!Taem We Fasin Agens Bambae i Finis!

WAN ripot i talem se man ya blong sayens, Albert Einstein, i bin talem se long wol ya we i gat tumas trabol, i hadwok moa blong winim fasin blong agensem narafala man i bitim blong brekem atom.a Man ya Edward R. Murrow, we i stap raetem ol store blong nyuspepa, plante man oli save hem from wok blong hem long Seken Bigfala Faet Blong Wol, mo biaen hem i kam lida blong wan ogenaesesen long Yunaeted Stet we i blong givimaot save. Hem tu i bin talemaot se “i no gat wan man we i save blokem fasin ya blong no laekem man we i defren​—oli save luksave nomo se trabol ya i stap.”

?Ol tok ya oli tru? ?I gat rod blong finisim fasin blong agensem narafala man we i defren long yumi mo man blong defren kala? ?Wanem tingting blong God long saed blong fasin ya?

God i Stap Mekem i Sem Mak Nomo Long Olgeta Man

Baebol i tok agens long fasin blong mekem i gud moa long sam man bitim ol narafala man. (Proveb 24:23; 28:21) Hem i talem se man we i gat “waes long heven, hem i narafala. Nambawan samting blong hem, laef blong hem i klingud. Hem i man blong pis, i kwaet man, i man blong joen gud long narafala man, mo i man we i gat sore. Waes blong man ya i gat plante gudfala frut long laef blong hem. Man ya i no save jajem man long fasin we i no stret, mo hem i no gat tu tingting.” (Jemes 3:​17) I impoten we olgeta jaj blong Isrel bifo oli gat waes ya.

Oli kasem oda ya se: “Yufala i mas mekem i stret taem yufala i jajem narafala. Yufala i mas mekem i sem mak long man we i no gat nem olsem we yufala i mekem long ol narafala, mo yufala i no mas laekem moa wan man we i gat haenem.”​—Levitikas 19:15.

Jisas Kraes mo tufala aposol blong hem, Pita mo Pol, oli soemaot klia, strongfala tingting blong Baebol agensem fasin blong no mekem i sem mak long olgeta man, mo fasin blong agensem man we i defren long yumi. Jisas i mekem i sem mak nomo long olgeta man we oli olsem “ol sipsip we oli no gat man blong lukaot long olgeta.” (Matyu 9:​36) Hem i tijim se: “I nogud yufala i stap jajem man long fasin ya we yufala i jes lukluk nomo. Yufala i mas jajem man long fasin we i stret gud.”​—Jon 7:​24.

Pita mo Pol tufala i talem se Jeova God hem wan i gat fasin blong mekem i sem mak nomo long olgeta man. Pita i talem se: “Tru, mi mi luksave se God i no stap mekem i moa gud long wan man, i bitim narafala man. Be long olgeta nesen, sipos wan man i fraetgud long God, mo i mekem stret fasin, bambae God i glad long man ya.” (Ol Wok 10:34, 35, NW) Aposol Pol i talem se: “God i stap mekem i sem mak nomo long olgeta man.”​—Rom 2:​11.

Paoa Blong Baebol

Baebol i gat paoa blong jenisim fasin blong ol man we oli letem hem i lidim olgeta. Hibrus 4:​12 i talem se: “Tok blong God i wan samting we i laef, mo we i stap wok.” Wetem help blong Jeova, wan man we i gat fasin blong agensem narafala man we i defren long hem, i save jenis, mo i save karem fasin blong mekem i sem mak long olgeta man.

Tingbaot Sol blong Tasas. Baebol i talem se bifo, hem i wan man we i agensem bigwan Kristin kongregesen,b from we hem i folem sam strongfala kastom blong skul. (Ol Wok 8:​1-3) From kastom blong ol man Jyu, hem i bilif fulwan se olgeta Kristin oli man blong apostasic mo oli enemi blong trufala wosip. From we hem i gat fasin ya blong no laekem nating ol Kristin, hem i sapotem ol man we oli kilim olgeta ya oli ded. Baebol i talem se hem i ‘tok strong, i stap mekem promes blong kilim ol man blong Masta oli ded.’ (Ol Wok 9:1) Taem hem i mekem olsem, hem i ting se i stap mekem wok blong God.​—Skelem wetem Jon 16:2.

Be, Sol blong Tasas i sakemaot fasin ya blong mekem nogud tumas long narafala from we hem i defren. !Mo tu, hem wan i kam wan Kristin! Biaen, taem hem i kam wan aposol blong Jisas Kraes, we nem blong hem Pol, hem i raetem se: “Bifo, mi mi stap tok nogud long hem, mi stap ronem hem, mi stap mekem i nogud long hem. Be nating. Hem i gat sore long mi, from we mi mi no bilif long hem, nao mi no save ol samting ya we mi stap mekem.”​—1 Timote 1:​13.

