Oli Mekem Samting We Jeova i Wantem

Wan Papa We i Rere Blong Fogif

SAM man oli talem se store ya hem i beswan sotfala store we eniman i bin raetem​—mo i stret we oli talem olsem tu. Parabol blong Jisas long saed blong lav we wan papa i gat long pikinini blong hem we i lusum rod, i olsem wan windo we yumi lukluk tru long hem blong kasem save moa long fasin sore we God i gat long ol sinman we oli tanem tingting blong olgeta from sin.

Hem i Lusum Rod Be i Faenem Bakegen

Wan man i gat tu pikinini boe blong hem. Sekenbon i talem long hem se: ‘Papa, plis yu seraot olting blong yu we bambae oli blong mitufala, blong mi mi save tekem haf blong mi naoia. Mi no wantem wet gogo kasem taem we yu yu ded.’ Papa ya i lesin long tok blong pikinini blong hem. Maet hem i bin seraot olting blong hem long tri haf, nao i givim wan haf i go long pikinini ya​—hemia nao samting we loa i talem se sekenbon blong ol boe i gat raet blong kasem. (Dutronome 21:17) Yangfala ya i hivimap olting blong hem kwiktaem mo i wokbaot i go long wan kantri longwe. Long kantri ya, hem i spenem olgeta mane blong hem blong ronem olkaen rabis fasin long laef blong hem.​—Luk 15:11-​13.

Nao, trabol i kamaot we i no moa gat kakae long kantri ya. Yangfala man ya i no moa gat samting ale, hem i agri blong wok olsem man blong lukaot long ol pig​—wan wok we long tingting blong ol man Jyu hem i daon moa long olgeta narafala wok. (Levitikas 11:​7, 8) !Kakae we hem i kasem i no naf nating, mekem se hem i stat wantem kakae ol lif blong kabej we hem i stap givim long ol pig! Biaen, yangfala man ya i stat luksave ol samting. Hem i tingting se: ‘Man, naoia ol man blong wok blong papa blong mi oli gat fulap kakae be mi mi hanggri we kolosap mi ded. Bambae mi gobak long papa blong mi, mi talem sore long hem, mo askem long hem sipos mi save kam wan man blong wok blong hem nomo.’a​—Luk 15:14-​19.

Yangfala man ya i stat wokbaot sloslou i gohom. I sua se, bodi mo fes blong hem i no moa olsem bifo. Nating se i olsem, papa blong hem i luksave hem “taem hem i stap longwe yet.” Papa i sore tumas long pikinini blong hem, nao i resis i go blong holem hem, mo i “kis long hem.”​—Luk 15:20.

Gudfala welkam ya we papa i mekem long pikinini blong hem, i mekem i isi moa long yangfala man ya blong talemaot ol sin blong hem. Hem i se: “Papa, mi mi mekem i nogud long God, mo i nogud long yu tu. Naoia i no moa stret blong oli talem mi se mi pikinini blong yu.” Be, papa ya i singaot ol slef blong hem, i se: “!Yufala i go kwik, yufala i tekem kot ya we i beswan, yufala i kam putum long hem. Yufala i kam putum ring long fingga blong hem, mo but long leg blong hem. Mo biaen, yufala i go tekem smol buluk ya we oli stap fidim i fatfat gud, yufala i kilim hem blong kakae. Bambae yumi mekem wan lafet ya, from we pikinini ya blong mi, bifo i olsem we hem i ded, be naoia hem i laef bakegen. Bifo hem i lus, be naoia mi faenem hem bakegen.”​—Luk 15:21-​24.

Ale, oli mekem wan bigfala lafet, we oli stap singsing mo danis. Taem fasbon pikinini i stap kambak long garen, hem i harem noes blong lafet ya. Hem i kam kros tumas, taem hem i harem nyus se brata blong hem i kamhom mo hemia nao from wanem oli mekem bigfala lafet ya. Hem i tok strong long papa blong hem se: ‘Plante yia finis mi mi stap wok long ples ya, we mi olsem slef blong yu nomo, mo neva mi brekem tok blong yu. Be yu yu neva givim wan smol nani long mi blong mi save mekem wan smol lafet wetem ol fren blong mi. !No gat! Be taem pikinini ya blong yu we i bin spolem olting blong yu, i kamhom, yu mekem wan bigfala lafet blong hem.’ Wetem kaen fasin, papa ya i ansa se: ‘Pikinini blong mi. Oltaem yu bin stap kolosap long mi, mo olgeta samting blong mi oli blong yu. Be i stret nomo we yumi glad tumas, from we brata ya blong yu we bifo i olsem we hem i ded, naoia hem i laef bakegen. Bifo hem i lus, be naoia yumi faenem hem bakegen.’​—Luk 15:25-​32.

