Givhan Long Olgeta We Kongregesen i Putumaot Olgeta

1-2. (1) ?Wanem tingting blong Jehova long man we i mekem sin mo i no tanem tingting? (2) ?Jehova i wantem se man we i mekem sin i mekem wanem?

JEHOVA i no agri long enikaen fasin nomo. Hem i no laekem nating ol rabis fasin. (Sam 5:​4-6) Jehova i wantem se yumi obei long ol rul blong hem long saed blong stret fasin. I tru, Jehova i kasemsave se yumi sinman mo yumi no save obei long fasin we i stret gud olgeta. (Sam 130:​3, 4) Be long semtaem, Jehova i no glad long ‘ol man we oli yusum kaen fasin blong hem, olsem wan eskius blong mekem ol nogud fasin we man i no sem blong mekem.’ (Jud 4) Yes Baebol i tokbaot se God bambae i “spolem ol man we oli no obei,” long faet blong Amagedon.—2 Pita 3:7; Rev. 16:16.

² Nating se i olsem, Jehova i no wantem se wan man i lus. Olsem we yumi bin tokbaot long ol stadi blong Wajtaoa ya, Baebol i soemaot klia se “hem i wantem se olgeta man oli tanem tingting blong olgeta.” (2 Pita 3:9) Ol elda oli folem fasin blong Jehova taem oli gat longfala tingting blong halpem ol man we oli mekem sin blong oli tanem tingting mo fren gud wetem Jehova bakegen. Be i no evri Kristin we oli mekem sin, we oli tanem tingting blong olgeta. (Aes. 6:9) Samfala oli gohed blong mekem sin, nating se ol elda oli traehad plante taem blong halpem olgeta blong oli tanem tingting. ?Long taem olsem, ol elda bambae oli mekem wanem?

“YUFALA I MAS PUTUMAOT RABIS MAN”

3. (1) ?Baebol i talem se kongregesen i mas mekem wanem long man we i no wantem tanem tingting? (2) ?From wanem yumi talem se taem wan man i no wantem tanem tingting, hem i jusum blong kongregesen i putumaot hem?

³ Sipos man we i mekem sin i no tanem tingting blong hem, ol elda bambae oli mas folem advaes we i stap long 1 Korin 5:​13, we i se: “Yufala i mas putumaot rabis man, blong hem i no stap long medel blong yufala.” Man we i mekem sin i save samting ya. Taswe i olsem we hem wan i jusum blong oli putumaot hem long kongregesen, mo hem i stap kakae frut blong samting we hem i planem. (Gal. 6:7) ?From wanem yumi talem olsem? From we hem i no wantem jenisim fasin blong hem, nating se ol elda oli traehad plante taem blong halpem hem. (2 King 17:​12-15) Ol aksen blong hem oli soemaot se hem i no wantem obei long ol rul blong Jehova.—Dut. 30:​19, 20.

4. ?From wanem oli mas talemaot long kongregesen se oli putumaot wan Kristin we i no wantem tanem tingting blong hem?

⁴ Taem wan Kristin i no tanem tingting mo oli putumaot hem, bambae oli talemaot long kongregesen se Kristin ya i no moa wan Witnes blong Jehova.a Hemia i no blong mekem man ya i sem, be i blong mekem se ol narafala long kongregesen oli obei long samting we Baebol i talem se oli mas “stop blong joen” wetem man ya, mo oli “no mas kakae wetem man olsem.” (1 Kor. 5:​9-11) I gat gudfala risen from wanem Jehova i givim advaes ya. Aposol Pol i talem se: “Smol is nomo i save mekem olgeta flaoa blong bred i solap.” (1 Kor. 5:6) Sipos kongregesen i no putumaot man we i mekem sin, hemia i save mekem ol narafala oli gat tingting ya se oli no nid blong obei long ol rul blong Jehova long saed blong stret fasin.—Prov. 13:20; 1 Kor. 15:33.

5. ?Yumi mas gat wanem tingting long man we kongregesen i putumaot hem, mo from wanem?

