Wan Visit We i Save Karem Blesing
1 !Sakias i glad tumas taem hem i tekem Jisas i kam long haos blong hem! !Mo visit ya i rili karem blesing!—Luk 19:2-9.
2 Tede, Jisas Kraes we i Hed blong kongregesen, i givim oda long ol elda blong “lukaotgud long ol sipsip blong God.” (1 Pita 5:2, 3; Jon 21:15-17) Ol elda oli mas givim ol tok long ol miting mo lidim wok blong prij. Antap long samting ya, oli givhan long ol wanwan memba blong kongregesen wetem lav. From samting ya, maet sam samtaem yu wantem wan elda i givhan long yu, maet long haos blong yu, no long Haos Kingdom, taem yutufala i prij tugeta, no long wan narafala taem. ?I stret we yu fraet taem ol elda oli visitim yu? No gat. Taem oli visitim yu, hemia i no minim se yu mekem wan rong. Taswe, ?from wanem ol elda oli stap visitim ol pablisa?
3 Pol i talem se hem i wantem visitim ol brata ‘blong faenemaot we olgeta oli stap olsem wanem.’ (Ol Wok 15:36) Yes, ol elda oli olsem ol man we oli lukaot long ol sipsip wetem lav, mo oli intres tumas long yu. Oli wantem givim help long saed blong speret we i save givhan mo mekem bilif blong yu i kam strong moa. Jeova we i Man blong Lukaot Sipsip wetem lav, hem i wantem se wanwan long yumi i kasem help olsem.—Esik. 34:11.
4 Welkamem Visit Blong Ol Elda: Taem Pol i visitim ol Kristin brata blong hem, hem i wantem ‘givhan long olgeta blong kasem paoa ya we tabu speret i stap givim blong mekem olgeta oli strong. Mo tu, hem i wantem se olgeta oli leftemap tingting blong hem, long sem taem we hem i leftemap tingting blong olgeta.’ (Rom 1:11, 12, NW) Long ol las dei ya we laef i strong tumas, yumi evriwan, yumi nidim se wan i leftemap tingting blong yumi long saed blong speret, mo yumi nidim help blong gohed blong stanap strong long bilif. I sua se taem yu akseptem visit blong ol elda wetem gudfala tingting, samting ya bambae i rili leftemap tingting blong yu mo bambae olgeta tu oli haremgud.
5 Soem fasin tangkyu from plante blesing we yu save kasem from visit blong ol elda. Sipos i gat wan samting no wan kwestin we i mekem yu wari, tingbaot se ol elda oli stap long kongregesen blong givhan long yu. Yu no mas fraet blong tokbaot wetem olgeta wan samting we i save spolem yu long saed blong speret Soem fasin tangkyu from plan ya we Jeova i stanemap wetem lav, mo bambae yu haremgud long ol blesing we wan visit olsem i save karem.