STADI 34
SINGSING 107 God i Soemaot Eksampol Blong Lav
?Olsem Wanem Ol Elda Oli Soemaot Lav Mo Sore Long Man We i Mekem Sin?
“God i kaen tumas . . . i traem blong pulum yu blong yu tanem tingting blong yu.”—ROM 2:4.
BIGFALA TINGTING
Stadi ya i tokbaot olsem wanem ol elda oli traem blong halpem olgeta long kongregesen we oli mekem bigfala sin.
1. ?Wanem i save hapen afta we wan man i mekem bigfala sin?
LONG laswan stadi yumi tokbaot samting we aposol Pol i mekem long wan man Korin we i mekem bigfala sin. Man ya i no tanem tingting blong hem, ale oli putumaot hem long kongregesen. Be olsem stamba vas blong stadi ya i soemaot, God i save lidim wan man blong i tanem tingting blong hem. (Rom 2:4) ?Olsem wanem Jehova i yusum ol elda blong givhan long olgeta?
2-3. ?Yumi mas mekem wanem, sipos yumi save se wan brata o sista i mekem bigfala sin, mo from wanem?
2 Ol elda oli no save givhan, sipos oli no save se man ya i mekem bigfala sin. Taswe, ?yumi mas mekem wanem sipos yumi save se wan brata o sista i mekem wan bigfala sin, we maet kongregesen i save putumaot hem from? I gud yumi talem long hem blong i go toktok long ol elda blong kasem help.—Aes. 1:18; Wok 20:28; 1 Pita 5:2.
3 ?Be olsem wanem sipos man we i mekem sin i no wantem go toktok long ol elda? Sipos i olsem, yumi nao yumi mas go talemaot long ol elda, blong oli save givhan long hem. Taem yumi mekem olsem, yumi soemaot se yumi lavem brata o sista blong yumi, mo yumi no wantem se hem i lego trutok. Sipos hem i gohed blong mekem sin ya, bambae hem i no moa fren gud wetem Jehova. Mo tu, bambae hem i no moa gat gudnem insaed long kongregesen. Taswe nating se i had, yumi mas go talemaot long ol elda, from we yumi lavem Jehova mo man ya we i mekem sin.—Sam 27:14.
?OLSEM WANEM OL ELDA OLI GIVHAN LONG MAN WE I MEKEM BIGFALA SIN?
4. ?Taem ol elda oli sidaon wetem wan man we i mekem bigfala sin, bambae oli traehad blong mekem wanem?
4 Taem wan man long kongregesen i mekem wan bigfala sin, bodi blong ol elda bambae i jusum tri elda blong oli wok olsem wan komiti,a blong oli sidaon wetem man ya. Trifala i mas gat tingting daon mo no flas. Oli mas luksave se nating se oli stap traehad blong halpem man ya, be oli no save fosem hem blong i tanem tingting blong hem. (Dut. 30:19) Ol elda oli kasemsave se i no evri man we bambae oli tanem tingting blong olgeta olsem King Deved. (2 Saml. 12:13) Maet samfala oli no wantem folem advaes blong Jehova. (Jen. 4:6-8) Nating se i olsem, mak blong ol elda i blong pulum man ya blong i tanem tingting blong hem. ?Ol elda oli mas tingbaot wanem, taem oli sidaon wetem wan man we i mekem sin?
5. ?Ol elda oli mas gat wanem fasin taem oli storian wetem man we i mekem sin? (2 Timoti 2:24-26) (Mo tu, yu luk pija.)
5 Ol elda oli tingbaot man ya we i mekem sin olsem wan sipsip we i lus mo we Jehova i lavem hem yet. (Luk 15:4, 6) Taswe, taem oli storian wetem hem, oli no tok strong o tok nogud long hem. Mo tu, oli no gat tingting ya se oli sidaon wetem hem nomo blong askem kwestin mo faenemaot wanem we i hapen. Be oli soemaot ol fasin we 2 Timoti 2:24-26 (Ridim.) i tokbaot. Ol elda oli kaen, oli gat kwaet fasin mo oli toktok gud long man ya blong traem kasem hat blong hem.
