?Speret Blong Wol i Stap Posenem Yu?

LONG Septemba 12, 1990, wan mesin i bosta long wan faktri long Kasakstan. Posen gas blong nyuklia i goaot long win, mo i mekem denja long laef blong 120,000 man we oli stap long ples ya. Plante blong ol man ya oli mekem bigfala maj long rod blong tok agensem posen ya we i save kilim olgeta i ded.

Be ol man we oli stadi moa long bisnes ya oli faenemaot se, long plante yia finis, posen gas ya i stap long win we ol man long ples ya oli bin pulum. Long ol yia we oli pas, faktri ya i bin sakem 100,000 tan blong posen gas long ol dram i go long ples blong doti we i no gat man i gad long hem. Nating se denja ya i stap kolosap long olgeta longtaem finis, i no gat wan man we i tinghevi long hem. ?From wanem?

Evri dei, ol man blong gavman oli pinim wan pepa long stad blong spot long taon ya, blong talemaot hamas posen gas i stap long win. Samting ya i mekem ol man oli ting se i no gat denja nating. Ol namba long pepa ya oli stret, be oli soemaot namba blong posen gas we oli kolem gamma nomo. Oli no kaontem namba blong wan narafala posen gas we oli kolem Alpha, we hem tu i save kilim man i ded. Plante mama oli stat luksave nao from wanem ol pikinini blong olgeta oli sik oltaem.

I gat wan posen win long saed blong speret tu, we yumi no save luk be we i save posenem yumi. Mo olsem ol man ya long Kasakstan, bighaf blong ol man tede oli no save nating se laef blong olgeta i stap long denja from win ya. Baebol i tokbaot doti win ya se ‘speret blong wol,’ we Setan i stampa blong hem. (1 Korin 2:​12) Enemi ya blong God i wantem spolem ol man, ale hem i yusum speret ya blong wol​—hemia tingting we bighaf blong ol man oli folem​—blong mekem yumi kam slak long fasin blong fasgud long God.

?Olsem wanem speret blong wol ya i save karemaot paoa blong yumi long saed blong speret? Hem i save pulum yumi blong wantem tumas ol samting we ae blong yumi i luk. Mo tu, hem i save pulum yumi blong folem fasin ya we yumi bon wetem, hemia blong tingbaot yumi wan nomo. (Efesas 2:​1-3; 1 Jon 2:⁠16) Bambae yumi tokbaot tri defren rod we tingting blong wol ya i save posenem yumi sloslou long saed blong speret.

Lukaot Kingdom Fastaem

Jisas i talem long ol Kristin blong ‘lukaot Kingdom mo ol stret fasin blong God fastaem.’ (Matyu 6:​33) Speret blong wol ya i mekem i defren. Hem i save lidim yumi blong tingbaot ol samting we yumi nomo i intres mo haremgud long olgeta, olsem se oli moa impoten. Faswan denja blong samting ya, i no se bambae yumi sakemaot olgeta samting long saed blong speret wantaem. No gat. Be bambae yumi putum ol samting long saed blong speret long seken ples. Maet yumi no luksave denja​—olsem ol man long Kasakstan​—from we tingting blong yumi i save gyaman long yumi se yumi oraet nomo. From we yumi bin holemstrong plante yia long trutok mo yumi laekem ol Kristin brata sista blong yumi, maet samting ya i save mekem yumi slip lelebet long tingting blong yumi nao yumi ting se bambae yumi no save lego rod blong trutok. Ating plante Kristin long kongregesena blong Efesas oli bin tingting olsem ya tu.

Raonabaot long yia 96 K.T.,b Jisas i givim advaes ya long olgeta: “I gat wan trabol blong yufala i stap long fes blong mi. Yufala i no moa laekem mi tumas, olsem we yufala i laekem mi fastaem.” (Revelesen 2:⁠4) Ol Kristin ya we oli bin mekem wok blong God longtaem finis, oli stanap strong tru long plante hadtaem. (Revelesen 2:​2, 3) Ol elda we oli gat strong bilif, olsem aposol Pol, oli bin tijim olgeta. (Ol Wok 20:​17-​21, 27) Be, taem ol yia oli pas, lav we oli gat long Jeova i no moa strong olsem fastaem, mo oli lusum paoa blong gohed strong long saed blong speret.​—Revelesen 2:⁠5.

