No Pleplei Mo Spel Bitim Mak
1 Long taem blong yumi we laef i strong, yumi evriwan i nidim blong spel samtaem. I stret we yumi pleplei mo spel smol. Be, sipos yumi spenem tumas taem blong spel, pleplei, mo joen wetem ol fren, samting ya i save mekem yumi kam slak, mo yumi no moa spenem plante taem long ol samting long saed blong spirit. Yumi mas meksua se yumi no pleplei mo spel bitim mak. (Mat. 5:3) ?Olsem wanem blong mekem olsem? Yumi mas folem advaes we i stap long Efesas 5:15-17.
2 No Bitim Mak: Aposol Pol i raetem se ol Kristin oli mas “lukaot gud” blong laef long fasin we i waes. Yumi nidim fasin blong no bitim mak mo fasin blong bos long yumi wan, blong meksua se yumi no spenem tumas taem blong pleplei mo spel. I gud blong tingbaot olsem wanem yumi stap yusum taem blong yumi blong spel. Pleplei we yumi mekem i mas gat sam gudfala frut blong hem, i no mas mekem yumi harem se yumi westem taem no yumi taed tumas. Sipos yumi no harem gud, yumi no luk wan gudfala frut blong hem, mo tingting blong yumi i jajem yumi smol afta we yumi mekem wan pleplei, maet samting ya i soemaot se yumi nidim blong yusum taem blong yumi long defren fasin.
3 Yusum Waes Fasin: Pol i givim advaes se yumi mas ‘yusum evri janis we yumi kasem,’ blong mekem ol samting we oli impoten moa, mo yumi no mas kam “krangke.” Ol Kristin we oli givim laef blong olgeta long God, oli no save letem spel mo pleplei i kam olsem bigfala samting long laef blong olgeta. I tru we spel mo pleplei i save givim paoa bakegen long bodi, be stamba blong paoa we yumi nidim blong mekem wok blong God, hemia spirit blong God. (Aes. 40:29-31) Yumi kasem spirit ya taem yumi joen long ol tiokratik wok olsem, stadi Baebol, go long ol miting blong kongregesen, mekem wok blong prij. Yumi no kasem spirit ya taem yumi spel mo pleplei.
4 Makemaot Ol Impoten Samting: Pol i talem long ol Kristin blong “traem save olgeta samting we Jeova i wantem blong yufala i mekem.” Jisas i tijim se ol wok blong yumi oli mas soemaot se Kingdom blong God i stap long fas ples long laef blong yumi. (Mat. 6:33) I impoten tumas we fastaem yumi mekem ol samting we oli givhan long yumi blong holem promes blong givim laef blong yumi i go long Jeova. Biaen, yumi save pleplei mo spel smol. Sipos yumi mekem olsem, bambae i gat gudfala frut long laef blong yumi, mo bambae yumi haremgud moa.—Prija 5:12.