?Yu Yu Stap Kasem Fasin Agens?
RAF fasin agensem wan laen blong man, fasin blong no laekem man blong narafala kala, fasin blong seraot long ol defren grup, mo fasin blong kilim i ded olgeta man long wan laen—?olsem wanem ol fasin ya oli sem mak? Olgeta fasin ya oli kamaot from wan fasin blong man we i stap long olgeta ples long wol—!hemia, fasin blong agensem narafala from we hem i no sem mak long yumi!
?Wanem ya fasin blong agensem narafala from we hem i defren long yumi? Wan insaeklopedia i eksplenem tok ya moa se, hem i “wan tingting we man i save gat, we hem i jajem narafala wantaem nomo, i no tektaem blong tingtinggud fastaem.” From we yumi sinman, plante taem tingting ya blong agensem narafala i save kasem yumi. Maet yu save rimemba wan taem we yu bin jajem narafala bifo we yu gat pruf. Baebol i talem se fasin ya blong jajem narafala folem tingting blong yumi, i defren long fasin blong Jeova God blong jajem man. Hem i talem se: “God i no luk ol samting olsem ol man oli stap luk ol samting ya. Tru, ol man oli luk ol samting we ae blong olgeta i save luk. Be long saed blong Jeova, hem i luk wanem i stap long hat blong man.”—1 Samuel 16:7.
Fasin Blong Agensem Narafala We i Defren Long Yumi i Save Spolem Hem
I sua se samtaem, evri man i kasem fasin ya we narafala i jajem hem rong. (Skelem wetem Eklesiastis 7:21, 22.) Yumi evriwan i kasem fasin agens from we yumi evriwan i defdefren. Be, sipos yumi kwik blong sakemaot tingting ya, bambae samting ya i blokem yumi blong spolem narafala. Sipos yumi holemtaet tingting ya, samting ya i save mekem trabol i kamaot. Hem i save pulum yumi blong bilivim sam gyaman tok. Eksampel, taem wan man i gat tingting ya blong agensem narafala we i defren, ale kwiktaem nomo hem i save strong blong jajem wan man se hem i griri, i man blong les, i krangke, i flas, jes from we hem i gat wan narafala skul, laen, no kantri.
Plante taem, fasin blong jajem man rong, i pulum man blong mekem i no stret long narafala, blong tok nogud, mo blong mekem raf fasin blong spolem narafala. Plante milyan man oli lusum laef blong olgeta long ol faet blong kilim i ded wan ful laen blong man, kilim man blong narafala kantri, mo long plante narafala trabol bakegen. Ol trabol ya oli kamaot from fasin ya blong agensem man we i defren.
Long olgeta ples blong wol, ol gavman oli traem blong faetem fasin ya blong agensem narafala from we hem i defren. Oli stanemap ol loa blong givim raet long man blong hem i fri, i sef, mo i sem mak long ol narafala man. Sipos yu ridim konstitusen no ol bigfala loa long kantri blong yu, ating yu save faenem wan haf blong olgeta we i talem se olgeta man long kantri ya oli fri blong mekem prapa disisen blong olgeta, nating se oli man no woman mo oli blong wanem kala no skul. Be yet, fasin blong agensem narafala from we hem i no sem mak, mo fasin blong mekem i defren long wan man bitim narafala, i stap long olgeta ples blong wol.
?Yu yu wan man we yu stap kasem trabol from we yu defren long ol narafala? ?I gat wan man we i bin talem se yu griri, les man, krangke, flas, jes from we kala, yia, kantri, no skul blong yu i defren long hem, no from we yu yu man mo hem i woman, no yu yu woman mo hem i man? ?Yu gat trabol blong kasem gudfala edukesen, no blong faenem wok, haos, mo help long komuniti, jes from we yu yu defren long ol narafala? Sipos yes, ?yu save mekem wanem
[Tok Blong Pija Long Pej 3]
Sipos yu holemtaet tingting blong no laekem man we i defren long yu, samting ya i save mekem se yu agensem man blong narafala kala
[Credit Line]
Nina Berman/Sipa Press