Trufala Fasin Blong Stap Sefgud—Naoia Mo Blong Olwe
I KLIA se Jeova God i save mekem ol man blong hem oli stap sefgud. Hem i “God ya we i Gat Olgeta Paoa.” (Ol Sam 68:14) Spesel nem blong hem i minim se “Hem i Mekem i Kamtru.” Nem ya i makemaot hem olsem Wan nomo long heven mo wol, we i save winim olgeta trabol. Nao hem i save mekem ol promes mo ol samting we hem i wantem oli kamtru. God hem wan i talem se: “Tok we i kamaot long maot blong mi, bambae i olsem. Bambae hem i no save kambak long mi, we hem i no karem frut blong hem, no gat. Be tru, bambae hem i mekem ol samting we mi mi haremgud from, mo bambae hem i mekemgud olgeta wok we mi mi sanem hem i go from.”—Aesea 55:11.
God i stap mekem olgeta we oli trastem hem oli stap sefgud. Tok blong hem i mekem promes ya. Tabu speret i pusum waes King Solomon blong talem se: “Nem blong Jeova i olsem wan strong haos. Ol stret man oli resis blong go haed long hem, nao hem i lukaotgud long olgeta.” Hem i talem tu se: “Man we i trastem Jeova, bambae hem i stap sef.”—Proveb 18:10; 29:25.
Ol Man Blong God Oli Stap Sef
Stat bifo olgeta, Jeova i mekem se ol man we oli dipen long hem, oli stap sefgud. Eksampel, Jeova i lukaotgud long profet Jeremaea. Taem ol ami blong Babilon oli raonem Jerusalem we i lego trufala wosip, ol man “oli mas skelem fastaem hamas bred oli gat raet blong kakae, mo oli wari tumas.” (Esikel 4:16) Laef i strong tumas. Sam woman oli kukum mo kakae ol pikinini blong olgeta. (Lamentesin 2:20; 4:10) Long taem ya, oli putum Jeremaea long kalabus from we hem i gohed blong prij we hem i no fraet. Be, Jeova i mekem se “evri dei, ol man oli go long ples blong kukum bred, oli tekem wan raon bred, mo oli kam givim long hem. Oli mekem olsem gogo i no moa gat bred long taon.”—Jeremaea 37:21.
Taem ol man Babilon oli winim Jerusalem, oli no kilim i ded Jeremaea. Mo tu, oli no tekem hem i go kalabus long Babilon. Defren olgeta, “jif blong ol gad [wan man Babilon] . . . i givim sam kakae mo wan presen long hem, nao i letem hem i go.”—Jeremaea 40:5.
Plante handred yia biaen, Jisas Kraes i talem klia long ol man blong God, i se: “I nogud yufala i stap tingting tumas, se ‘?Bambae yumi kakae wanem?’ no ‘?Bambae yumi dring wanem?’ no ‘?Bambae yumi kasem klos blong yumi olsem wanem?’ From we oltaem ol hiten man oli stap tingting tumas from ol samting olsem. Be Papa blong yufala long heven, hem i save we yufala i mas gat olgeta samting ya. Fastaem yufala i mas lukaotgud blong obei long God we i king blong yufala, mo blong mekem ol stret fasin we hem i wantem. Nao biaen hem i save givim olgeta samting ya tu long yufala.”—Matyu 6:31-33.
?Samting ya i minim wanem? ?I minim se bambae God i blokem olgeta trabol blong tede, blong oli no kasem ol man blong hem? No gat. Ol man we oli bilif strong long God, oli no fri long ol trabol. Samtaem, ol tru Kristin oli kasem sik, ol man oli ronem olgeta, stilim olting blong olgeta, samfala oli ded long ol akseden, mo oli kasem sam narafala trabol bakegen.
I no taem blong Jeova yet blong blokem ol man blong hem fulwan long ol trabol. Nating se i olsem, ol samting we oli kamaot oli soem se, hem i stap yusum paoa blong hem blong givhan mo blong lukaotgud long olgeta. Mo tu, ol Kristin oli blokem plante problem taem oli folem ol rul blong Baebol. (Proveb 22:3) Antap long hemia, oli harem se oli stap sef wetem ol brata mo sista blong olgeta long saed blong speret, long olgeta ples blong wol. Olgeta ya oli gat lav, mo oli givgivhan long olgeta long taem blong trabol. (Jon 13:34, 35; Rom 8:28) Eksampel, ol Wetnes blong Jeova long Yurop oli givhan long ol brata mo sista blong olgeta, we oli kasem bigfala trabol long Rwanda from faet i kamaot longwe. Oli kwik blong hivimap mo sanem 65 tan klos i go long olgeta. Mo tu, oli sanem meresin, kakae, mo ol narafala saplae, we mane blong olgeta i kasem samwe 160 milyan vatu.—Skelem wetem Ol Wok 11:28, 29.
