Jeova—God Ya We i Stap Talemaot Ol Tokhaed
‘I gat wan God long heven we i stap mekem ol tokhaed oli kam long klia ples.’—DANIEL 2:28.
1, 2. (a) ?Olsem wanem Jeova i defren long bigfala Enemi blong hem? (b) ?Olsem wanem fasin ya blong Jeova mo Setan we i defren olgeta, i stap kamaot long ol man tu?
JEOVA, haefala God blong heven mo wol we i gat bigfala lav, hem i waes tumas mo i gat stret fasin. Hem i no nidim blong haedem nem blong hem, ol wok blong hem, mo ol stampa tingting blong hem. Long taem we i stret mo long rod we hem i luk se i waes, hem i stap soemaot fasin mo wok blong hem. Taswe, hem i defren olgeta long Enemi blong hem, Devel Setan, we i stap traem blong haedem ol fasin mo wok blong hem.
2 Long sem fasin we Jeova mo Setan tufala i defren olgeta, ol man we oli wosipim tufala oli defren tu. Yumi save makemaot ol man we oli folem Setan from we oli gat tu fes mo oli man blong gyaman. Oli traem soemaot se oli gudfala man, be long semtaem, oli stap mekem ol wok blong tudak nomo. Ol Kristin long Korin oli kasem tok we i talem long olgeta se oli no mas sapraes long samting ya. “Ol man ya oli no tru aposol ya, oli gyaman aposol nomo. Oli stap gyaman blong talem ol wok blong olgeta, mo oli stap tanem ol fasin blong olgeta, blong mekem ol man oli luk olgeta, olsem we oli prapa aposol nomo blong Kraes. Be yumi no sapraes long samting ya. Setan, be hem i save tanem fasin blong hem, blong mekem ol man oli luk hem olsem we hem i wan enjel blong laet.” (2 Korin 11:13, 14) Ol Kristin oli mekem i defren olgeta. Oli lukluk i go long Kraes olsem Lida blong olgeta. Taem Jisas i stap long wol, hem i soemaotgud fasin blong Papa blong hem, Jeova God. (Hibrus 1:1-3) Taswe, taem ol Kristin oli folem fasin blong Kraes, oli stap folem fasin blong Jeova tu, we hem i God blong trutok, God we i soemaot ol samting long klia ples, mo God blong laet. Olgeta tu, oli no nidim blong haedem nem blong olgeta, wok blong olgeta, mo ol tingting blong olgeta.—Efesas 4:17-19; 5:1, 2.
3. ?Olsem wanem yumi save ansa long tok ya se ol Wetnes blong Jeova oli fosem ol man blong joen long “grup blong olgeta we i wok long fasin haed”?
3 Long ol taem we Jeova i luk se i stret, hem i stap mekem sam save i kam klia long saed blong ol stampa tingting blong hem mo long saed blong fyuja, ol save we ol man oli no gat yet. Long rod ya, hem i wan God we i stap talemaot ol tokhaed. Hem i singaotem ol man we oli wantem mekem wok blong hem—yes, hem i askem strong long olgeta—blong lanem moa long saed blong ol save ya we hem i stap soemaot. Wan stadi long 1994 long saed blong 145,000 Wetnes long wan kantri blong Yurop, i soemaot se kolosap olgeta evriwan, wanwan, oli bin stadi long ol tijing blong ol Wetnes blong Jeova blong tri yia, bifo we oli jusum blong kam wan Wetnes. Olgeta wanwan oli mekem disisen ya folem samting we oli wantem mekem, i no gat man i fosem olgeta. Mo afta we oli mekem disisen ya, oli fri yet blong mekem prapa jus blong olgeta long saed blong rod we oli wantem folem. Wan eksampel, smol namba blong man oli mekem disisen blong no moa stap olsem wan Wetnes, from we oli no moa agri wetem ol hae rul blong stret fasin we ol Kristin oli mas folem. Be, yumi glad blong luk se, long ol faef yia we oli jes pas, bighaf blong olgeta ya we oli lego ol Wetnes, oli kam joen mo wok bakegen wetem ol Wetnes.
4. ?Wanem samting we tingting blong ol Kristin we oli gat strong bilif i no nidim blong trabol from, mo from wanem?