Olsem ol man blong lukaot long sipsip long taem bifo, ol elda oli mekem bes blong olgeta blong halpem sipsip we i lus (Haf 5)
6. ?Olsem wanem ol elda oli save rerem hat blong olgeta fastaem? (Rom 2:4)
6 Ol elda oli mas rerem hat blong olgeta fastaem. Oli traem blong folem fasin blong Jehova taem oli storian wetem man ya we i mekem sin. Oli tingbaot tok ya blong Pol, we i se: “God i kaen tumas . . . i traem blong pulum yu blong yu tanem tingting blong yu.” (Ridim Rom 2:4.) Ol elda oli mas tingbaot se, oli ol man blong lukaot long sipsip we oli wok aninit long Kraes. (Aes. 11:3, 4; Mat. 18:18-20) Bifo we komiti ya i sidaon wetem man we i mekem sin, bambae oli prea blong askem Jehova blong i givhan long olgeta blong halpem man ya we i mekem sin blong i tanem tingting blong hem. Bambae oli mekem risej long Baebol mo long ol buk blong yumi, mo bambae oli prea blong Jehova i givhan long olgeta, blong oli kasemsave long tingting blong man ya mo samting we i hapen. Bambae oli tingbaot samting we oli nidim blong save long saed blong laef blong man ya, we maet i gat paoa long tingting mo aksen blong hem.—Prov. 20:5.
7-8. ?Olsem wanem ol elda oli save folem fasin blong Jehova blong gat longfala tingting?
7 Ol elda oli folem fasin blong Jehova blong gat longfala tingting. Oli tingbaot samting we Jehova i mekem long ol man blong hem long taem bifo we oli bin mekem sin. Eksampol, Jehova i soemaot longfala tingting long Ken, taem i givim woning long hem long saed blong samting we bambae i hapen sipos hem i mekem sin, mo blesing we bambae hem i kasem sipos hem i obei. (Jen. 4:6, 7) Mo tu, Jehova i sanem profet Natan i go long Deved. Mo Natan i yusum wan pijatok blong tajem hat blong hem. (2 Saml. 12:1-7) Mo Jehova i “gohed blong sanem” ol profet blong hem “bakegen mo bakegen” long nesen blong Isrel we i no wantem obei long hem. (Jer. 7:24, 25) Hem i no wet blong ol man oli tanem tingting blong olgeta bifo we hem i halpem olgeta. Be taem oli stap mekem sin yet, hem i traem pulum olgeta blong tanem tingting.
8 Ol elda oli folem eksampol blong Jehova taem oli stap traehad blong halpem olgeta we oli mekem bigfala sin. Folem 2 Timoti 4:2, ol elda oli “mas gat longfala tingting” taem oli storian wetem wan brata o sista we tingting blong hem i trabol. Hemia i min se oltaem wan elda i mas gat kwaet fasin mo longfala tingting, blong hem i save halpem wan man we i mekem sin blong i wantem mekem samting we i stret. Sipos elda i kam kros o i tok strong, maet man ya bambae i no lesin long advaes o i no wantem tanem tingting blong hem.”
9-10. ?Olsem wanem ol elda oli save halpem wan man blong i luksave ol samting we oli pulum hem blong mekem sin?
9 Ol elda oli traem blong faenemaot wanem i lidim hem blong mekem sin. Eksampol, ?Kristin ya i kam slak sloslo from we hem i no moa stadi hem wan o i no moa prij? ?Hem i no moa prea oltaem long Jehova long fulhat blong hem? ?Hem i no blokem ol nogud tingting we i save pulum hem? ?Hem i no jusum gud ol fren o ol samting we hem i mekem blong spel mo pleplei? ?Olsem wanem ol samting ya we hem i jusum oli gat paoa long hat blong hem? ?Hem i luksave se ol desisen mo aksen blong hem oli mekem Papa blong hem Jehova i harem nogud?
10 Taem ol elda oli askem ol kwestin olsem long kaen fasin, oli stap halpem man we i mekem sin blong i tingbaot ol samting we i mekem se sloslo hem i no moa fren gud wetem Jehova, nao hemia i pulum hem blong mekem sin. (Prov. 20:5) Mo tu, maet oli save yusum wan pijatok blong halpem man ya blong i tingbaot mo luksave nogud samting we hem i mekem, sem mak olsem we Natan i mekem blong halpem Deved. Long faswan taem we komiti i sidaon wetem man ya, maet bambae hem i harem nogud from desisen we hem i mekem, mo maet hemia bambae i pulum hem blong i tanem tingting blong hem.
11. ?Olsem wanem Jisas i givhan long ol man we oli mekem sin?
