?From Wanem Oli Mekem Ol Miting?

EVRI yia, ol Wetnes blong Jeova long olgeta ples blong wol oli hivap long ol asembli, plante taosen wantaem. Long ples ya, oli haremgud long kampani blong ol narafala Wetnes, mo oli lesin long ol nambawan tok we i tijim olgeta long saed blong Baebol. Sam long olgeta oli hadwok tumas blong go long ol asembli ya. Eksampel, las yia, long Malawi, wan man mo woman we tufala i gat bitim 60 yia, wetem boe blong tufala mo waef mo bebi blong hem, oli ron 80 kilomita long baskel blong go long wan asembli. Oli aot long velej blong olgeta long 6 klok long moning, mo 15 haoa biaen, oli kasem ples blong asembli.

Long Mosambik, wan grup i ron long baskel blong tri dei blong go long wan asembli. Wan naet, taem oli stap slip long open ples, oli harem ol laeon oli singaot i no longwe long olgeta. Oli sakem faeawud i go long ol laeon, be oli stap kolosap gogo i brok delaet. Wan narafala Wetnes we i stap go long semfala asembli ya, i sek long wan laeon we i kamaot stret long fored blong hem long rod. Hem i stanap i stap we i no muvmuf nating, gogo laeon ya i wokbaot i gowe. Long asembli ya, ol Wetnes ya oli talem wetem glad olsem wanem God i ‘tekemaot olgeta long maot blong laeon stret.’​—2 Timote 4:​17.

Plante Wetnes blong Jeova oli hadwok blong go long ol asembli mo long ol miting blong kongregesen evri wik, blong wosip long God. ?From wanem? Ol tok we oli kam biaen, bambae oli givhan long yu blong kasem save from wanem ol miting ya oli impoten.