?Wanem Beswan Tritmen Blong Winim Sik?
“Sikman we i kasem tritmen long wan dokta we i no yusum blad, hem i kasem tritmen we i beswan.” Hemia toktok blong Michael Rose, wan bigfala dokta we i wok long tim blong ol dokta we i stap katem man. ?Wanem ol tritmen mo “meresin we i no gat blad long hem”? Yu yu nidim blong save ol samting ya. Ol save ya bambae i givhan long yu blong tekem stret desisen taem yu kasem wan strong sik no taem dokta i mas katem yu. Wajem vidio kaset ya, No Blood—Medicine Meets the Challenge. Biaen, ansa long ol kwestin we oli stap daon, blong luk sipos yu kasem save long hem.—Makemgud: Long sam haf blong vidio kaset ya, oli soemaot we dokta i stap katem man, taswe ol papa mama oli mas jusum sipos ol pikinini blong olgeta oli lukluk ol haf ya no nogat.
(1) ?Wanem bigfala risen from wanem ol Witnes blong Jeova oli no tekem blad? (2) ?Ol Witnes blong Jeova oli wantem we ol dokta oli givim wanem help long olgeta? (3) ?Wanem stamba raet blong ol sikman? (4) ?From wanem i stret mo i waes blong jusum tritmen we i no gat blad long hem? (5) ?Taem wan man i lusum fulap blad, wanem tufala samting we ol dokta oli tingbaot fastaem? (6) ?Wanem fofala stamba rod blong tritim man we oli no yusum blad? (7) ?Olsem wanem ol dokta oli save (a) mekem se blad i no ron bigwan taem oli katem wan man, (b) sevem ol red sel, (c) givhan long bodi blong i wokem moa blad, mo (d) kasembak blad we i lus? (8) Eksplenem tufala rod ya we oli kolem (a) hemodilution mo (b) cell salvage (fasin blong sevem ol sel long bodi). (9) ?Wanem samting we yu yu mas wantem blong kasem save long hem long saed blong ol narafala tritmen no meresin we oli save tekem ples blong blad? (10) ?I gat rod blong ol dokta oli katem wan man we i kasem bigfala kil no i gat bigfala sik, be oli no givim blad long hem? (11) ?Wanem gudfala fasin we plante dokta oli stap tekem naoia?
Long saed blong sam tritmen we vidio kaset ya i soemaot, i stap long wanwan man blong tingting gud long ol rul blong Baebol mo tekem disisen sipos hem i wantem folem no nogat. ?Yu yu jusum finis wanem tritmen we i no gat blad long hem we yu mo ol pikinini blong yu, yufala i save agri long hem? Ol famle blong yu tu we oli no Witnes blong Jeova, oli mas save long desisen blong yu mo risen from wanem yu tekem desisen ya.—Lukluk Wajtaoa blong Jun 15, 2004, mo Oktoba 15, 2000, long haf ya “Wan Kwestin.”