?Olsem Wanem Ol Kristin Man Blong Lukaot Sipsip Oli Givhan Long Yumi?

LONG plante ples, yu save luk olsem wanem ol man blong lukaot long sipsip oli stap keagud long ol sipsip. Oli lidim, protektem, mo lukaot long nid blong ol sipsip. Ol elda oli mas intres long samting ya, from we wok blong olgeta i olsem hemia blong lukaot long sipsip. Yes, oli mas ‘lukaot long kongregesena blong God, olsem we man blong lukaot long sipsip i stap lukaot long ol sipsip blong hem’ mo oli mas ‘keagud long ol sipsip.’​—Ol Wok 20:28.

Sipos yu wan memba blong Kristin kongregesen, ?olsem wanem ol man blong lukaot sipsip long saed blong speret oli save givhan long yu? ?Mo yu mas mekem wanem taem oli traehad blong olgeta blong givhan long yu? ?From wanem kongregesen i nidim help blong olgeta?

?Protektem Olgeta Agens Long Wanem Samting?

Long ol taem bifo, ol laeon mo ol narafala wael anamol oli mekem se ol sipsip oli stap long denja. Oli traem blong kakae ol sipsip we oli stap wanwan. Man blong lukaot long sipsip i mas protektem ol sipsip ya. (1 Samuel 17:​34, 35) Yes, Devel Setan “i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae.” (1 Pita 5:8) Hem i kros tumas, nao hem i stap faet agens long ogenaesesen blong Jeova long wol ya, olsem wan grup, be tu, hem i stap faet agens long ol wanwan man blong God. ?Setan i wantem mekem wanem? Hem i wantem mekem tingting blong ol man blong Jeova i foldaon, mo blokem olgeta blong no “obei long ol loa blong God” mo blong no ‘givim wetnes long saed blong Jisas.’​—Revelesen 12:17.

Long saed blong ol lida blong gavman blong Isrel we oli olsem ol man blong lukaot long sipsip, Jeova i jajem olgeta se oli no mekemgud wok blong olgeta, from we ol sipsip blong Hem oli kam olsem “kakae blong evri wael anamol blong bus.” (Esikel 34:8) Be, ol Kristin elda oli wantem tumas wetem hat blong olgeta, blong protektem ol memba blong kongregesen. Long rod ya, bambae i no gat wan i lus from we oli no keagud long hem no from we Setan, wol ya, no ol man blong apostasib we oli olsem “wael dog,” oli pulum hem. (Ol Wok 20:29, 30) ?Olsem wanem ol man blong lukaot long sipsip oli save givhan long ol wanwan sipsip blong stap wekapgud mo lukaotgud? Wan rod, hemia taem oli reregud blong givim ol tok we oli stanap long Baebol, taem oli stap long platfom blong Haos Kingdom. Wan narafala rod, hemia taem oli storeyan wetem ol narafala bifo mo afta long ol miting, blong talem ol gudfala tok we oli save leftemap tingting blong olgeta. I gat wan narafala rod bakegen we i wokgud. Hemia taem oli visitim ol wanwan “sipsip” stret long haos blong olgeta. (Skelem wetem Ol Sam 95:7.) ?Be wanem ya wok blong visitim ol sipsip? ?Olsem wanem blong mekem wok ya? ?Mo oli mas visitim hu?

?Wanem Ya Wok Blong Visitim Ol Sipsip?

Wok blong visitim ol sipsip i no jes wan taem blong haremgud wetem wan fren no blong storeyan long ol samting we oli no impoten. Wan elda i talem se: “Plante pablisa oli rili glad blong ridim wan vas no blong tokbaot wan spesel poen long Baebol. I tru se, i no elda nomo we i toktok. Plante taem, wan pablisa blong Kingdom we elda i visitim i glad blong talemaot tingting blong hem long saed blong Baebol. Mo fasin ya i mekem prapa bilif blong hem i strong. Maet elda i tekem wan Wajtaoa no Wekap! magasin wetem hem, blong tokbaot wan haf we i leftemap tingting. Ating storeyan ya we i stanap long Baebol, hemia nao samting we i mekem se visit ya i defren long ol narafala visit.”