⁵ ?Yumi mas gat wanem tingting long man we kongregesen i putumaot hem? I tru se yumi no moa joen wetem hem, be yumi gat hop yet mo yumi luk hem olsem wan sipsip we i lus. Taem wan sipsip i lus, hem i save kambak yet mo joen wetem ol narafala sipsip. Tingbaot se sipsip ya we i lus, i bin givim laef blong hem long Jehova. Be sore tumas, hem i no moa holem promes ya, mo hem i putum hem wan i stap long denja. (Esik. 18:31) Nating se i olsem, naoia we Jehova i glad yet blong soem sore long ol man, yumi hop se Kristin ya bambae i kambak long hem. Taswe, ?olsem wanem ol elda oli save halpem man ya we kongregesen i putumaot hem?

?OLSEM WANEM OL ELDA OLI HALPEM MAN WE KONGREGESEN I PUTUMAOT HEM?

6. ?Ol elda bambae oli mekem wanem blong halpem wan Kristin we kongregesen i putumaot hem?

⁶ Taem oli putumaot wan Kristin long kongregesen, ?ol elda bambae oli stop blong givhan long hem blong i kambak long Jehova? !Nogat! Taem ol elda oli talemaot long man we i mekem sin se kongregesen bambae i putumaot hem, komiti blong ol elda bambae i talemaot long hem ol samting we hem i mas mekem blong kongregesen i save tekembak hem. Be ol elda bambae oli mekem sam moa samting. Plante taem, bambae oli talem long man ya we i mekem sin, se afta long sam manis bambae oli sidaon wetem hem bakegen blong luk sipos hem i jenisim tingting blong hem. Sipos man ya i agri blong sidaon wetem olgeta bakegen, ol elda bambae oli halpem hem blong i tanem tingting mo i kambak long Jehova. Nating sipos hem i no jenisim tingting blong hem long taem ya, ol elda bambae oli gohed blong traem visitim hem bakegen long fiuja.

7. ?Olsem wanem ol elda oli folem fasin blong Jehova blong soem sore long man we kongregesen i putumaot? (Jeremaea 3:12)

⁷ Ol elda oli traehad blong folem fasin blong Jehova blong soem sore long man we kongregesen i putumaot hem. Eksampol, long taem bifo, Jehova i no wet se ol man Isrel oli tanem tingting blong olgeta, blong hem i save halpem olgeta. Defren olgeta, hem i tekem faswan step blong givhan long olgeta, nating se oli no soemaot yet se oli tanem tingting blong olgeta. Olsem we yumi luk long nambatu stadi blong Wajtaoa ya, Jehova i soemaot se hem i gat sore, taem hem i talem long profet Hosea blong i fogivim waef blong hem we i stap mekem sin yet. (Hos. 3:1; Mal. 3:7) Olsem Jehova, ol elda oli wantem tumas se man ya we i mekem sin i tanem tingting blong hem mo i kambak long kongregesen, mo oli no traem mekem i had long man ya blong i kambak.—Ridim Jeremaea 3:12.

8. ?Olsem wanem parabol blong boe we i lusum rod i halpem yumi blong kasemsave se Jehova i gat bigfala sore? (Luk 15:7)

⁸ Tingbaot parabol ya blong Jisas long saed blong boe we i lusum rod, we yumi bin tokbaot long nambatu stadi blong Wajtaoa ya. Taem papa ya i luk we boe blong hem i stap kambak, hem i “resis i go, i putum han blong hem i goraon long boe ya, mo i kis long hem.” (Luk 15:20) Makem se papa ya i no wet se boe ya i askem hem blong i fogivim hem. Be, hem i tekem faswan step blong resis i go long hem, from we hem i lavem boe blong hem tumas. Ol elda oli traehad blong soemaot semfala fasin ya long olgeta we oli lego Jehova. Oli wantem se ol sipsip ya we oli lus, oli kambak long Jehova. (Luk 15:​22-24, 32) !Taem wan man we i mekem sin i kambak long Jehova, olgeta long heven mo long wol oli glad tumas!—Ridim Luk 15:7.