4 I tru se, long olgeta we oli lego ol Wetnes, i no olgeta evriwan we oli kambak bakegen. Mo sam long olgeta, oli bin gat ol impoten wok insaed long Kristin kongregesena bifo. Yumi no mas sapraes long samting ya, from we wan man we i folemgud Jisas fastaem, aposol Judas, hem tu i bin lego bilif. (Matyu 26:14-16, 20-25) Be ?hemia wan risen blong yumi harem nogud long Kristin skul? ?Samting ya i minim se wok blong tijim ol man we ol Wetnes blong Jeova oli stap mekem mo we i stap karem bigfala frut, hem i olsem nating nomo? No gat. I sem mak taem Judas Iskariot i jenisim fasin blong hem mo i agensem trufala bilif, samting ya i no blokem stampa tingting blong God.
Hem i Gat Olgeta Paoa Be i Gat Lav Tu
5. ?Olsem wanem yumi save se Jeova mo Jisas i laekem ol man, mo olsem wanem tufala i bin soemaot lav ya?
5 Jeova God, hem i gat lav. Hem i kea long ol man. (1 Jon 4:7-11) Nating se hem i hae olgeta, hem i laekem blong frengud wetem ol man. Long saed blong wan man blong wok blong hem long taem bifo, yumi ridim se: “ ‘Ebraham, hem i bilif long God. Mo from we hem i bilif long God olsem, God i mekem hem i stret man long fes blong hem.’ Mo ol man oli stap singaot hem se Fren blong God.” (Jemes 2:23; 2 Kronikel 20:7; Aesea 41:8) Taem tu man oli frengud, oli toktok tugeta long ol samting we oli no tokbaot wetem ol narafala man, hemia ol tokhaed. Jeova i mekem i sem mak wetem ol fren blong hem. Jisas i folem fasin ya blong Papa blong hem. Hem i frengud wetem ol disaepol blong hem mo hem i talemaot ol tokhaed long olgeta. Hem i talem long olgeta se: “Mi mi no moa save singaot yufala se ol man blong wok blong mi, from we man blong wok, hem i no save ol samting we masta blong hem i stap mekem. Naoia mi mi stap singaot yufala se ol fren blong mi, from we mi talemaot olgeta samting ya finis long yufala we mi harem long Papa blong mi.” (Jon 15:15) Ol save no “ol tokhaed” we Jeova, Pikinini blong hem, mo ol fren blong tufala nomo oli save, oli mekem olgeta i joengud, wetem lav mo fasin blong fasgud tugeta we i no gat wan samting i save spolem.—Kolosi 3:14.
6. ?From wanem Jeova i no nidim blong haedem evri samting we hem i wantem mekem?
6 Mining blong nem blong Jeova, “Hemia we i Mekem i Kamtru,” i soemaot se hem i naf blong tekem enikaen fasin we hem i nidim blong tekem, blong mekem ol stampa tingting blong hem oli kamtru. Jeova i no olsem ol man. Hem i no nidim blong haedem ol tingting blong hem from we hem i fraet se ol narafala man bambae oli blokem hem blong mekem ol tingting ya oli kamtru. No gat. Hem i no save mestem. Taswe, long Tok blong hem, Baebol, hem i talemaot klia plante samting we bambae hem i mekem. Hem i promes se: “Tok we i kamaot long maot blong mi . . . bambae hem i no save kambak long mi, we hem i no karem frut blong hem, nogat. Be tru, bambae hem i mekemgud olgeta wok we mi mi sanem hem i go from.”—Aesea 55:11.
7. (a) ?Jeova i bin talemaot wanem long garen blong Iden, mo olsem wanem Setan i pruvum se God i tru? (b) ?Olsem wanem rul we i stap long 2 Korin 13:8 i tru oltaem nomo?
