Ol Anamol We “Waes i Stap Finis Long Tingting Blong Olgeta” Oli Save Tijim Yumi

LONG ol yia 1900, ol man long olgeta ples blong wol, oli wokem plante nyufala samting, olsem mesin blong mekem rum i kolkol, samting blong mekem se wora i no kam aes, samting blong tekemaot sol we i stap long solwora, mo mesin we i yusum saon blong makem ples blong ol samting aninit long solwora. Be, i gat sam anamol we oli stap mekem ol samting ya plante taosen yia bifo. Yes, ol man oli lanem plante samting taem oli stadi long ol anamol ya, we “waes i stap finis long tingting blong olgeta.” (Proveb 30:24-28; Job 12:​7-9) Tru tumas, sam anamol oli kam olsem ol tija blong man, nating se oli no save toktok. Yumi save faenem plante samting we oli pulum intres blong yumi sipos yumi stadi long olgeta.

?Sipos yumi stadi long fasin blong sam anamol, samting ya i save givhan long yumi tu? Yes. Jisas Kraes i tokbaot ol man blong hem se oli olsem ol sipsip, ol snek, ol sotleg, mo ol lokis. ?Wanem i stap long tingting blong hem taem hem i talem olsemia? Bambae yumi luk.

“Ol Sipsip Blong Mi Oli Save Harem Voes Blong Mi”

Baebol i tokbaot sipsip bitim 200 taem. Smith’s Bible Dictionary i eksplenem se, “sipsip i saen blong kwaet fasin, longfala tingting, mo fasin obei.” Profet tok blong Aesea japta 53 i tokbaot Jisas olsem wan sipsip. !I stret nomo we Jisas i talem se ol man blong hem tu oli olsem ol sipsip! Be, ?Jisas i stap tingbaot wanem fasin blong ol sipsip taem hem i talem samting ya?

Jisas i talem se: “Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi.” (Jon 10:27) Olsem nao, hem i soemaot se ol disaepol blong hem oli gat tingting daon mo oli wantem tumas blong folem hem. Ol trufala sipsip oli lesin long man we i lukaot long olgeta mo oli glad blong folem hem. Mo tu, man blong lukaot long sipsip i laekem tumas ol sipsip blong hem.

Maet wan grup blong sipsip i stap olbaot long wan pis graon blong kakae gras, be ol wanwan sipsip ya oli stap lukluk ol narafala sipsip raonabaot long olgeta. Taswe, taem oli harem se oli no sef no oli fraet, buk ya Alles für das Schaf (Evri Samting Blong Ol Sipsip) i talem se “kwiktaem oli hivap wanples.” Sipos ol sipsip oli ronwe from i gat denja, oli ronwe tugeta olsem wan grup, mo sam samtaem oli stop blong lukluk sipos denja ya i stap yet no oli sef. “Taem oli ronwe mo oli stop sam samtaem olsem, samting ya i givhan long ol pikinini sipsip mo ol sipsip we oli no strong, blong oli save stap wetem grup ya. Mo tu, from we oli stap long medel blong grup blong ol sipsip ya, samting ya i protektem gud olgeta.” ?Yumi save lanem wanem from fasin ya blong olgeta?

Ol trufala Kristin tede, oli no stap wanwan insaed long ol smosmol grup mo skul blong Krisendom.a Be, oli stap tugeta olsem wan grup blong sipsip. Ol wanwan Kristin ya oli save se oli blong kampani ya blong God, mo samting ya i mekem se ogenaesesen blong ol Wetnes blong Jeova i joengud. Taem oli kasem trabol​—maet wan bigfala sik, wan faet, no wan disasta​—?ol wanwan man blong wosip ya oli go wea blong kasem advaes we i lidim olgeta mo i protektem olgeta? Long ogenaesesen blong Jeova, we i mekem olgeta oli stap sef long saed blong speret.

