Sevem Laef Blong Man Long Ol Disasta

LONG Sol, Koria, wan bigfala store haos we i gat ol stoa insaed long hem, i foldaon wantaem nomo. !Plante handred man oli fas aninit long bigbigfala hif blong doti ya! Ol wokman oli wok ful dei mo naet blong traem sevem laef blong ol man ya. Afta we plante dei i pas, oli no moa gat hop blong faenem wan man i laef aninit long bigbigfala hif ya blong simen mo aean.

Kolosap long taem we ol man oli rere blong lego wok ya, oli sapraes tumas blong harem wan smol krae i kamaot long ol doti ya. Oli hareap blong traem seftem ol doti wetem han blong olgeta nomo, blong sevem wan woman we i gat 19 yia. Hem i bin fas aninit long hif blong doti ya blong 16 longfala dei. Wan elevetaa we i foldaon i blokemgud hem, nao ol tan blong simen we oli stap folfoldaon oli no kasem hem. Bodi blong woman ya i lusum tumas wora mo hem i kasem plante kil, !be hem i no ded!

Naoia, kolosap evri manis i gat nyus blong wan disasta. Maet graon i seksek bigwan, wan bigfala hariken, wan volkeno i bosta, wan akseden, no hanggri. Mo plante milyan man we oli lukluk nyus long televisin, oli sapraes mo intres tumas long store blong ol man we oli sevem laef blong narafala, mo store blong olgeta we oli laef tru long ol disasta ya. Be, plante man oli no wantem harem nyus mo woning blong wan disasta long fyuja, we i bigwan moa i bitim ol narawan bifo. (Matyu 24:21) Baebol i tokbaot bigfala trabol ya long fyuja, i se: “Hemia nao tok blong Jeova blong ol ami, se: ‘!Yu luk! Wan bigfala trabol i stap go blong kasem olgeta nesen long wol wanwan. Mo wan bigfala win bambae i girap long ol ples long wol we oli farawe tumas. Mo tru, ol man we Jeova i kilim i ded olgeta, long dei ya bambae ol dedbodi blong olgeta oli stap olbaot long wol, i stat long wan saed blong wol i go kasem narasaed blong wol. Bambae i no gat man i krae long olgeta, bodi blong olgeta bambae i stap olsem nomo, i no gat man i berem olgeta. Bambae oli kam olsem sitsit blong buluk olbaot long graon.”​—Jeremaea 25:32, 33.

!Ating yu yu sapraes long ol tok ya! Be trabol ya i no olsem ol narafala disasta mo akseden we oli kilim i ded olgeta man long ples we disasta i kamaot. I gat rod blong laef tru long disasta ya long fyuja​—⁠!yes, yu yu save laef tru long hem!

Wan Impoten Taem

Blong kasem save fulwan olsem wanem yu save laef tru long trabol ya, yu mas save from wanem bigfala trabol ya bambae i kamaot long fulwol. Blong talem stret, hemia nomo rod blong stretem fulwan ol problem blong man. Tede, i no gat plante man we oli harem se oli stap sefgud mo oli no fraet. Nating se ol man blong sayens oli stap traehad, ol bigfala sik oli stap pas i go long olgeta ples blong wol. Ol faet we oli kamaot from rao long saed blong skul, laen blong man, mo politik, oli kilim plante taosen man i ded. Hanggri i mekem ol man, woman, mo pikinini we oli no gat fol, oli harem nogud mo oli safa. Ol rabis fasin oli stap spolem ol gudfala fasin we ol man oli mas folem long laef blong olgeta. Mo ol pikinini tu oli stap kam nogud.

Wan profet tok blong Baebol we oli raetem bitim 1,900 yia finis, i eksplenem laef blong yumi long fasin we i stret nomo. Hem i se: “Yu mas luksave se long ol las dei, bambae laef i fulap long denja.”​—2 Timote 3:​1, The New Testament in Modern English, we J. B. Phillips i raetem; skelem wetem Matyu 24:​3-​22.

?Yu ting se wan God we i gat lav i no save kea long laef blong yumi we i fulap long trabol? Baebol i talem se: ‘Hem nomo i tru God. Hem i stampa blong wol ya, i wokem hem, . . . i no mekem blong nating nomo, be hem i mekem blong ol man oli save stap long hem.’ (Aesea 45:18) Yes, bitim we God i letem ol man oli spolem naesfala wol ya mo kilim i ded olgeta man long hem, Hem bambae i mekem wan samting. Kwestin i stap se, ?Bambae hem i mekem wanem?

!Jusum Laef!

Baebol i givim ansa long Ol Sam 92⁠:​7, i se: “Ol man nogud oli save gru kwik olsem rabis gras, olgeta evriwan we oli stap mekem i nogud oli save win, be bambae yu yu spolemgud olgeta.” Rod blong God blong stretem ol trabol long wol ya, i blong finisim olgeta rabis fasin. Be yumi glad se, bambae i no gat nid blong finisim olgeta man evriwan. Ol Sam 37:34 i mekem promes ya se: ‘Yu mas putum tingting blong yu i stap strong long Jeova, mo yu mas obei long ol tok blong hem, nao bambae hem i ona long yu, i givim graon ya long yu. Bambae yu luk we hem i kilim i ded ol man nogud.’

Ol tok ya oli soemaot se yumi gat jans blong sevem laef blong yumi long taem blong trabol ya we bambae i bigfala moa i bitim olgeta narafala trabol we ol man oli bin kasem bifo. God i letem yumi jusum rod. Advaes we Moses i givim long ol man Isrel taem oli rere blong go insaed long Promes Lan, i stretgud long yumi tede tu. Hem i se: “Mi mi putum laef mo ded i stap long fored blong yufala, blesing mo trabol. Mo yufala i mas jusum laef, nao yufala i save gohed blong stap laef, yufala wetem ol pikinini blong yufala.” (Dutronome 30:19) Be, ?olsem wanem blong “jusum laef” mo sevem laef blong yumi? ?Trufala fasin blong sevem laef blong man i minim wanem?

[Futnot]

[Foto Credit Line long pej 2]

COVER: Explosion: Copyright © Gene Blevins/Los Angeles Daily News

[Foto Credit Line long pej 3]

Yunhap News Agency/Sipa Press