7 Smoltaem afta we fasin rebel i kamaot long Iden, Jeova i talemaot wanem samting bambae i hapen long en blong rao we i stap gohed bitwin hem mo Enemi blong hem, Setan. Laen we God i promes blong stanemap, bambae i kasem kil we i mekem hem i soa, be i no blong longtaem. Be, Setan bambae i kasem kil we hem i ded from. (Jenesis 3:15) Long 33 K.T.,b Setan i givim kil long Laen ya, hemia Jisas Kraes, taem hem i kilim hem i ded. Taem Setan i mekem olsem, hem i mekem tok blong Baebol i kamtru. Long rod ya, hem i pruvum se Jeova i God blong trutok, nating se hem i no minim blong pruvum samting ya. Fasin blong hem blong no laekem nating trutok mo stret fasin, wetem flas fasin mo fasin we hem i no wantem tanem tingting blong hem from sin, oli lidim hem blong mekem samting we God i talemaot se bambae hem i mekem. Yes, wan rul blong Baebol i tru tumas long saed blong olgeta we oli agensem trutok, wetem Setan tu. Hem i se: “Mifala i no save mekem wan samting blong blokem trutok, mifala i save mekem i gohed nomo.”—2 Korin 13:8.
8, 9. (a) ?Setan i save wanem samting, mo save ya i naf blong blokem ol stampa tingting blong Jeova? (b) ?Ol man we oli agensem Jeova oli no wantem harem wanem klia woning, mo from wanem?
8 Stat long 1914, taem Kingdom blong God i stanap long fasin we ol man oli no save luk wetem prapa ae blong olgeta, Revelesen 12:12 i kamtru. Hem i se: “From samting ya, yu heven, mo yufala evriwan we i stap long heven, yufala i mas harem gud. Be sore tumas long yu, graon, mo long yu, solwora. From we Setan i kamdaon finis long yufala, mo hem i kros tumas, from we i save, i gat smol taem nomo blong hem i stap yet.” ?Be, save ya se Setan i gat smoltaem nomo blong hem i stap, i pulum hem blong jenisim fasin blong hem? Sipos Setan i mekem olsem, hemia i min se hem i luksave we Jeova i God blong trutok, mo se hem i Haefala Rula we ol man oli mas wosipim hem nomo. Be, Setan i no wantem luksave se hem i lus, nating se hem i save ol fasin blong Jeova finis.
9 Jeova i talemaot klia, wanem bambae i hapen taem Kraes i kam blong mekem jajmen i kamtru long rabis wol blong Setan. (Matyu 24:29-31; 25:31-46) Long saed blong ol rula blong wol long taem ya, Tok blong Hem i talem se: ‘Taem oli stap talem se “Pis mo seftaem,” long taem ya nao bambae bigfala trabol i save kasem olgeta, i spolem olgeta. Bambae trabol ya i kasem olgeta wantaem nomo, olsem we woman i harem nogud blong bonem pikinini.’ (1 Tesalonaeka 5:3) Ol man we oli folem Setan oli no lesin long woning ya we i klia nomo. Oli blaen from we hat blong olgeta i rabis. Mo samting ya i blokem olgeta blong tanem tingting blong olgeta from rabis rod we oli stap folem. Oli no save jenisim ol plan mo trik we oli stap yusum blong traem spolem ol stampa tingting blong Jeova.
10. (a) ?Maet yumi save talem se 1 Tesalonaeka 5:3 i bin kamtru finis long wanem fasin, mo ol man blong Jeova oli mas mekem wanem from? (b) ?From wanem maet ol man we oli no gat bilif oli kam strong moa long fyuja, long fasin blong olgeta blong agensem ol man blong God?
10 Long 1986, Yunaeted Nesen i talemaot se hemia Intenasnal Yia blong Pis. Stat long taem ya, wol i kam fulap moa long ol toktok long saed blong pis mo seftaem. Sam bigfala wok i bin kamaot blong traehad blong putum pis long wol ya, mo i luk olsem se ol traehad ya oli karem sam frut. ?Hemia i min se fulwan profet tok ya i kamtru finis? no ?I stret blong ting se bambae ol nesen oli talemaot wan mesej long fyuja we i mekem yumi sek? Bambae Jeova i mekem poen ya i kam klia long stret taem blong hem. Be, go kasem taem ya, yumi mas stap wekap long saed blong speret, mo yumi ‘mas stap wet long Dei blong God, we yumi stap wok blong mekem i kamtru kwik.’ (2 Pita 3:12) Taem i stap pas, mo bambae ol nesen oli toktok moa yet long saed blong pis mo seftaem. From samting ya, sam man we oli save woning ya finis be oli no wantem obei long hem, maet oli kam strong moa long fasin blong olgeta. Maet oli ting se Jeova i no wantem, no i no naf, blong mekem tok blong hem i kamtru. (Skelem wetem Eklesiastis 8:11-13; 2 Pita 3:3, 4.) !Be ol trufala Kristin oli save se Jeova bambae i mekem stampa tingting blong hem i kamtru!
