeova long Bruklin, Nyu Yok. Hem i stap long ples ya blong kolosap 28 yia. Long 1988 kasem stat blong 1995, oli holem ol klas blong skul blong Gilead long Wolkil, Nyu Yok.

Long ol yia ya, oli mekem skul ya long plante narafala ples tu. I gat wan skul blong Gilead blong ten wik blong tijim tri klas long Meksiko; faef klas long Jemani; tu long India. Stat long 1987, oli holem wan narafala skul we oli kolem Ministeriol Trening Skul long 34 kantri. Skul ya i wan spesel kos blong eit wik blong trenem ol yangfala brata we oli kasem ol hae mak long saed blong speret. Be tijing we oli givim long namba 99 klas blong Gilead, long nyufala ‘Watchtower Senta Blong Edukesen’ long Pateson, Nyu Yok, i wan kos blong 20 wik. Long kos ya, oli stadi fulwan long Baebol, oli tokbaot histri mo ogenaesesen blong ol Wetnes blong Jeova long taem blong yumi, mo oli givim plante advaes olsem wanem blong mekem wok blong misinari long ol narafala kantri.

Namba 99 klas ya i kasem stefeket blong olgeta long Septemba 2. Oli mekem miting blong tri haoa blong givim stefeket long olgeta, long nyufala bigfala rum long Watchtower Senta Blong Edukesen. Ples ya i fulap long ol man. I gat plante narafala man tu long Betel long Pateson, Wolkil, mo Bruklin, we oli joen long miting ya tru long televisin. Hem i wan taem blong glad blong olgeta we oli skul long Gilead wetem ol famle mo ol fren blong olgeta. Mo hem i wan taem blong glad blong plante handred narafala man tu, we oli bin givhan blong bildim nyufala haos ya we oli mekem skul long hem.

Carey Barber blong Hed Kampani we i givim faswan tok, i pulum tingting i go long impoten wok ya we i stap gohed. Hem i talem se: “Ples ya bambae i stap olsem stampa ples long wol blong givimaot tijing blong God long fasin we i bigwan moa bitim ol taem bifo.” Hem i eksplenem se yumi kam kolosap long en blong faet ya we laen blong woman i mekem agensem laen blong snek. (Jenesis 3:15) Hem i soem se olgeta ya nomo we oli kasem stret save long Tok blong God mo oli obei long hem, bambae oli save laef tru long bigfala faet we bambae i kamaot long taem blong bigfala trabol long fyuja.

Hem i talem se: “Program blong edukesen we yumi folem, i blong pulum olgeta man blong Jeova we oli stap long evri ples, blong oli kam bigman long ol gudfala fasin olsem Proveb 1:​1-4 i tokbaot. Hemia ol fasin olsem waes mo fasin stretem, fasin blong kam naf blong kasem mining blong ol dip save, fasin stretem we i mekem yumi waes, stret fasin, fasin blong skelemgud ol samting, fasin blong folem ol stret rul mo blong tingtinggud.” !Ol fasin olsem long saed blong speret oli lukaotgud long yumi!

Advaes Long Ol Nyufala Misinari

Biaen long faswan tok ya, i gat faef narafala sot tok we oli go long olgeta long skul blong Gilead. Harold Jackson, wan tija long skul blong Gilead bifo, we naoia i wok long hedkwota long Bruklin, i givim tok long klas ya se, “Holemtaet Fasin Blong Haremgud Long Ol Blesing We God i Givim.” Lloyd Barry, wan we i mekem wok blong misinari longtaem finis, mo naoia i stap olsem wan memba blong Hed Kampani, i tokbaot “Mekem Wok Blong Jeova Wetem Tingting Daon.” Hem i eksplenem se fasin ya i impoten long ol studen blong Gilead, from we bambae oli mas jenisim fasin blong laef blong olgeta long ol nyufala ples we oli go long hem. Mo, bambae oli nidim fasin ya tu blong mekem se oli joengud wetem ol narafala misinari, ol kongregesen, mo ol manples.

Karl Adams, wan tija long skul blong Gilead, i mekem olgeta long klas ya oli tingtinggud long kwestin ya se, “?Bilif Bambae i Lidim Yu Blong Mekem Wanem?” Hem i leftemap tingting blong olgeta blong no mekem olsem ol man Isrel we oli toktok smol agens long laef we oli gat long drae ples, nao oli wantem gobak long Ijip. Oli mas mekem olsem Ebraham, we i lukluk i go long Kingdom blong God blong stretem ol trabol blong hem bitim we hem i gobak long Ur, ples blong ol man Koldia. (Eksodas 16:​2, 3; Hibrus 11:​10, 15, 16) Ulysses Glass, we i rejistarem ol studen long klas ya, i tokbaot store blong Asaf olsem Ol Sam 73 i talem. Hem i givim tok long ol studen ya, se “Tingbaot Ol Blesing Blong Yufala.” Mo Albert Schroeder, wan memba blong Tijing Komiti blong Hed Kampani, i mekem tok ya se, “Jeova i Stap Givim Olgeta Samting We Yumi Nidim.” Blong pruvum se Jeova i stap givhan olsem, hem i tokbaot skul blong Gilead, mo olsem wanem skul ya i givhan blong mekem bigfala wok blong prij mo mekem disaepol.