Wan narafala elda we i gat save long wok ya i talem se: “Bifo we yu go blong mekem visit, yu mas spenem sam taem blong tingbaot nid blong pablisa we bambae yu visitim. ?Wanem bambae i leftemap tingting blong pablisa ya? Fasin blong presem narafala i impoten tumas long wok blong visitim ol sipsip. Hem i givim paoa long man blong stanap strong longtaem.” Yes, wok blong visitim ol sipsip i bitim fasin blong visitim wan fren, wan kaen visit we eni man long kongregesen i save mekem.

?From Wanem Wan Man Blong Lukaot Sipsip i Visitim Yu?

Taem wan elda i visitim wan famle, hem i rere blong leftemap tingting blong ol Kristin brata mo sista blong hem mo givhan long olgeta blong stanap strong long bilif. (Rom 1:​11) Taswe, taem wan no tu elda oli wantem visitim yu, ?bambae yu mekem wanem? Wan elda blong visitim ol kongregesen i talem se: “Sipos elda i visitim ol sipsip long taem ya nomo we i gat wan trabol, faswan samting we maet man ya i tingbaot long saed blong visit ya se, ‘?Mi mi mekem wanem samting i rong?’ ” Ol man blong lukaot long sipsip we oli gat lav, oli folem eksampel blong Jeova, we i keagud long man blong raetem Ol Sam mo oltaem, ‘i stap mekem laef blong hem i nyuwan bakegen.’ Jeova i givhan moa long taem blong trabol mo taem we hem i nidim spesel help.​—Ol Sam 23:​1-4.

Plan blong visitim ol sipsip i ‘blong mekem olgeta oli kam strong moa, i no blong pulum olgeta i kamdaon.’ (2 Korin 13:10) Yes, taem elda i talem tangkyu long hemia we hem i visitim, from i stap stanap strong, i stap wok strong, mo from gudfala wok blong hem, samting ya i rili leftemap tingting. Wan elda i talem se: “Taem yu visitim ol sipsip, i nogud blong soem long man no woman ya se yu kam blong faenemaot mo tokbaot problem. I tru, maet pablisa ya i wantem tokbaot wan problem we hem i gat. Mo sipos wan sipsip i no save wokbaot gud no i stap longwe long ol narafala sipsip, elda i mas mekem wan samting blong givhan.”

Ol Kristin man blong lukaot long sipsip oli mas tekem spesel kea long olgeta we vas ya i tokbaot olgeta se: “Bambae mi [Jeova] mi lukaot hemia we i lus finis. Mo hemia we i ronwe, bambae mi mi karem hem i kambak. Mo hemia we i brekem wan bun blong hem, bambae mi fasem hem gud long kaliko. Mo hemia we i sik, bambae mi mi mekem hem i strong.” (Esikel 34:16) Yes, ol man blong lukaot long sipsip oli mas kea long ol sipsip, karem olgeta oli kambak, fasem soa blong olgeta, mo mekem oli kam strong bakegen. Ol man blong lukaot sipsip long Isrel, oli tanem baksaed long wok ya. Blong mekemgud wok ya, ol man blong lukaot long sipsip oli mas savegud ol sipsip mo kea long ol nid blong olgeta. Hemia nao stampa samting we i mekem se ol defren haf blong wok blong visitim ol sipsip tede i defren long ol narafala visit.