Ating ol bigfala bisnes mo ol sas samting long Efesas i gat paoa long samfala Kristin blong taon ya. Sore tumas, tede tu, tingting blong ol man blong wol blong wantem kasem plante tumas sas samting i pulum sam Kristin blong folem fasin ya. Sipos tingting blong yumi i strong blong ronem plante sas samting long laef, i sua se bambae yumi no moa traehad blong kasem ol mak long saed blong speret.​—Skelem wetem Matyu 6:​24.

Jisas i givim woning long saed blong denja ya, i se: “Ae blong man, hem i olsem laet blong bodi blong hem. Sipos ae blong yu i klia gud, bambae i olsem we bodi blong yu i fulap olgeta long laet. Be sipos ae blong yu i nogud [“i wantem tumas samting” futnot NW], bambae i olsem we bodi blong yu i fulap olgeta long tudak. Mo sipos laet we yu yu gat i tudak nomo, yu yu stap long tudak we i tudak olgeta.” (Matyu 6:​22, 23) Wan ae we i “kliagud” hem i wan ae we i lukluk ol samting long saed blong speret long fasin we i kliagud, mo we i stap lukluk i go long Kingdom blong God nomo. Defren olgeta long hemia, ae we i “nogud” no we i “wantem tumas samting,” hem i no save lukluk longwe, hem i naf blong luk ol samting long saed blong bodi nomo we hem i wantem naoia. Ol mak long saed blong speret mo ol blesing blong fyuja, oli stap longwe tumas blong hem i lukluk.

Long vas bifo, Jisas i talem se: ‘Long ples ya we ol gudgudfala samting blong yu i stap, be hat blong yu tu bambae i stap oltaem long ples ya.’ (Matyu 6:21) ?Olsem wanem yumi save luksave sipos hat blong yumi i stap long ol samting long saed blong speret no ol samting long saed blong bodi? Ating bigfala samting, hemia ol toktok blong yumi, from we ‘taem man i tok, hem i save talemaot ol samting we hat blong hem i fulap long hem.’ (Luk 6:​45) Sipos oltaem yumi stap tokbaot ol sas samting blong wol ya no ol mak we ol man blong wol oli stap kasem, hemia i pruvum se hat blong yumi i hafhaf mo se ae blong yumi long saed blong speret i no kliagud.

Carmen,c wan sista blong Spen, i faet strong agensem problem ya. Hem i eksplenem se: “Mi mi gruap long trutok, be taem mi kasem 18 yia, mi statem wan kindagaten blong ol pikinini, olsem wan bisnes blong mi. Tri yia biaen, i gat fo woman we oli wok blong mi, bisnes ya i stap kam bigwan, mo mi stap kasem plante mane. Ating samting we mi mi haremgud moa long hem, hemia se mi kasem ol mane ya mi wan, mo mi mekem se bisnes ya i ‘win gud.’ Blong talem tru, hat blong mi i stap long bisnes ya​—hemia samting we mi laekem moa bitim ol narafala samting.

“Mi tingting se mi save stap olsem wan Wetnes, mo long semtaem, yusum bighaf blong taem blong mi long bisnes blong mi. Be, i gat wan narakaen filing tu we i stap stikim mi oltaem se, mi save mekem moa long wok blong Jeova. Wanem we i halpem mi blong putum wok blong Kingdom long fasples, hemia eksampel blong tu fren blong mi we oli paenia. Wan long tufala, nem blong hem Juliana, i stap long kongregesen blong mi. Hem i no pusum mi blong joen long wok blong paenia, be ol storeyan blong hem mo glad we hem i kasem from wok blong prij, i halpem mi blong tingtinggud long wanem mak we mi mi gat long saed blong speret.

“Samtaem biaen, mi stap spel long Yunaeted Stet, mo mi stap wetem Gloria, wan sista we i paenia. Hasban blong hem i ded i no longtaem bifo, mo hem i stap lukaot long smol gel blong hem we i gat faef yia wetem mama blong hem we i gat sik blong kansa. Be, hem i paenia. Eksampel blong hem mo bigfala lav we hem i gat long wok blong prij, i kasem hat blong mi. Ol fofala dei ya we mi stap long haos blong hem oli mekem tingting blong mi i strong blong mekem bes blong mi long wok blong Jeova. Fastaem, mi kam wan fultaem paenia. Sam yia biaen, Sosaeti i singaot mi mo hasban blong mi blong go wok long Betel. Mi lego bisnes blong mi we i stap blokem mi long saed blong speret, mo naoia mi harem se laef blong mi i stret long fored blong Jeova, samting ya nao we i moa impoten.”​—Luk 14:33.

