?Yu Yu Save Ol Defren Tritmen We Yu Save Yusum?

Naoia, plante moa hospital mo dokta raon long wol oli stap givim ol tritmen we i no gat blad long hem. ?Yu yu save ol defren tritmen we yu save jusum? Yu mas save long olgeta, olsem nao, yu save mekem wan gudfala desisen long saed blong wanem tritmen we bambae yu jusum. I gud yu lukluk DVD ya No Blood—Medicine Meets the Challenge. Biaen, i gud yu prea long Jehova, mo traem ansa long olgeta kwestin daon, blong tingtingbak long ol samting we yu lanem.—Yu mas makemgud se: Long DVD ya, i gat sam sot pija blong dokta we i stap katem man. Ol papa mama oli mas skelem sipos i gud we ol smol pikinini blong olgeta oli lukluk samting ya no nogat.

(1) ?Wanem bigfala risen from wanem ol Witnes blong Jehova oli no tekem blad? (2) ?Long saed blong tritmen we ol dokta mo hospital oli givim, wanem samting we ol Witnes blong Jehova oli wantem? (3) ?Wanem raet blong olgeta sikman? (4) ?Taem man i jusum wan tritmen we i no gat blad long hem, from wanem hemia i no wan krangke desisen we i olsem se hem i no wantem lukaotgud long laef blong hem? (5) ?Taem man i lusum plante blad, wanem tufala samting we ol dokta oli traem mekem fastaem? (6) ?Wanem fofala stamba rod we ol dokta oli folem we oli no yusum blad taem oli tritim man? (7) ?Ol dokta oli save mekem wanem (a) blong man i no lusum plante blad, (b) blong sevem ol red sel, (c) blong givhan long bodi blong mekem moa blad, mo (d) blong kasembak blad we i lus? (8) Eksplenem tufala rod ya: (a) miksim blad blong man wetem wan spesel wota (hemodilution) mo (b) sevem ol sel (cell salvage). (9) ?Wanem save we yu nidim long saed blong ol tritmen ya we oli yusum blad? (10) ?Dokta i save katem man from ol bigfala sik, sipos hem i no givim blad long hem? (11) ?Wanem gudfala samting we plante dokta mo hospital oli stap luksave?

Tingting blong sam man i no letem olgeta blong oli akseptem sam tritmen we DVD ya i tokbaot. I stap long wanwan man blong tekem prapa desisen blong hem we i laenap wetem tingting blong hem we hem i trenem folem ol save blong Baebol. ?Yu yu tekem wan klia desisen long ol tritmen we yu mo ol pikinini blong yu, yufala i save akseptem? ?Yu yu fulumap finis kad ya DPA? Blong kasem save fulwan long ol samting ya, ridim bakegen, “Wan Kwestin” long Wajtaoa blong Jun 15, 2004, mo Wajtaoa blong Oktoba 15, 2000. Afta, i gud yu karem Kingdom Wok Blong Yumi blong Novemba 2006, mo lukluk pepa we i stap long medel blong hem, we nem blong hem: “?Bambae Mi Mekem Wanem Desisen Sipos Dokta i Wantem Givim Meresin Long Mi We i Gat Smol Blad Insaed Long Hem, No i Wantem Yusum Blad Blong Mi Bakegen?” Nao raetem desisen blong yu long pepa ya long saed blong wanem tritmen we yu save akseptem mo wanem tritmen we yu no wantem. Biaen, yu mas meksua se yu fulumap gud DPA kad blong yu folem ol desisen we yu raetem finis long pepa ya. Yu mas talemaot klia ol desisen blong yu long dokta mo hospital mo long ol famle blong yu we oli no Witnes.