I no Pol nomo we i mekem wan bigfala jenis olsem long fasin blong hem blong tingting. Long leta we hem i raetem i go long wan narafala man blong talemaot gud nyus, Taetas, hem i talem long olgeta Kristin se oli no mas “tok nogud long nem blong narafala man, mo oli no man blong rao. Oli mas man we oli save frengud long ol man, mo oltaem oli mas mekem i gud long ol man. From we bifo, yumi tu i stap mekem i krangke. Yumi no save obei, mo yumi lusum stret rod olgeta. Bifo, yumi stap mekem ol samting we yumi nomo i wantem, mo we yumi stap haremgud long hem. Long taem ya, yumi fas long ol fasin ya olsem we yumi kalabus nomo, yumi no save kam fri bakegen. Mo oltaem yumi stap jelas, mo yumi stap kros longtaem. Ol narafala man oli no laekem yumi, oli agens long yumi, mo yumi tu i no laekem olgeta, yumi agens long olgeta.”​—Taetas 3:​2, 3.

Sakemaot Fasin Blong Agensem Man We i Defren, We i Olsem Wan Fenis

Tede, ol trufala Kristin oli traehad blong folem advaes ya. Oli mas stap longwe long fasin blong jajem man folem tingting blong olgeta nomo. Samting ya bambae i blokem olgeta blong oli no ‘tok nogud’ long saed blong narafala. Oli haremgud from we oli joen long wan kampani blong ol brata we oli kamaot long olgeta nesen, laen, mo kala blong wol.

Tingbaot Henrique, wan yangfala man Brasil we i gat blak skin. Plante taem, ol man oli spolem hem from kala blong hem i defren long olgeta, mekem se hem tu i gat fasin blong no laekem nating ol waet man. Hem i eksplenem se: “Tu Wetnes we oli laet skin, oli kam long haos blong mi blong tokbaot nem blong God. Fastaem, mi no wantem lesin from we mi mi no trastem ol waet man. Be biaen, mi luk se mesej blong olgeta i trutok. Ale, mi agri blong stadi Baebol wetem olgeta. Faswan kwestin we mi mi askem long olgeta se: ‘?I gat plante blak man long jyos blong yufala?’ Oli ansa se: ‘Yes.’ Nao, oli soemaot wan pija long mi, we i stap long buk ya My Book of Bible Stories.d Pija ya i soemaot wan grup blong ol yangfala we oli gat ol defren kala skin. Long pija ya i gat wan blak boe, mo samting ya i leftemap tingting blong mi. Biaen, mi go long Haos Kingdom blong ol Wetnes blong Jeova. Long ples ya, mi luk ol man blong ol defren kala we oli soem respek long wanwan blong olgeta. Long tingting blong mi, samting ya i gud tumas.”

Naoia, Henrique i wan Wetnes blong Jeova, mo hem i glad tumas blong stap long kampani blong ol trufala Kristin brata. Hem i kasem save se samting ya i no kamaot from wan man. Hem i se: “Tede, mi talem tangkyu long Jeova mo Jisas from olgeta samting we tufala i mekem long mi. Mi stap wok wetem plante milyan man we oli stap holemstrong long Jeova. Oli kamaot long olgeta kantri, kala, mo defren kaen laef, be oli joen tugeta wetem wan stampa tingting nomo.”

Taem Dario i stap gruap, ol man oli mekem plante trabol long hem from we hem i defren. Taem hem i gat 16 yia, hem i stadi Baebol wetem ol Wetnes blong Jeova. Hem i talem se: “Taem mi stap wetem ol Wetnes, mi luk se i no gat wan man we i gat filing se hem i hae moa long narafala from kala blong skin.” Hem i sapraes from trufala lav we ol man ya oli soemaot. Hem i makem tu se, ol man blong ol defren kala skin oli gat wok insaed long kongregesen. Naoia, taem wan man blong wol i mekem nogud long Dario from kala blong hem, oltaem hem i rimemba se Jeova i laekem ol man blong olgeta kantri, laen, mo lanwis.