Sipos yumi lan blong “jusumaot wanem fasin i stret gud olgeta,” olsem Carmen i mekem, samting ya bambae i halpem yumi blong mekem ol disisen we oli waes long saed blong wok, edukesen, haos, mo laef blong yumi. (Filipae 1:​10) Be, long saed blong ol pleplei, ?yumi stap jusumaot ol samting we oli impoten moa? Speret blong wol ya i save pulum yumi bigwan long samting ya tu.

Putum Ol Pleplei Long Stret Ples Blong Olgeta

Olgeta man oli bon wetem fasin ya blong wantem spel mo pleplei, be speret blong wol i stap yusum fasin ya blong trikim olgeta. Bighaf blong ol man oli no gat wan trufala hop long saed blong fyuja. Taswe, oli stap fulumap laef blong olgeta wetem olkaen pleplei mo narafala samting blong spel. (Skelem wetem Aesea 22:13; 1 Korin 15:32.) ?Yumi luk se ol pleplei oli stap kam moa impoten oltaem long laef blong yumi? Sipos i olsem, maet hemia wan saen se yumi stat folem sam tingting blong wol.

Baebol i givim woning se: “Man we i stap laekem tumas blong gat gudtaem [“pleplei,” Lamsa] bambae hem i kam wan man we i no gat samting.” (Proveb 21:17) I no rong blong gat gudtaem. Be sipos yumi laekem pleplei tumas, no yumi putum hem olsem samting we i moa impoten long laef blong yumi, hem i save mekem se yumi kam slak long saed blong speret. Sloslou, bambae yumi no moa harem se yumi wantem kakae long saed blong speret, mo bambae yumi no moa faenem taem blong go talemaot gud nyus.

From samting ya, Tok blong God i givim advaes se yumi mas “sakemaot ol hevi samting long tingting blong yumi blong bambae yumi rere blong wok, mo yumi mas bos long yumi wan long fasin we i stretgud olgeta.” (1 Pita 1:​13, The New English Bible) Yumi nidim blong bos long yumi wan sipos yumi no wantem bitim mak long taem we yumi spenem long ol pleplei. Sakemaot ol hevi samting blong bambae yumi rere blong wok, i minim se yumi reregud blong mekem ol wok long saed blong speret, ol wok olsem stadi, ol miting, mo wok blong prij.

?Bambae yumi mekem olsem wanem taem yumi nidim spel? ?Yumi mas gat tingting se yumi no mas tekem smol spel samtaem? No gat. Yumi nidim blong spel, antap moa tede, from we ol trabol blong laef oli mekem tingting blong yumi i hevi tumas. Nating se i olsem, ol Kristin we oli givim laef blong olgeta i go long God, oli no mas letem laef blong olgeta i stanap long pleplei nomo. Sipos yumi spenem tumas taem long ol pleplei, samting ya i save pulum yumi sloslou, blong no moa mekem wok we i givim mining long laef blong yumi. Hem i save daonem strong tingting blong yumi blong wok kwik from we taem i sot, mo maet hem i save pulum yumi blong mekem ol samting nomo we yumi save haremgud long olgeta. Ale, ?olsem wanem yumi save gat stret tingting long saed blong spel?

Baebol i givim advaes ya se i moagud blong spel blong smoltaem i bitim we yumi wok bitim mak​—antap moa sipos yumi no nidim blong wok plante olsemia blong kasem ol samting blong laef. (Eklesiastis 4:⁠6) Spel i halpem bodi blong yumi blong kasem paoa bakegen, be tabu speret blong God i save givim paoa long yumi long saed blong speret. (Aesea 40:​29-​31) Yumi save kasem tabu speret ya taem yumi joen long ol Kristin wok. Stadi wanwan i fulumap hat blong yumi wetem gudfala save we i pulum yumi blong wantem ol samting we oli gud. Ol miting oli mekem se tangkyu blong yumi long Man ya we i Wokem Olgeta Samting, i kam bigwan moa. Kristin wok blong prij i mekem se yumi gat sore mo yumi laekem ol man raonabaot long yumi. (1 Korin 9:​22, 23) Pol i talem i tru nomo se, “yes, bodi blong yumi i stap kam nogud mo i olfala, be evri dei, hat blong yumi insaed i stap kasem nyufala paoa.”​—2 Korin 4:​16, Phillips.

Ileana, we i gat sikis pikinini mo we hasban blong hem i no bilif, i bisi oltaem. Hem i gat wok blong mekem long prapa famle blong hem, mo blong givhan long sam narafala memba blong famle bakegen. Samting ya i minim se hem i stap hareap mo wok kwik oltaem. Nating se i olsem, hem i soemaot gudfala fasin from we hem i prij mo i rerem ol miting blong hem oltaem. ?Olsem wanem hem i naf blong mekemgud olgeta wok ya?

