?Yu Yu Gat Wan Oda Blong Magasin?
1 ?Yu yu go long miting blong prij samtaem mo biaen yu faenem se yu no gat magasin long basket blong prij blong yu? Tingbaot wan haf long Kingdom Wok blong Yumi blong Septemba 1995, we nem blong hem “Yusumgud Ol Magasin Blong Yumi.” Hem i talem se “yumi mas odarem wan stret namba blong ol magasin.” Mo i talem tu se: “Putum wan oda wetem brata we i lukaot long magasin, blong kasem wan stret namba blong ol magasin. Long rod ya, yu mo famle blong yu bambae yufala i gat naf magasin oltaem.” ?Yu mekem samting ya finis?
2 I gud yu putum oda blong wan stret namba blong ol magasin we yu wantem. Samting ya bambae i pusum yu blong tinghevi moa long wok blong seremaot ol magasin evri wik, mo bambae yu kasem moa glad long wok ya. Sipos yu putum oda finis, i gud yu tingting bakegen blong luk sipos yu stap karem i naf magasin we yu nidim evri manis long wok blong prij. Be, yumi mas sua blong karem oda blong yumi evri wik. Hemia responsabiliti blong yumi. Sipos yu gowe long kongregesen blong longtaem lelebet, talem long brata we i lukaot long ol magasin sipos yu wantem se hem i givim ol magasin blong yu long wan narafala go kasem taem yu kambak.
3 Sem haf ya insaed blong Kingdom Wok i talem se “yumi mas makemaot wan dei evri wik blong seremaot ol magasin.” ?Yu yu save joen wetem kongregesen long dei blong seremaot magasin? !Olsem 1999 Calendar of Jehovah’s Witnesses i soem, hemia evri Sarede blong yia! Yumi no mas ting nating long impoten wok ya blong seremaot Wajtaoa mo Wekap! Taem yumi traehad blong joen fulwan long wok blong seremaot ol magasin, yumi stap “karem gud nius blong samting we i moa gud” i go long ol man raonabaot long yumi.—Aes. 52:7, NW.