Olsem Wanem Blong Winim

Yumi evriwan i glad, taem narafala i kaen long yumi mo i soemaot respek long yumi. Taswe, taem narafala i mekem trabol long yumi from we yumi defren long hem, hemia wan strong traem. Kristin kongregesen i no save blokem ol tok agens we yumi kasem long ol man blong rabis wol ya, we oli agensem ol man we oli defren long olgeta. Go kasem taem we Setan i no moa bos long wol ya, bambae ol fasin we oli no stret oli gohed nomo. (1 Jon 5:​19) Revelesen 12:12 i givim woning ya long yumi se: “Sore tumas long yu, graon, mo long yu, solwora. From we Setan i kamdaon finis long yufala, mo hem i kros tumas, from we i save, i gat smol taem nomo blong hem i stap yet.” Tingting blong hem i no jes blong mekem man i harem nogud nomo. Hem i olsem wan wael anamol stret. Aposol Pita i talem long yumi se: “Enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigfala, i stap lukaot man blong i kakae.”​—1 Pita 5:8.

Mo tu, Baebol i talem se: “Yufala i mas putum yufala i stap daon, aninit long han blong God. Yufala i mas blokem Setan, nao hem bambae i ronwe long yufala.” (Jemes 4:7) Wan gudfala samting we i save halpem yumi blong winim trabol ya we narafala i agensem yumi from we yumi defren, hemia blong trastem God blong bambae i lukaotgud long yumi. Yumi save mekem olsem King Deved we i talem se: “God blong mi, plis yu sevem mi long ol man nogud, yu tekemaot mi long paoa blong ol rabis man ya, we fasin blong olgeta i strong tumas.” (Ol Sam 71:4) Maet yumi save prea olsem man blong raetem Sam, se: “God, plis yu sore long mi, from we ol man oli stap kam mekem faet long mi, oltaem ol enemi ya blong mi oli stap ronem mi.”​—Ol Sam 56:1.

?Bambae God i ansa long ol prea olsemia? Baebol i talem se: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, we oli no gat man blong lukaot long olgeta. Hem bambae i gat sore long ol puaman, mo long olgeta we oli no strong, hem bambae i stap sevem laef blong olgeta we oli sot long ol samting.” (Ol Sam 72:12, 13) !I gud tumas blong save se long stret taem blong hem, bambae Jeova i mekem olgeta man we oli stap kasem trabol, oli fri olgeta!

“Bambae Oli No Mekem Nogud Nating”

Ol gavman blong wol ya, bambae oli gohed blong putumap ol loa mo folem ol plan blong olgeta blong faet agensem fasin blong no mekem i sem mak long olgeta man. Maet oli gohed blong mekem promes se bambae olgeta man oli sem mak, mo bambae i gat stret fasin i kamaot long olgeta man. Be bambae oli no winim fasin ya. (Ol Sam 146:3) God nomo i save mekem olsem, mo bambae hem i finisim olgeta nogud fasin we man i stap mekem agensem narafala man we i defren. Bambae hem i jenisim fasin blong laef blong olgeta man blong oli kam wan famle nomo we oli joengud tugeta. Baebol i tokbaot “wan bigfala hif blong man, we olgeta i plante tumas, i no gat man i save kaontem olgeta. Ol man ya oli kamaot long olgeta kala mo long olgeta laen, mo long olgeta kantri, mo long olgeta lanwis.” Olgeta ya nao bambae oli stap laef taem rabis wol ya i lus, mo bambae oli glad blong laef long pis.​—Revelesen 7:​9, 10.

Bambae Jeova i finisim olgeta soa we i bin kamaot from fasin blong no laekem man blong defren kala no blong defren fasin blong laef. !Tingbaot, bambae i no moa gat wan man we i mekem i no stret long narafala! “Bambae oli sidaon, wanwan, aninit long rop blong frut we oli wokem waen long hem mo aninit long figtri blong olgeta. Bambae i no gat wan samting we i mekem olgeta oli seksek. From we prapa maot blong Jeova blong ol ami i talem olsem.” (Maeka 4:4) Mo Aesea 11⁠:9 i talem se: “Bambae oli no mekem nogud nating.”

Sipos naoia samfala oli stap agensem yu from we yu defren long olgeta, nambawan hop ya blong fyuja bambae i mekem yu yu frengud moa wetem Jeova. Bambae hem i halpem yu blong stanap strong tru long ol fasin we oli no stret long rabis wol ya tede. Sipos yu stap kasem ol trabol olsem, traem lukluk i go long fyuja, mo folem waes advaes blong Baebol, se: “Yufala evriwan ya we yufala i putum tingting blong yufala i stap long Hae God, yufala i mas strong. Tingting blong yufala i mas stap strong oltaem.”​—Ol Sam 31:⁠24.

[Ol futnot]

[Foto Credit Line Blong Pija Long Pej 4]

U.S. National Archives photo