Ileana i eksplenem se: “Ol miting mo wok blong prij oli halpem mi blong mekem ol narafala wok. Eksampel, afta long wok blong prij, mi gat plante samting blong tingbaot taem mi stap mekem wok blong mi long haos. Plante taem, mi singsing taem mi wok. Be, taem mi mestem wan miting no mi no joen plante long wok blong prij, ol wok long haos oli kam hevi tumas long mi.”

!Samting ya i defren olgeta long samfala man we oli tingbaot ol pleplei mo spel olsem samting we i impoten moa!

Jeova i Glad Long Man We i Naes Long Saed Blong Speret

Ol man blong wol ya oli tingting bitim mak long saed blong bodi mo fes blong olgeta. Oli spenem bigfala mane long ol spesel meresin we i save mekem oli kam naes mo i save mekem bodi blong olgeta i luk olsem we oli yangfala bakegen. Ol man we oli bolhed oli go luk ol spesel dokta blong oli planem hea long hed blong olgeta bakegen, sam narafala oli mekem kala long hea blong olgeta. Sam woman oli askem dokta blong mekem titi blong olgeta i kam bigwan moa, no blong katem mo pulum skin long fes blong olgeta blong mekem oli luk yangfala. Plante milyan man oli folem sam spesel program blong kam bunbun, oli go long ol haos blong mekem masel mo eksasaes. Oli pem sam kaset video we oli soem olsem wanem blong mekem ol spesel eksasaes, mo ol buk blong eksplenem wanem we oli mas kakae blong kam bunbun. Wol ya i wantem mekem yumi tingting se rod blong haremgud hemia blong gat wan bodi we i naes tumas. Hem i wantem mekem yumi ting se samting we i moa impoten, hemia wanem we narafala i tingting long saed blong yumi.

Long Yunaeted Stet, nyuspepa ya Newsweek i tokbaot wan stadi we sam man oli mekem, we i soemaot se 90 pesen blong ol waet yangfala blong Amerika oli “no glad nating long lukluk blong bodi blong olgeta.” Sipos yumi traehad tumas blong gat wan bodi we i gud olgeta, bambae yumi save kam slak long saed blong speret. Dora i wan yangfala Wetnes blong Jeova we i sem long bodi blong hem from we hem i fatfat. Hem i talem se: “Taem mi go long stoa, i hadwok blong faenem sam klos we oli stret long mi. I olsem se ol man oli wokem ol naesfala klos blong ol yangfala we oli bunbun nomo. Mowas yet, ol man oli tok blong daonem mi se mi fatfat tumas. Samting ya i mekem mi mi harem nogud bigwan, antap moa, taem ol Kristin brata mo sista nao oli talem olsem.

“From samting ya, mi stat blong tingting bitim mak long saed blong bodi blong mi, mekem se mi putum ol impoten samting long saed blong speret oli stap long seken ples long laef blong mi. I olsem se wan gudfala bodi nao bambae i mekem mi mi kasem trufala glad. Sam yia oli pas, mo mi kam bigman long saed blong tingting mo Kristin fasin, taswe mi lukluk ol samting long fasin we i defren. I tru se, mi stap lukaotgud long bodi blong mi, be mi luksave se samting we i moa impoten hemia se mi naes long saed blong speret. Hemia nao wanem we i save mekem mi mi haremgud moa. Taem mi kasem save long samting ya, mi naf blong putum wok blong Kingdom long stret ples blong hem.”

Sera i wan woman blong bifo we bilif blong hem i strong mo i holem stret tingting. I tru se Baebol i tokbaot hem olsem wan naesfala woman nating se hem i bitim 60 yia finis. Be Baebol i tokbaot moa ol nambawan fasin blong hem​—samting we i stap insaed long hat blong hem. (Jenesis 12:11; 1 Pita 3:​4-6) Hem i gat kaengud mo kwaet fasin, mo hem i rere blong stap daon mo obei long hasban blong hem. Sera i no wari tumas se ol man oli tingbaot hem olsem wanem. Nating se hem i gruap long wan famle we i rij, hem i rere blong lego ol samting ya blong go stap long haos tapolen nomo, blong bitim 60 yia. Hem i gat tingting daon mo i no tingbaot hem wan nomo, be hem i sapotemgud hasban blong hem. Hem i wan woman blong bilif. Samting ya nao i mekem hem i naes tumas.​—Proveb 31:30; Hibrus 11:11.

