Mekem Laef Blong Yu i Stanap Long Wok Blong Jeova
1 Jisas i talem se ol man we oli harem ol tok blong hem, oli olsem tu defren kaen man blong wokem haos. I gat wan we i wokem haos blong hem antap long ston, hemia man we i mekem laef blong hemi stanap long fasin blong obei long Kraes. Man ya i naf blong stanap strong tru long strongfala win blong fasin agens mo ol trabol. Narafala man i mekem laef blong hem i stanap long fasin blong tingbaot hem wan nomo mo fasin blong no obei, i olsem haos antap long sanbij. Taswe man ya i no naf blong stanap taem hem i kasem traem. (Mat. 7:24-27) Yumi stap laef long taem blong en blong wol ya, mo plante taem yumi fesem strong win blong fasin agens. Longwe, yumi save luk ol dak klaod blong bigfala trabol oli stap kam. ?Bambae yumi naf blong stanap strong go kasem en, wetem wan bilif we i strong. (Mat. 24:3, 13, 21) Samting ya i dipen bigwan long samting we laef blong yumi i stanap long hem naoia. Taswe, yumi mas askem kwiktaem long yumi se: ‘?Mi mi mekem Kristin laef blong mi i stanap long fasin blong obei mo mekem wok blong God?’
2 ?Fasin blong mekem laef blong yumi i stanap long wok blong Jeova, i minim wanem? Samting ya i minim se yumi putum Jeova long stamba ples long laef blong yumi. I minim tu se yumi lukluk i go long Kingdom blong God nomo. From samting ya, yumi obei long God long olgeta samting we yumi mekem long laef blong yumi evridei. Yumi putum ful hat blong yumi long stadi blong Baebol we yumi mekem yumi wan, no wetem famle mo kongregesen, mo long wok blong prij. Ol samting ya oli mas stap long fasples long laef blong yumi. (Pri. 12:13; Mat. 6:33) Fasin ya blong obei oltaem i kamaot long wan bilif we i strong olsem wan ston, we i no foldaon taem i gat ol strong win blong fasin agens.
3 Yumi rili glad blong luk se plante milyan man oli no fraet blong mekem laef mo hop blong olgeta i stanap long wok blong God olsem Jisas i mekem. (Jon 4:34) Oli folem wan gudfala program blong tiokratik wok mo oli glad blong kasem plante nambawan blesing from wok ya. Wan Kristin sista i eksplenem olsem wanem, hem mo hasban blong hem, tufala i mekem gud wok ya blong tijim tufala pikinini boe blong tufala long wok blong Jeova. Hem i talem se: “Mifala i fulumap laef blong mifala wetem trutok. Mifala i go long evri asembli, mifala i rerem gud ol miting mo mifala i go long ol miting ya, mo mifala i joen evri wik long wok blong prij.” Hasban blong hem i ademap se: “Trutok i no wan haf blong laef blong mifala, trutok, hemia laef blong mifala. Olgeta narafala samting oli kam biaen long trutok.” ?Yu tu, yu putum wok blong Jeova long fasples long laef blong yu, olsem famle ya i mekem?
4 Traem Faenem Wan Program Blong Wik We i Wok Gud: Ogenaesesen blong Jeova i wokem faef miting evri wik blong halpem yumi blong folem oltaem wan gudfala program long saed blong spirit. Ol Kristin we oli mekem laef blong olgeta i stanap long wosip blong Jeova oli lukaot se ol samting we oli mas mekem long wok mo long famle, oli no blokem olgeta blong go long ol impoten miting ya. Oli no letem ol samting we oli no impoten tumas oli blokem olgeta blong go oltaem long ol miting.—Fil. 1:10; Hib. 10:25.
5 Ol Kristin we oli bigman long saed blong spirit, oli luksave se i impoten tumas blong gat wan program blong stadi olgeta wanwan, wetem famle, mo mekem rere ol miting, olsem we i impoten blong kakae long moning, medel dei mo sapa, evri dei. (Mat. 4:4) ?Yu yu save mekem plan blong putum 15 no 20 menet evri dei blong mekem prapa stadi blong yu? Sipos yu wantem mekem samting ya oltaem, yu mas lukaot blong no letem sam narafala samting oli kakae taem we yu putumap blong stadi. Mekem gudfala fasin ya i kam olsem wan kastom long laef blong yu. Maet samting ya i minim se yu mas wekap eli moa long taem we yu stap wekap evri moning. Ol 17,000 memba blong famle blong Betel raonabaot long wol oli girap eli long evri moning, blong tokbaot vas blong dei tugeta. I tru se blong wekap eli, yu mas mekem plan blong go slip long wan taem we i stret long naet, olsem ya bambae yu slip inaf mo tingting blong yu i kliagud long nekis dei.
