Tikikas Wan Man Blong Wok We Ol Narafala Oli Trastemgud

PLANTE taem, Tikikas i wokbaot wetem aposol Pol, mo i wok olsem man blong karem mesej blong hem. Hem i wan man blong wok we Pol i trastemgud blong i lukaot long mane, no blong lukaot long wan grup. Baebol i soemaot se ol man oli save trastem Tikikas​—hemia wan fasin we i impoten tumas long olgeta Kristin. Taswe, i sua se yu wantem save moa long saed blong man ya.

Pol i tokbaot Tikikas, i se: “Hem i wan brata blong yumi, we mi mi laekem hem tumas. Oltaem hem i strong blong givhan long mi, mo hem i joen long mi blong mekem ol wok blong Masta blong yumi.” (Kolosi 4:7) ?From wanem aposol Pol i tinghae long Tikikas olsem ya?

Wok Blong Givhan Long Jerusalem

Raonabaot long 55 K.T., ol Kristin blong Judia oli gat hadtaem blong kasem samting we oli nidim blong laef. Pol i lidim wok blong hivimap ol presen mane blong givhan long olgeta ya, wetem help blong ol kongregesen blong Yurop mo Esia Maena. Tikikas, we i wan man Esia, i joen long wok ya blong givhan long ol Kristin blong Jerusalem.

Pol i eksplenem olsem wanem oli mas hivimap ol presen ya. Hem i talem long ol brata blong jusum sam man we oli save trastem blong sanem olgeta i go long Jerusalem, no blong letem oli go wetem Pol, blong karem ol presen mane ya we bambae oli hivimap. (1 Korin 16:​1-4) Taem Pol i mekem longfala trep ya, i stat long Gris i go kasem Jerusalem, plante man oli folem hem, mo i luk olsem se Tikikas, i wan blong olgeta ya tu. (Ol Wok 20:4) Ating oli nidim plante man olsem from we oli stap karem mane we plante kongregesen oli givim long olgeta. I impoten blong stap plante tu, from we ol man blong stil oli mekem se ol rod oli no sef.​—Korin 11:26.

Aristakas mo Trofimas oli go long Jerusalem wetem Pol. From samting ya, sam man oli ting se Tikikas mo ol narafala tu oli bin folem Pol. (Ol Wok 21:​29; 24:17; 27:​1, 2) Tikikas i joen long wok ya blong givhan long ol Kristin blong Judia. Taswe ating hem nao i “brata” ya we i wok wetem Taetas long Gris blong hivimap presen ya, mo hem i ‘man ya we ol kongregesen oli jusumaot hem blong wokbaot wetem [Pol] blong karem presen ya we ol brata oli givim long gladhat blong olgeta.’ (2 Korin 8:​18, 19; 12:18) Faswan wok ya we oli givim long Tikikas i wan bigfala responsabiliti, be namba tu wok we hem i kasem i impoten tumas tu.

Stat Long Rom Go Kasem Kolosi

Faef no sikis yia biaen, (60-​61 K.T.),a hemia fastaem we Pol i stap kalabus long Rom, mo hem i hop se bambae i no longtaem, hem i save kam fri. Tikikas i bin stap wetem hem, plante handred kilomita longwe long kantri blong hem. Naoia, Tikikas i rere blong gobak long Esia. Samting ya i givim jans long Pol blong sanem sam leta i go long ol Kristin kongregesen blong ples ya, mo tu blong sanem Onesimas, wan slef we i ronwe, i gobak long masta blong hem, Faelimon, long Kolosi. Tikikas mo Onesimas oli karem tri leta we naoia oli stap long Baebol​—wan i go long ol man Efesas, wan i go long ol man Kolosi, mo wan i go long Faelimon. Ating oli karem wan leta i go long kongregesen blong Laodisia tu, wan taon we i stap 18 kilomita longwe long Kolosi.​—Efesas 6:​21; Kolosi 4:​7-9, 16; Faelimon 10-​12.