Ol Sipsip We Oli Strong Oli Nidim Fasin Kea

?Olsem wanem long ol sipsip we oli strong? ?Yumi save talem se i no nid blong ol man blong lukaot sipsip long saed blong speret oli soem spesel fasin kea long olgeta? No gat. Taem wan prapa sipsip i kasem trabol, i moa isi blong givhan long hem sipos hem i trastem man blong lukaot long sipsip. Wan buk i talem se, “ol sipsip oli gat fasin blong fraet long man. I no isi oltaem blong mekem oli trastem yu.” Wetem ol narafala samting, sem buk ya i tokbaot impoten rod ya we man i mas folem blong mekem ol sipsip oli trastem hem, se: “Toktok oltaem long anamol ya. Oli lan blong haremsave ol voes, wan samting we i mekem se oli sua long yu. Visitim ol sipsip oltaem.”​—Alles für das Schaf. Handbuch für die artgerechte Haltung (Evri samting we ol sipsip oli nidim. Buk we i talem olsem wanem blong lukaotgud long olgeta).

Taswe, i impoten blong visitim ol sipsip wanwan. Samting ya i mekem se oli save trastem fasin fren we oli gat wetem man we i stap lukaot long olgeta. Fasin ya i stret tu insaed long Kristin kongregesen. Wan elda i talem se: “Taem ol memba blong kongregesen oli savegud wan brata olsem elda we oltaem i stap visitim ol sipsip, bambae i moa isi long hem blong visitim hemia we i gat sam problem.” Taswe, ol man blong lukaot long sipsip long saed blong speret oli no mas traem blong fidim mo kea long ol sipsip long Haos Kingdom nomo. Sipos ol samting long laef blong olgeta i letem, ol elda oli mas visitim ol sipsip long haos blong olgeta blong savegud olgeta. Wan Kristin i tokbaot taem ya we hem i jes kam wan elda se, presiden elda i telefon mo i askem long hem blong visitim mo leftemap tingting blong wan brata we i jes lusum gel blong hem long wan nogud akseden long trak. Elda ya i talem se: “!Mi sore we mi sore tumas, from we mi neva visitim brata ya mo mi no save tu se hem i stap wea! Mi haremgud bakegen taem wan brata we i elda longtaem finis, i talem se bambae hem i kam wetem mi.” Yes, ol elda oli givgivhan long olgeta long wok blong visitim ol sipsip.

Taem wan elda i stap mekemrere blong visitim ol sipsip, wan man blong givhan we i stap gohed long “gudfala wok” blong kam olsem wan elda i save joen wetem hem. (1 Timote 3:​1, 13) !Wan man blong givhan i save gat bigfala tangkyu taem hem i luk olsem wanem wan elda i givhan long wan sipsip long ol visit olsem! Olsem nao, ol elda mo ol man blong givhan oli savegud evriwan long kongregesen. Mo samting ya i mekem se Kristin lav mo fasin joen i kam strong moa.​—Kolosi 3:​14.

Mekem Plan Blong Visitim Ol Sipsip

Taem wan grup blong ol elda i mekem disisen se bambae ol brata we i lidim Kongregesen Buk Stadi i visitim ol sipsip, sam long olgeta oli visitim evriwan long Buk Stadi blong olgeta insaed long sikis manis. Be sam narafala, oli no mekem visit ya insaed long buk stadi blong olgeta. Samting ya i pusum wan elda blong talem se: “I klia se sam elda oli rere mo oli mekem plante long wok blong visitim ol sipsip. Be sam elda oli nidim we ol narafala elda oli leftemap tingting blong olgeta blong mekem wok ya.” Olsem nao, sam grup blong ol elda oli mekem plan se, ol man blong lukaot long sipsip oli mas visitim olgeta pablisa long wan prapa taem.

I tru, wan elda no eni pablisa i save visitim wan brata no sista long kongregesen long eni taem nomo. Wan elda we i wantem go visitim wan sipsip, hem i telefon i go fastaem mo i talem se, “Evri manis, mi mi visitim wan famle. ?Mi save visitim yu blong wan no tu haoa samtaem nekis manis? ?Wetaem yu ting se i stret blong mekem samting ya?”

