STADI 33
SINGSING 130 Yumi Fogivim Ol Man
?Olsem Wanem Kongregesen i Save Gat Sem Tingting Olsem Jehova Long Man We i Mekem Bigfala Sin?
“Sipos wan man i mekem wan sin, yumi gat wan helpa.”—1 JON 2:1.
BIGFALA TINGTING
Ol impoten lesen we yumi save lanem long samting we i hapen long kongregesen blong Korin, taem wan brata i mekem wan bigfala sin.
1. ?Jehova i wantem se evri man oli mekem wanem?
TAEM Jehova i wokem yumi, hem i mekem we yumi fri blong jusum samting. Yu yusum nambawan presen ya oltaem taem yu mekem ol desisen. Be desisen we i moa impoten we wan man i save mekem, hemia blong givim laef blong hem long Jehova, mo i joen wetem bigfala famle blong Jehova blong wosipim Hem. Mo hemia nao samting we Jehova i wantem se evri man oli mekem. ?From wanem? From we hem i lavem ol man, mo hem i wantem se oli harem gud. Hem i wantem se oli harem gud blong fren gud wetem hem mo kasem laef olwe.—Dut. 30:19, 20; Gal. 6:7, 8.
2. ?Jehova i wantem se ol man we oli mekem bigfala sin, oli mekem wanem? (1 Jon 2:1)
2 Jehova i no fosem yumi blong wosipim hem, be hem i letem wanwan man i jusum se bambae hem i mekem wanem. ?Olsem wanem sipos wan Kristin we i baptaes finis i mekem wan bigfala sin? Sipos hem i no tanem tingting blong hem, kongregesen i mas putumaot hem. (1 Kor. 5:13) Nating se i olsem, Jehova i wantem tumas mo i hop se man ya we i mekem bigfala sin, i kambak long Hem. Hemia nao wan impoten risen from wanem Jehova i givim ransom, blong hem i save fogivim man we i tanem tingting blong hem. (Ridim 1 Jon 2:1.) Jehova i wan God we i gat lav, mo hem i wantem tumas se olgeta we oli mekem bigfala sin, oli tanem tingting blong olgeta.—Sek. 1:3; Rom 2:4; Jem. 4:8.
3. ?Bambae yumi tokbaot wanem long stadi ya?
3 Jehova i wantem se yumi gat sem filing mo tingting olsem hem, long saed blong ol rabis fasin mo long ol man we oli mekem bigfala sin. Stadi ya bambae i halpem yumi blong folem eksampol blong Jehova. Taem yu stap ridim stadi ya, makem (1) ?olsem wanem kongregesen blong Korin long faswan handred yia i dil wetem wan man we i mekem bigfala sin? (2) ?Pol i givim wanem advaes long olgeta, taem man ya we i mekem bigfala sin i tanem tingting blong hem? Mo (3) ?stori ya i soemaot wanem long saed blong fasin blong Jehova blong dil wetem wan man we i mekem wan bigfala sin?
?OLSEM WANEM KONGREGESEN BLONG KORIN I DIL WETEM WAN MAN WE I MEKEM BIGFALA SIN?
4. ?Wanem i hapen long kongregesen blong Korin? (1 Korin 5:1, 2)
4 Ridim 1 Korin 5:1, 2. Taem Pol i stap long nambatri misinari trip blong hem, hem i harem wan rabis nius blong wan samting we i hapen long niufala kongregesen long Korin. Wan brata long kongregesen ya i stap mekem doti fasin blong seks wetem waef blong papa blong hem. !Plante man oli sek from we “fasin nogud olsem, ol man blong ol nesen tu oli no stap mekem”! Kongregesen i no mekem wan samting, mo oli ting se i oraet nomo blong brata ya i gohed blong stap insaed long kongregesen. Maet samfala oli ting se taem oli mekem olsem, oli stap folem fasin blong Jehova blong sore long man. Be Jehova i no glad se wan man we i mekem sin i stap long medel blong ol man blong hem. Nogud fasin we man ya i mekem, i spolem gudnem blong kongregesen. Mo sipos hem i gohed blong stap insaed long kongregesen, ol narafala Kristin tu oli save stat blong folem fasin blong hem. ?Taswe Pol i talem long kongregesen ya blong mekem wanem?
5. ?Pol i talem long kongregesen blong Korin blong mekem wanem, mo hem i minim wanem? (1 Korin 5:13) (Mo tu, yu luk pija.)
5 Ridim 1 Korin 5:13. Jehova i pulum Pol blong raetem wan leta mo talem se kongregesen i mas putumaot man ya we i no wantem tanem tingting from sin we hem i mekem. ?Ol Kristin long taem ya bambae oli mekem wanem long man ya? Pol i talem se oli “mas stop blong joen” wetem hem. ?Hemia i minim wanem? Pol i eksplenem se hemia i minim tu se oli “no mas kakae wetem man olsem.” (1 Kor. 5:11) Sipos yu kakae wetem wan man, i isi nomo blong yu joen moa wetem hem. Taswe Pol i wantem makem klia se kongregesen i no mas spenem taem wetem man ya. Hemia bambae i mekem se hem i no spolem kongregesen. (1 Kor. 5:5-7) Mo tu, sipos oli no joen wetem man ya, maet bambae hem i luksave se hem i go longwe tumas long ol rod blong Jehova, nao maet hem i sem mo i tanem tingting blong hem.