Respek Long Ol Man We Jeova i Stap Yusum Olgeta
11. ?Daniel mo Josef tufala i bin lanem wanem long saed blong Jeova?
11 King Nebukadnesa, rula blong Babilon bifo, i kasem wan drim we i mekem tingting blong hem i trabol. Be, hem i no save rimemba drim ya, ale, hem i askem sam man blong givhan long hem. Ol pris, ol waesman, mo ol man blong mekem majik, oli no naf blong talemaot drim ya long hem, mo blong eksplenem mining blong hem. Man blong God, Daniel, i naf blong mekem olsem, be hem i talem stret se, i no from prapa waes blong hem we hem i talemaot drim ya mo mining blong hem. Daniel i talem se: ‘I gat wan God long heven we hem i stap talemaot ol tokhaed, mo bambae hem i soemaot long King Nebukadnesa ol samting we bambae oli kamaot long ol laswan dei.’ (Daniel 2:1-30) Sam handred yia bifo long taem ya, semkaen samting i hapen long Josef, wan narafala profet blong God. Samting ya tu i pruvum se Jeova i Bigfala Man blong talemaot ol tokhaed.—Jenesis 40:8-22; Emos 3:7, 8.
12, 13. (a) ?Weswan profet blong God i hae moa long ol narafala profet, mo from wanem yu yu ansa olsem? (b) ?Hu ya ol ‘man blong wok blong Kraes we oli talemaot ol tokhaed blong God’ tede, mo yumi mas gat wanem tingting long saed blong olgeta ya?
12 Profet blong Jeova we i hae moa long ol narafala profet we oli bin wok long wol ya, hemia Jisas. (Ol Wok 3:19-24) Pol i eksplenem se: “Bifo, long plante yia we i pas finis, God i yusum ol profet blong tok long ol olfala blong yumi plante taem, long plante narnarafala fasin. Be naoia, we i kolosap taem blong wol i finis, hem i yusum Pikinini blong hem blong tok long yumi. Pikinini ya, hem i wok blong God fastaem, taem God i mekem olgeta samting we i stap long wol. Mo God i jusumaot hem finis, blong bambae, taem wol ya i finis, be olgeta samting ya blong wol oli blong hem nomo.”—Hibrus 1:1, 2.
13 Jeova i toktok long ol faswan Kristin tru long Pikinini blong hem, Jisas, we i talemaot ol tokhaed blong God long olgeta. Jisas i talem long olgeta se: “God i openem rod long yufala, blong yufala i save ol tok haed blong fasin we hem i stap kam king blong ol man blong hem.” (Luk 8:10) Biaen, Pol i tokbaot ol Kristin we tabu speret i makemaot olgeta se oli ‘man blong wok nomo blong Kraes, we God i putumap olgeta blong wokem ol plan blong hem we fastaem oli blong haed.’ (1 Korin 4:1) Tede, ol Kristin we tabu speret i makemaot olgeta oli gohed blong mekem wok ya. Grup ya nao oli slef we i stret mo waes, mo tru long Hed Kampani blong hem, hem i stap givimaot kakae long saed blong speret long stret taem blong hem. (Matyu 24:45-47) Yumi gat respek long ol profet we God i yusum long taem bifo blong talemaot tok blong hem, mo bigfala respek long Pikinini blong Hem. Taswe, ating i stret nomo we yumi gat respek tu long man blong wok ya we Jeova i stap yusum tede, blong talemaot ol save blong Baebol we ol man oli nidim tumas long taem ya we laef i had.—2 Timote 3:1-5, 13.
?Yumi Haedem Ol Tok No Yumi Talemaot Klia?
14. ?Wetaem nao ol Kristin oli mekem wok blong olgeta long fasin haed, mo long rod ya oli folem eksampel blong hu?
