?From Wanem Yumi Mas Ripotem Ol Fasin Nogud?

“MAN we i ripotem wan bisnes bambae i kam enemi blong ol man.” Hemia wan tok blong ol man Wes Afrika. Samting ya i kamtru long Olu taem hem i talemaot se bigfala brata blong hem i bin mekem i nogud long saed blong seks wetem stret sista blong hem. Brata ya i singaot strong, i se: “!Yu yu stap gyaman!” Nao hem i kilim nogud Olu, i ronemaot hem long haos, mo i bonem olgeta klos blong hem. Ol man blong velej oli sapotem bigfala brata ya blong Olu. Oli no moa wantem se Olu i stap long velej, ale Olu i gowe. Taem ol man oli luk se gel ya i gat bel, long taem ya nomo, oli luksave se Olu i bin talem tru. Ale, brata i talemaot sin blong hem, mo ol man long velej oli fren wetem Olu bakegen. Samtaem, samting we i defren olgeta i save hapen. Oli save kilim Olu i ded.

I klia se, ol man we oli no laekem Jeova oli no glad taem narafala i mekem nogud fasin blong olgeta i kam long klia ples. From we yumi sinman, oltaem yumi no wantem agri long fasin stretem, mo yumi kros long man we i stretem yumi. (Lukluk Jon 7:7.) Yumi no sapraes se plante man oli haedem rong blong narafala i bitim we oli ripotem hem long olgeta we oli gat raet blong stretem hem.

Tinghae Long Fasin Stretem

Ol man blong Jeova oli gat defren tingting long saed blong fasin stretem. Ol man mo woman we oli ona long God, oli tinghae long plan we Jeova i mekem insaed long Kristin kongregesen,a blong halpem olgeta we oli mekem sin. Oli luksave se fasin stretem olsem i soem kaen fasin blong Hem.​—Hibrus 12:​6-​11.

Wan samting we i hapen long laef blong King Deved, i soemaot poen ya. Nating se Deved i wan man blong stret fasin stat taem hem i yangfala nomo, i gat wan taem we hem i mekem wan bigfala sin. Faswan samting se, hem i slip wetem woman blong narafala man. Biaen, blong traem haedem sin ya, hem i folem wan plan blong kilim hasban blong woman ya i ded. Be Jeova i talemaot sin blong Deved long profet Netan. Nao Netan i no fraet blong go talemaot bisnes ya stret long fes blong Deved. Netan i yusum wan pijatok we i gat paoa. Hem i tokbaot wan rijman we i gat plante sipsip blong hem, be i go stilim smol sipsip blong wan puaman, wan sipsip nomo we man ya i gat mo we i laekem tumas. Hem i kilim sipsip ya i ded blong givim kakae long fren blong hem. Nao Netan i askem long Deved wanem samting i stret blong mekem long wan man olsem. Deved i wan man blong lukaot long sipsip bifo, taswe hem i harem nogud mo i kros. Hem i talem se: “!Man ya we i mekem olsem i mas ded!” Nao Netan i soem se pijatok ya i stret long hem, i se: “!Yu nao yu man ya!”​—2 Samuel 12:​1-7.

Deved i no kam kros long Netan. Mo hem i no traem mekem eskyus no faenem wan poen long Netan. No gat. Strong tok blong Netan i mekem se tingting blong hem i stikim hem. Deved i harem nogud tumas, ale hem i talemaot se: “Mi mi mekem sin agensem Jeova.”​—2 Samuel 12:13.

Taem Netan i mekem sin blong Deved i kam long klia ples, mo biaen i stretem hem long fasin we God i agri long hem, i gat gudfala risal i kamaot. Deved i no save ronwe long ol nogud frut blong sin blong hem, be hem i tanem tingting blong hem mo i frengud wetem Jeova bakegen. ?Wanem tingting blong Deved long saed blong fasin stretem ya? Hem i raetem se: “Sipos wan stret man i kilim mi, hem i soem kaengud fasin long mi. Mo sipos hem i tok strong blong stretem mi, samting ya i gud tumas olsem oel we i ron daon long hed blong mi mo mi no save blokem.”​—Ol Sam 141:​5, NW.

Long taem blong yumi tu, ol man blong Jeova oli save mekem ol bigfala sin, nating se oli holemstrong long God blong plante yia finis. Bighaf blong olgeta, oli luksave se ol elda oli save halpem olgeta, ale oli go luk ol elda. (Jemes 5:​13-​16) Be wanwan man we oli mekem nogud fasin oli traem haedem sin blong olgeta, olsem King Deved i mekem. Ale, ?yumi mas mekem wanem sipos yumi save long wan bigfala sin we wan long kongregesen i bin mekem?