9. ?Jehova i leftemap tingting blong ol man we oli mekem sin blong oli mekem wanem?

⁹ Ol samting we yumi bin lanem oli soemaot klia se Jehova i no save letem ol man we oli mekem sin oli gohed blong stap insaed long kongregesen. Nating se i olsem, hem i gohed yet blong traehad blong halpem olgeta, from hem i wantem se oli kambak long hem. Hosea 14:4 i soemaot filing we Jehova i gat, taem wan man i tanem tingting blong hem, i se: “Bambae mi hilim olgeta, blong oli no moa lego mi. Bambae mi lavem olgeta, long gladhat blong mi nomo, from we mi no moa kros.” Strong filing ya we Jehova i gat, i mas pulum ol elda blong lukaot eni saen se i soemaot se wan man i tanem tingting blong hem. Mo ol tok ya oli sud pulum olgeta ya tu we oli lego Jehova, blong oli no wet longtaem blong kambak long Hem.

10-11. ?Olsem wanem ol elda oli save halpem olgeta we oli lego Jehova longtaem finis?

¹⁰ ?Olsem wanem long olgeta we kongregesen i bin putumaot olgeta, plante yia i pas finis? Maet olgeta ya oli lego finis ol fasin we kongregesen i bin putumaot olgeta from. Mo samtaem, sam long olgeta ya oli no moa tingbaot from wanem kongregesen i putumaot olgeta. Nomata hamas yia olgeta ya i stap aotsaed long kongregesen, ol elda bambae oli traehad blong faenem mo visitim olgeta. Taem ol elda oli visitim olgeta, bambae oli prea wetem olgeta mo leftemap tingting blong olgeta blong oli kambak long kongregesen. I tru, sipos wan man i stap aotsaed long kongregesen blong plante yia, bambae hem i nidim blong kasemsave long Jehova bakegen mo ol trutok blong Baebol. Taswe sipos hem i talem se hem i wantem kambak, ol elda oli save mekem plan blong wan brata o sista i stadi wetem hem, nating se kongregesen i no tekembak hem yet. Mo ol elda nao bambae oli jusum se hu i save stadi wetem hem.

¹¹ Ol elda oli traehad blong folem fasin blong Jehova blong soem lav. Mo oli mekem bes blong olgeta blong faenem olgeta we oli lego Jehova mo halpem olgeta blong kambak long hem. Taem man we i mekem sin i soemaot se hem i jenisim tingting mo fasin blong hem, kongregesen bambae i no wet blong tekembak hem.—2 Kor. 2:​6-8.

12. (1) ?From wanem ol elda oli mas lukaot gud bifo we oli tekembak wan man we i bin mekem sin? (2) ?From wanem yumi no mas ting se Jehova bambae i no save soem sore long sam man from sin we oli mekem? (Mo tu, yu luk futnot.)

¹² Samtaem ol elda oli mas lukaot gud, bifo we oli tekembak wan man we i bin mekem sin. Eksampol, sipos man ya i mekem nogud fasin long saed blong seks wetem pikinini o i kam wan apostasi, o sipos hem i folem rod we i no stret blong divos, ol elda oli mas meksua se man ya i rili tanem tingting blong hem. (Mal. 2:14; 2 Tim. 3:6) Ol elda oli mas protektem ol sipsip blong Jehova. Be long sem taem, yumi mas luksave se Jehova i save tekembak eni man we i rili tanem tingting blong hem, mo we i stop blong mekem ol rabis fasin. Taswe, taem ol elda oli stap lukaot gud blong tekembak wan man we i mekem wan bigfala sin we i spolem gud narafala, oli mas lukaot gud tu blong blokem tingting ya se Jehova bambae i neva save soem sore long hem.b—1 Pita 2:10.

SAMTING WE KONGREGESEN I SAVE MEKEM

13. ?Olsem wanem fasin we yumi soem long man we kongregesen i stretem hem, i defren long man we oli putumaot hem?