Nating se Jeova i letem hadtaem i kasem ol trufala Kristin, oli bilif se bambae hem i givim paoa, help, mo waes, blong mekem se oli naf blong stanap strong tru long ol hadtaem ya. Aposol Pol i raet long ol Kristin brata mo sista blong hem, i se: “Ol samting ya we oli stap traem yufala [ol hadtaem], oli sem mak nomo long olgeta samting we oli stap traem olgeta man. Be God i stap holem promes blong hem. Mo hem i no save letem wan samting [hadtaem] i traem yufala, we i strong tumas long yufala. Be long taem ya we samting olsem [hadtaem] i traem yufala, God bambae i mekem rod, blong yufala i naf blong stanap strong tru long samting ya.”—1 Korin 10:13; The Emphatic Diaglott.
Samting We God i Mekem Blong Givhan Long Ol Man Blong Hem
Tede, plante milyan man oli glad tumas blong mekem samting we God i wantem. I no gat wan man i fosem olgeta blong mekem wok blong God. Oli mekem wok ya, from we oli save God mo oli laekem hem tumas. Ale, from we Jeova i laekem tumas ol trufala man blong hem, hem i promes blong jenisim wol ya i kam wan paradaes. Nao ol man we oli obei long hem oli save stap long wol ya, oli save haremgud long pis, bambae oli gat strong bodi, mo oli stap sef blong olwe.—Luk 23:43.
Bambae God i mekem samting ya tru long wan gavman blong heven, we Jisas Kraes i rul long hem, olsem King we God i putumap. (Daniel 7:13, 14) Baebol i kolem gavman ya se ‘Kingdom blong God’ mo ‘kingdom blong heven.’ (1 Korin 15:50; Matyu 13:44) Kingdom blong God bambae i tekem ples blong olgeta gavman blong man. Bambae i no moa gat plante gavman long wol. Bambae i gat wan gavman nomo long heven. Bambae hem i rul wetem stret fasin antap long ful wol.—Ol Sam 72:7, 8; Daniel 2:44.
Jeova i stap singaot olgeta man blong stap aninit long rul blong Kingdom. Wan rod we hem i folem blong mekem samting ya, hemia tru long wok blong seremaot Baebol, buk ya we i eksplenem samting we Kingdom bambae i mekem long ol man. Baebol, hem i buk we oli seremaot moa long hem, i bitim ol narafala buk long wol. Mo naoia, oli wokem haf no fulwan Baebol long bitim 2,000 lanwis.
Wetem lav, Jeova God i stap givhan long ol man blong kasem save long ol tijing blong Baebol long saed blong Kingdom. Hem i mekem olsem, taem hem i tijim mo i sanem ol man oli go blong eksplenem Baebol long ol narafala. Naoia, i gat bitim faef milyan Wetnes blong Jeova oli stap talemaot gud nyus blong Kingdom blong God long moa long 230 kantri.
?Bambae Evriwan Oli Stap Sefgud?
?Bambae evriwan oli folem ol stret loa blong God, blong soem se oli harem tok we i singaot olgeta blong obei long Kingdom blong Hem? No gat, from we plante man oli no intres blong mekem samting we God i wantem. Oli no wantem lesin taem narafala i wantem givhan long olgeta blong jenisim fasin blong olgeta. Yes, oli soem se oli olsem ol man ya we Jisas i tokbaot olgeta se: “Tingting blong olgeta i kam strong finis. Oli blokem sora blong olgeta finis. Oli satem ae blong olgeta finis. Sipos no, maet oli save luk long ae blong olgeta, maet oli save harem long sora blong olgeta, maet oli save kasem long tingting blong olgeta. Nao bambae oli save tanem tingting blong olgeta blong bilif long mi, nao [God] bambae i mekem olgeta oli gud bakegen.”—Matyu 13:15.
Bambae i no save gat trufala fasin blong stap sefgud long wol, sipos wol i fulap long ol man we oli no wantem folem ol stret rul blong God. Ol man we oli no obei long God, oli traem spolem fasin blong stap sefgud blong ol man we oli wantem wosip long Jeova.
