Olsem Wanem Blong Pemaot Taem

¹ Yumi gat plante samting blong mekem long wok blong Jeova. !Taswe yumi bisi oltaem! (1 Kor. 15:58) Yumi luksave se yumi nidim blong stadi wanwan mo olsem wan famle, yumi nidim blong ridim Baebol evri dei, mekemrere mo joen long ol miting blong kongregesen, mo joen oltaem long wok blong prij. Ol elda oli gat wok blong lukaot long ol sipsip blong God, mo oli gat ol narafala wok long kongregesen tu. Samfala oli gat plante wok blong mekem long famle blong olgeta no blong ol narafala. Blong mekemgud evri samting, yumi evriwan i nidim fasin blong skelemgud ol wok blong yumi, mo yumi nidim wan gudfala program.

² Jusum Ol Samting We Oli Moa Impoten: Blong ‘pemaot taem,’ yumi mas gat fasin luksave mo fasin blong jusumgud ol samting. (Efes. 5:​15, 16) Yumi mas luksave wanem samting ‘oli impoten moa,’ mo putum olgeta fastaem long program blong yumi. (Fil. 1:​10) Wan hasban mo waef, tufala i tokbaot tiokratik famle blong tufala se: “Mifala i fulumap laef blong mifala wetem trutok . . . Trutok i no wan haf nomo blong laef blong mifala, be laef blong mifala hemia nao trutok. Olgeta narafala samting oli stap long seken ples.” I impoten tumas blong putum wosip blong Jeova mo wok blong hem long fasples long laef blong yumi.

³ Luksave Ol Samting We Oli Westem Taem: I gat 168 haoa long wan wik, mo yumi mas yusum taem ya long waes fasin. Blong gat naf taem blong mekem ol tiokratik wok, yumi mas luksave mo traem tekemaot long laef blong yumi ol samting we oli westem taem. !Wan stadi i soem se, long Yunaeted Stet, ol bigman oli spenem 30 haoa evri wik blong lukluk televisin! Sam narafala, oli spenem plante taem blong ridim ol buk blong wol. Samfala oli luksave se oli spenem plante tumas taem blong storeyan wetem ol fren blong olgeta, blong mekem ol samting we oli laekem blong mekem be oli no impoten, blong spel, no blong pleplei long kompyuta. Maet yumi nidim blong luklukgud long program blong yumi evri dei, blong luksave olsem wanem yumi save yusum taem blong yumi long fasin we i moagud. Blong soem waes fasin, yumi mas putum wan mak long hamas taem we yumi spenem blong mekem ol samting we oli no impoten.

⁴ Wokem Wan Gudfala Program: Nating se laef blong yumi i olsem wanem, yumi evriwan i save pemaot taem blong mekem ol samting long saed blong speret. Samfala oli faenem se sipos oli girap moa eli evri dei, samting ya i halpem olgeta blong mekem moa wok. Sipos yumi mas spenem longtaem lelebet long bas no taksi blong go mo kambak long wok, no yumi mas wet long ol narafala, maet yumi yusum taem ya blong ridim Baebol, mekemrere ol miting, no lesin long ol kaset blong Sosaeti. Ol famle oli faenem se i givhan bigwan long olgeta, taem oli makemaot wan stret taem blong stadi tugeta. Sipos olgeta memba blong famle oli rere long stret taem ya blong stadi, samting ya tu i no westem taem blong evriwan.

⁵ Evri dei, yumi mas luksave moa se i no gat “plante taem i stap yet.” (1 Kor. 7:​29) Laef blong yumi i dipen long fasin blong yumi blong yusumgud impoten taem ya we i stap yet. !Bambae yumi kasem blesing sipos yumi pemaot taem blong putum ol samting long saed blong Kingdom long fasples long laef!​—Mat. 6:​33.