14 From we Jeova i stap talemaot klia olgeta samting, ?hemia i min se ol Kristin oli mas talemaot oltaem evri samting we oli save long hem? Ol Kristin oli folem advaes we Jisas i givim long ol aposol blong hem, se oli mas ‘waes olsem snek, mo kwaet olsem ol sotleg.’ (Matyu 10:16) Sipos ol man oli talem long ol Kristin se oli no mas wosipim God folem rod we oli save se i stret, be ol Kristin oli gohed blong “obei long God,” from we oli luksave se i no gat wan man long wol we i gat raet blong blokem wosip blong Jeova. (Ol Wok 5:29) Jisas hem wan i soemaot se i stret blong mekem olsem. Yumi ridim se: “Biaen long samting ya, Jisas i stap go olbaot long Galili. Hem i no wantem wokbaot long Judia, from we ol lida blong ol man Isrel oli wantem kilim hem. Hemia i kolosap long taem blong wan lafet blong ol man Isrel, we nem blong hem Lafet we oli wokem ol Wansaed Haos. Nao Jisas i ansa long olgeta [ol stret brata blong hem we oli no bilif], i se: . . . ‘I gud yufala i go long lafet. Mi mi no save go long lafet ya, from we hemia i no stret taem blong mi yet ya.’ Hem i talem tok ya, nao hem i stap long Galili. Ol brata ya blong Jisas oli go long lafet, nao biaen, Jisas tu i go. Be taem hem i go, hem i no wokbaot long klia ples, i wokbaot olsem we i stap haed.”—Jon 7:1, 2, 6, 8-10.
?Yumi Talemaot No Yumi No Talemaot?
15. ?Olsem wanem Josef i soemaot se sam samtaem fasin blong no talemaot wan tokhaed hem i rod blong soemaot lav?
15 Long saed blong sam samting, yumi soemaot waes fasin mo lav sipos yumi no talemaot. Tingbaot eksampel blong Josef, we i olsem papa blong Jisas long wol ya. ?Hem i mekem wanem taem hem i harem nyus ya se Meri, woman ya we i mas mared long hem, i gat bel? Yumi ridim se: “Nao Josef, man ya we oli promes finis long hem se bambae hem i tekem Meri, hem i wan stret man, mo hem i no wantem mekem Meri i sem. Hem i wantem blong oli brekem promes ya, be long kwaet fasin nomo.” (Matyu 1:18, 19) !Sipos Josef i bin mekem Meri i sem long fored blong olgeta man, hem i no soem kaen fasin nating!
16. ?Wanem fasin we ol elda, mo ol narafala memba blong kongregesen tu, oli mas gat long saed blong ol bisnes we i blong haed nomo?
16 I no stret nating blong talemaot long ol man we oli no gat raet blong save, ol tokhaed we oli save mekem trabol i kamaot no mekem narafala i harem nogud. Ol Kristin elda oli mas tingbaot samting ya taem oli givim advaes no leftemap tingting blong wan Kristin brata no sista, no maet taem oli stretem wan Kristin we i mekem bigfala sin agensem Jeova. I impoten we oli mekem ol wok ya folem rod we Baebol i soemaot. Oli no nidim blong talemaot ol save we i mas haed, long olgeta we oli no gat bisnes insaed long problem ya. Mo fasin ya i no soemaot lav tu. Antap long hemia, ol memba blong Kristin kongregesen bambae oli no traem pulum ol elda blong talemaot ol save we i blong haed nomo. Bambae oli respektem fasin ya we ol elda oli mas gat, blong no talemaot prapa bisnes blong narafala. Proveb 25:9 i makem se: “Yu mas go toktok wetem brata blong yu blong stretem problem blong yutufala. Mo yu no mas talemaot ol tok we narafala i talem long yu nomo.”
17. ?From wanem ol Kristin oli no talemaot bisnes we i mas stap haed, be from wanem oli mas talemaot sam bisnes olsem?
