?Yu Yu No Fulumap Yet?

?Fulumap wanem? Wan pepa ya, Advance Medical Directive/Release (long Franis Instructions médicales/Directives anticipées) we i blong ol Witnes we oli baptaes finis. ‘Yu no save nating wanem bambae i save kamtru long laef blong yu tumora.’ Taswe, i impoten tumas we yu ting rere fastaem long tritmen mo meresin we yu yu wantem tekem long taem we yu kasem trabol no bigfala sik, mo fulumap wan kopi blong Novemba 2006 Kingdom Wok. I gud blong talemaot wanem meresin we yu jusum blong tekem mo bambae oli mekem wanem long taem ya we yu kasem wan aksiden no wan bigfala trabol. (Jem. 4:14; Wok 15:28, 29) Blong givhan moa long yu, yu save lukluk vidio ya, Transfusion-Alternative Health Care—Meeting Patient Needs and Rights. Afta we yu lukluk vidio ya, i gud yu prea long Jeova long saed blong ol samting we yu lanem long ol kwestin we oli stap daon.—Makemgud: Long sam haf blong vidio kaset ya, oli soemaot we dokta i stap katem man, taswe ol papa mama oli mas jusum sipos ol pikinini blong olgeta oli lukluk kaset ya no nogat.

(1) ?From wanem samfala we oli wok long saed blong helt oli stap jekem bakegen fasin ya blong givim blad long ol sikman? (2) Talem tri bigfala sik we ol dokta oli katem man from, be oli no nid blong yusum blad. (3) ?Hamas dokta long wol we oli glad blong no yusum blad taem oli wok long ol sikman? ?From wanem oli glad blong mekem olsem? (4) ?Ol stadi we ol hospital oli mekem i no longtaem, oli soemaot wanem long saed blong fasin blong yusum blad? (5) ?Wanem ol sik we man i save kasem sipos hem i tekem blad? (6) ?Wanem tingting blong plante man we oli gat bigfala save long saed blong fasin blong yusum ol narafala tritmen mo meresin we oli no gat blad long olgeta? (7) ?Wanem samting i save mekem se man i sot long blad? ?Man i save lusum hamas blad bifo we i spolem bodi blong hem? ?Oli save mekem wanem blong halpem man we i sot long blad? (8) ?Olsem wanem ol dokta oli save mekem se bodi blong sikman i wokem moa red sel? (9) ?Wanem ol rod we ol dokta oli stap yusum blong mekem se wan sikman i no lusum tumas blad taem oli katem hem? (10) ?Oli save yusum ol narafala tritmen mo meresin we i no gat blad long hem long ol smol pikinini mo long ol man we oli kasem bigfala kil long aksiden no we oli mas katem olgeta hareap? (11) ?Wanem faswan rul we ol dokta oli mas folem blong oli save lukaot gud long ol sikman? (12) ?From wanem i impoten we ol Kristin oli mekem desisen bifo we oli sik, long saed blong wanem tritmen no meresin we i no gat blad long hem we bambae oli akseptem? ?Olsem wanem yumi save mekem olsem?

Long saed blong sam tritmen we yumi luk long vidio kaset ya, i stap long wanwan man nomo blong tekem desisen se bambae oli akseptem olgeta, no nogat. Maet samfala oli harem se oli no save akseptem olgeta from we tingting blong olgeta we oli trenem folem Baebol, bambae i stikim olgeta, be sam narafala oli no harem olsemia. ?Olsem wanem? ?Yu yu jusum finis wanem tritmen mo meresin we i no gat blad long hem, we yu mo ol pikinini blong yu, yufala i save akseptem? Blong kasem save moa long saed ya, lukluk “Wan Kwestin” long Wajtaoa blong Jun 15, 2004, Oktoba 15, 2000, mo wan pej we i stap long Kingdom Wok Blong Yumi blong Novemba 2006 we i askem se, “?Bambae Mi Mekem Wanem Desisen Sipos Dokta i Wantem Givim Meresin We i Gat Smol Blad Insaed Long Hem, No i Wantem Yusum Blad Blong Mi Bakegen?” Afta we yu raetemdaon desisen blong yu long tritmen we yu wantem, yu mas talemaot long ol dokta blong yu mo famle blong yu we oli no Witnes, blong oli kasem save long desisen blong yu.