6 Sipos yu yu hed blong famle blong yu, tekem disisen blong stanemap wan plan blong famle blong yu i joen long ol tiokratik wok. Sam famle oli ridim Baebol, Yearbook, no sam narafala buk, taem oli spel tugeta afta kakae long sapa. Plante papa mama oli glad blong luk ol pikinini blong olgeta oli gruap gud mo oli kam ol Kristin we oli strong long saed blong trutok. Ol papa mama ya oli talem se wan long ol samting we i givhan long olgeta, hemia kastom blong famle blong joen tugeta wan taem evri wik, long sapa, blong spenem taem tugeta blong tingbaot ol samting long saed blong spirit. Wan papa olsem i talem se: “Mi ting se wan samting we i rili halpem ol pikinini blong mifala blong kam bigman long saed blong spirit, hemia famle stadi we mifala i mekem long sapa, evri Wenesde, we mifala i statem samwe long 30 yia finis nao.” Trifala pikinini blong hem oli tekem baptaes taem oli yangfala yet, mo biaen, trifala i joen long fultaem minista wok. Antap long famle stadi, ating famle blong yu i save lukluk bakegen sam haf blong miting, no sam fastok we yufala i save yusum long wok blong prij, no yufala i save mekem sam narafala samting tugeta, we oli leftemap tingting blong yufala.
7 ?Yu yu ‘pemaot taem’ long program blong yu evri wik, blong joen long wok blong talemaot Kingdom? (Kol. 4:5) Bighaf long yumi oli bisi long laef, oli mas lukaot long famle blong olgeta mo oli gat sam responsabiliti long kongregesen. Sipos yumi no mekem wan gudfala plan blong joen evri wik long wok blong prij mo blong tijim man, bambae i isi nomo long ol narafala samting blong tekem ples blong impoten wok ya. Wan Kristin brata we i gat wan bigfala plantesin wetem plante buluk i talem se: “Raonabaot long 1944, mi luksave se, sipos mi wantem joen long wok blong prij, mi mas mekem disisen blong jusum wan dei blong joen long wok ya. Stat long taem ya i kam kasem naoia, mi gohed blong spel wan dei evri wik, blong joen long minista wok.” Wan Kristin elda i faenem se fasin blong mekem wan gudfala program blong joen long minista wok i givim jans long hem blong prij 15 aoa evri manis. Sipos hem i gat sam wok blong mekem long Sarede, hem i tekem disisen blong prij fastaem long moning, mo blong mekem wok blong hem biaen. ?Yu mo famle blong yu, yufala i save mekem plan blong joen wan dei evri wik long wok blong prij, blong mekem se wok ya i kam wan haf blong laef blong yufala long saed blong spirit?—Fil. 3:16.
8 Luklukgud Long Program We Yu Folem Oltaem Long Laef Blong Yu: I gat sam samting we oli save blokem yumi blong mekem laef blong yumi i stanap long wok blong Jeova. Sam samting we yumi no bin tingting long olgeta oli save kamaot. Ol samting ya oli save spolem gudfala plan blong yumi blong stadi Baebol, go long ol miting mo joen long wok blong prij. Mo enemi blong yumi, Setan, bambae i mekem olgeta samting we hem i save mekem blong ‘blokem rod blong yumi’ mo blong spolem ol plan blong yumi. (1 Tes. 2:18; Efes. 6:12, 13) Yu no mas letem tingting blong yu i foldaon from ol trabol ya, mo yu no mas lego. Yu mas mekem olgeta samting we yu save mekem blong folem tiokratik program blong yu. Yu mas stanap strong mo gat strong tingting blong gohed blong mekem ol samting we oli rili save karem blesing long yu.
9 Yumi no mas letem paoa blong wol mo ol slak fasin blong bodi blong yumi we i gat sin, oli pulum yumi blong stap bisi tumas long plante kaen wok we oli no joen wetem ol samting long saed blong spirit. I gud yumi luklukgud long laef blong yumi, mo yumi askem sam kwestin olsem: ‘?Mi mi letem wol i pulum laef blong mi sloslou i go long wan rod we i no stretgud mo we i no moa folem Kristin plan blong mi? ?Mi mi stat blong mekem laef blong mi i stanap long ol samting blong wol ya we bambae i lus? (1 Jon 2:15-17) ?Mi mi spenem hamas taem long ol prapa bisnes blong mi, long ol trep blong holide, long spot, mo long ol narafala pleplei, olsem wajem televisin? ?Taem we mi spenem blong mekem ol samting ya i bitim taem we mi yusum blong mekem sam samting long saed blong spirit?’
