Wan Kwestin
“Wajtaoa” blong Ogis 15, 1996, i talem se: “Long lashaf blong bigfala trabol ya, ol ‘man’ we oli ronwe i go long saed blong Jeova, bambae Jeova i sevem olgeta.” ?Tok ya i minim se afta long faswan haf blong bigfala trabol ya, plante moa man bambae oli kam long saed blong God?
Hemia i no bigfala poen blong haf ya.
Bighaf blong ol tok blong Jisas long Matyu 24:22, bambae oli kamtru long taem we God i sevem ol man tru long faswan haf blong bigfala trabol ya, hemia tru long faet agensem ol skul. Wajtaoa ya i talem se: “Tingbaot se sam ‘man,’ hemia olgeta we tabu speret i makemaot olgeta we oli stap yet long wol, wetem ‘bigfala hif blong man,’ bambae God i sevem olgeta tru long faswan haf blong bigfala trabol ya, taem Bigfala Babilon i lus wantaem nomo blong olwe.”
I no gat denja se ol man we oli holemstrong long God olsemia bambae oli lus, taem Jisas mo ami blong hem long heven oli tekem aksin long lashaf blong bigfala trabol. ?Be hu nao bambae oli pastru long lashaf ya blong bigfala trabol? Revelesen 7:9, 14 i soem se wan bigfala hif blong man we oli hop blong laef long wol ya, bambae oli pastru. ?Olsem wanem long ol tabu Kristin? “Wan Kwestin” long Wajtaoa blong Ogis 15, 1990, i tokbaot from wanem yumi no save talem wetaem stret ol tabu Kristin ya we oli stap yet long wol, bambae oli go antap long heven. Taswe, haf ya we i kamaot i no longtaem (Ogis 15, 1996), i no talem ol klia tok long poen ya, be i talem nomo, se: “Long sem fasin, long lashaf blong bigfala trabol ya, ol ‘man’ we oli ronwe i go long saed blong Jeova, bambae Jeova i sevem olgeta.”
Long saed blong kwestin ya se, maet sam narafala man bambae oli gat jans blong lanem trutok mo kam long saed blong God afta we bigfala trabol i stat, tingbaot tok blong Jisas long Matyu 24:29-31. Afta we bigfala trabol ya i faerap, saen blong Pikinini blong man bambae i kamaot long skae. Jisas i talem se, olgeta laen blong man long wol bambae oli kilkilim bodi blong olgeta mo krae. Hem i no talem wan samting blong soem se sam man bambae oli wekap long tingting blong olgeta, tanem tingting blong olgeta blong kam long saed blong God, mo kam ol trufala disaepol.
I sem mak, folem parabol blong ol sipsip mo nani, taem Pikinini blong man i kamtru, bambae hem i seraotem mo jajem ol man from ol samting we oli bin mekem mo oli no bin mekem. Jisas i no talem se sam man we oli olsem nani, bambae oli jenisim fasin blong olgeta wantaem nomo, we oli kam olsem sipsip. Jajmen we hem i mekem long ol man, bambae i stanap long ol samting we oli mekem finis.—Matyu 25:31-46.
Be, bakegen, yumi no save talem klia long poen ya. Ol man blong God, hemia ol tabu Kristin mo bigfala hif blong man tugeta, oli savegud samting we oli mas mekem naoia—prij mo mekem disaepol. (Matyu 28:19, 20; Mak 13:10) Naoia, i stret taem blong yumi folem impoten tok ya, se: “From we mifala i stap joen blong wok wetem God, mifala i talem long yufala bakegen. God i givhan long yufala finis, long gladhat blong hem. Plis yufala i no letem givhan ya blong God i go blong nating nomo. Plis yufala i harem tok blong God. Hem i talem se ‘Long taem ya blong givhan long man, mi mi harem yufala. Long dei ya blong sevem man, mi mi givhan long yufala.’ Yufala i mas harem tok ya. Naoia i taem blong God i givhan long man. Tede i dei blong hem i sevem man.”—2 Korin 6:1, 2.