Yusumgud Laef Blong Yu
PAPA i stap slip long bed blong hem insaed long haos. Hem i sik tumas from kansa. Pikinini boe blong hem i stap long woksap, i stap klinim ples mo putumgud ol tul blong wok blong papa blong hem. Taem boe ya i stap pikimap ol tul, hem i tingbaot ol nambawan wok we papa blong hem i bin mekem wetem ol tul ya. Nating se woksap i stap kolosap nomo long haos, boe ya i save se papa blong hem bambae i neva kam insaed long woksap ya bakegen. Papa ya bambae i no moa save holem ol tul ya we fastaem hem i gat gudhan blong yusum. Taem blong hem i finis nao.
Boe ya i tingbaot Eklesiastis 9:10, we i talem se: “Olgeta samting we han blong yu i save mekem, i gud yu mekem wetem paoa blong yu. From we i no gat wok no plan no save no waes long Seol [beregraon], ples ya we bambae yu yu go long hem.” Hem i savegud vas ya. Hem i bin yusum vas ya plante taem blong tijim trutok ya blong Baebol long narafala se man we i ded, hem i no save mekem wan samting. Be, naoia paoa blong tok we Solomon i talem, i kasem hat blong hem. Hem i luksave, se yumi mas yusumgud laef blong yumi mo harem gud long olgeta dei we yumi laef, from we bambae taem i kam we yumi no moa save mekem olsem.
Haremgud Long Laef
Long fulwan buk blong Eklesiastis, waes King Solomon i pulum ol man we oli ridim tok blong hem blong oli harem gud long laef. Eksampel, long japta 3 hem i talem se: “Mi mi luksave se i no gat wan samting i moagud i bitim we man i harem gud mo i mekem ol gudfala samting long laef blong hem. Mo tu, olgeta man wanwan oli mas kakae mo dring, mo luk gudfala frut blong ol hadwok blong olgeta. Hemia wan presen we God i givim.”—Eklesiastis 3:12, 13.
Tabu speret blong God i pulum Solomon blong talem bakegen tingting ya se: “Mi mi luksave se nambawan samting we man i save mekem, i blong hem i gohed nomo, i stap kakae mo i stap dring, mo i stap glad long ol samting ya we i stap hadwok long hem long sotfala laef ya we God i givim long hem. Hemia nao rod blong laef blong yumi.”—Eklesiastis 5:18.
Long sem fasin, hem i givim advaes long ol yangfala se: “Yangfala man [no, yangfala woman] yu mas harem gud long yang taem blong yu. Mo yu mas letem hat blong yu i mekem i gud long yu long ol yia we yu yu yangfala yet.” (Eklesiastis 11:9a) !I gud tumas blong harem gud mo blong yusum fulwan paoa we yu gat taem yu yangfala!—Proveb 20:29.
‘Tingbaot Man We i Wokem Yu’
I tru, Solomon i no minim se i waes blong ronem evri samting we hat mo ae blong yumi i laekem. Nogat. (Skelem wetem 1 Jon 2:16.) Samting ya i klia long tok we hem i raetem biaen se: “Be yufala i mas tingbaot tu we bambae God i jajem yufala from ol samting ya we yufala i mekem [blong harem gud].” (Eklesiastis 11:9b) Nomata hamas yia yumi gat, yumi mas rimemba se God i stap lukluk olgeta samting we yumi mekem long laef blong yumi, mo bambae hem i jajem yumi folem olgeta samting ya.
!I no waes nating blong gat tingting ya se yumi save ronem ol samting we yumi wantem fastaem, ale biaen, taem yumi kam olfala lelebet bambae yumi jes mekem wok blong God! Tingbaot, yumi save lusum laef blong yumi enitaem nomo. Mo nating sipos i no hapen olsem, be taem yumi kam olfala i hadwok moa blong mekem wok blong God. Solomon i luksave samting ya, taswe hem i raetem se: “Yu mas tingbaot Bigfala Man ya we i wokem yu. Yu mas tingbaot hem taem yu yu yang yet, bifo we ol trabol taem oli kam, mo ol yia oli kamtru we bambae yu talem se: ‘Mi no glad nating long laef ya.’ ”—Eklesiastis 12:1.
Naoia, trabol blong olfala i kam. Solomon i yusum sam pijatok blong soemaot wanem i kamaot taem man i kam olfala. Ol han oli seksek, ol leg oli kam slak, mo ol tut oli no moa plante. Hea i kam waet mo i folfoldaon. Man i no moa save slipgud. Smol noes nomo blong wan pijin i mekem hem i wekap. Hem i no moa save luklukgud, harem, filim, smelem, mo testem ol samting olsem fastaem. From we bodi blong hem i kam slak, hem i fraet se bambae hem i foldaon, mo i “fraet” tu se maet wan narafala samting i save hapen long hem long ol pablik rod. Biaen, man ya i ded.—Eklesiastis 12:2-7.
Ol olfala we oli no bin ‘tingbaot Bigfala Man ya we i wokem olgeta’ taem oli yangfala yet, oli harem nogud moa. From we olgeta ya oli no bin yusumgud laef blong olgeta, oli ‘no glad nating’ taem oli kam olfala. Mo tu, wan man we i no tingbaot God nating long laef blong hem, maet i save gat moa problem mo i harem i soa moa long bodi blong hem taem hem i olfala. (Proveb 5:3-11) Sore tumas, taem olgeta ya oli tingting long fyuja blong olgeta, oli tingbaot beregraon nomo.
Stap Glad Taem Yu Kam Olfala
Samting ya i no minim se ol olfala oli no save harem gud long laef. Baebol i talem se, ol tok ya “plante dei mo yia blong laef mo pis” oli olsem wan blesing we God i givim long man. (Proveb 3:1, 2) Jeova i talem long fren blong hem Ebraham se: “Yu bambae yu save stap longtaem, gogo kasem we yu olfala gud, nao bambae yu ded we tingting blong yu i stap kwaet.” (Jenesis 15:15) I tru, man i no harem gud taem hem i kam olfala. Nating se i olsem, tingting blong Ebraham i gat pis mo i stap kwaet taem hem i kam olfala. Hem i haremgud tumas from we hem i bin yusum laef blong hem blong mekem wok blong Jeova. Mo tu, hem i stap wet wetem bilif blong luk “taon we faondesen blong hem i save stap oltaem nomo,” hemia Kingdom blong God. (Hibrus 11:10) Taswe, “hem i gat gudfala laef, mo taem hem i ded, hem i olfala we i olfala.”—Jenesis 25:8.
From samting ya, Solomon i talem long yumi se: “Sipos wan man i mas laef plante yia, man ya i mas harem gud long olgeta yia ya.” (Eklesiastis 11:8) Nating sipos yumi yangfala no olfala, yumi save kasem trufala glad taem yumi frengud wetem God.
Taem yangfala man ya long woksap i stap putumgud ol tul blong papa blong hem, hem i tingbaot ol samting ya. Hem i tingbaot ol man we hem save olgeta, we oli stap traehad blong harem gud long laef be oli no faenem glad from we oli no gat gudfala fasin fren wetem Man ya we i Wokem olgeta. !Yes, afta we Solomon i pulum yumi blong harem gud long laef, i stret nomo we hem i finisim tok blong hem olsem se: “Taem mi skelem olgeta samting finis, mi mi luksave se: Man i mas fraetgud long trufala God mo folem ol loa blong hem. Hemia nao bigfala wok we man i mas mekem”!—Eklesiastis 12:13.