?Wok Blong Hu?

Taem ol elda oli faenemaot se wan man i bin mekem bigfala sin, oli go luk man ya blong givhan long hem mo stretem hem olsem hem i nidim. Hemia nao wok blong ol elda blong jajem ol man olsem insaed long Kristin kongregesen. Oli wajemgud kongregesen long saed blong speret, mo oli stretem mo givhan long eniman we i stat folem wan rod we i no waes no i nogud.​—1 Korin 5:​12, 13; 2 Timote 4:2; 1 Pita 5:​1, 2.

Be, ?olsem wanem sipos yu yu no wan elda be yu harem tok se wan narafala Kristin i mekem wan bigfala sin? Yu save faenem advaes long Loa we Jeova i givim long nesen blong Isrel. Loa ya i talem se sipos wan man i luk we narafala i lego trutok mo wok agensem, i traem sakemaot ol lida blong nesen, i kilim man i ded, no i brekem wan narafala loa bakegen, hem i mas ripotem man ya, mo i mas rere blong talemaot ol samting we hem i save long saed blong bisnes ya. Levitikas 5:1 i talem se: “Sipos wan man i harem narafala i tok swea long pablik ples, no i luk wan fasin olsemia, no i faenemaot se wan man i bin mekem olsem, be hem i no ripotem, ale man ya i mekem sin mo i mas kasem panis from rong blong hem.”​—Lukluk Dutronome 13:​6-8; Esta 6:2; Proveb 29:24.

Nating se ol Kristin tede oli no stap aninit long Loa blong Moses, be bigfala tingting insaed long hem i save lidim olgeta. (Ol Sam 19:​7, 8) Taswe, sipos yu faenemaot se wan Kristin brata no sista i mekem wan bigfala sin, ?yu mas mekem wanem?

Stretem Bisnes Ya

Fastaem, i impoten we i gat pruf blong mekem yu yu bilif se wan bigfala sin i bin kamaot. Wan waes man i talem se: “Yu no mas wetnes agensem brata no sista blong yu sipos yu no save pruvum ol tok blong yu. Hemia wan krangke fasin blong mekem wetem maot blong yu.”​—Proveb 24:28.

Yu save mekem disisen blong go luk ol elda stret. I no rong blong mekem olsem. Be, rod we i soemaot moa lav, i blong go luk hemia we i mekem sin ya. Maet trufala store i defren long ol tingting we yu yu gat. No maet ol elda oli stat stretem bisnes ya finis. Ale, storeyan wetem man ya long kwaet fasin. Sipos yu gat gudfala risen yet blong bilif se hem i mekem wan bigfala sin, traem pulum hem blong go luk ol elda blong askem help, mo eksplenem from wanem i waes blong mekem olsem. Yu no mas talemaot bisnes ya long ol narafala, from we hemia fasin blong toktok tumas blong spolem narafala.

Afta we sam taem i pas, sipos man ya i no go toktok wetem ol elda, ale yu nao yu mas go luk olgeta. Nao, bambae wan no tu elda i storeyan wetem man ya. Ol elda oli mas “traehad blong faenemaot moa, luklukgud long bisnes ya, mo askem kwestin” long man ya, blong luk sipos hem i rili bin mekem sin. Sipos yes, bambae oli stretem hem folem rod we Baebol i soemaot.​—Dutronome 13:12-​14.

I nidim tufala wetnes blong pruvum se wan man i bin mekem bigfala sin. (Jon 8:​17; Hibrus 10:28) Sipos i gat wan wetnes nomo, mo man ya i talem se hem i no bin mekem rong, ale bisnes ya bambae i stap long han blong Jeova. (1 Timote 5:​19, 24, 25) I stret blong mekem olsem, from we yumi save se olgeta samting oli stap “long klia ples” long fored blong Jeova, mo se, sipos man ya i gat fol, bambae hem i “kasem panis” from.​—Hibrus 4:​13; Namba 32:23.

Be ?olsem wanem sipos man ya i talem se hem i no bin mekem bigfala sin, mo yu nomo yu givim wetnes agensem hem? ?Maet naoia hem i save agensem yu from we yu bin spolem nem blong hem? No gat, hem i no save mekem olsem sipos yu no bin tokbaot bisnes ya wetem ol narafala we oli no gat raet blong save long hem. Sipos yu ripotem wan bisnes we i save mekem trabol insaed long kongregesen, long olgeta we oli gat wok blong lukaot long kongregesen mo stretem ol bisnes olsem, hemia i no wan fasin blong toktok blong spolem nem blong narafala. Hemia i laenap wetem fasin blong wantem mekem i stret oltaem mo stap tru long God.​—Lukluk Luk 1:​74, 75.

