?Yu Yu No Fulumap Yet?
?Fulumap wanem? Wan kad ya, Advance Medical Directive/Release (Instructions médicales/Directives anticipées), no DPA kad, we i blong ol Witnes we oli baptaes finis. ‘Yu no save nating wanem bambae i save kamtru long laef blong yu tumora.’ Taswe, i impoten tumas we yu mekem desisen fastaem long tritmen mo meresin we yu yu wantem tekem long taem we yu kasem bigfala sik no aksiden, mo i impoten we yu raetemdaon samting ya long pepa. (Jem. 4:14; Wok 15:28, 29) Blong givhan moa long yu, ogenaesesen blong Jeova i wokem DVD ya, Transfusion-Alternative Health Care—Meeting Patient Needs and Rights. I gud yu lukluk DVD ya, mo biaen yu prea long Jeova long saed blong ol samting we yu lanem, mo ol kwestin we oli stap daon.—Makemgud: Long sam smol haf blong DVD ya, oli soemaot we dokta i stap katem man, taswe ol papa mama oli mas jusum sipos ol pikinini blong olgeta oli lukluk DVD ya no nogat.
(1) ?From wanem sam dokta mo sam narafala we oli wok long saed blong helt oli stap jekem bakegen fasin ya blong givim blad long ol sikman? (2) Talem tri bigfala sik we ol dokta oli katem man from, be oli no yusum blad. (3) ?Hamas dokta long wol we oli glad blong no yusum blad? ?From wanem oli glad blong mekem olsem? (4) ?Ol stadi we ol hospital oli mekem i no longtaem, oli soemaot wanem long saed blong fasin blong yusum blad? (5) ?Wanem ol sik we man i save kasem sipos hem i tekem blad? (6) ?Wanem ol gudfala samting we plante dokta oli talem se oli save kamaot, taem oli yusum tritmen mo meresin we i no gat blad long hem? (7) ?Wanem i save mekem se man i sot long blad? ?Laef blong man bambae i stap long denja sipos hem i lusum hamas blad? ?Ol dokta oli save mekem wanem blong halpem man we i sot long blad? (8) ?Olsem wanem ol dokta oli save mekem se bodi blong sikman i wokem plante moa red sel? (9) ?Wanem ol rod we ol dokta oli stap yusum blong mekem se sikman i no lusum tumas blad taem oli katem hem? (10) ?Oli save yusum tritmen mo meresin we i no gat blad long hem long ol smol pikinini, mo long ol man we oli kasem bigfala aksiden no we oli mas katem olgeta hareap? (11) ?Wanem faswan rul we ol dokta oli mas folem blong lukaot gud long ol sikman? (12) ?Long saed blong tritmen mo meresin we i no gat blad long hem, from wanem i impoten we ol Kristin oli mekem jus blong olgeta bifo we sik no aksiden i kasem olgeta? ?Olsem wanem yumi save mekem samting ya?
Long saed blong sam tritmen we yumi luk long DVD ya, i stap long wanwan man nomo blong jusum se bambae oli agri long olgeta, no nogat. Tingting blong olgeta we oli trenem folem Baebol, bambae i halpem olgeta blong mekem desisen ya. ?Olsem wanem? ?Yu yu jusum finis wanem tritmen mo meresin we yu mo ol pikinini blong yu, yufala i save agri long hem? ?Yu yu fulumap kad ya (DPA) finis? Blong kasem save moa long saed ya, yu save ridim japta 7 blong buk ya “God’s Love” mo ol narafala save we i joen wetem japta ya. Mo tu, yu save ridim pej we i stap long Kingdom Wok Blong Yumi blong Novemba 2006 se,” ?Bambae Mi Mekem Wanem Desisen Sipos Dokta i Wantem Givim Meresin We i Gat Smol Blad Insaed Long Hem, No i Wantem Yusum Blad Blong Mi Bakegen?” Afta, yu mas meksua se yu raetem ol tritmen we yu jusum long kad (DPA) blong yu. Mo tu, yu mas toktok long dokta blong yu mo ol famle blong yu we oli no Witnes, blong oli kasem save gud long desisen blong yu.
[Tok blong makem poen long pej 3]
• ?Yu yu jusum finis wanem tritmen mo meresin we yu mo ol pikinini blong yu, yufala i save agri long hem?
• ?Yu yu karem oltaem wetem yu, kad ya (DPA) we yu fulumap gud finis, blong yu rere from wan sik no aksiden we i save kamaot enitaem nomo?