God i no fosem ol man blong jenisim fasin blong olgeta. Be tu, bambae hem i no letem ol rabis fasin oli stap olwe. No gat. Wetem longfala tingting, Jeova i stap sanem ol Wetnes blong hem oli go blong tijim ol man long ol rul mo ol stampa tingting blong hem. Be, bambae hem i no gohed blong mekem samting ya blong longtaem yet. Jisas Kraes i talem se: ‘Bambae ol man oli stap talemaot gud nyus ya se God i king blong olgeta man. Bambae oli talemaot long olgeta ples long wol, blong oli wetnes blong hem long fes blong olgeta man. Nao biaen, bambae en i save kam.’—Matyu 24:14.
?“En” ya bambae i minim wanem long ol man we oli sakemaot ol loa blong God? Bambae oli kasem strong jajmen mo lus olgeta. Baebol i tokbaot “panis long olgeta we oli no save ona long God, mo long olgeta we oli no save obei long gud nyus blong Jisas, Masta blong yumi. Panis we olgeta bambae oli kasem long Dei ya, hemia i olsem ded we i no save finis.”—2 Tesalonaeka 1:6-9.
!I No Longtaem Bambae Yumi Stap Sefgud Blong Olwe!
Afta we Jeova i spolem ol man we oli sakemaot ol rod blong hem blong putum pis, bambae Kingdom blong hem i statem wan nambawan taem we ol man oli sef long ol trabol. Hemia blong givim blesing long ol stret man long wol ya. (Ol Sam 37:10, 11) !Nyufala wol ya bambae i defren olgeta long hemia we yumi stap long hem tede!—2 Pita 3:13.
Hadtaem blong kasem kakae mo hanggri bambae i finis. Evri man, bambae oli gat plante kakae. Baebol i talem se ‘bambae olgeta man oli haremgud long bigfala kakae we i gat oel long hem.’ (Aesea 25:6) Bambae i no moa gat man we i sot long kakae, from we “bambae i gat plante kakae long ples ya, we ol hil oli fulapgud long ol kakae.”—Ol Sam 72:16.
Bambae i no moa gat man i laef long ol haos we oli nogud mo oli fasfas. Aninit long Kingdom blong God, bambae evri man oli gat gudfala haos, mo bambae oli kakae ol kakae we oli bin planem long graon blong olgeta. Baebol i promes se: “Bambae oli wokem ol haos, mo bambae oli save stap long olgeta. Mo bambae oli planem rop ya we oli mekem waen long frut blong hem mo bambae oli kakae frut blong hem.”—Aesea 65:21.
Bambae i no moa gat fulap man we oli no gat wok. Bambae ol man oli mekem ol gudfala wok, mo oli luk gudfala frut blong wok blong olgeta. Tok blong God i talem se: “Bambae oli yusumgud ol samting ya we han blong olgeta i wokem. Bambae oli no hadwok blong nating nomo.”—Aesea 65:22, 23.
Aninit long rul blong Kingdom, bambae i no moa gat man we i harem nogud mo i ded from sik. Tok blong God i talem klia long yumi se: “Bambae i no gat wan man ples we i save talem se: ‘Mi mi sik.’ ”—Aesea 33:24.
Long Paradaes we bambae i kamtru long wol ya i no longtaem, ol man bambae oli no moa harem nogud mo harem i soa. Oli no moa save krae from sore mo ded. !Yes, bambae ded tu i finis! !Bambae ol man oli laef foreva long Paradaes! Baebol i talem se God “bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”—Revelesen 21:4.
Aninit long rul blong Jisas Kraes, “Prins blong Pis,” bambae i gat trufala fasin blong stap sefgud long wol ya. Yes, long olgeta ples long wol, bambae ol man oli stap sef aninit long rul blong wan gavman—Kingdom blong God—we i rul wetem stret fasin mo lav.—Aesea 9:6, 7; Revelesen 7:9, 17.
[Tok Makem Poen Pija Long Pej 4]
“Blong ol man oli harem se oli sef, oli mas gat bilif long fyuja, . . . mo [trastem] se ol plan long saed blong politik mo mane bambae oli stanap strong.”—Wan woman we i stap long Esia.
[Tok Makem Poen Pija Long Pej 5]
“Bitim ol narafala samting, raf fasin mo fasin stronghed i mekem yu harem se yu no sef.”—Wan man we i stap long Saot Amerika.
[Tok Makem Poen Pija Long Pej 6]
“Mi no harem se mi sef . . . taem i gat ami blong narafala kantri i kam insaed long kantri ya. Sipos i gat faet i kamaot long kantri, ?olsem wanem ol man oli save harem se oli sef?”—Wan skul pikinini long Medel Is.
[Tok Makem Poen Pija Long Pej 7]
“Bambae mi harem se mi sef, taem mi save wokbaot long taon long naet we i no gat wan man i repem mi.”—Wan skulgel long Afrika.