Mekem Kongregesen i Stap Klin

Wan risen blong ripotem ol rong, i blong mekem kongregesen i stap klin. Jeova God i gat klin fasin, hem i wan tabu God. Hem i talem se olgeta we oli wosipim hem, oli mas stap klin long saed blong speret mo long ol fasin blong olgeta. Tok blong hem i givim advaes ya se: “Yufala i mas obei long God. Yufala i no letem ol samting ya we yufala i bin wantem bifo, taem we yufala i no save hem, bambae oli pulum fasin blong yufala. God ya we i singaot yufala, hem i tabu, hem i klin gud. Oraet, long sem fasin, yufala tu i mas tabu, yufala tu i mas klin gud. Long Baebol God i talem finis se, ‘Yufala i mas tabu, yufala i mas klin gud, olsem we mi mi tabu, mi mi klin gud.’ ” (1 Pita 1:​14-​16) Wan man we i stap mekem doti fasin no bigfala sin, i save mekem se ful kongregesen i kam doti long fes blong Jeova nao Hem i no moa glad long kongregesen, sipos oli no stretem no putumaot man ya.​—Lukluk Josua, japta 7.

Tufala leta we aposol Pol i raetem i go long Kristin kongregesen long Korin, oli soem se fasin ya blong ripotem ol bigfala rong i save mekem ol man blong God oli stap klin long fes blong Hem. Long faswan leta, Pol i raetem se: “Ol man oli stap talem we i gat wan man long yufala we i mekem wan bigfala trabol. Oli stap talem se ‘Samting ya i nogud tumas. Ol hiten man mo ol man olbaot, be oli no save mekem fasin ya. Man ya i stap slip wetem seken woman blong stret papa blong hem.’ ”​—1 Korin 5:1.

Baebol i no talem hu nao i ripotem bisnes ya long aposol Pol. Stefanas, Fotunatas, mo Akaekas, oli aot long Korin oli kam long Efesas we Pol i stap long hem, maet olgeta nao oli bin talemaot bisnes ya long Pol. Mo tu, Pol i bin kasem wan leta we Kristin kongregesen long Korin i raetem blong askem sam kwestin long hem. Nomata hu i bin talemaot, be taem ol wetnes we Pol i save trastem olgeta oli ripotem bisnes ya long hem, hem i save givim advaes blong lidim kongregesen ya. Hem i raetem se: “Yufala i mas putumaot man ya we i stap mekem sin oltaem, bambae hem i no moa stap wetem yufala.” Ale, kongregesen i putumaot man ya.​—1 Korin 5:​13; 16:17, 18.

?Advaes blong Pol i karem gudfala frut? !Yes! I luk olsem we man ya i luksave se fasin we hem i stap mekem i nogud tumas. Long seken leta we Pol i raetem i go long ol man Korin, hem i talem long kongregesen blong ‘fogivim mo leftemap tingting’ blong man ya we i tanem tingting blong hem finis. (2 Korin 2:​6-8) Taswe, fasin blong ripotem rong ya i mekem se kongregesen i kam klin, mo God i glad bakegen long man ya we i bin spolem fasin fren blong hem wetem God.

Yumi faenem wan narafala eksampel long faswan leta blong Pol long Kristin kongregesen long Korin. Long taem ya, aposol Pol i talem nem blong ol wetnes we oli ripotem wan trabol long hem. Hem i raetem se: “Ol brata mo sista. Ol famle blong Kloe oli talemaot nyus long mi finis, mo i klia gud we yufala nomo i stap rao wetem yufala.” (1 Korin 1:​11) Pol i save se ol rao ya mo fasin blong leftemap sam man tumas, i mekem olgeta oli seseraot, mo kolosap i spolem fasin joengud insaed long kongregesen. From we Pol i wantem se ol Kristin brata mo sista ya blong hem oli stap strong long saed blong speret, hem i raetem leta kwiktaem blong givim advaes we i save stretem kongregesen ya.

Tede, long olgeta ples blong wol, bighaf blong ol Kristin brata mo sista long ol kongregesen oli wokhad blong mekem ol fasin we God i agri long olgeta. Olsem nao, kongregesen i save stap klin long saed blong speret. Samfala oli mas stanap strong tru long ol hadtaem blong mekem olsem. Sam narafala oli ded from we oli holemstrong long God. Sipos yumi agri long wan bigfala rong we narafala i mekem no yumi traem haedem, yumi no stap soem fasin tangkyu from ol traehad blong ol brata sista ya.