Wan Lesen Blong Yumi

Papa we i stap long parabol ya blong Jisas i minim God blong yumi, Jeova, we i gat bigfala sore. Olsem pikinini boe ya we i lusum rod, samfala man oli lego sefples blong olgeta long haos blong God, mo biaen oli kambak bakegen. ?Wanem tingting blong Jeova long saed blong olgeta ya? Olgeta we oli rili tanem tingting blong olgeta from ol sin blong olgeta mo kambak long Jeova, oli save sua se ‘hem i no save gogohed blong tok strong long olgeta, mo kros blong hem i no save stap olwe.’ (Ol Sam 103:9) Long parabol ya, papa blong boe ya i resis i go blong welkamem pikinini boe blong hem we i kambak. Long sem fasin, Jeova i no jes rere nomo blong fogivim ol sinman we oli tanem tingting blong olgeta from sin, be hem i wantem tumas blong mekem olsem. Hem i ‘rere blong fogif,’ mo hem i mekem olsem long ‘fasin we i fulwan.’​—Ol Sam 86:5; Aesea 55:7; Sekaraea 1:3.

Long parabol blong Jisas, trufala lav we papa ya i gat long boe blong hem, i mekem se pikinini ya i no fraet tumas blong kambak. Be traem tingbaot: ?Olsem wanem sipos papa ya i no moa wantem save long boe ya, no i bin faerap long kros mo tok strong se hem i no moa wantem luk boe ya bakegen? Ating fasin ya bambae i mekem se yangfala man ya i gowe mo i no moa kambak bakegen.​—Skelem wetem 2 Korin 2:​6, 7.

Taswe, i olsem we papa ya i mekem rod blong pikinini blong hem i save kambak, long taem ya we pikinini i aot long haos. Long taem blong yumi, ol Kristin elda oli mas putumaot long kongregesen,b samfala we oli mekem bigfala sin. (1 Korin 5:​11, 13) Long taem ya we oli mekem olsem, oli save mekem rod blong bambae man ya i kambak, sipos oli soemaot, wetem lav, wanem we hem i mas mekem blong kambak insaed long kongregesen long fyuja. Samfala we oli bin lusum rod long saed blong speret, oli bin tanem tingting blong olgeta from sin blong olgeta mo kambak long haos blong God, from we oli tingbaot advaes we ol elda oli bin givim wetem fulhat blong olgeta.​—2 Timote 4:2.

Papa ya i soemaot sore tu, taem pikinini boe blong hem i kambak. Hem i no tekem longtaem tumas blong luksave se boe blong hem i rili tanem tingting blong hem from sin blong hem. Hem i no traem tu blong pulum boe blong hem blong talemaot olgeta smosmol samting long saed blong ol sin we hem i bin mekem. Hem i tingbaot nomo blong givim welkam long boe blong hem, mo hem i soemaot se hem i glad tumas blong mekem olsem. Ol Kristin oli save folem eksampel blong hem. Oli mas glad tumas taem wan man we i bin lusum rod, i faenem stret rod bakegen.​—Luk 15:10.

Fasin blong papa ya i soemaot klia se, longtaem finis hem i bin wantem se stronghed pikinini blong hem i kambak. Tru tumas, hemia i soemaot long smol fasin nomo, olsem wanem Jeova i wantem tumas se olgeta man we oli lego haos blong hem oli kambak. Hem i ‘no wantem we wan man i lus. Hem i wantem se olgeta man bambae oli tanem tingting blong olgeta from ol sin blong olgeta.’ (2 Pita 3:9) Ol man we oli tanem tingting blong olgeta from ol sin we oli mekem, oli save sua se bambae Jeova i blesem olgeta wetem ‘nyufala paoa long tingting blong olgeta.’​—Ol Wok 3:​19.

[Ol futnot]