?Olsem wanem oli kasem ol advaes ya blong Baebol? Tru long ol buk olsem Wajtaoa mo Wekap! Ol buk ya mo ol Kristin miting oli givhan bigwan long olgeta we oli gat spesel nid, olsem ol pikinini sipsip mo ol sipsip we oli no strong tumas. Eksampel, spesel advaes i go long ol famle we papa no mama nomo i lukaot long ol pikinini, mo long olgeta we oli harem nogud from we tingting blong olgeta i foldaon. !From samting ya, i waes blong ridim olgeta Wajtaoa mo Wekap! ya, kam long olgeta miting blong kongregesen,b mo mekem olgeta samting we yumi lanem, i wok long laef blong yumi! Long rod ya, yumi soemaot se yumi gat tingting daon mo yumi fasgud long grup blong ol sipsip blong God.​—1 Pita 5:2.

‘Waes Olsem Snek Mo Kwaet Olsem Sotleg’

Smith’s Bible Dictionary i talem se: “Long olgeta kantri blong Is, snek i saen blong samting we i nogud, mo fasin blong no obei.” Be, tok ya “sotleg blong mi,” wan man i save yusum blong soem se hem i laekem tumas wan narafala. (Sing blong Solomon 5:2) Taswe, ?Jisas i stap tingbaot wanem, taem hem i talem long ol man blong hem se oli mas ‘waes long ol trik, olsem snek, mo kwaet man, olsem sotleg’?​—Matyu 10:16.

Jisas i stap givim advaes long saed blong wok blong prij mo tijim ol man. Ol disaepol blong hem oli save faenem sam man we oli glad blong lesin long olgeta mo sam narafala we oli no glad. I gat sam man we oli save soem intres, be ol narafala bambae oli no wantem harem gud nyus. Bambae i gat samfala tu we oli save ronem mo mekem bigfala trabol long ol man ya blong God. (Matyu 10:17-​23) ?Ol disaepol oli mas mekem wanem taem oli kasem trabol olsem?

Long buk ya Das Evangelium des Matthäus (Gospel blong Matyu), Fritz Rienecker i tokbaot Matyu 10:16 se: “Fasin waes . . . i mas joen wetem stret fasin, fasin blong tok tru oltaem, mo fasin blong talemaot tingting blong yumi klia nomo. Olsem nao, sipos wan enemi i tok agensem yumi, hem i no save pruvum ol tok blong hem. Ol man blong Jisas oli stap long medel blong ol enemi we oli no gat sore nating, we oli no save soem kaen fasin long ol aposol ya, mo we oli yusum eni jans we oli gat blong faet agensem olgeta mo mekem raf fasin. Taswe, ol aposol oli nidim blong gat fasin olsem snek. Oli mas stap luklukgud ol enemi blong olgeta, oli mas skelemgud ol samting wetem ae mo tingting we i wekapgud. Oli mas naf blong winim trabol, we oli no yusum wan trik no gyaman fasin. Ol tok mo fasin blong olgeta oli mas stret mo tru, nao long rod ya oli pruvum se oli olsem sotleg.”

?Ol man blong God tede, oli save lanem wanem from ol tok blong Jisas long Matyu 10:16? Tede, taem ol man oli harem gud nyus, oli mekem kolosap sem mak olsem ol man long faswan handred yia oli mekem. Taem ol man oli ronem mo mekem trabol long ol trufala Kristin, ol Kristin ya oli mas joenem fasin waes olsem snek wetem stret fasin olsem wan sotleg. Ol Kristin oli neva yusum ol gyaman trik mo tok, oli no gat kruked fasin, be oli tok tru mo oli gat stret fasin taem oli talemaot mesej blong Kingdom long ol narafala.

Hemia wan eksampel: Ol fren long wok, ol yangfala long skul, mo ol memba blong stret famle blong yu, oli save tok nogud long yu from bilif blong yu olsem wan Wetnes blong Jeova. Taem oli mekem samting ya, maet yu wantem givimbak semkaen tok long olgeta, mo talem ol nogud tok agensem bilif blong olgeta. Be, ?hemia nao kwaet fasin? No gat. Sipos yu soemaot long ol man ya we oli tok agens long yu, se ol tok we oli talem i no save spolem gudfala fasin blong yu, maet bambae oli no moa gohed blong talem ol nogud tok agensem yu. Long rod ya, bambae yu soemaot se yu waes mo se yu no gat poen​—yes, yu ‘waes long ol trik, olsem snek, be yu kwaet man tu, olsem sotleg.’