11 Ol elda oli gat strong tingting blong folem eksampol blong Jisas. Traem tingbaot man ya Sol we hem i blong Tasas. Jisas i halpem hem taem i askem se: “Sol, Sol. ?From wanem yu stap mekem i nogud long mi?” Jisas i askem kwestin ya blong mekem Sol i luksave se samting we hem i stap mekem i rong. (Wok 9:3-6) Mo long saed blong “woman ya Jesebel,” Jisas i talem se: “Mi mi givim taem long hem blong i tanem tingting blong hem.”—Rev. 2:20, 21.
12-13. ?Olsem wanem ol elda oli save givim taem long man we i mekem sin blong i tanem tingting? (Mo tu, yu luk pija.)
12 Olsem Jisas, ol elda oli no kwik blong gat tingting ya se man we i mekem sin bambae i no save tanem tingting blong hem. Samfala maet oli tanem tingting blong olgeta long faswan taem we komiti i sidaon wetem olgeta. Be sam narafala, maet i tekem taem. Taswe, ol elda oli save mekem plan blong sidaon wetem man ya bakegen, i bitim we oli sidaon wetem hem wan taem nomo. Maet afta long faswan taem we oli sidaon, Kristin ya we i mekem sin bambae i stat blong tingting long ol samting we ol elda oli talem long hem. Mo maet hemia bambae i pulum hem blong gat tingting daon mo askem Jehova blong i fogivim hem. (Sam 32:5; 38:18) Olsem nao, taem komiti i sidaon wetem man ya bakegen, maet fasin blong hem i jenis, i no olsem long faswan taem we oli sidaon wetem hem.
13 Blong halpem man we i mekem sin blong i tanem tingting blong hem, ol elda oli mas soemaot sore mo kaen fasin long hem. Ol elda oli prea blong Jehova i blesem ol traehad blong olgeta, mo oli hop se brata o sista we i mekem sin i luksave rong blong hem mo i tanem tingting.—2 Tim. 2:25, 26.
Maet ol elda oli mas storian wetem man bitim wan taem, blong halpem hem blong i tanem tingting blong hem (Haf 12)
14. ?Yumi mas presem hu taem wan man we i mekem sin i tanem tingting blong hem, mo from wanem?
14 !Yumi glad tumas taem wan man we i mekem sin i tanem tingting blong hem! (Luk 15:7, 10) ?Be yumi mas presem hu taem wan man we i mekem sin i tanem tingting blong hem? ?Ol elda? Tingbaot samting we Pol i talem long saed blong ol man we oli mekem sin, i se: “Maet God bambae i givim janis long ol man ya, blong oli tanem tingting blong olgeta.” (2 Tim. 2:25) Yes i no eni man, be Jehova nao i halpem Kristin ya blong i jenisim tingting mo fasin blong hem. Pol i tokbaot se afta we wan man i tanem tingting blong hem, bambae hem i kasem stret save long trutok, hem i gat gudfala tingting bakegen, mo bambae hem i naf blong ronwe long ol trap blong Setan.—2 Tim. 2:26.
15. ?Olsem wanem ol elda oli save gohed blong halpem man we i tanem tingting blong hem?
15 Taem wan man we i mekem sin i tanem tingting blong hem, komiti bambae i mekem plan blong ol elda oli visitim hem blong leftemap tingting blong hem, blong hem i gohed blong stanap strong agensem ol trik blong Setan, mo i gohed blong wokbaot long stret rod. (Hib. 12:12, 13) I tru, ol elda oli no talemaot samting we man ya i mekem long ol narafala. ?Be kongregesen bambae i nidim blong save wanem?
“LONG FORED BLONG EVRIWAN, YU MAS STRETEM OLGETA”
16. Folem 1 Timoti 5:20, ?Pol i stap tokbaot hu taem hem i talem se “long fored blong evriwan”?
16 Ridim 1 Timoti 5:20. Pol i talem long gudfala elda ya Timoti, blong i stretem “olgeta we oli stap mekem sin,” long fored blong evriwan. ?Olsem wanem? ?Pol i min se oli mas stretem man we i mekem sin “long fored blong evriwan” long kongregesen? Nogat. Hem i stap tokbaot olgeta ya we maet oli save finis sin we man ya i mekem. Maet oli luk nogud samting we Kristin ya i mekem, o maet hem i talemaot long olgeta, samting we hem i mekem. Ol elda bambae oli letem olgeta ya nomo we oli save long samting we i hapen, se oli lukluk finis long bisnes ya mo oli stretem Kristin ya we i mekem sin.