10 Sipos yu luksave se yu stap mekem fulap samting we oli no rili impoten long laef blong yu, ?yu save mekem wanem? Pol i prea se ol Kristin brata blong hem oli “save kam stret gud olgeta,” no oli “stat blong folem stret rod.” ?From wanem yu no prea long Jeova blong i halpem yu blong putum wok blong hem i stap bakegen long stamba ples long laef blong yu? (2 Kor. 13:9, 11, NW, ftn.) Ale, yu mas gat strong tingting blong laef folem disisen blong yu, mo blong jenisim ol samting we oli no stret. (1 Kor. 9:26, 27) Jeova bambae i givhan long yu blong yu no gowe long lefsaed no long raetsaed be yu gohed blong obei long hem mo mekem wok blong hem.—Skelem wetem Aesea 30:20, 21.
11 Stap Bisi Long Wok Blong God We i Karem Glad: Plante milyan man oli spenem ful paoa blong olgeta blong faenem glad. Be long en blong laef blong olgeta, oli kasem save se ol samting blong wol ya we oli traehad blong kasem, oli no karem trufala glad long olgeta. Oli bin “resis olbaot nomo.” (Pri. 2:11) Long defren fasin, taem yumi mekem laef blong yumi i stanap long wok blong Jeova ‘yumi putum hem oltaem long fored blong yumi,’ bambae yumi harem se laef blong yumi i gat mining. (Ol Sam 16:8, 11) Yumi harem olsemia from we Jeova hem wan, hem i stamba risen blong laef blong yumi. (Rev. 4:11) Hem i Bigfala Man blong Mekem Promes i Kamtru, taswe sipos hem i no stap, bambae laef i no gat mining nating. Taem yumi mekem wil blong Jeova, laef blong yumi i bisi long wan wok we i karem frut, we i gat mining. Wok ya i save karem bigfala blesing long yumi mo long ol narafala tu, yes, hem i save karem blesing we i stap blong olwe.
12 Yumi mas lukaot long fasin blong harem gud nomo long wanem kaen laef we yumi gat, nao yumi no moa tingbaot se smoltaem nomo i stap bifo we wol blong Setan i lus. Fasin blong yumi blong tingbaot fiuja i gat paoa long evridei laef blong yumi. Ol man long taem blong Noa, we oli no bilif se bambae Bigfala Wota i kavremap wol, “oli no save se bambae trabol i kam,” mo oli mekem laef blong olgeta i stanap long ol prapa bisnes blong olgeta. Oli stap kakae, oli stap dring, oli stap mekem mared, gogo wota i “ron bigwan, i tekemaot olgeta.” (Mat. 24:37-39) Tede, plante man oli mekem wol ya i impoten tumas long laef blong olgeta, be bambae ol plan blong olgeta oli lus, mo olgeta tu bambae oli lus long “dei blong Jeova,” taem ya we bambae Jeova i spolem wol long wan fasin we man i neva luk bifo.—2 Pita 3:10-12.
13 Taswe, yu mas gohed blong mekem laef blong yu i stap strong long Jeova, God ya we i laef, mo gohed blong mekem wok blong hem. Olgeta samting we yu save putumgud i stap long laef blong naoia, oli no save karem plante blesing i kam long yu long fiuja. Jeova nomo i save mekem samting ya from we hem i Bigfala man ya we yu rili save trastem. Hem i no save giaman, bambae hem i mekem olgeta promes blong hem oli kamtru. (Taet. 1:2) Hem i no save ded samtaem, taswe ol samting we yumi putum long han blong hem, bambae oli neva lus. (Hab. 1:12; 2 Tim. 1:12) !Laef we yumi stap bildim naoia, we i stanap long fasin obei mo bilif, hemia stat nomo blong laef ya we bambae i gohed gogo i no save finis long wok blong hapi God blong yumi!—1 Tim. 1:11; 6:19.
[Tok]
“Trutok i no wan haf blong laef blong yumi. Trutok, hemia laef blong yumi. Olgeta narafala samting oli kam biaen long trutok.”