Ol Rul We Ol Dokta Oli Folem Mo Fasin Blong No Yusum Blad

LONG ol yia we oli jes pas, ol man oli kasem plante moa save long saed blong ol meresin, i bitim olgeta taem bifo. Be, taem ol dokta oli faenem moa meresin blong winim sik, samting ya i mekem sam problem oli kamaot long saed blong ol rul we ol dokta oli folem, long fasin we oli mekem long ol sikman.

Oli mas tinghevi long olkaen kwestin olsem: ?I stret se samtaem dokta i no moa givim strong meresin long wan man we i sik tumas, blong letem se sikman ya i ded nomo? ?I stret we dokta i mekem samting we i agensem tingting blong sikman, sipos hem i harem se samting ya we hem i wantem mekem i moagud long sikman ya? Taem wan meresin i sas tumas we sam man nomo oli save pem, ?olsem wanem blong mekem se olgeta man oli gat rod blong kasem kea mo meresin we oli nidim taem oli sik?

Ol bigfala kwestin olsem, oli mekem se ol man oli stap lukluk bakegen long ol rul we ol dokta oli lukaotgud blong folem, long saed blong fasin we oli mekem long ol sikman. Ol spesel rul ya oli blong halpem ol dokta mo sayentis blong stretem ol problem we oli kamaot bitwin long olgeta mo ol sikman, from ol nyufala save we oli stap faenem long saed blong bodi mo ol nyufala meresin. Bighaf blong ol strongfala disisen oli mas mekem long ol hospital, taswe plante hospital oli stanemap ol komiti blong lukluk long saed blong bisnes ya blong ol rul we ol dokta oli mas folem. Plante taem, ol memba blong komiti ya​—hemia sam dokta mo loea​—oli mekem ol bigfala miting, blong tokbaot mo lukluk long ol problem we oli save kamaot bitwin ol dokta mo ol sikman, taem oli yusum ol nyufala save mo meresin.

Sam kwestin we oli kamaot plante taem long ol miting ya, hemia se: ?Ol dokta oli mas respektem bilif blong ol Wetnes blong Jeova go kasem wanem mak, taem ol Wetnes oli no wantem tekem blad from bilif blong skul blong olgeta? ?Sipos dokta i luk se “i moagud” blong givim blad long wan sikman, i stret we hem i mekem olsemia, nating se sikman ya i no wantem? ?I stret fasin sipos dokta i gohed blong mekem samting we i no talem long sikman, from we hem i ting se ‘sipos sikman ya i no save long samting ya, bambae tingting blong hem i no trabol from’?

Blong mekem stret fasin long taem olsem, ol dokta oli mas kasem save long bilif blong ol Wetnes. Ol Wetnes blong Jeova oli wantem tumas blong eksplenem bilif blong olgeta long ol dokta, from we oli luksave se sipos oli toktok stret tugeta long saed ya, bambae i no gat trabol biaen.

Serem Ol Defren Tingting

Tija Diego Gracia, wan man Spen we i gat bigfala save long saed blong ol rul we ol dokta oli mas folem, i wantem se klas blong hem i gat wan miting wetem ol Wetnes. Tija ya i talem se: “I stret nomo we yufala [ol Wetnes blong Jeova] i gat jans blong talemaot ol samting we oli impoten long yufala . . . antap moa, olgeta problem we yufala i kasem long saed blong bisnes ya blong tekem blad.”

Taswe, long Jun 5, 1996, oli singaot tri Wetnes blong Jeova oli kam long Komplutens Yunivesiti long Madrid, Spen, blong tokbaot bilif blong olgeta. Samwe long 40 dokta mo sam narafala man blong hae save, oli stap.

Afta we ol Wetnes oli mekem wan sotfala toktok, oli letem taem long ol man we oli wantem askem kwestin. Olgeta man we oli stap long taem ya oli agri se wan sikman we i bigman finis, hem i gat raet blong mekem disisen se hem i no wantem meresin no rod we dokta i wantem yusum blong traem winim sik blong hem. Olgeta man long klas ya oli bilif tu se, dokta i no gat raet blong gohed blong givim blad long wan sikman sipos hem i no bin askem sikman ya fastaem. Be, oli wari lelebet long bilif blong ol Wetnes.

Wan wari blong olgeta, hemia long saed blong mane. Taem dokta i katem man we i no yusum blad, sam samtaem hem i nidim ol spesel tul, olsem taem hem i katem man wetem spesel laet, mo tu, taem hem i yusum ol meresin we oli sas tumas, olsem erythropoietin, we oli givim long man we i sot long blad, blong mekem se bodi blong hem i wokem moa blad kwiktaem. Wan dokta i gat tingting ya se, taem ol Wetnes oli no wantem tekem blad blong narafala man we i no sas tumas, maet ol Wetnes ya oli stap ting se ol man we oli wok long saed blong helt oli mas givim spesel meresin long olgeta we i sas tumas.