¹³ Olsem we yumi bin tokbaot long laswan stadi, samtaem kongregesen i talemaot se oli stretem wan Kristin. Long taem olsem, yumi save gohed blong joen wetem hem, from we hem i tanem tingting mo i jenisim fasin blong hem finis. (1 Tim. 5:20) Hem i stap yet olsem wan brata o sista blong yumi, mo hem i nidim blong yumi leftemap tingting blong hem. (Hib. 10:​24, 25) Be hemia i defren taem oli putumaot wan Kristin long kongregesen. Yumi mas “stop blong joen” wetem man ya, mo yumi “no mas kakae wetem man olsem.”—1 Kor. 5:11.

14. ?Olsem wanem ol Kristin oli save yusum tingting blong olgeta we oli trenem folem Baebol, taem oli mitim wan man we kongregesen i putumaot hem? (Mo tu, yu luk pija.)

¹⁴ Sipos kongregesen i putumaot wan Kristin, ?hemia i min se yumi no save invaetem hem i kam long miting, o talem halo long hem taem i kam long miting? Nogat. I tru se yumi no mas joen wetem hem. Be ol Kristin oli save yusum tingting blong olgeta we oli trenem folem Baebol, taem oli wantem invaetem wan man we kongregesen i putumaot hem, we maet i wan famle o gudfala fren blong olgeta, blong i kam long miting. ?Mo sipos hem i kam, bambae yumi mekem wanem? Bifo, taem wan man olsem i kam long miting, yumi no stap talem halo long hem. Be bakegen, wanwan Kristin i save yusum tingting blong hem we i trenem folem Baebol, blong jusum se bambae hem i mekem wanem long taem olsem. Maet samfala oli jusum blong talem halo o welkamem man olsem long miting. Nating se i olsem, bambae yumi no tekem taem blong storian longtaem wetem olgeta o spenem taem wetem olgeta.

15. ?Vas blong 2 Jon 9-11 i stap tokbaot wanem kaen man? (Mo tu, yu luk bokis ya “?Jon Mo Pol i Stap Tokbaot Sem Kaen Sin?”)

¹⁵ Maet samfala bambae oli talem se: ‘?Mi ting se Baebol i talem se man we i talem halo long man olsem, hem i stap joen long ol rabis wok blong hem?’ (Ridim 2 Jon 9-11.) Ol vas raonabaot oli soemaot se ol tok ya oli stap minim ol apostasi mo olgeta we oli stap gohed blong leftemap rabis fasin. (Rev. 2:20) Taswe, sipos wan man we kongregesen i putumaot hem i stap gohed blong leftemap ol tijing blong apostasi o sam narafala rabis fasin, bambae ol elda oli no visitim hem. Be yet, i posibol se man ya i save tanem tingting blong hem. Be go kasem taem ya, bambae yumi no talem halo o invaetem man olsem i kam long ol miting blong kongregesen.

FOLEM FASIN BLONG JEHOVA BLONG GAT SORE

16-17. (1) ?Jehova i wantem se ol man we oli mekem sin, oli mekem wanem? (Esikel 18:32) (2) ?Olsem wanem ol elda oli soem se oli stap wok wetem Jehova?

¹⁶ ?Yumi lanem wanem long ol faef stadi blong Wajtaoa ya? !Jehova i no wantem nating se wan man i lus! (Ridim Esikel 18:32.) Hem i wantem se olgeta man oli fren wetem hem. (2 Kor. 5:20) Hemia nao from wanem longtaem finis i kam, Jehova i gohed blong talem long ol man blong hem we oli lego hem, blong oli tanem tingting blong olgeta mo kambak long hem. Ol elda oli gat nambawan blesing ya blong wok wetem Jehova, blong halpem olgeta we oli mekem bigfala sin, blong oli tanem tingting blong olgeta.—Rom 2:4; 1 Kor. 3:9.

¹⁷ !Olgeta long heven oli glad tumas taem wan sinman i tanem tingting blong hem! Evritaem we wan sipsip blong Jehova i kambak insaed long kongregesen, hemia i mekem Jehova i glad tumas. Taem yumi gohed blong tingting dip long sore mo kaen fasin blong Jehova, hemia bambae i mekem se yumi lavem hem moa.—Luk 1:78.