Vidio Kaset We i Eksplenem Sam Niufala Rod We Ol Dokta Oli Save Yusum

Tede, ol loea mo dokta oli stap lesin moa long tingting blong ol sikman long saed blong tritmen we i stret long olgeta mo we oli gat raet blong kasem. Samting ya i mekem se oli wokem sam niufala meresin mo tritmen we oli save givhan long ol Witnes blong Jeova. (Wok 15⁠:​28, 29) Bambae yumi luk samting ya long vidio kaset ya, Transfusion-Alternative Health Care​—⁠Meeting Patient Needs and Rights. Wajem vidio kaset ya, mo biaen, tingtingbak long samting we yu lanem.​—⁠Makemgud: Long sam haf blong vidio kaset ya, oli soemaot we dokta i stap katem man, taswe ol papa mama oli mas jusum sipos ol pikinini blong olgeta oli lukluk kaset ya no nogat.

(1) ?From wanem samfala we oli wok long saed blong helt oli stap jekem bakegen fasin ya blong givim blad long ol sikman? (2) ?Talem tri bigfala sik we ol dokta oli katem man from, be oli no nid blong yusum blad? (3) ?Hamas dokta long wol we oli glad blong no yusum blad taem oli wok long ol sikman? ?From wanem oli glad blong mekem olsem? (4) ?Ol stadi we ol hospital oli mekem i no longtaem, oli soemaot wanem long saed blong fasin blong yusum blad? (5) ?Wanem ol sik we man i save kasem sipos hem i tekem blad? (6) ?Wanem tingting blong plante man we oli gat bigfala save long saed blong fasin blong yusum ol narafala tritmen mo meresin we oli no gat blad long olgeta? (7) ?Wanem samting i save mekem se man i sot long blad? ?Man i save lusum hamas blad bifo we i spolem bodi blong hem? ?Oli save mekem wanem blong halpem man we i sot long blad? (8) ?Olsem wanem ol dokta oli save mekem se bodi blong sikman i wokem moa red sel? (9) ?Wanem ol rod we ol dokta oli stap yusum blong mekem se wan sikman i no lusum tumas blad taem oli katem hem? (10) ?Oli save yusum ol narafala tritmen mo meresin we i no gat blad long hem long ol smol pikinini mo long ol man we oli kasem bigfala kil long aksiden no we oli mas katem olgeta hareap? (11) ?Wanem faswan rul we ol dokta oli mas folem blong oli save lukaot gud long ol sikman? (12) ?From wanem i impoten we ol Kristin oli mekem disisen bifo we oli sik, long saed blong wanem tritmen no meresin we i no gat blad long hem we bambae oli akseptem? ?Olsem wanem yumi save mekem olsem?

Long saed blong sam tritmen we yumi luk long video kaset ya, i stap long wanwan man nomo blong tekem disisen se bambae oli akseptem olgeta, no nogat. Maet samfala oli harem se oli no save akseptem olgeta from we tingting blong olgeta we oli trenem folem Baebol, bambae i stikim olgeta, be sam narafala oli no harem olsemia. ?Olsem wanem? ?Yu yu jusum finis wanem tritmen no meresin we i no gat blad long hem, we yu mo ol pikinini blong yu, yufala i save akseptem? Ol memba blong famle we oli no Witnes, olgeta tu oli mas save long desisen blong yu mo risen from wanem yu tekem desisen ya.​—⁠Lukluk “Wan Kwestin” long Wajtaoa blong Jun 15, 2004, mo Oktoba 15, 2000.