Nao wan Wetnes we i stap long miting ya i toktok, i agri se bisnes ya long saed blong mane i wan samting we ol dokta oli mas skelemgud. Be tu, hem i tokbaot risal blong sam stadi we oli soemaotgud mane we oli mas yusum taem ol problem we ol man oli no luksave oli kamaot, from we oli bin givim blad long wan man. I gat mane we oli mas yusum blong winim ol sik we oli kamaot from blad we oli givim long ol man, mo tu, mane we ol man ya oli lusum taem oli no save wok from sik we blad i givim long olgeta. Oli tokbaot wan bigfala stadi we oli mekem long Yunaeted Stet. Stadi ya i soemaot se plastik bag blong blad we oli givim long man, praes blong hem i samwe long 30,000 vatu nomo. Be taem oli joenem wetem ol problem we oli kamaot from blad ya, praes i go antap bitim 150,000 vatu​—hemia faef taem antap long praes blong fastaem. Taswe, olsem hem i poenemaot, taem yumi skelem olgeta samting ya, i no sas tumas sipos dokta i no yusum blad taem hem i katem man. Mo tu, bighaf blong mane we oli yusum taem dokta i katem man we i no yusum blad, hemia blong pem ol tul we oli save yusum bakegen.

Wan narafala kwestin we i stap long tingting blong samfala dokta long miting ya, hemia se maet tingting blong ol narafala Wetnes i gat paoa long sikman. Oli askem kwestin se, ?Wanem samting bambae i kamaot sipos bilif blong wan Wetnes i seksek nao i agri blong tekem blad? ?Bambae ol narafala Wetnes oli no moa wantem save hem?

Ansa blong tufala kwestin ya i dipen nomo long ol samting we oli kamaot long taem ya. Fasin blong no obei long loa blong God i wan bigfala samting, mo ol elda blong kongregesena oli mas luklukgud long wan man we i no obei long loa ya. Ol Wetnes oli wantem halpem eni man we i pastru long wan taem long laef blong hem we i strong tumas, olsem taem dokta i katem hem from wan bigfala sik we i save ded from, nao hem i agri blong tekem blad. I sua se, wan Wetnes olsemia, bambae i harem nogud tumas mo bambae i wari se hem i no moa fren wetem God. Maet wan man olsem i nidim we narafala i halpem hem mo i traem kasem save long filing blong hem. From we stampa blong Kristin skul hemia lav, taswe ol elda oli mas yusum fasin sore mo no mekem i strong tumas long narafala, olsem oli mekem long olgeta bisnes we oli jajem.​—Matyu 9:​12, 13; Jon 7:​24.

Wan tija long saed blong ol rul we ol dokta oli mas folem, i aot long Yunaeted Stet i kam long miting ya. Nao hem i askem se: “?Bambae i no longtaem, yufala ol Wetnes i skelem bakegen ol rul we yufala i stap folem? Ol narafala skul oli bin mekem olsem long ol yia we oli jes pas.”

Ol Wetnes oli talem long hem se, disisen we oli tekem se blad i tabu, i wan strong bilif, i no jes wan tingting long saed blong ol rul we oli stap jenisim sam samtaem. Loa blong Baebol i klia nomo, mo i no gat wan risen we i givim raet long olgeta blong jenisim. (Ol Wok 15:​28, 29) Wan Wetnes i no save brekem loa ya blong God, olsem we i no save agri wetem wosip blong ol aedol mo fasin blong slip olbaot.

Ol Wetnes blong Jeova oli gat bigfala tangkyu long ol dokta, olsem olgeta ya long Madrid we oli mekem miting ya long saed blong ol rul we ol dokta oli mas folem. Ol Wetnes oli glad we oli respektem disisen blong olgeta, blong faenem sam narafala meresin we i no go agensem bilif blong olgeta we i stanap strong long Baebol. I klia se, fasin ya blong lukluk long ol rul we ol dokta oli stap folem, bambae i mekem wan impoten wok. Hemia blong halpem ol dokta mo ol sikman blong agri moa, mo blong halpem ol dokta blong gat moa respek long tingting blong ol sikman.

Wan bigfala dokta long Spen i talem se, ol dokta oli no mas fogetem se oli stap “wok wetem ol tul we oli no stretgud olgeta, mo oli folem sam rod we oli save rong samtaem tu.” Taswe, oli nidim blong “bilif strong se oltaem, oli mas soemaot lav, antap moa taem oli no gat plante save long saed blong wan samting.”

[Futnot]