Spenem Taem Long Waes Fasin
1 Yumi wantem tumas blong mekem Jeova i glad. Samting ya i pusum yumi blong mekem ol wok long saed blong spirit oli kam faswan samting long laef blong yumi. Jeova i talem long yumi blong ‘lukaot Kingdom fastaem’ mo blong ‘luksave ol samting we oli moa impoten.’ (Mat. 6:33, NW; Fil. 1:10, NW ) ?Olsem wanem yumi save pemaot taem blong mekem ol samting long saed blong Kingdom fastaem, mo putum ol wok we oli no impoten biaen?—Efes. 5:15-17.
2 Putum Ol Wok Blong Kingdom Long Fasples: Mekem wan gudfala plan blong yu save yusumgud taem blong yu, mo blong yu no westem long ol samting we oli no impoten. Long stat blong evri manis, samfala oli makem long kalenda ol dei we bambae oli spenem long wok blong prij. Biaen, oli lukaot gud blong no letem ol narafala samting oli kam spolem plan ya. Yumi save mekem sem samting blong pemaot taem blong go long ol miting, mekem stadi yumi wan, mo go long ol asembli. Plante oli gat wan program blong ridim Baebol long stat no long en blong dei. Makemaot wan taem blong mekem ol impoten wok, mo no letem ol samting we oli no impoten oli kam tekem ples blong olgeta.—Pri. 3:1; 1 Kor. 14:40.
3 No Spenem Tumas Taem Long Ol Samting Blong Wol: Long sam kantri, i gat plante defren kaen spot we man i save joen long olgeta, fulap vidio kaset mo sinema, ol defdefren pleplei, mo ol narafala samting we man i save mekem blong haremgud. Plante man oli spenem taem bitim mak long fored blong televisen mo kompiuta. Be sipos yumi bisi tumas long ol pleplei blong wol ya mo long ol niufala samting we ol man blong wol oli wokem blong pulum tingting blong yumi nomo, bambae yumi no save kasem glad. (1 Jon 2:15-17) Taswe, Baebol i talem klia se yumi no mas yusum wol ya tumas. (1 Kor. 7:31, NW ) Sipos yu lesin long waes advaes ya, yu stap soemaot long Jeova se wosip blong hem i stap long fasples long laef blong yu.—Mat. 6:19-21.
4 Klosap nao rabis fasin blong wol ya bambae i kasem en blong hem. Olgeta we oli putum ol wok blong Kingdom long fasples long laef blong olgeta, bambae oli hapi mo God bambae i glad long olgeta. (Prov. 8:32-35; Jem. 1:25) Taswe, i gud we yumi yusumgud taem blong yumi, we i sas tumas.