Yumi ol Kristin, yumi mas wantem tumas blong kam naes moa long saed blong speret. Hemia wan samting we, sipos yumi traehad evri dei long hem, bambae i save gru mo stap longtaem. (Kolosi 1:​9, 10) I gat tu stampa rod we yumi save folem blong lukaotgud long yumi wan long saed blong speret.

Yumi kam naes moa long ae blong Jeova taem yumi joen long wok blong prij we i save sevem laef blong man. (Aesea 52:7; 2 Korin 3:⁠18–​4:⁠2) Yumi kam naes moa tu, taem yumi lanem mo wokem ol Kristin fasin. I gat plante jans blong kam naes moa long saed blong speret: “Yufala i mas laeklaekem yufala tumas. Long saed blong fasin blong ona long narafala, yufala fastaem i mas soemaot rod. . . . Kam fulap long speret. . . . Tekem ol narafala oli kam long haos blong yufala. . . . Taem ol man oli harem i gud, yufala tu i mas harem gud wetem olgeta. Taem ol man oli stap krae, yufala tu i mas krae wetem olgeta. . . . Sipos wan man i mekem nogud long yufala, yufala i no mas givimbak long hem. . . . Yufala i mas traehad tumas blong yufala i gat pis wetem olgeta man.” (Rom 12:​10-​18, NW) Sipos yumi wokem ol fasin olsemia, God mo ol narafala man tu bambae oli laekem yumi tumas, mo samting ya bambae i daonem enikaen sem we yumi gat from we sin i mekem se bodi no fes blong yumi i no naes.​—Galesia 5:​22, 23; 2 Pita 1:​5-8.

!Yumi Save Agensem Speret Blong Wol Ya!

Posen win blong wol ya i save gat paoa long yumi long plante defren rod mo mekem yumi kam slak long fasin blong fasgud long God. Hem i save mekem se yumi no glad long ol samting we yumi gat finis, mo yumi wari tumas blong putum ol nid mo intres blong yumi wan long fasples bifo long wok blong God. Hem i save pulum yumi tu, blong tingting olsem ol man i bitim we yumi traem kasem tingting blong God, nao yumi save luk ol pleplei no naes bodi olsem samting we i moa impoten.​—Skelem wetem Matyu 16:​21-​23.

Setan i gat strong tingting blong spolem yumi long saed blong speret, mo speret blong wol ya i wan stampa samting we hem i stap yusum. Rimemba se, nating we Setan i olsem wan laeon we i singaot bigwan, be hem i save jenisim ol trik blong hem mo kam olsem wan snek we i lukaotgud tu. (Jenesis 3:1; 1 Pita 5:8) Ol man blong wol ya oli mekem sam Kristin man oli foldaon taem oli ronem mo mekem trabol long olgeta, be win blong wol ya i mekem moa man oli foldaon taem i posenem olgeta sloslou nomo. Pol i wari moa long saed blong seken denja ya, i se: “Mi fraet we bambae tingting blong yufala i kam olsem we i doti. Mi fraet we bambae yufala i lego fasin ya we yufala i stap laekem Kraes tumas, long fasin we i stret nomo, i klin nomo. Mi fraet we bambae yufala i foldaon olsem we fas woman ya Iv i foldaon fastaem, we snek i gyaman long hem long ol gyaman toktok blong hem.”​—2 Korin 11:⁠3.

Blong lukaotgud se ol trik blong snek ya oli no winim yumi, yumi mas luksave ol gyaman waes we “oli stap kamaot long wol ya,” mo yumi mas strong blong sakemaot olgeta. (1 Jon 2:​16) Yumi no mas letem wan gyaman tingting i trikim yumi, se ol tingting blong wol ya oli no save spolem yumi. Posen win blong wol ya blong Setan i strong bitim mak.​—Efesas 2:⁠2.

Taem yumi luksave ol tingting blong wol, yumi save faet agensem olgeta sipos tingting mo hat blong yumi i fulap long trufala tijing blong Jeova. Olsem King Deved, yumi mas talem se: “Hae God, plis yu tijim mi long ol fasin blong yu, yu mekem mi mi savegud ol rod blong yu. Yu tijim mi, blong mi save folem trutok blong yu long olgeta laef blong mi, from we yu nomo yu God blong mi, we yu stap sevem mi. Oltaem mi mi trastem yu.”​—Ol Sam 25:​4, 5.

[Ol futnot]

[Tok Blong Pija Long Pej 26]

Sipos yumi ronem ol sas samting blong traem mekem laef blong yumi i moagud, bambae yumi no moa traehad blong kasem ol mak long saed blong speret