Ol Blesing From Wok Blong Visitim Ol Sipsip

From we ol wari blong rabis wol ya oli stap kam plante moa, ol elda oli mas mekem ol visit we oli leftemap tingting moa naoia bitim bifo. Taem oli leftemap tingting mo oli givhan long ol sipsip long ol visit ya, ol sipsip oli harem se oli sef mo oli haed long trabol.

I gat wan ripot we i tokbaot wan kongregesen we oltaem, ol man blong lukaot sipsip oli visitim olgeta pablisa blong Kingdom. Ripot ya i talem se: “Ol pablisa oli gat gudfala tingting long saed blong visit blong man blong lukaot sipsip. Plante taem, ol pablisa oli go kolosap long wan elda mo oli askem se, wetaem bambae hem i mekem wan narafala visit. Ol pablisa oli haremgud tumas long storeyan we elda i bin talem blong leftemap tingting blong olgeta long laswan visit blong hem. Wok blong visitim ol sipsip i wan rod we i mekem se kongregesen i kam strong moa.” Ol narafala ripot oli soem se taem ol man blong lukaot long sipsip oli givhan wetem lav long rod olsem, kongregesen i save kam strong moa long lav, fasin joen, mo kaen fasin. !Hemia wan bigfala blesing ya!

Ol Kristin man blong lukaot long sipsip oli visitim ol sipsip blong mekem se oli kam bigman moa long saed blong speret. Ol elda oli wantem leftemap tingting mo mekem bilif blong ol brata mo sista blong olgeta i kam strong. Sipos i gat wan bigfala problem we i nidim advaes long taem blong wan visit, maet i gud blong mekem plan blong tokbaot samting ya long narafala taem, antap moa sipos wan man blong givhan i stap wetem elda ya. Nating se wanem i hapen, i stret blong mekem wan prea long en blong visit ya.

?Olsem wanem long yu? ?Wan man blong lukaot sipsip long saed blong speret i wantem visitim yu i no longtaem? Sipos yes, yu mas glad blong lukluk i go long taem ya blong kasem ol tok we oli leftemap tingting we oli stap wet long yu. Hem i kam blong givhan long yu mo blong mekem yu strong blong stap oltaem long rod ya we i go kasem laef we i no save finis.​—Matyu 7:​13, 14.

[Ol futnot]

[Bokis blong pija long pej 26]

Ol Advaes Long Wok Blong Visitim Ol Sipsip

◻ Talemaot visit blong yu: Plante taem i gud blong talemaot long olgeta fastaem se bambae yu visitim olgeta. Sipos wan elda i plan blong stretem wan bigfala problem, i gud blong talemaot samting ya fastaem long pablisa.

◻ Mekemrere: Tingbaot stampa fasin mo laef blong man ya. Talem ol tok blong presem hem we i kamaot long hat. Traem blong givim long hem wan “presen long saed blong speret,” blong leftemap tingting mo mekem bilif blong hem i strong.—Rom 1:​11, 12.

◻ Hu bambae i kam wetem yu: Wan narafala elda no wan man blong givhan we i nafgud.

◻ Long taem blong visit: Ol elda oli mas kaen, soem lav, tok klia, mo rere blong jenisim toktok blong mekem i stret long famle ya. Traem kasem save long famle ya, ol samting we oli nidim, mo ol narafala samting olsem. Lesingud. Sipos i gat wan bigfala problem, i gud blong mekem plan blong mekem wan spesel visit.

◻ Taem we yu spenem long wan visit: Kam long stret taem, mo aot taem brata no sista ya i haremgud yet long visit ya.

◻ Long en blong visit: I stret blong mekem wan prea. Bambae brata no sista ya i rili gat tangkyu from.​—Filipae 4:​6, 7.

[Tok Blong Pija Long Pej 24]

Ol Kristin man blong lukaot sipsip oli mas lukaotgud long ol sipsip long saed blong speret

[Tok Blong Pija Long Pej 26]

Wok blong visitim ol sipsip i givim nambawan jans blong leftemap tingting long saed blong speret