Givhan Long Olgeta We Oli Mekem Rong

?From wanem samfala we oli mekem bigfala sin oli no wantem go luk ol elda blong kongregesen? Plante taem, hemia from we oli no luksave se fasin ya i save givhan long olgeta bigwan. Samfala oli gat rong tingting ya se sipos oli talemaot sin blong olgeta, bambae ol elda oli talemaot long ful kongregesen. Sam narafala oli gyaman long olgeta bakegen, se sin blong olgeta i no bigfala tumas. Mo sam narafala bakegen, oli ting se olgeta nomo oli save stretem rong ya, oli no nidim ol elda.

Be ol man we oli mekem bigfala sin oli nidim we ol elda oli givhan long olgeta wetem fasin lav. Jemes i raetem se: ‘?I gat wan long yufala we i sik? I gud hem i singaot ol elda blong kongregesen blong oli kam luk hem. Nao ol elda ya oli save prea long hem, mo oli save kafsaedem oel i go long hem long nem blong Jeova. Mo prea blong man we i bilif bambae i sevem sikman ya. Jeova bambae i mekem hem i strong bakegen, mo sipos hem i bin mekem sam sin, Jeova bambae i fogivim hem from.’​—Jemes 5:​14, 15.

!Hemia wan nambawan rod we Jeova i stanemap blong halpem ol man we oli mekem rong, blong oli save kam strong bakegen long saed blong speret! Taem ol elda oli givim advaes we i kamaot long Tok blong God long fasin we i kaengud, mo taem oli prea from olgeta, oli givhan long olgeta blong lego nogud fasin we oli stap mekem. Taswe, olgeta we oli tanem tingting blong olgeta, oli haremgud mo tingting blong olgeta i gat spel taem oli go luk ol elda we oli gat lav. Oli no harem se ol elda ya oli daonem olgeta. Wan yangfala man long Wes Afrika i slip olbaot mo i haedem sin ya blong hem blong plante manis. Afta we sin ya i kam long klia ples, hem i talem long ol elda se: “!Mi bin wantem tumas we wan man i askem kwestin long mi long saed blong fasin blong mi wetem gel ya! Naoia, we bisnes ya i kam long klia ples, tingting blong mi i spelgud.”​—Lukluk Ol Sam 32:​3-5.

Lav We i Stanap Long Ol Stret Rul

Ol man blong God we oli tekem baptaes oli ‘aot finis long ded, oli kam long laef.’ (1 Jon 3:​14) Be sipos oli mekem bigfala sin, oli folem bakegen rod blong ded. Oli mas kasem help, sipos no, oli save kam strong moa blong mekem sin, mo maet oli no wantem tanem tingting blong olgeta mo wosipim trufala God bakegen.​—Hibrus 10:26-​29.

Taem yumi ripotem wan man we i mekem bigfala rong, yumi soem se yumi rili laekem hem. Jemes i raetem se: “Ol brata mo sista. I gud yufala i save samting ya. Sipos wan long yufala i gowe long trutok, nao narawan long yufala i lidim hem i kambak bakegen, narawan ya i mekem wan gudfala wok ya. Man we i tanem man nogud i aot long rong rod, i kambak long stret rod bakegen, hem i sevem laef blong man nogud ya, bambae man nogud ya i no lus. Mo i mekem rod blong God i tekemaot plante sin.”​—Jemes 5:​19, 20.

?Ale, from wanem yumi mas ripotem ol bigfala sin? From we fasin ya i karem gudfala frut. Taem yumi ripotem ol bigfala rong, yumi soem long God, kongregesen, mo man we i mekem rong ya, se yumi gat Kristin lav we i stanap long ol stret rul. Taem ol wanwan memba blong kongregesen i holemstrong long ol stret rul blong God, Jeova i blesem ful kongregesen bigwan. Aposol Pol i raetem se: ‘God bambae i holem yufala i stap strong we i no gat samting blong jajem yufala from, gogo kasem en ya we Jisas Kraes, Masta blong yumi bambae i mekem kot long olgeta man.’​—1 Korin 1:8.

[Futnot]

[Tok blong pija long pej 26]

Yumi soem lav taem yumi pulum wan Wetnes we i mekem bigfala rong blong go luk ol elda

[Tok blong pija long pej 28]

Ol elda oli givhan long olgeta we oli mekem rong, nao God i save glad long olgeta bakegen