Tikikas i no wan man blong karem leta nomo. Hem i wan man blong karem mesej we ol man oli trastem, from we Pol i raetem se: “Bambae Tikikas i talemaot long yufala ol nyus blong mi. Hem i wan brata blong yumi, we mi mi laekem hem tumas. Oltaem hem i strong blong givhan long mi, mo hem i joen long mi blong mekem ol wok blong Masta blong yumi. Mi sanem i go long yufala, blong samting ya nomo, blong hem i mekem yufala i harem gud, from we hem bambae i talemaot ol nyus blong mifala long yufala.”​—Kolosi 4:​7, 8.

Man ya we i gat hae save, E. Randolph Richards, i soem se “plante taem, i olsem se man we i karem leta, i joenem man we i raetem leta ya wetem hemia we i kasem leta. . . . I impoten se ol man oli trastemgud man we i karem leta from we plante taem hem i karem sam moa nyus antap long wanem we i stap long leta ya. Maet man we i raetem i tokbaot wan samting wetem smol tok nomo, we oli soem prapa tingting blong hem. Be hem i wantem se man we i karem leta i talem long olgeta we bambae oli ridim, plante moa smosmol samting we oli joen wetem leta ya.” Yes, ating wan leta i tokbaot sam tijing, no sam samting we oli impoten tumas, ale, wan man blong karem leta we ol narafala oli trastemgud i save toktok mo eksplenem plante narafala samting.

Ol leta we oli go long ol man Efesas, Kolosi, mo long Faelimon, oli no talem plante samting long saed blong Pol. Taswe Tikikas i mas givim sam nyus hem wan. Hem i mas talem se Pol i olsem wanem, mo tu, hem i mas luksave sipos ol kongregesen we hem i visitim oli gat sam trabol, blong hem i save leftemap tingting blong olgeta. Man we i sanem leta i no givim ol impoten mesej mo responsabiliti olsemia long enikaen man nomo. Hem i sanem wan man we hem i rili save trastemgud. Tikikas i wan man olsem.

Wok Blong Lukaot Long Sam Teritori Longwe

Afta we Pol i kam fri long kalabus long Rom, hem i tingbaot blong sanem Tikikas no Atemas, blong givhan long Taetas long aelan blong Krit. (Taetas 1:5; 3:​12) Long namba tu taem we Pol i kalabus long Rom (raonabaot long 65 K.T.), hem i sanem Tikikas bakegen i go long Efesas, ating blong tekem ples blong Timote. Olsemia Timote i save kam stap wetem Pol, long Rom.​—2 Timote 4:​9, 12.

Baebol i no talem klia sipos Tikikas i go long Krit mo long Efesas tu long taem ya. Be ol vas olsem oli soem se Tikikas i wan long olgeta we oli wok kolosap long aposol Pol go kasem ol laswan yia blong wok blong hem. Pol i tingbaot Tikikas blong tekem ples blong Timote mo Taetas blong kasem responsabiliti mo mekem sam wok we oli no isi. Taswe i klia se Tikikas i bin kam wan Kristin elda we i bigman long saed blong speret. (Skelem wetem 1 Timote 1:3; Taetas 1:​10-​13.) From we hem i rere oltaem blong wokbaot mo blong wok long ol teritori longwe, hem i givhan bigwan long Pol mo long fulwan Kristin kongregesen.

Tede, plante Kristin we oli lego samting we olgeta nomo i wantem, oli glad blong mekem wok blong God long ol kongregesen blong ol Wetnes blong Jeova, no oli rere blong go long ol narafala ples blong sapotem wok blong Kingdom. Plante taosen oli glad blong mekem wok blong misinari, seket elda, no blong bildim ol Betel mo Haos Kingdom, blong wok long hedkwota no long wan branj blong Watch Tower Society. Olsem Tikikas, oli no gat flas tingting, be oli wok strong, mo oli ‘ol man blong wok we oli stap tru.’ God i haremgud tumas long olgeta ya, mo ol narafala Kristin oli laekem olgeta olsem ol ‘man blong mekem wok blong Masta, we ol narafala oli trastemgud.’

[Futnot]