Jehova i pulum Pol blong raetem wan leta i go long kongregesen mo eksplenem se oli mas putumaot man ya we i mekem sin (Haf 5)
6. ?Kongregesen blong Korin i mekem wanem taem i kasem leta blong Pol, mo wanem i kamaot from?
6 Afta we Pol i sanem leta i go long ol Kristin long Korin, hem i stap tingting se kongregesen ya bambae i harem olsem wanem taem i kasem leta ya. Be afta, Taetas i talem wan gudfala nius we i mekem Pol i harem gud tumas. Kongregesen ya i folem advaes we Pol i talem long leta blong hem, mo oli putumaot man ya we i mekem sin. (2 Kor. 7:6, 7) Mo tu, sam manis afta we Pol i sanem leta ya i go long olgeta, man ya we i mekem bigfala sin, i tanem tingting blong hem. Hem i jenisim fasin mo tingting blong hem, mo i stat bakegen blong folem ol rul blong Jehova long saed blong stret fasin. (2 Kor. 7:8-11) ?Wanem nekiswan samting we Pol i talem se kongregesen i mas mekem?
?KONGREGESEN BAMBAE I MEKEM WANEM LONG MAN YA WE I TANEM TINGTING BLONG HEM?
7. ?Wanem frut i kamaot taem kongregesen i putumaot man ya we i mekem sin? (2 Korin 2:5-8)
7 Ridim 2 Korin 2:5-8. Pol i talem se “panis we bighaf blong yufala i givim long man ya, hem i naf.” Hemia i min se panis we oli givim long man ya, i givhan long hem blong i tanem tingting blong hem. Mo from samting ya, kongregesen i no moa nid blong gohed blong panisim hem.—Hib. 12:11.
8. ?Wanem nekiswan samting we Pol i talem se kongregesen i mas mekem?
8 Taem man ya we i mekem bigfala sin i tanem tingting blong hem, Pol i givim advaes long kongregesen se: “Yufala i mas fogivim hem mo yufala i leftemap tingting blong hem,” mo “soemaot long hem se yufala i lavem hem.” I gud blong makem se Pol i wantem se kongregesen i mekem sam moa samting, i bitim we oli welkamem bak man ya long kongregesen. Pol i wantem se kongregesen i soemaot long ol toktok mo aksen blong olgeta, se oli rili fogivim man ya mo oli lavem hem tumas. Long rod ya, man ya bambae i sua fulwan se ol brata sista oli glad se hem i kambak insaed long kongregesen.
9. ?From wanem maet samfala oli faenem i had blong fogivim man ya we i tanem tingting blong hem?
9 ?Olsem wanem? ?I gat sam brata sista we oli no glad taem oli harem se kongregesen i welkamem bak man ya we i tanem tingting blong hem? Baebol i no talem, be i luk olsem se hemia nao samting we i hapen. Maet samfala oli kros yet from samting we hem i mekem long kongregesen, mo samfala maet oli harem nogud from samting ya i bin spolem olgeta wan. Maet sam narafala oli harem se i no stret we oli welkamem bak man ya, from we olgeta oli bin traehad blong obei long ol komanmen blong Jehova. (Skelem wetem Luk 15:28-30.) ?Taswe from wanem i impoten we kongregesen i soemaot se oli rili lavem brata ya we i tanem tingting blong hem?
10-11. ?Wanem i save hapen sipos ol elda oli no wantem fogivim man we i tanem tingting from sin blong hem?
10 Traem tingbaot samting we bambae i hapen sipos ol elda oli no letem man ya we i tanem tingting blong hem i kambak long kongregesen. O sipos kongregesen i tekembak hem, be ol brata sista oli no wantem soemaot lav long hem. Hemia bambae i mekem ‘hem i harem nogud tumas nao tingting blong hem i foldaon.’ Maet hem i save gat tingting ya se bambae hem i neva save kam pat blong kongregesen bakegen. Mo tu, maet bambae hem i ting se i blong nating nomo we hem i traehad blong fren gud bakegen wetem God.
11 Antap long hemia, sipos ol brata mo sista oli no wantem fogivim man ya we i tanem tingting from sin blong hem, hemia i save spolem frensip blong olgeta wan wetem Jehova. ?From wanem? From hemia bambae i soemaot se oli no stap folem fasin blong Jehova blong fogivim man we i tanem tingting from sin blong hem, be oli stap folem fasin blong Setan we i no kaen mo i no sore long man. Mo sipos oli mekem olsem, bambae oli kam ol tul we Setan i save yusum blong stopem man ya blong i no moa wosipim Jehova.—2 Kor. 2:10, 11; Efes. 4:27.
