Ripot Long Wok Blong Kingdom

Wan Man We Bifo i Agensem Ol Witnes, i Lanem Trutok

OL NIUSPEPA mo televisin oli talem plante samting long saed blong faet we i kamaot bitwin defren pati long Laeberia. Plante taosen man oli ded mo plante handred taosen oli mas muf i go long wan narafala ples. Nating se laef i strong tumas olsemia, plante man we hat blong olgeta i stret oli gohed blong akseptem trutok, olsem stori ya biaen i soemaot.

James i skul long Luteran Jos stat long taem we hem i gat 10 yia. Biaen, hem i kam maneja blong niuspepa blong jos ya, mo hem i yusum wok blong hem blong raetem sam haf agensem ol Witnes blong Jeova, nating se hem i neva mitim wan long olgeta.

Biaen, James i lego wok blong raetem sam haf long niuspepa blong jos ya, mo hem i kam bos blong wan nambawan hotel we plante man i kam long hem. Wan dei we hem i stap sidaon long rum blong welkam blong hotel blong hem, tu sista we oli dresap gud oli kam luk hem. Taem hem i luk tufala sista ya we oli gat sam gudfala klos, hem i singaot tufala. Be taem oli talem from wanem oli kam, hem i talem se: “Mi mi bisi tumas blong toktok.” Ol Witnes oli tokbaot sabskripsen long Wajtaoa mo Wekap!, mo hem i akseptem, jes from we hem i wantem se ol sista oli lego hem. Long 12 manis, hem i kasem ol magasin, be hem i neva openem wan. Evritaem we hem i kasem wan magasin, wantaem nomo hem i putum hem i go long wan plastik bag.

Faet i kam strong tumas long kantri ya, taswe James i putum sam mane mo sam sas samting long wan bag, blong stap rere blong ronwe sipos sam man oli agensem hem. Wan moning, wan hanbom i faerap long fored blong doa, biaen haos blong hem. Wantaem nomo, hem i fraetgud, hem i tekem bag blong hem mo hem i ronwe blong sevem laef blong hem. Hem i joen long plante taosen man we oli ronwe tu, mo hem i mas pastru long plante ples we ol soldia oli blokem rod blong jekem olgeta man we oli pas. Long ol ples ya, ol soldia oli stilim mo oli kilim i ded plante man, nating se ol man ya oli no mekem eni rong samting.

Taem James i kasem faswan ples we oli soldia oli stap gad, ol soldia oli askem sam kwestin long hem mo oli talem long hem blong openem bag blong hem. James i openem bag blong hem, mo taem hem i luk insaed, hem i sek we i sek. Hem i harem nogud tumas blong luk se bag ya we hem i karem i no bag we hem i mekem rere wetem ol sas samting insaed. From we hem i fraet tumas, hem i mestem mo hem i tekem bag ya we hem i bin putum insaed olgeta Wajtaoa mo Wekap! we hem i no openem yet. Be taem soldia i luk ol magasin mo i ridim nem blong James long pepa blong sabskripsen, hem i talem se: “Oh, yu yu wan Witnes blong Jeova. Mifala i no stap lukaotem yufala ol Witnes, mifala i save se yufala i no giaman.” Soldia i tekemaot sam magasin long bag, mo hem i talem long James blong gohed long rod blong hem.

Sem samting nomo i kamaot long naen ples we ol soldia oli stap gad, from we evri jif blong gad oli tingting se James i wan Witnes blong Jeova, mo oli neva kilim hem, oli letem hem i pas nomo. Naoia, Jemes i rili haremgud se hem i no karem ol sas samting blong hem, from we hem i sua se sipos hem i gat ol samting ya, ol soldia bambae oli kilim hem i ded, olsem olgeta man ya we hem i luk se oli ded.

Biaen hem i kasem laswan ples we ol soldia oli gad, wan ples we plante man oli fraet tumas long hem. Long ples ya, hem i harem nogud bitim mak blong luk plante tumas bodi blong ol dedman we oli stap olbaot long graon. Hem i fraet we i fraet, ale hem i singaot nem blong Jeova. Hem i prea, hem i talem se sipos Jeova i halpem hem blong pas tru long ples ya we plante man oli ded long hem, bambae hem i mekem wok blong God gogo kasem en blong laef hem.

James i givim bag blong hem long ol soldia, mo taem ya bakegen, ol soldia oli talem se: “Mifala i no stap lukaotem ol man ya.” Oli luk James mo oli talem se: “I gat wan long ol brata blong yu we i stap daon long hil ya. Yu go, mo yu stap wetem hem.” Long taem ya, James i jenisim fulwan tingting blong hem long saed blong ol Witnes blong Jeova. Wantaem nomo hem i joen brata ya, mo oli mekem plan blong stadi Baebol wetem buk ya Yu Save Laef Foreva Long Paradaes Long Wol.a

Smol dei biaen, faet i fosem hem blong ronwe long ples ya. Long taem ya, James i ron long bus, mo hem i karem wan samting nomo we hem i holemtaet, !hemia buk ya Laef Foreva! Long 11 manis, hem i stap longwe long ol Witnes, ale, faef taem hem i stadi hem wan fulwan buk blong hem. Biaen, taem hem i kam naf blong kambak long taon, hem i stadi Baebol bakegen wetem ol Witnes, mo hem i gru kwiktaem long saed blong spirit. Smoltaem biaen, hem i tekem baptaes, mo nao hem i stanap strong mo hem i wok wetem ol Kristin brata blong hem.

[Futnot]