Biaen, ol man oli lesingud taem Milton Henschel, presiden blong Watchtower Sosaeti, i mekem tok long saed blong, “Ol Man We Oli Givgivhan Long Olgeta.” Hem i ridim mo i tokbaot plante haf long buk blong Rom, japta 12. Long tok ya blong hem, hem i talem se: “Yumi mas tingbaot se yumi gat wan strong fasin fren wetem ol brata mo sista blong yumi insaed long kongregesen.” Hem i ademap se: “I gud we oltaem yumi tingbaot se yumi evriwan i blong Jeova. Yumi no mas toktok smol agensem no faenem mastik long ol narafala, be yumi mas givhan oltaem. Yumi givhan long yumi bakegen taem yumi holemtaet fasin joengud we i kamaot long God insaed long Kristin kongregesen.” Hem i soem olsem wanem oli save soemaot fasin ya long haos blong ol misinari, taem oli mekemrere kakae. Oli mas tingbaot se i no evriwan we oli laekem blong kakae sem samting. Hem i leftemap tingting blong olgeta tu blong givhan long ol brata mo sista we oli pua taem oli prij wetem olgeta, bitim we oli toktok smol agensem olgeta. Brata Henschel i soemaot se sipos yumi rili givhan long ol narafala, mekem olgeta oli kam strong, mo leftemap tingting blong olgeta, “bambae Jeova i laekem yumi tumas.” !Hemia i nambawan advaes blong ol misinari we bambae oli go wok long ol kantri we oli defren long ples blong olgeta!

Kasem Moa Save Long Olgeta Long Klas Ya

Ol 48 studen blong namba 99 klas, wanwan long olgeta oli gat samwe long 32 yia blong olgeta, mo oli bin mekem wok blong talemaot gud nyus fultaem blong bitim 11 yia.

Long miting ya, oli askem sam kwestin long ol studen blong skul, blong mekem se ol man we oli lesin oli gat jans blong kasem moa save long olgeta. Nikki Liebl blong Yunaeted Stet, mo Simon Bolton blong Engglan, tufala i tokbaot ol samting we i bin traem tufala, blong pruvum sipos tufala i rili bilif se Jeova i save givim ol samting we oli nidim long saed blong bodi, no no gat. Tufala i luk we Jeova i lukaotgud long tufala taem tufala i putum wok blong prij fultaem long fas ples.

Isabelle Kazan we i toktok Franis, i talem se hem i lanem lanwis blong ol man Arab blong prij long ol man we oli toktok lanwis ya long kantri blong hem. Taem hem i stat long 1987, i gat wan smol grup blong fo brata nomo we oli tok lanwis blong ol man Arab long Paris, wetem hem mo wan narafala sista we tufala i stap lanem lanwis ya. (I no isi long tufala. Tufala i spenem eit haoa evri wik blong mekemrere Wajtaoa blong givim ansa long miting.) ?Be fasin traehad blong tufala i blong nating nomo? No gat, from we tede long Franis, i gat faef seket blong ol Wetnes blong Jeova we oli toktok lanwis Arab. Wan narafala studen we nem blong hem, Miko Puro, i talem olsem wanem lanwis Franis we hem i lanem long skul, i givhan long hem blong prij long ol man Afrika we oli refujia long ples blong hem, Finlan. Mo lanwis ya bambae i givhan long hem tu long kantri blong Benin we bambae hem i go mekem wok blong misinari long hem. Bonny Bowes i talem se hem i traehad blong toktokgud lanwis Franis, blong hem i save go wok long Kubek, Kanada. Mo Bjarki Rasmussen we i kam long Denmak, i tokbaot ol samting we i hapen long hem mo waef blong hem, long ol yia we tufala i wok long ol aelan blong Faro. Yes, ol nyufala misinari ya oli mekem fultaem wok blong prij longtaem finis.

Oli sanem ol misinari ya i go long 19 kantri​—long Afrika, Sentrol mo Saot Amerika, Is Yurop, mo long ol kantri blong Esia. Ol misinari blong ol narafala klas bifo, oli go finis long bitim 200 kantri. Plante long olgeta ya oli stap bisi yet long ol kantri we oli bin go wok long hem. Ol nyufala misinari ya bambae oli go joen wetem olgeta ya blong talemaot gud nyus blong Kingdom moa long ol laswan ples blong wol.​—Ol Wok 1:8.

[Futnot]

[Tok Blong Pija Long Pej 25]

Sam pija blong ol misinari long ol klasrum long Watchtower Senta Blong Edukesen

[Tok Blong Pija Long Pej 26]

Olgeta We Oli Kamaot Long Klas Namba 99 Blong Watchtower Baebol Skul Blong Gilead

Long ol nem aninit, yumi kaontem ol laen stat long fored i gobak biaen, mo ol nem oli stat long lefsaed i go long raetsaed.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L.; (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Tok Blong Pija Long Pej 27]

Samfala we oli wok yet long kantri we oli bin go long hem bifo: (lefsaed) Charles Leathco wetem waef blong hem, Fern, long Brasil, tufala i joen long faswan klas mo namba sikis klas blong Gilead; (daon) Martha Hess, long Japan, hem i kamaot long namba seven klas blong Gilead