17 Rul ya i tru tu insaed long famle mo wetem ol gudfala fren blong yumi. I impoten blong haedem sam samting we hem i prapa bisnes blong olgeta nomo, from we long rod ya, yumi save blokem rao, mo yumi no kam badfren. “Win blong not i karem bigfala ren i kam, olsem wan woman we i gat bel i harem i soa blong karem pikinini. Mo tang blong man we i talemaot wan tokhaed, i mekem fes blong man ya i sem.” (Proveb 25:23) Be i tru tu se, sam samtaem yumi mas talemaot wan bisnes we i haed, long papa mama blong yumi, ol Kristin elda, no ol narafala man we oli gat raet blong save long hem. Yumi mas mekem olsem blong holem fasin blong fasgud long Jeova mo ol stretfala rul blong hem, mo blong soem lav long hemia we i mestem.c Be kolosap oltaem, ol Kristin oli no talemaot ol tokhaed we narafala i talem long olgeta. Oli haedem, olsem we oli haedem prapa bisnes blong olgeta.
18. ?Wanem trifala Kristin fasin we oli save halpem yumi blong luksave wanem samting i stret blong talemaot mo wanem samting yumi no mas talemaot?
18 Blong ademap ol poen ya: Wan Kristin i folem fasin blong Jeova taem hem i haedem sam samting we oli mas haed, mo i talemaot olgeta long taem we i stret blong talemaot nomo. Taem hem i stap mekem disisen long wanem samting we hem i mas talemaot mo wanem samting we hem i no mas talemaot, hem i mas letem tingtingdaon, bilif, mo lav, oli lidim hem. Tingtingdaon bambae i blokem hem, blong i no ting se hem i impoten tumas. Olsem nao, bambae hem i no talemaot evri samting we hem i harem, blong traem mekem ol narafala oli sapraes. Mo bambae hem i no talem long ol narafala se hem i save sam tokhaed we hem i no gat raet blong talemaot, jes blong traem mekem olgeta oli harem nogud. Bilif long Tok blong Jeova mo Kristin kongregesen, bambae i pusum Kristin ya blong prij long saed blong ol tok mo save we God nomo i givim long Baebol. Mo bambae hem i lukaot blong no talem ol fastok we oli save mekem narafala i kros. Yes, lav bambae i pusum hem blong talemaot long klia ples olgeta samting we oli givim ona long God, mo we ol man oli nidim blong save blong kasem laef. Be, bambae hem i lukaotgud blong no talemaot bisnes blong narafala olbaot. Hem i luksave se sipos hem i mekem olsem, hem i no stap soemaot lav.
19. ?Wanem wan fasin we i makemaot ol trufala Kristin, mo wanem risal blong fasin ya?
19 Stret fasin long ol bisnes olsem, hem i wan samting we i makemaot ol trufala Kristin. Olgeta ya oli no haedem nem blong God olsem we i no gat wan nem, mo oli no stap haedem God long tijing ya Triniti, we man i no save eksplenem mo we i wan tokhaed. No gat. Yumi makemaot ol gyaman skul from we oli bilif long ol god we oli no gat nem, mo we man i no gat save long olgeta. Be ol samting ya oli no makemaot trufala skul. (Lukluk Ol Wok 17:22, 23.) Ol Wetnes blong Jeova we tabu speret i makemaot olgeta, oli rili gat tangkyu from jans ya blong stap olsem ‘ol man blong wok blong God, we oli talemaot ol tingting blong Hem we fastaem oli haed.’ Taem oli talemaot klia ol tokhaed ya long ol narafala man, oli stap givhan blong pulum ol man we oli gat gudhat, blong oli frengud wetem Jeova.—1 Korin 4:1; 14:22-25; Sekaraea 8:23; Malakae 3:18.
[Ol futnot]
a Wan grup blong man we oli joen wanples blong wosip.
b K.T. i minim Kristin Taem, mo B.K.T. i minim Bifo Kristin Taem.
c Lukluk Wajtaoa (Engglis mo Franis), Novemba 15, 1985, “Yu No Mas Joen Long Ol Sin Blong Narafala.”
?Bambae Yu Yu Ansa Olsem Wanem?
◻ ?From wanem Jeova i no nidim blong haedem ol samting we hem i wantem mekem?
◻ ?Jeova i stap talemaot ol tokhaed blong hem long hu ya?
◻ ?Wanem fasin we ol Kristin oli mas gat long saed blong ol bisnes we oli mas stap haed?
◻ ?Wanem trifala fasin we bambae oli halpem ol Kristin blong save wanem samting i stret blong talemaot mo wanem we oli no mas talemaot?
[Tok blong pija long pej 8, 9]
Jeova i talemaot ol tokhaed tru long Tok blong hem, Baebol