17. Sipos bighaf blong kongregesen i save se wan Kristin i mekem wan bigfala sin, ?bambae ol elda oli talemaot wanem mo from wanem?
17 Samtaem bighaf blong olgeta long kongregesen, oli save finis se wan Kristin i mekem wan bigfala sin, o maet bambae oli save yet long samting ya. Sipos samting olsem i hapen, tok ya “long fored blong evriwan” i minim evriwan long kongregesen. Taswe wan elda bambae i talemaot long ful kongregesen se oli bin stretem brata o sista ya. ?From wanem? Pol i givim ansa se: “Hemia bambae i olsem wan woning long olgeta evriwan,” blong oli no mekem wan bigfala sin.
18. ?Ol elda bambae oli mekem wanem sipos wan Kristin we i no bitim 18 yia yet i mekem sin? (Mo tu, yu luk pija.)
18 ?Ol elda bambae oli mekem wanem sipos wan Kristin we i baptaes finis mo i no bitim 18 yia yet i mekem wan bigfala sin? Bodi blong ol elda bambae i mekem plan blong tu elda i go sidaon wetem yangfala ya mo Kristin perens blong hem.b Ol elda bambae oli traem faenemaot samting we perens ya i mekem finis blong halpem pikinini blong tufala blong i tanem tingting. Sipos yangfala ya i stap folem ol advaes blong perens blong hem, tufala elda ya i save jusum blong no moa gohed blong lukluk long bisnes ya. Antap long hemia, ol elda oli save se Jehova i givim wok ya long papa mo mama blong stretem pikinini blong tufala long fasin we i soemaot lav. (Dut. 6:6, 7; Prov. 6:20; 22:6; Efes. 6:2-4) Be yet, ol elda bambae oli gohed blong jekem sipos perens ya i gohed blong givhan long pikinini ya. ?Be olsem wanem sipos yangfala ya i no wantem nating blong tanem tingting blong hem? Long taem olsem, wan komiti blong ol elda bambae i sidaon wetem hem mo Kristin perens blong hem.
Taem wan yangfala i mekem wan bigfala sin, tu elda bambae i go sidaon wetem hem mo Kristin perens blong hem (Haf 18)
“JEHOVA I LAVEM MAN TUMAS, MO I GAT SORE”
19. ?Olsem wanem ol elda oli traehad blong folem fasin blong Jehova taem oli sidaon wetem man we i mekem sin?
19 Jehova i givim wok long ol elda blong oli mekem kongregesen i stap klin. (1 Kor. 5:7) Be long semtaem, oli mekem bes blong givhan long olgeta we oli mekem sin blong oli tanem tingting. Mo taem oli stap halpem wan man olsem, oli gohed blong gat stret tingting mo hop se man ya bambae i mekem jenis long laef blong hem. ?From wanem? From we oli wantem folem fasin blong Jehova, we hem i “lavem man tumas, mo i gat sore.” (Jem. 5:11) Makem olsem wanem aposol Jon i soemaot fasin ya long ol brata mo sista. Hem i raet i go long olgeta se: “Ol smol pikinini blong mi, mi mi stap raetem ol tok ya long yufala, blong yufala i no mekem sin. Be sipos wan man i mekem wan sin, yumi gat wan helpa we i stap wetem Papa, hemia Jisas Kraes, we i wan stret man.”—1 Jon 2:1.
20. ?Bambae yumi tokbaot wanem long laswan stadi blong Wajtaoa ya?
20 Sore tumas i gat sam taem we wan Kristin i jusum blong no tanem tingting blong hem. Sipos i olsem, kongregesen i mas putumaot hem. ?Ol elda bambae oli mekem wanem sipos samting ya i hapen? Bambae yumi tokbaot ansa blong kwestin ya long laswan stadi blong Wajtaoa ya.
SINGSING 103 God i Givim Ol Man Blong Lukaot Long Ol Sipsip
a Bifo, yumi stap singaot grup ya se kot komiti. Be naoia yumi no moa yusum tok ya, be yumi singaot grup ya se komiti blong ol elda.
b Tok ya perens we oli yusum long ples ya, i save minim stret papa mo mama blong pikinini ya, o wan narafala Kristin we i gat wok ya blong lukaot long pikinini ya.