?Yumi Slef Blong Ol Man No Man Blong Wok Blong God?

WAN buk long Jemani we nem blong hem Seher, Grübler, Enthusiasten (Ol Man blong Drim, Tingting Dip, mo Wok Wetem Strong Tingting), i talem se: “Long sam fasin, i stret blong tinghae long ol Wetnes blong Jeova.” Nating se buk ya i bin toktok nogud long ol Wetnes, hem i talem se: “Bighaf blong olgeta ya, oli gat wan laef we i klin, oli no gat fulap sas samting. Oli wok strong mo tinghevi long wok blong olgeta, oli ol kwaet man mo oli pem takis blong olgeta oltaem. Oli no traehad blong kasem fulap mane. . . . Yumi save toktokgud nomo long saed blong olgeta from stret fasin we oli folem long ol asembli blong olgeta. Tingting blong olgeta blong lego samting we olgeta nomo oli wantem blong mekem wok blong God, i sem mak long ol narafala jyos. Be, long saed blong wok blong prij we oli mekem, oli bitim ol narafala jyos. Samting we i mekem se olgeta ya oli hae moa long olgeta narafala Kristin jyos mo grup tede, hemia strong tingting we oli gat blong talemaot ol tijing blong olgeta long evri ples, nomata wanem denja i stap.”a

Nating se oli talem ol gudfala tok olsem taem oli skelem ol Wetnes blong Jeova, be i gat sam man we oli tokbaot ol Wetnes blong Jeova long fasin we i defren olgeta. Long bighaf blong ol kantri blong wol, ol Wetnes oli wosip long klia ples we i no gat man i traem stopem olgeta. Plante milyan man oli save olgeta, oli respektem olgeta, mo oli agri se olgeta ya oli gat raet blong wosip olsem oli wantem. Taswe, ?from wanem i gat sam man we tingting blong olgeta i no kliagud yet se hu ya ol Wetnes blong Jeova?

Ating wan risen blong samting ya, hemia from we long ol yia we oli jes pas, plante skul oli bin mekem ol rabis fasin, olsem fasin blong mekem i nogud long saed blong seks wetem pikinini, pulum plante man wantaem blong kilim olgeta i ded bakegen, mo joen long ol rabis wok blong ol teroris.b I tru se, ol fasin ya we oli longwe tumas long stret fasin, oli no kamaot nomo long ol man we oli strong blong folem skul. Ol fasin ya oli stap long evri ples. Be, long saed blong skul, plante man oli stat gat tingting we i hafhaf, mo samfala oli agensem ol skul stret.

Denja We i Kamaot Taem Yumi Folem Man

Mining blong wan smol krangke grup blong skul (sect), hemia “wan grup blong man we oli strong blong folem wan stampa tijing nomo, no wan lida.” Long sem fasin, ol man we oli joen long wan “cult” oli “givim bigfala ona long wan man, wan tingting, no wan samting.” Yes, ol memba blong enikaen skul we oli strong blong folem ol man olsem lida blong olgeta, wetem ol tingting blong ol man ya, oli stap long denja from we oli save kam slef blong ol man ya. Taem wan grup blong man i strong blong folem wan lida, oli save dipen tumas long lida ya blong haremgud long filing blong olgeta, mo long saed blong wosip. Denja ya i save kam nogud moa sipos wan man i gruap long wan skul olsemia stat taem hem i pikinini.

Ol man we oli gat sam kwestin long saed blong wan skul, oli nidim ol trufala ansa. Samfala oli bin harem tok ya se skul blong ol Wetnes i mekem ol memba blong hem oli slef nomo, i bos strong long laef blong olgeta, i blokem fasin fri blong olgeta, mo i mekem se oli no save joengud wetem ol narafala man.

Ol Wetnes blong Jeova oli save se ol tok olsem oli no tru. Taswe, oli askem long yu blong lukluk moa long bisnes ya, nao biaen yu save jajem yu wan. ?Ol Wetnes oli rili ol man blong wok blong God, olsem we oli talem, no oli ol slef blong man nomo? ?Wanem stampa blong paoa blong olgeta? Ol save long pej 12 kasem 23, bambae i givim ol stret ansa long ol kwestin ya.

[Ol futnot]