‘Ol Lokis Ya Oli Olsem Ol Hos We Oli Mekemlaen Long Taem Blong Faet’

Buk ya GEO i talem se long 1784, wan “bigfala hif [blong lokis] we neva bifo i gat wan bigfala hif olsem,” i spolem Saot Afrika. Bigfala hif blong lokis ya i kavremap wan graon we i olsem 5,200 skwea kilomita, hemia faef taem moa bigfala bitim kantri blong Hong Kong. Smith’s Bible Dictionary i talem se ol lokis oli “spolemgud ol garen mo bus long ol kantri we oli gotru long olgeta.”

Long revelesen we God i givim long Jisas long ol samting we bambae oli kamaot long ‘dei blong Masta,’ hem i yusum pijatok blong wan bigfala hif blong lokis. Baebol i tokbaot olgeta se: “Ol lokis ya, mi luk olgeta oli olsem ol hos we oli mekemlaen long taem blong faet.” (Revelesen 1:​1, 10; 9:​3-7) ?Wanem mining blong pijatok ya?

Longtaem finis, ol Wetnes blong Jeova oli kasem save se ol lokis ya blong Revelesen japta 9, oli minim ol man blong God we tabu speret i makemaot olgeta long wol ya, long ol yia 1900.c Ol Kristin ya oli gat wan spesel wok blong mekem​—hemia blong talemaot mesej blong Kingdom long olgeta ples blong wol mo blong mekem disaepol. (Matyu 24:14; 28:19, 20) Samting ya i minim se oli mas stanap strong tru long ol traem mo fasgud long wok blong olgeta. I no gat wan pijatok we i eksplenemgud fasin ya, bitim hemia blong ol lokis we man i no save winim.

Nating se lokis i smol olsem 5 sentimita nomo, be hem i save flae 100 no 200 kilomita long wan dei. Lokis blong draeples i save flae 1,000 kilomita long wan dei. Buk ya GEO i eksplenem se wan lokis i save “muvmufum ol wing blong hem 18 taem long wan seken mo hem i save gohed blong mekem olsem, 17 haoa long wan dei​—i no gat wan narafala bebet we i save mekem samting ya.” !Hemia i rili wan bigfala wok blong wan smol bebet olsem!

Olsem wan grup, ol Wetnes blong Jeova oli strong blong karem gud nyus blong Kingdom i go long evri ples. Naoia oli prij long bitim 230 kantri. Ol man ya blong God oli mas winim plante hadtaem blong oli save joen long wok ya. ?Wanem kaen problem we oli fesem? Ol man oli daonem olgeta, gavman i putum tabu long wok blong olgeta, samfala oli sik, tingting blong samfala i foldaon, mo ol famle oli agensem olgeta, hemia jes sam long olgeta trabol we oli kasem. Be, i no gat wan samting we i naf blong stopem wok blong olgeta. Oli fasgud long wok ya we God i givim long olgeta.

Gohed Blong Soemaot Ol Kristin Fasin

Yes, Jisas i talem se ol man blong hem oli olsem ol sipsip, ol snek, ol sotleg, mo ol lokis. Samting ya i stretgud long taem blong yumi. ?From wanem? From we en blong wol ya i kolosap nomo, mo ol problem oli hevi moa bitim bifo.

Ol tru Kristin we oli no fogetem ol pijatok ya blong Jisas, oli fasgud long grup blong ol sipsip blong God, mo oli gat tingting daon blong folem ol advaes we ogenaesesen blong Jeova i givim. Oli stap wekapgud oltaem mo oli lukaotgud blong blokem ol samting we i save spolem Kristin wok blong olgeta. Long semtaem, oli meksua se oli no gat poen. Antap moa, oli gohed blong mekem samting we God i wantem nating se oli kasem trabol. Mo oli gohed blong lanem plante samting from fasin blong ol anamol, we “waes i stap finis long tingting blong olgeta.”

[Ol futnot]