Prija 3:11—“Evri Samting We Hem i Bin Mekem Oli Naes Long Taem Blong Olgeta”

“Evri samting we hem i bin mekem oli naes long taem blong olgeta. Mo tu, hem i putum laef we i no save finis long hat blong olgeta, be nating se i olsem, ol man bambae oli neva faenemaot olgeta wok we tru God i bin mekem, long stat blong olgeta go kasem en blong olgeta.”—Prija 3:11, Niu Wol Translesen.

“Hem i mekem evri samting oli naes long taem blong olgeta. Mo tu hem i putum laef we i no save finis long hat blong olgeta; be yet i no gat wan man i save faenemaot samting we God i bin mekem long stat kasem en.”—Prija 3:11, New International Version.

Mining blong Prija 3:11

“Evri samting we Hem i bin mekem oli naes long taem blong olgeta.” Hibru tok we oli tanem i kam “naes” i no minim nomo wan samting we i luk naes. I save givim tingting ya tu se “stap long oda,” “folem,” o “stret.” (Prija 3:11, futnot) Ol naesfala wok blong God i no olgeta samting nomo we hem i krietem, be i save minim tu samting we hem i mekem blong mekem stamba tingting blong hem i kamtru.—Daniel 2:21; 2 Pita 3:8; Revelesen 4:11.

“Mo tu hem i putum laef we i no save finis long hat blong olgeta.” God i wokem ol man blong oli laef olwe. (Ol Sam 37:29) Mo tu, hem i putum tingting ya we man i wantem tumas blong laef olwe. Nating se i olsem, faswan kapol ya, Adam mo Iv i no obei, from samting ya, tufala mo ol pikinini we oli kamaot biaen long tufala oli stap ded. (Jenesis 3:17-19; Rom 5:12) Be yet, God i promes blong “givim samting we olgeta laef samting oli wantem tumas,” hemia i minim tu tingting ya we man i wantem blong laef olwe. (Ol Sam 145:16) Baebol i eksplenem olsem wanem Jehova i mekem se ol man oli save kasem bakegen nambawan laef ya blong olwe.—Rom 6:23.

“Ol man bambae oli neva faenemaot olgeta wok we tru God i bin mekem, long stat blong olgeta go kasem en blong olgeta.” Waes blong God i dip tumas mo i bigwan tumas mo Baebol i talem se “man i no naf blong kasemsave (Rom 11:33) Nating se i olsem, God i glad blong talemaot ol plan blong hem long ol man we oli wantem mekem hem i glad.—Amos 3:7.

Ol vas raonabaot long Prija 3:11

King Solomon we i king blong Isrel bifo i raetem buk blong Prija, ol man oli savegud hem from waes we God i givim long hem. Buk ya i fulap long ol gudfala advaes long saed blong wanem samting i rili impoten long laef mo ol samting we oli nating nomo. (Prija 1:2, 3; 2:1, 17; 7:1; 12:1, 13) Long japta 3, Solomon i tokbaot sam nomol samting we oli stap hapen long laef blong man. Hem i tokbaot ol defren samting we oli mekem mo ol wok blong olgeta. (Prija 3:1-8, 10) God i mekem se ol man oli fri blong jusum wanem kaen samting nao oli wantem mekem mo wetaem blong mekem. (Dutronome 30:19, 20; Josua 24:15) Solomon i eksplenem se taem man i mekem samting we God i wantem mo i respektem “stret taem” we God i makemaot, bambae hem i enjoem ol gudfala frut blong ol hadwok blong hem. Solomon i talem se hemia “ol presen we i kam long God.”—Prija 3:1, 12, 13.

Wajem sot video ya blong luk wanem we buk blong Prija i tokbaot.