12. ?Olsem wanem kongregesen i save folem eksampol blong Jehova?
12 ?Olsem wanem kongregesen blong Korin i save folem fasin blong Jehova be i no blong Setan? Hemia taem oli folem fasin blong Jehova blong fogivim ol man we oli tanem tingting blong olgeta. Makem samting we sam man blong raetem Baebol oli talem long saed blong Jehova. Deved i talem se: “Yu yu gud mo yu rere blong fogif.” (Sam 86:5) Maeka i raetem se: “?I gat wan God we i olsem yu, we i stap fogivim ol mastik mo i stap lukluk ova long ol sin?” (Maeka 7:18) Mo Aesea i talem se: “I gud man nogud i lego ol fasin blong hem mo rabis man i lego ol tingting blong hem. I gud hem i gobak long Jehova, hem bambae i gat sore long hem, yes, long God blong yumi, from we bambae hem i fogif long wan fasin we i bigwan.”—Aes. 55:7.
13. ?From wanem i stret nomo we kongregesen i tekembak wan man we i tanem tingting blong hem? (Yu luk bokis ya “?Wetaem Man Ya Long Korin i Kambak Insaed Long Kongregesen?”)
13 Blong folem eksampol blong Jehova, kongregesen blong Korin i mas welkamem bak man ya we i tanem tingting blong hem mo soemaot se oli lavem hem. Taem kongregesen i folem advaes blong Pol blong welkamem bak man ya we i tanem tingting from sin blong hem, oli soemaot se oli stap “obei long evri samting.” (2 Kor. 2:9) Nating se man ya i stap aotsaed long kongregesen blong sam manis nomo, be panis we hem i kasem i pulum hem blong i tanem tingting blong hem. Taswe, i no nid we ol elda oli wet longtaem blong tekembak hem long kongregesen.
FOLEM FASIN BLONG JEHOVA WE I GAT JASTIS MO SORE
14-15. ?Yumi lanem wanem long samting we i hapen long Korin? (2 Pita 3:9) (Mo tu, yu luk pija.)
14 Stori blong samting we i hapen long kongregesen blong Korin, i stap long Baebol “blong tijim yumi.” (Rom 15:4) Stori ya i tijim yumi se Jehova i no save letem wan man we i no tanem tingting from sin we hem i mekem, i stap insaed long kongregesen. Maet samfala oli save gat rong tingting se from we Jehova i gat sore, bambae hem i letem man we i no tanem tingting blong hem i gohed blong stap insaed long kongregesen. I tru se Jehova i gat sore, be hem i no save agri long enikaen fasin. Mo tingting blong hem long saed blong ol samting we i stret mo i no stret i neva jenis. (Jud 4) Sipos Jehova i letem man we i no tanem tingting blong hem i gohed blong stap insaed long kongregesen, hemia i no soemaot sore from we bambae samting ya i spolem kongregesen.—Prov. 13:20; 1 Kor. 15:33.
15 Yumi save se Jehova i no wantem se wan man i lus, be hem i wantem se olgeta man oli kasem laef. Hem i soemaot sore long ol man we oli jenisim tingting mo aksen blong olgeta, mo oli wantem fren gud wetem hem bakegen. (Esik. 33:11; ridim 2 Pita 3:9.) Taswe, taem man ya long Korin i tanem tingting blong hem mo i jenisim fasin blong hem, Jehova i yusum Pol blong eksplenem long kongregesen se oli mas fogivim hem mo welkamem bak hem.
Yumi folem fasin blong Jehova blong soem lav mo sore long olgeta we kongregesen i tekembak olgeta (Haf 14-15)
16. Naoia we yu save samting we kongregesen blong Korin i mekem long man ya we i mekem sin, ?yu wantem mekem wanem?
16 Samting we i hapen long kongregesen blong Korin, i soemaot se Jehova i gat bigfala lav, stret fasin, mo jastis. (Sam 33:5) Taem yumi save samting ya, bambae yumi wantem presem Jehova moa. Antap long hemia, yumi evriwan i sinman, mo yumi nidim we Jehova i fogivim yumi. Mo yumi glad se Jehova i givim ransom, we i mekem se hem i save fogivim ol sin blong yumi. !Taem yumi save se Jehova i rili lavem yumi mo i wantem mekem i gud long yumi, hemia i leftemap tingting blong yumi!
17. ?Bambae yumi tokbaot wanem long nekis stadi?
17 Sipos wan Kristin i mekem wan bigfala sin, ?olsem wanem ol elda long kongregesen oli save folem fasin blong Jehova blong soem lav, mo halpem man ya blong i tanem tingting blong hem? ?Kongregesen i mas mekem wanem taem ol elda oli tekem desisen blong putumaot o tekembak wan man long kongregesen? Bambae yumi tokbaot ansa blong ol kwestin ya long nekis stadi.
SINGSING 109 Yumi Lavem Ol Brata Long Fulhat Blong Yumi